Read Besoa 1 Korintu 13 Bible Online

1 Korintu 13 - Besoa bible

1 Korintu 13

¹Kehapiꞌ kubuku molaluita i lalu básá malaꞌeka ba básá tauna to tiꞌara kuisá, agáiáná ane tiꞌara ara kamaꞌahiꞌkuꞌ, mbero-mbero peá katueꞌkuꞌ. Upu-upu kapánde iti nodo peá pokániꞌ ndóngi ba timbóngá to maoniꞌ. Tiꞌara mobunduꞌ.

²Kehapiꞌaꞌ molámbiꞌ kapánde mopahaweꞌ laluita to hangko i Pueꞌ Ala, hai molámbiꞌaꞌ upu-upu kapánde haneꞌi kuisá upu-upu to tewuniángi, hai ane maróhó pepoináláingkuꞌ haneꞌi kubuku molimbá buluꞌ, agáiáná ane tiꞌara ara kamaꞌahiꞌkuꞌ, mbero-mbero peá katueꞌkuꞌ.

³Ane upu-upu párewángkuꞌ kugáláꞌ-gáláꞌáheꞌ tauna to meahiahiꞌ, hai kuhuhuꞌ woꞌo wátángkuꞌ bona raintu, agáiáná ane tiꞌara ara kamaꞌahiꞌkuꞌ, mbero-mbero peá katueꞌkuꞌ.

⁴Apa lempóna to rauliꞌ kamaꞌahiꞌ? Ane mampokaꞌahiꞌkeꞌ hángká rángántaꞌ, hangaa-ngaa: sabaraꞌkeꞌ hai maroꞌa laluntaꞌ, tiꞌara taisá mahiniꞌ, tiꞌarakeꞌ maꞌángkáꞌ, tiꞌarakeꞌ mampepemahile,

⁵tiꞌarakeꞌ mobábehi apa to tiꞌara moisá ádá, tiꞌarakeꞌ mopasimbuku peundeꞌántaꞌ haduduántaꞌ i tauna ntániꞌna, tiꞌarakeꞌ hawiáꞌ mabukoꞌ, hai tiꞌarakeꞌ mepailalu.

⁶Ane maꞌahiꞌkeꞌ i hángká rángántaꞌ, lempóna: tiꞌara taundeꞌ apa to kadake, agáiáná to taundeꞌ, apa to maroꞌa,

⁷mokádipurákeꞌ hangaꞌ tauna,[77] mepoináláikeꞌ oaꞌ, mehárungákeꞌ oaꞌ, hai sabaraꞌkeꞌ oaꞌ kehapiꞌ ba apa miꞌi to morampekeꞌ.

⁸Ahiꞌ tiꞌara ina mokahópóꞌá, agáiáná kapánde ina mokahópóꞌá. Ane ara to mapánde mopahaweꞌ laluitana Pueꞌ Ala, ba molaluita i lalu básá to hangko i Inao to Magasaꞌ, ina haweꞌ tempóna kapánde iti tiꞌara piꞌi raparaluu,

⁹láwiꞌ deꞌe-deꞌe makuraꞌ mani upu-upu kapánde, hai tauna to mopahaweꞌ laluita to hangko i Pueꞌ Ala, makuraꞌ woꞌo kamapánderaꞌ.

¹⁰Agáiáná ane haweꞌ miꞌi tempóna Pueꞌ Ala mampopeawaꞌ upu-upuna, upu-upu to ara mani kamakuraꞌna, tiꞌara piꞌi ina ara.

¹¹Rápáꞌna, tempóngkuꞌ mani ánángkóiꞌ, polaluitangkuꞌ maꞌánángkóiꞌaꞌ mani; noꞌonoꞌ woꞌo pekiringkuꞌ hai pambiárángkuꞌ. Agáiáná deꞌe-deꞌe manginaomoꞌ, onoꞌ haneꞌi kukábáhá miꞌi apa to kubábehi hangkoia.

¹²Deꞌe-deꞌe, nodokeꞌ tauna to mepampewaio to tiꞌara makaaꞌ, láwiꞌ tiꞌara mani taisá upu-upuna i katoꞌu-toꞌuána. Agáiáná i alo to ina haweꞌ, ina taisá miꞌi upu-upuna, láwiꞌ ina mampombelindoꞌákeꞌ Pueꞌ Ala. Deꞌe-deꞌe, makuraꞌ mani kakuisána Pueꞌ Ala, agáiáná i alo to ina haweꞌ, ina kuisá ntepuꞌu Pueꞌ Ala nodo woꞌo Ia moisáꞌaꞌ.

¹³Mewaliꞌ deꞌe-deꞌe, ara tálu pákáꞌna to hangaa-ngaa tabábehi: mepoináláikeꞌ i Pueꞌ Ala, mehárungákeꞌ i dándina Pueꞌ Ala, hai maꞌahiꞌkeꞌ i hángká rángántaꞌ. Agáiáná hangko i tálu pákáꞌna iti, to melumbuꞌ ntepuꞌu kamaroꞌana ia miꞌi kamaꞌahiꞌ.