Read Besoa 1 Korintu 15 Bible Online

1 Korintu 15 - Besoa bible

1 Korintu 15

¹Deꞌe-deꞌe halalu-halalu, kupoinao mampopaingáꞌákou Ngkóráꞌ Marasa to kupahaweꞌámokou. Ngkóráꞌ Marasa iti nitarima miꞌi hai nipoinálái ntepuꞌu.[80]

²Molámbiꞌmokou katehómpóꞌ, asalaꞌ mepoináláikou oaꞌ i Ngkóráꞌ Marasa to kupahaweꞌámokou. Ane tiꞌara nitibaaꞌ maroꞌa pepoináláimi, mbero-mbero peá.

³Ngkóráꞌ Marasa iti kutarima hangko i Kerisitu,[81] hai iti woꞌo to kupahaweꞌámokou. Ntóáꞌna, Kerisitu mate bona mopaháwángi dósántaꞌ nodo to teukiꞌ i lalu Sura Magasaꞌ.[82]

⁴Ia ratawu, hai i katáluna alona, rapopearó huleꞌ, nodo to teukiꞌ i lalu Sura Magasaꞌ.[83]

⁵I katueꞌNa huleꞌ, Ia mopatongawaꞌ wátáNa i topeguruNa; rungu-runguna i Peturuꞌ,[84] roo onoꞌ i topeguruNaheꞌ to ntániꞌna.

⁶Hangko ionoꞌ, Ia mopatongawaꞌ wopiꞌi wátáNa i lindoꞌraꞌ topeuláꞌNa to lima áturaꞌ lábi. Kahandaꞌáraꞌ tauna iti tueꞌ maniheꞌ tempóngkuꞌ moukiꞌ sura deꞌe, agáiáná aramoheꞌ woꞌo bahangapa to mate.

⁷Roo onoꞌ, Ia mopatongawaꞌ wopiꞌi wátáNa i Iakobu ádiNa[85] hai i upu-upu suroNa.

⁸Kaupuána, Ia mopatongawaꞌ miꞌi wátáNa i kódóꞌ. Tiꞌaraꞌaꞌ nodo surona Iesu to ntániꞌna, {láwiꞌ i bókóꞌaꞌ}. Tiꞌara kuhárungá ina Napileꞌiaꞌ mewaliꞌ suroNa. Nodoaꞌ hadua ánángkóiꞌ to mesupaꞌ i tempó to tiꞌara hintotoꞌ,

⁹láwiꞌ kódóꞌ deꞌe surona Pueꞌ Iesu to tepaiwóiꞌá hangko i upu-upu suroNa. Katoꞌuána, tiꞌaraꞌaꞌ hintotoꞌ rauliꞌ suro, láwiꞌ hangkoia kupopeahiahiꞌheꞌ tauna to mepoinálái i Pueꞌ Iesu.

¹⁰Agáiáná ánti kabulána laluna Pueꞌ Ala hai ánti petulungiNa i kódóꞌ, onoꞌ miꞌi haneꞌi mewaliꞌaꞌ suroNa haweꞌ deꞌe-deꞌe. Hai mobunduꞌ ntepuꞌu kabulána laluNa hai petulungiNa i kódóꞌ, láwiꞌ mantepuꞌu i kaNapileꞌingkuꞌ mewaliꞌ suro, melumbuꞌ kamatimina pobágóꞌkuꞌ i Pueꞌ hangko i upu-upu surona Pueꞌ Iesu to ntániꞌna. Ane hangko i róhóngkuꞌ haduduángkuꞌ, tiꞌara kubuku mampopolumao bágóꞌ iti, agáiáná ánti kabulána laluna Pueꞌ Ala hai ánti petulungiNa i kódóꞌ, onoꞌ miꞌi haneꞌi kubuku.

¹¹Arakou to kupaturoꞌ, arakou woꞌo to rapaturoꞌ surona Pueꞌ Iesu to ntániꞌna, agáiáná tiꞌara topoánti Ngkóráꞌ to hangaa-ngaa tapaioru. To tapaioru ia miꞌi Ngkóráꞌ Marasa. Ngkóráꞌ Marasa iti to kibámbáriámokou álána nipoinálái.

¹²Mewaliꞌ, ane kibámbári katueꞌna huleꞌ Kerisitu hangko i kapate, moapa riꞌi haneꞌi ara tauna i oloꞌmi to mosápuáka katueꞌraꞌ huleꞌ tomate i alo pobutusi i kahópóꞌána duniáꞌ?

¹³Ane rápáꞌna tauna to mate tiꞌaraheꞌ ina tueꞌ huleꞌ, manótó woꞌo Kerisitu tiꞌara tueꞌ huleꞌ.

¹⁴Ane rápáꞌna Kerisitu tiꞌara tueꞌ huleꞌ, tiꞌara ara bunduꞌna pobágóꞌkiꞌ mopahaweꞌ Ngkóráꞌ Marasa, hai tiꞌara woꞌo ara bunduꞌna pepoináláimi. Láwiꞌ ane rápáꞌna Kerisitu tiꞌara tueꞌ huleꞌ, lempóna, mampoinálái pekou bámbári to tiꞌara toꞌu.

¹⁵Melumbuꞌ hangko i onoꞌ, ina rarekeꞌangkaiꞌ sabiꞌ dongkoꞌ mokana i Pueꞌ Ala, láwiꞌ kipahaweꞌ bámbári to manguliꞌ Pueꞌ Ala mopatueꞌ miꞌi huleꞌ Kerisitu. Agáiáná ane rápáꞌna tauna to mate tiꞌara ina rapatueꞌ huleꞌ, lempóna, tiꞌara toꞌu laluitangkiꞌ,

¹⁶láwiꞌ ane rápáꞌna tauna tiꞌara rapatueꞌ huleꞌ hangko i kapate, lempóna Kerisitu woꞌo tiꞌara rapatueꞌ huleꞌ.

¹⁷Hai ane rápáꞌna Kerisitu tiꞌara rapatueꞌ huleꞌ, tiꞌara mobunduꞌ pepoináláimi, hai tiꞌarakou tekábáhá hangko i kuasaꞌ dósá.

¹⁸Hai ane noꞌonoꞌi, toSarani to matemoheꞌ, manótó tiꞌara ara pehárungáraꞌ {kaꞌina rapatueꞌraꞌ huleꞌ}.

¹⁹Ane rápáꞌna mehárungákeꞌ i Kerisitu tangaꞌtaꞌ mani tueꞌ i duniáꞌ, hai roo onoꞌ tiꞌara piꞌi ara pehárungántaꞌ, lempóna, hangko i upu-upu tauna i duniáꞌ deꞌe, kitaꞌ miꞌi to meahiahiꞌ ntepuꞌu.

²⁰Agáiáná deꞌe miꞌi paturoꞌ to katoꞌu-toꞌuána: Kerisitu rapatueꞌ miꞌi huleꞌ. Ia to rungu-runguna tueꞌ huleꞌ hangko i kapate. Hai karapatueꞌNa huleꞌ iti mewaliꞌ nodo pentitadaꞌántaꞌ kaꞌina rapatueꞌraꞌ huleꞌ woꞌo upu-upu tauna to mate to mepoinálái i Hia.

²¹Ánti kamadósána hadua tauna, ia miꞌi Adama, onoꞌ miꞌi haneꞌi upu-upu tauna hangaa-ngaa mate. Noꞌonoꞌ woꞌo, ánti kamatena hai katueꞌna huleꞌ hadua tauna, ia miꞌi Iesu, onoꞌ miꞌi haneꞌi tauna to mate ina rapatueꞌheꞌ huleꞌ.

²²Upu-upu pemuleꞌána Adama hangaa-ngaa mate. Noꞌonoꞌ woꞌo, upu-upu tauna to mohintuwuꞌ hai Kerisitu ina molámbiꞌheꞌ katueꞌ to woꞌu to tiꞌara mokahópóꞌá.

²³Agáiáná upu-upu tauna ina rapatueꞌ huleꞌ mouláꞌ tempóna: to rungu-runguna ia miꞌi Kerisitu. Roo onoꞌ i kahaweꞌNa huleꞌ i duniáꞌ deꞌe, upu-upu tauna to mate to meuláꞌ i Hia ina rapatueꞌ huleꞌ.

²⁴Rooheꞌ rapatueꞌ huleꞌ, hangko ina haweꞌ riꞌi kahópóꞌána duniáꞌ deꞌe. I tempó iti, Kerisitu ina monangi upu-upu topopárentá, upu-upu tadulako, hai upu-upu to makuasaꞌ. Ia ina mepárentá láwiꞌ Ia Datu, hai kahópóꞌána, Ia ina mohuhuꞌ kadatuáNa iti i Pueꞌ Ala Umántaꞌ.

²⁵Láwiꞌ Kerisitu hangaa-ngaa mepárentá duuꞌna Pueꞌ Ala mampopengkoruꞌ upu-upu ewáliNa i Hia,

²⁶hai ewáliNa to kahópóꞌána to ina Nanangi, ia miꞌi kapate.

²⁷Ara teukiꞌ i lalu Sura Magasaꞌ to manguliꞌ: “Pueꞌ Ala mampopengkoruꞌ hinángkáꞌna i Hia.” [86] Mewaliꞌ taisá ntepuꞌu: hinángkáꞌna to ara ina rapopengkoruꞌ i Kerisitu. Bateꞌna perái Pueꞌ Ala to tiꞌara mengkoruꞌ i Hia, láwiꞌ Ia miꞌi to mampopengkoruꞌ hinángkáꞌna i Kerisitu.

²⁸Mewaliꞌ, ane hinángkáꞌna rapopengkoruꞌ i Kerisitu, Kerisitu ina mengkoruꞌ i UmáNa bona tongawaꞌ kamakuasaꞌna Pueꞌ Ala i upu-upuna.

²⁹Noumbá miꞌi? Ane tauna to mate tiꞌara ina rapatueꞌ huleꞌ, apa miꞌi bunduꞌna ane araheꞌ tauna to rariu mosulewátái rángáraꞌ to mate?[87] Ane tomate tiꞌara ina rapatueꞌ huleꞌ, moapa riꞌi haneꞌi ádá iti rabábehi?

³⁰Kaiꞌ deꞌe rapopeahiahiꞌangkaiꞌ oaꞌ. Agáiáná ane tomate tiꞌara ina rapatueꞌ huleꞌ, apa bunduꞌna kapári to kitódihá oaꞌ iti?

³¹Ánti pobágóꞌkuꞌ mopahaweꞌ Ngkóráꞌ Marasa, alo-alona ina kupomate.[88] Toꞌu ntepuꞌu laluitangkuꞌ iti, hai toꞌu woꞌo kagóeꞌkuꞌ ánti kakómuna halalungkuꞌ, láwiꞌ mepoináláikou i Kerisitu Iesu Pueꞌtaꞌ.

³²Tangaꞌkuꞌ ieneꞌ i kótá Epesu, mantódiháꞌaꞌ kapári,[89] nodoaꞌ to raewaꞌ binataꞌ to pehakaꞌ. Ane rápáꞌna tauna to mate tiꞌara ina rapatueꞌ huleꞌ, apa bunduꞌna upu-upuna iti kutódihá? Ane rápáꞌna tomate tiꞌara ina rapatueꞌ huleꞌ, rángina miꞌi tauláꞌ laluita deꞌe: “Maikeꞌ mandeꞌ hai mainu pekeꞌ, láwiꞌ kahalo ina matekeꞌ.”

³³Ineeꞌkou rapakanawoꞌ! Ane mamporángákou tauna to kadake bábehiáraꞌ, ina tebáliki woꞌo bábehiámi mewaliꞌ kadake.[90]

³⁴Onoꞌ miꞌi haneꞌi hangaa-ngaa nipekiri maroꞌa mokana i apa to maroꞌa nibábehi, hai hangaa-ngaa nikábáhá upu-upu dósámi, láwiꞌ arakou to tiꞌara mani moisá Pueꞌ Ala. Kupahaweꞌ noꞌonoꞌ bona nipokahili.

³⁵Manótó araheꞌ to ina mekuneꞌ, “Noumbá katoꞌuána tauna to mate ina rapatueꞌ huleꞌ? Wátá to noumbá ina raweꞌiheꞌ?”

³⁶Bebe ntepuꞌu tauna to mekuneꞌ noꞌonoꞌ! Ane mantudaꞌkeꞌ ba apa peá, tinudaꞌ iti tiꞌara ina tueꞌ ane tiꞌara ratawu hai ratámbungi sieruꞌ tampoꞌ nodo tauna to mate.

³⁷Hai lenggeꞌna tinudaꞌ to tatudaꞌ iti, tiꞌara hibali hai lenggeꞌna katueꞌna. Iti tinudaꞌ peá, maroꞌa pare ba tinudaꞌ to ntániꞌna.

³⁸Roo onoꞌ, Pueꞌ Ala mopatueꞌ hai mampoweꞌi lenggeꞌ to woꞌu, duuꞌna mesupaꞌ pare ba goaꞌ ba apa peá mouláꞌ pákáꞌ-pákáꞌna. Hai lenggeꞌ to woꞌu iti hintotoꞌ hai peundeꞌána Pueꞌ Ala.

³⁹Ane tapekiri upu-upu pinatueꞌ i duniáꞌ deꞌe, montaniꞌ-ntaniꞌ lenggeꞌraꞌ. Lenggeꞌ tauna tiꞌara nodo lenggeꞌ tádáhi. Lenggeꞌ bouꞌ montaniꞌ woꞌo. Pákáꞌ-pákáꞌna binataꞌ, montaniꞌ-ntaniꞌ lenggeꞌraꞌ.

⁴⁰Noꞌonoꞌ woꞌo i langiꞌ: ara alo, wulá hai betue, agáiáná upu-upu iti tiꞌara hibali hai apa to ara i duniáꞌ. Peawaꞌna alo, wulá hai betue tiꞌara hibali hai peawaꞌna apa to ara i duniáꞌ deꞌe.

⁴¹Peawaꞌna alo tiꞌara hibali hai peawaꞌna wulá. Peawaꞌna betue montaniꞌ woꞌo. Mogalo betue to handaꞌ, montaniꞌ-ntaniꞌ peawaꞌna.

⁴²Noꞌonoꞌ woꞌo tauna to mate ane tueꞌheꞌ huleꞌ. Tangaꞌtaꞌ mani tueꞌ i duniáꞌ deꞌe, maledeꞌkeꞌ hai tiꞌara maroꞌa wátántaꞌ. Ane matekeꞌ, wátámandoꞌtaꞌ ina ratawu hai ina magoro. Agáiáná ane rapatueꞌkeꞌ huleꞌ, wátántaꞌ deꞌe ina rabáliki mewaliꞌ wátá to woꞌu, to maroꞌa hai maróhó, hai tiꞌara piꞌi ina mate ba magoro.

⁴³

⁴⁴To ratawu, ia miꞌi wátá to hintotoꞌ tueꞌ i duniáꞌ deꞌe. Agáiáná ane rapatueꞌkeꞌ huleꞌ i alo to ina haweꞌ ánti kuasaꞌna Inao to Magasaꞌ, wátántaꞌ deꞌe ina rabáliki mewaliꞌ wátá to hintotoꞌ toroꞌ i surugáꞌ.

⁴⁵Ara teukiꞌ i lalu Sura Magasaꞌ to manguliꞌ: tauna to rungu-runguna napopewaliꞌ hai napatueꞌ Pueꞌ Ala ia miꞌi Adama.[91] Agáiáná Kerisitu peisá rauliꞌ Adama to kahópóꞌána. Ia miꞌi to mampoweꞌikeꞌ katueꞌ to maroꞌa to tiꞌara mokahópóꞌá.

⁴⁶Pueꞌ Ala tiꞌara kásáliu mobáliki wátántaꞌ. Rungu-runguna Ia mampoweꞌikeꞌ wátántaꞌ deꞌe to hintotoꞌ i duniáꞌ. I alo to ina haweꞌ, ina Naweꞌikeꞌ wátántaꞌ to hintotoꞌ i surugáꞌ.

⁴⁷Adama to rungu-runguna toroꞌ i wongko duniáꞌ deꞌe, rapopewaliꞌ hangko i tampoꞌ. Agáiáná Kerisitu peisá rauliꞌ Adama to kaduá, hai Ia hangko i surugáꞌ.

⁴⁸Upu-upu tauna i duniáꞌ ara wátá to nodo wátána Adama, tauna to rungu-runguna to napopewaliꞌ Pueꞌ Ala hangko i tampoꞌ. Agáiáná i alo to ina haweꞌ, upu-upu tauna to mepoinálái ina molámbiꞌheꞌ wátá to hibali hai wátána Kerisitu to i surugáꞌ.[92]

⁴⁹

⁵⁰Tunggáiángkuꞌ halalu-halalu ia miꞌi node: wátántaꞌ i duniáꞌ deꞌe to rapopewaliꞌ hangko i óntóꞌ hai waheꞌ, tiꞌara peisá mesuaꞌ i lalu popárentána Pueꞌ Ala i surugáꞌ. Hai wátántaꞌ deꞌe to ina mate tiꞌara peisá tueꞌ haweꞌ i rue-ruena.

⁵¹Mewaliꞌ bona niꞌisá, kupahaweꞌákou paturoꞌ to tewuniángi hangkoia, agáiáná deꞌe-deꞌe napakanótóámokeꞌ Pueꞌ Ala. Ane haweꞌ Pueꞌ Iesu i karongkánina, tiꞌara manikeꞌ mate upu-upu, agáiáná kitaꞌ upu-upu ina rabáliki, maroꞌa to tueꞌ mani, maroꞌa to mate miꞌi.

⁵²Ane ratawueꞌ tamburuꞌ to kahópóꞌána,[93] upu-upu iti ina mewaliꞌ i lalu hangkapira mata peá. Láwiꞌ ane ratawueꞌ tamburuꞌ iti, Pueꞌ Ala ina mopatueꞌ huleꞌ tomate, hai ina Naweꞌiheꞌ wátá to woꞌu to tiꞌara piꞌi ina mate. Hai kitaꞌ to tueꞌ mani, ina rabálikikeꞌ woꞌo,

⁵³láwiꞌ wátántaꞌ deꞌe wátá to mate hai magoro. Onoꞌ miꞌi haneꞌi wátántaꞌ hangaa-ngaa rabáliki mewaliꞌ wátá to tiꞌara piꞌi ina mate. Hai ane tebáliki wátántaꞌ to maledeꞌ mewaliꞌ wátá to tiꞌara mokahópóꞌá, ina tebukeki apa to teukiꞌ hangkoia i lalu Sura Magasaꞌ to manguliꞌ node: “Pueꞌ Ala monangi miꞌi kapate.” [94]

⁵⁴

⁵⁵“Ee kapate, iumbá miꞌi penangimu? Ee kapate, iumbá miꞌi kuasaꞌmu mepakarugiꞌ?”[95] [96]

⁵⁶Kuasaꞌna kapate mepakarugiꞌ ia miꞌi dósá, hai to mopatongawaꞌ dósá ia miꞌi áturána Pueꞌ Ala.

⁵⁷Agáiáná Nakábáhámokeꞌ hangko i dósá hai kapate ánti pohintuwuꞌtaꞌ hai Pueꞌtaꞌ Iesu Kerisitu. Tatóiá Pueꞌ Ala!

⁵⁸Mewaliꞌ halalu-halalu to kupokaꞌahiꞌ, ineeꞌ bata-bata lalumi. Hangaa-ngaa nipakaróhó pepoináláimi hai nipopolumao oaꞌ bágóꞌna Pueꞌ, láwiꞌ niꞌisá apa to nipobágóꞌ i Pueꞌ tiꞌara ina mbero-mbero.[97]