Read Besoa 1 Korintu 11 Bible Online

1 Korintu 11 - Besoa bible

1 Korintu 11

¹Nipeuláꞌi miꞌi bábehiángkuꞌ, nodo woꞌo kamampeuláꞌingkuꞌ bábehiána Kerisitu.

²Kaliliuána halalu-halalu, kutóiákou láwiꞌ i pákáꞌ-pákáꞌna nibuhinaoaꞌ oaꞌ, hai nipeuláꞌi paturoꞌ to kupahaweꞌámokou.

³Agáiáná ara mani hampákáꞌ to paraluu niꞌisá: to mokapalaꞌi upu-upu tobaleilo ia miꞌi Kerisitu. Noꞌonoꞌ woꞌo to mokapalaꞌi towawine ia miꞌi toámána, hai Pueꞌ Ala mokapalaꞌi Kerisitu.

⁴Ane maminggukeꞌ hai arai tobaleilo to metótóku haneꞌi mekakae ba mopahaweꞌ laluitana Pueꞌ Ala, tobaleilo iti mopakóiꞌ Kerisitu to mewaliꞌ kapalaꞌna.

⁵Agáiáná towawine to tiꞌara metótóku ane mekakae ba mopahaweꞌ laluitana Pueꞌ Ala, ia mopakóiꞌ toámána to mewaliꞌ kapalaꞌna, láwiꞌ ia hibali hai towawine to ralóli.[67]

⁶Mewaliꞌ, ane ara towawine to tiꞌara moundeꞌ metótóku, rángina miꞌi ralóli peá hangko tiꞌara mani mekakae ba mopahaweꞌ laluitana Pueꞌ Ala! Agáiáná ane mahili ragundiꞌ ba ralóli, hangaa-ngaa metótóku.

⁷Ane tobaleilo to mekakae ba mopahaweꞌ laluitana Pueꞌ Ala, ineeꞌ metótóku, láwiꞌ tobaleilo napopewaliꞌ Pueꞌ Ala mouláꞌ pambiáráNa haduduáNa,[68] bona hangaꞌna Pueꞌ Ala rapomahile. Towawine hangaa-ngaa metótókuheꞌ láwiꞌ towawine rapopewaliꞌ bona hangaꞌna tobaleilo rapomahile,

⁸láwiꞌ tobaleilo tiꞌara rapopewaliꞌ hangko i towawine, agáiáná towawine riꞌi to rapopewaliꞌ hangko i tobaleilo.[69]

⁹Hai noꞌonoꞌ woꞌo, tobaleilo tiꞌara rapopewaliꞌ bona motulungi toinána, agáiáná toinána riꞌi to rapopewaliꞌ bona motulungi toámána.[70]

¹⁰Onoꞌ miꞌi ntóáꞌna haneꞌi towawine hangaa-ngaa metótókuheꞌ, láwiꞌ tótóku iti nodo tandaꞌ karaweꞌina miꞌi kuasaꞌ mopahaweꞌ laluitana Pueꞌ, hai rapetiroheꞌ woꞌo malaꞌeka.

¹¹Agáiáná i kitaꞌ to mepoinálái i Pueꞌ, towawine hai tobaleilo mombeparaluu. Towawine hangaa-ngaa motulungi tobaleilo, hai tobaleilo hangaa-ngaa motulungi towawine,[71]

¹²láwiꞌ rungu-runguna towawine rapopewaliꞌ hangko i tobaleilo, agáiáná roo onoꞌ, upu-upu tobaleilo rapoánáka hangko i towawine, agáiáná to mopaꞌara upu-upuna iti ia miꞌi Pueꞌ Ala.

¹³Nipepekiri: hintotoꞌ paꞌi ane towawine tiꞌara metótóku mekakae i Pueꞌ Ala ane maminggu?

¹⁴Rápáꞌna, handaꞌ tauna manguliꞌ tiꞌara hintotoꞌ ane tobaleilo malóe weluáꞌraꞌ,

¹⁵agáiáná ane towawine malóe weluáꞌraꞌ, iti mewaliꞌ tandaꞌ karaꞌádáiraꞌ, láwiꞌ weluáꞌraꞌ to malóe iti mopamalásáꞌ wátáraꞌ, hai weluáꞌraꞌ iti to mewaliꞌ tótókuna.

¹⁶Agáiáná ane ara to mampoinao mosápuáka to kuꞌuliꞌ iti, deꞌe miꞌi laluitangkuꞌ: mouláꞌ ádá to kipeuláꞌi, towawine hangaa-ngaa metótóku ane mamingguheꞌ, hai ádá iti rapeuláꞌi woꞌo halalu hampepepoináláintaꞌ i jemaꞌa-jemaꞌa. Tiꞌara ara ádá ntániꞌna.

¹⁷Kaliliuána, ara woꞌo hampákáꞌ to kupoinao kuhángáꞌáꞌákou, hai tiꞌara kutóiákou ánti bábehiámi deꞌe, láwiꞌ ane moromu-romukou, handaꞌ mani to kadake to nibábehi haneꞌi to maroꞌa.

¹⁸Rungu-runguna, kuhádi bámbári to manguliꞌ, ane hirámpukou maminggu, ara posisalaꞌ i oloꞌmi, hai kupekiri bámbári iti babilaꞌ ara katoꞌuána!

¹⁹Hintotoꞌnto ane niposisalaꞌi, ane mopatongawaꞌ ba heáná to maróhó peuláꞌna i Pueꞌ.

²⁰Agáiáná ane hirámpukou, tiꞌara nibábehi apa to hintotoꞌ i tauna to mandeꞌ rótiꞌ hai mainu anggoroꞌ mambuhinao kamatena Pueꞌ Iesu.

²¹Arakou hantángáꞌ to mandeꞌ ioru duuꞌmi mabuhu, hai arakou woꞌo to mainu duuꞌmi malangu. Iti nibábehi i lindoꞌraꞌ rángámi to meahiahiꞌ tueꞌraꞌ, álána marimiheꞌ hai mangkadoꞌu.

²²Moapa riꞌi haneꞌi nibábehi noꞌonoꞌ? Tiꞌarakou paꞌi potámbi? Rángimi mandeꞌ hai mainu sieruꞌ i lalu támbimi. Ba niundeꞌ mopakóiꞌ halalu hampepepoináláimi? Ba nipoinao nipakahiliáheꞌ halalumi to meahiahiꞌ tueꞌraꞌ? Ba niuliꞌ riꞌi ina kuꞌuliꞌ kutóiákou? Tiꞌara! Bábehiámi iti tiꞌara kupokana.

²³Kupaturoꞌmokou hangkoia apa lempóna ane mandeꞌkou hai mainu hingkakani tempómi mambuhinao kamatena Pueꞌ Iesu. Hai apa to kupaturoꞌákou iti, kutarima hangko i Pueꞌ.[72] Káindina, hangko tiꞌara mani rahuhuꞌ i ewáliNa, Pueꞌ Iesu moala miꞌi rótiꞌ

²⁴haneꞌi mekakae. Nabiseꞌ-biseꞌ hai Nahángáꞌáꞌáheꞌ topeguruNa, “Deꞌe miꞌi wátáNgkuꞌ to Kuhuhuꞌ mosulewátáikou. Hangaa-ngaa nibábehi deꞌe mewaliꞌ tandaꞌ pebuhinaomi i Kódóꞌ.”

²⁵Noꞌonoꞌ woꞌo, karooraꞌ mandeꞌ, Nahuhuꞌámoheꞌ painuá anggoroꞌ, haneꞌi Nahángáꞌáꞌáheꞌ, “Óntóꞌna painuá anggoroꞌ deꞌe, lempóna podándina Pueꞌ Ala to woꞌu[73] to mopahintuwuꞌ Pueꞌ Ala hai tauna. Dándi iti Napakaróhó hai waheꞌKuꞌ to tebubuha i kamateNgkuꞌ. I káni-kánimi mainu, nibábehi bona mewaliꞌ tandaꞌ pebuhinaomi i Kódóꞌ.”

²⁶Mewaliꞌ, i káni-kánina mandeꞌkou rótiꞌ hai mainukou anggoroꞌ, nibámbári kamatena Pueꞌ Iesu duuꞌna i kahaweꞌáNa huleꞌ.

²⁷Mewaliꞌ, heáná to tiꞌara hintotoꞌ bábehiána ane mandeꞌ rótiꞌ hai mainu anggoroꞌ i lalu hangaꞌna Pueꞌ,[74] tauna iti madósá, láwiꞌ ia tiꞌara mobiláꞌ wátána hai waheꞌna Pueꞌ Iesu to rapándiriꞌ nodo rótiꞌ hai anggoroꞌ.

²⁸Upu-upu tauna hangaa-ngaa mopáresáꞌ sieruꞌ laluna hangko peisá riꞌi mandeꞌ rótiꞌ hai mainu anggoroꞌ,

²⁹láwiꞌ tauna to tiꞌara mobiláꞌ wátána Pueꞌ ane mandeꞌ rótiꞌ hai mainu anggoroꞌ, ina nahuku Pueꞌ Ala.

³⁰Onoꞌ miꞌi haneꞌi handaꞌ tauna i oloꞌmi to maduꞌa hai maledeꞌ wátáraꞌ, hai araheꞌ woꞌo to mate.

³¹Agáiáná ane tapáresáꞌ sieruꞌ laluntaꞌ, tiꞌarakeꞌ ina nahuku Pueꞌ.

³²Ane nahukukeꞌ Pueꞌ, lempóna Ia mokámbáróákeꞌ nodo hadua umaꞌ mokámbáróá ánáꞌna, bona menosoꞌkeꞌ hai tiꞌarakeꞌ ina rahuku i kahópóꞌána duniáꞌ hingkakani hai tauna to tiꞌara mepoinálái.

³³Mewaliꞌ halalu-halalu, ane hirámpukou mosusa pandeꞌ rótiꞌ, rángina miꞌi mombepegiákou sieruꞌ. Ane aramokou aha, hangko mandeꞌrakou hingkakani.

³⁴Ane ara to marimi, rángina miꞌi mandeꞌ sieruꞌ i támbina, bona tiꞌarakou nasalaꞌi Pueꞌ i tempómi mandeꞌ rótiꞌ. Mokana i pekuneꞌmi to ntániꞌna, ina kupakanótóákou ane haweꞌaꞌ huleꞌ.