Read Besoa Roma 8 Bible Online

Roma 8 - Besoa bible

Roma 8

¹Deꞌe-deꞌe, tiꞌara piꞌi ara pehuku i heáná peá tauna to mohintuwuꞌ hai Kerisitu Iesu,

²láwiꞌ ánti pohintuwuꞌtaꞌ hai Kerisitu Iesu, kuasaꞌna Inao to Magasaꞌ mampoweꞌikeꞌ katueꞌ to woꞌu hai mokábáhákeꞌ hangko i kuasaꞌ dósá to moántikeꞌ i kapate.

³Kitaꞌ tiꞌarakeꞌ peisá tekábáhá hangko i kuasaꞌ dósá ánti peuláꞌtaꞌ i Paturoꞌna Musa, láwiꞌ tiꞌara tabuku mampeuláꞌi upu-upu Hawaꞌ iti hangko i róhóntaꞌ haduduántaꞌ. Agáiáná ara to nabábehi Pueꞌ Ala to melumbuꞌ hangko i kuasaꞌna Paturoꞌna Musa. Ia mohuoꞌ ÁnáꞌNa mai i duniáꞌ mewaliꞌ tauna. WátáNa hibali hai wátána tauna to madósá. Hai Pueꞌ Ala mohuku kuasaꞌ dósá moliu kamatena Iesu bona dósá tauna peisá rawehángi.[40]

⁴Tunggáiána Pueꞌ Ala mobábehi iti, bona mewaliꞌkeꞌ tauna to manótó i peitáNa nodo to ratuntu i lalu Paturoꞌna Musa. Tiꞌarapokeꞌ paraluu mouláꞌ peundeꞌána laluntaꞌ haduduántaꞌ, agáiáná peisákeꞌ mouláꞌ peundeꞌána Inao to Magasaꞌ.

⁵Tauna to mouláꞌ peheꞌ peundeꞌána laluraꞌ haduduáraꞌ, mouláꞌ peheꞌ apa to rapekiri i laluraꞌ. Agáiáná tauna to mampekiri hiolaꞌ hai Inaona Pueꞌ Ala, ina mampekiriheꞌ oaꞌ bábehiá to mopagóeꞌ Pueꞌ Ala.

⁶Heáná peá tauna to mopaioru peundeꞌána laluna haduduána, manótó miꞌi kamolámbiꞌna kapate to mogááki hangko i Pueꞌ Ala. Agáiáná heáná peá to mopaioru peundeꞌána Inao to Magasaꞌ, ia miꞌi to mohintuwuꞌ hai Pueꞌ Ala hai molámbiꞌ katueꞌ to maroꞌa.

⁷Tauna to mouláꞌ peundeꞌána laluna haduduána, moewaꞌ Pueꞌ Ala. Tiꞌara mengkoruꞌ i hawaꞌNa, láwiꞌ tiꞌara nabuku.

⁸Tauna to nakuasaꞌi peundeꞌána laluna haduduána, tiꞌara nabuku mobábehi apa to mopagóeꞌ Pueꞌ Ala.

⁹Agáiáná kómu halalu-halalu, tiꞌarapokou mouláꞌ peundeꞌána lalumi haduduámi. Mouláꞌkou peundeꞌána Inao to Magasaꞌ, ane Inaona Pueꞌ Ala iti toꞌu-toꞌu ara i lalumi. Ane tauna to tiꞌara ara Inaona Kerisitu i laluraꞌ, tiꞌaraheꞌ taunána Kerisitu.

¹⁰Agáiáná kómu, ane Kerisitu ara i lalumi, kehapiꞌ wátámi deꞌe mate ánti dósá, ina molámbiꞌkou katueꞌ to woꞌu hangko i Inao to Magasaꞌ, láwiꞌ rapakanótómokou i peitána Pueꞌ Ala.

¹¹Ane Pueꞌ Ala mopatueꞌ huleꞌ Iesu ánti kuasaꞌna Inao to Magasaꞌ, hai Inao to Magasaꞌ iti ara i lalumi, kehapiꞌ mate wátámi, Pueꞌ Ala bateꞌna ina mopatueꞌ huleꞌ woꞌo wátámi moliu kuasaꞌna Inao to Magasaꞌ to ara i lalumi.

¹²Mewaliꞌ halalu-halalu, hangaa-ngaa mouláꞌkeꞌ peundeꞌána Pueꞌ Ala. Tiꞌara piꞌi paraluu nipeuláꞌi peundeꞌána lalumi haduduámi,

¹³láwiꞌ ane nipeuláꞌi peundeꞌána lalumi haduduámi, ina matekou hai ragáákikou hangko i Pueꞌ Ala. Agáiáná ane, ánti kuasaꞌna Inao to Magasaꞌ, nikábáhá bábehiámi to mouláꞌ peundeꞌána lalumi, ina molámbiꞌkou katueꞌ to maroꞌa hingkakani hai Pueꞌ Ala.

¹⁴Heáná peá tauna to napokalei Inaona Pueꞌ Ala, ia miꞌi ánáꞌna Pueꞌ Ala.

¹⁵Hangkoia, napohawiꞌkou dósá, onoꞌ miꞌi haneꞌi mampokalááꞌkou pehukuna Pueꞌ Ala. Agáiáná deꞌe-deꞌe nitarima miꞌi Inao to Magasaꞌ, onoꞌ miꞌi haneꞌi tiꞌarapokou paraluu malááꞌ, láwiꞌ Inao to Magasaꞌ iti to mampopewaliꞌkou ánáꞌna Pueꞌ Ala. Hai ánti pokalena Inao to Magasaꞌ, peisámokeꞌ mekióꞌ “Umaꞌ” i Pueꞌ Ala.

¹⁶Ánti pokalena Inao to Magasaꞌ i laluntaꞌ, taisá ntepuꞌu miꞌi kakitaꞌna ánáꞌna Pueꞌ Ala.

¹⁷Mewaliꞌ, ane napoánáꞌmokeꞌ Pueꞌ Ala, taisá kitaꞌ ina mewaliꞌkeꞌ pueꞌ sosora,[41] hai ina molámbiꞌkeꞌ gáláꞌtaꞌ to napatimama miꞌi Pueꞌ Ala i kitaꞌ ánáꞌNa. Upu-upuna iti talámbiꞌ hingkakani hai Kerisitu, láwiꞌ i duniáꞌ deꞌe, ane kitaꞌ rapopeahiahiꞌ hibali hai Kerisitu, i alo pobutusi ina molámbiꞌkeꞌ woꞌo katueꞌ to meawaꞌ hingkakani hai Iesu.

¹⁸Kuisá ntepuꞌu, upu-upu kapári to talámbiꞌ i duniáꞌ deꞌe-deꞌe, hantóiꞌ mpiiꞌ peá ane tapekiri kana i peawaꞌna katueꞌtaꞌ to ina talámbiꞌ i alo to ina haweꞌ.[42]

¹⁹Deꞌe-deꞌe, upu-upu óntóꞌ duniáꞌ to nabábehi Pueꞌ Ala, mampegiá tempóna Pueꞌ Ala ina mopatongawaꞌ heáná to mewaliꞌ miꞌi ánáꞌNa.

²⁰I pewaliꞌána duniáꞌ, tiꞌara mani ara hakiꞌ, kapate hai kapári, agáiáná ánti dósá tauna, Pueꞌ Ala mohuku duniáꞌ deꞌe, onoꞌ miꞌi haneꞌi handaꞌ ntepuꞌu to merampe. Kehapiꞌ noꞌonoꞌ, ara mani pehárungá bona i hangkani tempó, Pueꞌ Ala ina mokábáhá duniáꞌ deꞌe hangko i kapári to paka mewaliꞌ, hai tahárungá woꞌo duniáꞌ deꞌe ina rapopeawaꞌ hingkakani hai kitaꞌ ánáꞌna Pueꞌ Ala.

²²Halalu-halalu, taisá handaꞌ ntepuꞌu to merampe i duniáꞌ deꞌe. Upu-upu óntóꞌ duniáꞌ deꞌe meraruaꞌ oaꞌ lántuꞌána mani mampegiá tempóna Pueꞌ Ala ina mopawoꞌu upu-upuna. Pantódihána duniáꞌ nodo pantódihána towawine to tangaꞌna humádi.

²³Hai tiꞌara peá duniáꞌ deꞌe to mantódihá kapári. Kitaꞌ woꞌo mantódihákeꞌ i lalu katueꞌtaꞌ, lántuꞌántaꞌ mampegiá tempóna Pueꞌ Ala ina mokábáhá wátántaꞌ hangko i kapate.[43] Mewaliꞌ iti tongawaꞌ i kitaꞌ to Napoánáꞌ, láwiꞌ to rungu-runguna Naweꞌikeꞌ ia miꞌi Inao to Magasaꞌ.

²⁴Deꞌe-deꞌe, tekábáhámokeꞌ hangko i huku dósántaꞌ ánti pehárungántaꞌ i Pueꞌ Ala. Tahárungá kaꞌina Naweꞌintaꞌ upu-upu to Nadándiákeꞌ. Hai ane talámbiꞌ miꞌi apa to tahárungá, lempóna tiꞌara piꞌi taparaluu mampegiá, láwiꞌ mewaliꞌ miꞌi. Tiꞌara ara hadua tauna to mohárungá apa to nalámbiꞌ miꞌi.

²⁵Ane mampegiákeꞌ apa to tahárungá, hangaa-ngaa sabaraꞌkeꞌ mampegiá duuꞌna talámbiꞌ.

²⁶Kitaꞌ tauna to maledeꞌ, láwiꞌ tiꞌara mpuꞌu taisá apa to hangaa-ngaa tauliꞌ ane mekakaekeꞌ. Agáiáná Inao to Magasaꞌ motulungikeꞌ láwiꞌ Naisá miꞌi apa to taparaluu, hai Ia to meraruaꞌ mopahaweꞌ pekakaentaꞌ i lindoꞌna Pueꞌ Ala.[44]

²⁷Hai Pueꞌ Ala to mopáresáꞌ laluna tauna, moisá woꞌo tunggáiána Inao to Magasaꞌ iti, láwiꞌ kitaꞌ upu-upu to mepoinálái i Pueꞌ Ala, napekakaeákeꞌ Inao to Magasaꞌ hiolaꞌ hai peundeꞌána Pueꞌ Ala.

²⁸Ane mampokaꞌahiꞌkeꞌ Pueꞌ Ala hai Ia mokióꞌkeꞌ hiolaꞌ hai tunggáiáNa, upu-upu to mewaliꞌ i lalu katueꞌtaꞌ bateꞌna napakeꞌ Pueꞌ Ala bona mobunduꞌ i kitaꞌ,

²⁹láwiꞌ hangko i rungu-runguna, Pueꞌ Ala moisá kaheánána to ina Napoánáꞌ.[45] Hai hira to mepoinálái, Napileꞌimoheꞌ bona Napahibaliheꞌ hai Iesu,[46] bona Iesu iti Ia miꞌi Ánáꞌ Towutuꞌ hai hira mewaliꞌ ádiNa.

³⁰Mewaliꞌ: kitaꞌ to Napileꞌimokeꞌ Pueꞌ Ala hangko i rungu-runguna, Nakióꞌkeꞌ bona mewaliꞌkeꞌ ánáꞌNa. Hai kitaꞌ to Nakióꞌmokeꞌ mewaliꞌ ánáꞌNa, Naꞌámpungikeꞌ woꞌo bona manótó ntepuꞌukeꞌ i peitáNa. Hai kitaꞌ to Napakanótómokeꞌ i peitáNa, Nadándi ina molámbiꞌkeꞌ woꞌo gáláꞌtaꞌ hangko i peawaꞌNa.[47]

³¹Apa mani to peisá ina tauliꞌ mokana i upu-upuna to nabábehi Pueꞌ Ala iti. Ane Pueꞌ Ala mamporángákeꞌ, heáná mani paꞌi to mobuku moewaꞌkeꞌ! Tiꞌara ara.

³²Mogalo riꞌi ÁnáꞌNa haduduáNa, tiꞌara Napekabohiꞌ; Nahuoꞌ mai i duniáꞌ bona mate mosulewátáikeꞌ. Mewaliꞌ, ane ÁnáꞌNa haduduáNa Naweꞌikeꞌ mewaliꞌ Topohómpóꞌ Salaꞌ, manótó miꞌi kaꞌina Naweꞌintaꞌ woꞌo pákáꞌ-pákáꞌna to mobunduꞌ ntepuꞌu i lalu katueꞌtaꞌ.

³³Hai kitaꞌ to Napileꞌi Pueꞌ Ala, heáná mani paꞌi to peisá mosalaꞌikeꞌ? Tiꞌara ara, láwiꞌ Pueꞌ Ala haduduáNa to manguliꞌ katiꞌárána piꞌi ara salaꞌtaꞌ.

³⁴Heáná mani paꞌi to peisá manguliꞌ hangaa-ngaa rahukukeꞌ? Tiꞌara ara, láwiꞌ Iesu Kerisitu to mate mosulewátáikeꞌ ánti kamadósántaꞌ. Pelumbuꞌna mani hangko ionoꞌ, Ia rapatueꞌ huleꞌ hai mehoda tándáꞌ i kuánána Pueꞌ Ala, mampekakaeákeꞌ i lindoꞌna Pueꞌ Ala.[48]

³⁵Apa paꞌi to peisá mogáákikeꞌ hangko i kamaꞌahiꞌna Kerisitu? Kehapiꞌkeꞌ narampe kamasusa, ba kapári, ba pepopeahiahiꞌ, ba kamarimi, ba kamakuraꞌtaꞌ, ba kamalááꞌ, ba pepapate, bateꞌna tiꞌarakeꞌ tekábáhá hangko i ahiꞌna Kerisitu.

³⁶I lalu duniáꞌ deꞌe, bateꞌna narampekeꞌ kapári nodo to teukiꞌ hangkoia i lalu Sura Magasaꞌ: “Ó Pueꞌ, araheꞌ oaꞌ tauna to mampoinao mopapateangkaiꞌ ánti peuláꞌkiꞌ i Hio. Kaiꞌ deꞌe nodo dimbá to ina rasambale.”[49] [50]

³⁷Kehapiꞌ riꞌi ba apa peá to morampekeꞌ, bateꞌna menangikeꞌ oaꞌ, hai rumihi ntepuꞌu penangintaꞌ ánti kamaꞌahiꞌna Iesu i kitaꞌ!

³⁸Láwiꞌ kuisá ntepuꞌu, tiꞌara ara to peisá mogáákikeꞌ hangko i kamaꞌahiꞌna Pueꞌ Ala. Mate ba tueꞌ manikeꞌ, bateꞌna Napokaꞌahiꞌkeꞌ oaꞌ. Tiꞌara ara malaꞌeka ba kuasaꞌ tokadake, tiꞌara ara kamalááꞌ maroꞌa deꞌe-deꞌe, maroꞌa i alo to ina haweꞌ, tiꞌara ara kuasaꞌ i langiꞌ ba i duniáꞌ, tiꞌara ara apa peá to peisá mogáákikeꞌ hangko i kamaꞌahiꞌna Pueꞌ Ala to talámbiꞌ ánti pohintuwuꞌtaꞌ hai Kerisitu Iesu Pueꞌtaꞌ.