Read Besoa 1 Korintu 12 Bible Online

1 Korintu 12 - Besoa bible

1 Korintu 12

¹Kaliliuána halalu-halalu, ina molaluitaꞌaꞌ kana i kapánde to tatarima hangko i Inao to Magasaꞌ. Tunggáiángkuꞌ bona niꞌisá ntepuꞌu apa to toꞌu mokana i kapánde iti.

²Nibuhinao halalu-halalu, hangkoia hangko tiꞌara manikou moisá Pueꞌ Ala, tediiꞌ lalumi menómbá i lenggeꞌ ánitu to rabábehi hangko i watu ba kau to tiꞌara peisá molaluita.

³Onoꞌ miꞌi haneꞌi kuꞌundeꞌ bona niꞌisá: hadua tauna to molaluita ánti pokalena Inao to Magasaꞌ, tiꞌara ina manguliꞌ, “Iesu hárárá miꞌi!” Noꞌonoꞌ woꞌo ane ara tauna to manguliꞌ, “Iesu ia miꞌi Pueꞌ!” lempóna tauna iti napokalei Inao to Magasaꞌ.

⁴Mampopengaa kapánde to talámbiꞌ hangko i Inao to Magasaꞌ, agáiáná Ia hadua peá.

⁵Handaꞌ pákáꞌna bágóꞌ to tapobágóꞌ i Pueꞌ, agáiáná Pueꞌ hadua peá.

⁶Handaꞌ pákáꞌna rárá to napakeꞌ Pueꞌ Ala mopatongawaꞌ kuasaꞌNa i lalu katueꞌtaꞌ, agáiáná Pueꞌ Ala hadua peá. Ia miꞌi to mampoweꞌikeꞌ kuasaꞌ mampopolumao bágóꞌNa.

⁷Kitaꞌ hadua-hadua raweꞌikeꞌ kapánde hangko i Inao to Magasaꞌ,[75] bona tapakeꞌ motulungi halalu hampepepoináláintaꞌ.

⁸I hadua tauna, Inao to Magasaꞌ mampoweꞌi kapánde bona nabuku mopahaweꞌ laluita to maroꞌa hai to hintotoꞌ ntepuꞌu. I to haduána, Ia mampoweꞌi kapánde molempónga ngkóráꞌna Pueꞌ Ala.

⁹I tauna ntániꞌna, Naweꞌi pepoinálái to maróhó. Hai i to haduána, Inao to Magasaꞌ mampoweꞌi kuasaꞌ mepakauriꞌ.

¹⁰I to haduána, Inao to Magasaꞌ mampoweꞌi kuasaꞌ bona nabuku mobábehi tandaꞌ kuasaꞌ. Hai i to haduána, Naweꞌi kapánde mopahaweꞌ laluita to hangko i Pueꞌ Ala. I to haduána woꞌo, Naweꞌi kapánde mampopontaniꞌ apa to hangko i Inao to Magasaꞌ hai apa to tiꞌara hangko i Inao to Magasaꞌ. I tauna ntániꞌna, Naweꞌi kapánde molaluita i lalu básá ntániꞌna, básá to hangko i Inao to Magasaꞌ.[76] Hai i to haduána woꞌo, Naweꞌi kapánde molimbá básá iti bona raisá tauna ntániꞌna apa lempóna.

¹¹Upu-upu iti mentóáꞌ hangko i Inao to Magasaꞌ to hadua peá. Ia miꞌi to mampoweꞌikeꞌ kapánde to montaniꞌ-ntaniꞌ mouláꞌ peundeꞌáNa haduduáNa.

¹²Kitaꞌ to mepoinálái i Kerisitu peisá rapándiriꞌ nodo wátá tauna. Ane wátá tauna, hambuaꞌ peá, agáiáná handaꞌ pákáꞌna gáláꞌna. Kehapiꞌ handaꞌ pákáꞌna gáláꞌna, upu-upu gáláꞌna iti mewaliꞌ hambuaꞌ wátá.

¹³Noꞌonoꞌ woꞌo kitaꞌ to mepoinálái. Kitaꞌ upu-upu mewaliꞌkeꞌ nodo hambuaꞌ wátá, láwiꞌ rariukeꞌ upu-upu hai Inao to Magasaꞌ to hadua peá, hai kitaꞌ upu-upu molámbiꞌ Inao to Magasaꞌ to hibali, maroꞌa toIahudiꞌ ba to tiꞌara toIahudiꞌ, maroꞌa hawiꞌ ba to tiꞌara woꞌo hawiꞌ.

¹⁴I wátántaꞌ, ara biti, ara tae, hai handaꞌ pákáꞌna gáláꞌna to ntániꞌna. Tiꞌara hanggááꞌ peá.

¹⁵Ane rápáꞌna biti manguliꞌ, “Kódóꞌ tiꞌaraꞌaꞌ tae, onoꞌ miꞌi haneꞌi tiꞌaraꞌaꞌ mesuaꞌ gáláꞌna wátá,” biti iti mia-mia gáláꞌna wátá.

¹⁶Ane talinga manguliꞌ, “Kódóꞌ, tiꞌaraꞌaꞌ mata, onoꞌ miꞌi haneꞌi tiꞌaraꞌaꞌ mesuaꞌ gáláꞌna wátá,” talinga iti mia-mia gáláꞌna wátá.

¹⁷Ane rápáꞌna upu-upu gáláꞌna wátántaꞌ mewaliꞌ aha mata, noumbá rárána bona wátántaꞌ peisá mehádi? Ane upu-upu mewaliꞌ aha talinga, noumbá rárána bona wátántaꞌ peisá meáriꞌ?

¹⁸Onoꞌ miꞌi haneꞌi Pueꞌ Ala mopaꞌara bona i wátántaꞌ ara pákáꞌ-pákáꞌna gáláꞌna. Pákáꞌ-pákáꞌna Nawoli i wátántaꞌ mouláꞌ peundeꞌáNa i kaꞌaraꞌána to hintotoꞌ.

¹⁹Ane rápáꞌna Napahampákáꞌ peá upu-upu gáláꞌna wátántaꞌ, umbána to peisá rauliꞌ wátá?

²⁰Mewaliꞌ, handaꞌ gáláꞌna wátá, agáiáná hambuaꞌ peá wátá.

²¹Mata tiꞌara peisá mohángáꞌá tae, “Tiꞌarakoꞌ kuparaluu!” Hai wuáꞌ tiꞌara peisá mohángáꞌá biti, “Tiꞌarakoꞌ kuparaluu!”

²²Katoꞌuána, gáláꞌna wátántaꞌ to tarekeꞌ maledeꞌ, iti riꞌi to taparaluu ntepuꞌu.

²³Gáláꞌna wátántaꞌ to tarekeꞌ tiꞌara maroꞌa, gáláꞌna iti to tawaruꞌi. Gáláꞌna wátántaꞌ to tiꞌara hintotoꞌ raita tauna ntániꞌna, gáláꞌna iti riꞌi to takámpái.

²⁴Agáiáná gáláꞌna wátántaꞌ to maroꞌa raita tauna, tiꞌara paraluu takámpái. Pueꞌ Ala mokádipurá gáláꞌna wátántaꞌ bona to makuraꞌ rabiláꞌ, iti riꞌi to takádipurá ntepuꞌu.

²⁵Nabábehi noꞌonoꞌ bona tiꞌara mewaliꞌ posisalaꞌ i wátántaꞌ, upu-upuna molumao maroꞌa. Onoꞌ miꞌi haneꞌi upu-upu gáláꞌna wátántaꞌ hangaa-ngaa mombekádipurá.

²⁶Ane ara hanggáláꞌ wátántaꞌ to mahái, upu-upu wátántaꞌ ina mohádiá. Ane ara hanggáláꞌ wátántaꞌ to ratóiá, upu-upu wátántaꞌ ina ratóiá.

²⁷Pueꞌ Ala mampopewaliꞌmokou nodo hambuaꞌ wátá ánti pohintuwuꞌmi hai Kerisitu, hai kómu hadua-hadua peisá rapándiriꞌ nodo hanggáláꞌ hangko i wátána Kerisitu.

²⁸I lalu jemaꞌa, Pueꞌ Ala mampoweꞌi bágóꞌ i tauna hadua-hadua: kaꞌisáꞌ, araheꞌ to mewaliꞌ suroNa, karompákáꞌna, araheꞌ to mopahaweꞌ ngkóráꞌNa, katáluna, araheꞌ to mepaturoꞌ. Hai araheꞌ woꞌo to Naweꞌi kuasaꞌ mobábehi tandaꞌ kuasaꞌ. Araheꞌ to Naweꞌi kuasaꞌ mepakauriꞌ, araheꞌ to molámbiꞌ kapánde motulungi hángká rángáraꞌ, araheꞌ to mewaliꞌ tadulako, araheꞌ to molámbiꞌ kapánde molaluita i lalu básá to naweꞌi Inao to Magasaꞌ.

²⁹Tiꞌara upu-upu to mewaliꞌ suro ba nabiꞌ ba guru. Tiꞌara upu-upu to peisá mobábehi tandaꞌ kuasaꞌ,

³⁰ba mopakauriꞌ tauna. Tiꞌara upu-upu to molámbiꞌ kapánde molaluita i lalu básá to hangko i Inao to Magasaꞌ, ba molimbá básá iti bona raisá tauna ntániꞌna apa lempóna.

³¹Mewaliꞌ hangaa-ngaa nipoinao ntepuꞌu molámbiꞌ kapánde hangko i Inao to Magasaꞌ to melumbuꞌ kamaroꞌana, agáiáná ara mani to melumbuꞌ ntepuꞌu kamaroꞌana. Iti miꞌi to ina kupahaweꞌákou.