Read Besoa 1 Korintu 7 Bible Online

1 Korintu 7 - Besoa bible

1 Korintu 7

¹Halalu-halalu, deꞌe-deꞌe ina kuhániki pekuneꞌmi to niukiꞌ i lalu surami to nipakatuáꞌaꞌ. Arakou to manguliꞌ, ba maroꞌa paꞌi ane tohamboko tiꞌara moromu?

²Agáiáná kuhángáꞌákou, bona tiꞌaraheꞌ ara to rakeloꞌ bona mobábehi salaꞌ, maroꞌa ane tobaleilo mampotoina hadua peá towawine, hai noꞌonoꞌ woꞌo towawine mampotoama hadua peá tobaleilo, {hai hangaa-ngaa tetidaꞌheꞌ i pohambokoraꞌ}.[39]

³Tiꞌara maroꞌa tobaleilo mokaraohi toinána ba towawine mokaraohi toámána duuꞌna tiꞌarapoheꞌ hambuaꞌ paturuá. Tobaleilo hangaa-ngaa mobukeki peundeꞌána toinána, noꞌonoꞌ woꞌo towawine i toámána.

⁴Towawine tiꞌara makuasaꞌ i wátána haduduána, agáiáná toámána. Noꞌonoꞌ woꞌo tobaleilo tiꞌara makuasaꞌ i wátána haduduána, agáiáná toinána.

⁵Kómu tohamboko, ineeꞌkou paka mombekaraohi. Agáiáná, ane rápáꞌna moliwokou ina mombekaraohi bahangapa peá kamaruena bona ara tempómi mekakae, peisánto. Agáiáná hangaa-ngaa moromu wopakou huleꞌ bona tiꞌarakou nakeloꞌ Datu Tokadake ánti katiꞌárána nibuku momeeꞌ peundeꞌána lalumi.

⁶To kuꞌuliꞌ deꞌe, tiꞌara párentá agáiáná paturoꞌkuꞌ peá i kómu.

⁷Katoꞌuána, kuꞌundeꞌ ntepuꞌu riꞌi ane kómu upu-upu hibali hai kódóꞌ, tiꞌarakou mohamboko. Agáiáná tiꞌara upu-upu tauna to rabuku ane tiꞌaraheꞌ mohamboko. Hadua-haduakeꞌ molámbiꞌ pewátiꞌ to montaniꞌ-ntaniꞌ hangko i Pueꞌ Ala. Hadua molámbiꞌ pewátiꞌ bona mohamboko, hai hadua molámbiꞌ pewátiꞌ bona tiꞌara mohamboko, agáiáná upu-upu pewátiꞌ iti hangko i Pueꞌ Ala.[40]

⁸Tauna to tiꞌara mani mohamboko ba to bembaꞌ, kuhángáꞌákou: maroꞌa riꞌi ane tiꞌarakou mohamboko hibali hai kódóꞌ.

⁹Agáiáná ane tiꞌara nibuku momeeꞌ peundeꞌána lalumi, rángina miꞌi mohambokokou bona tiꞌarakou naꞌánti peundeꞌána lalumi i bábehiá to salaꞌ.

¹⁰Upu-upu tauna to mohamboko miꞌi, deꞌe-deꞌe kuweꞌikou laluita. Katoꞌuána, párentá deꞌe hangko i Pueꞌ, tiꞌara hangko i kódóꞌ. Kómu towawine, ineeꞌkou mampogááka toámámi.

¹¹Agáiáná ane nipogáákaheꞌ, ineeꞌ wopakou moala tobaleilo ntániꞌna. Ane niundeꞌ motoama huleꞌ, hangaa-ngaa mesuleꞌ pekou huleꞌ i toámámi. Hai kómu tobaleilo, ineeꞌkou woꞌo mampogááka toinámi.[41]

¹²Kaliliuána halalu-halalu, deꞌe miꞌi laluitangkuꞌ haduduángkuꞌ, tiꞌara párentána Pueꞌ: ane ara tobaleilo toSarani to mampotoina miꞌi towawine to tiꞌara toSarani, ineeꞌ napogááka asalaꞌ towawine iti moundeꞌ oaꞌ hingkakani hai ia.

¹³Noꞌonoꞌ woꞌo ane towawine toSarani to mampotoama miꞌi tobaleilo to tiꞌara toSarani, ineeꞌ napogááka, asalaꞌ tobaleilo iti moundeꞌ oaꞌ hingkakani hai ia.

¹⁴Láwiꞌ towawine toSarani iti mopamagasaꞌ pohambokoraꞌ, noꞌonoꞌ woꞌo tobaleilo toSarani iti mopamagasaꞌ pohambokoraꞌ.[42] Ane tiꞌarai noꞌonoꞌ, ánáꞌraꞌ ina rauliꞌ ánángkóiꞌ to tiꞌara moisá Pueꞌ. Agáiáná ane hadua hangko i tosaeraꞌ mepoinálái i Pueꞌ Iesu, ánáꞌraꞌ iti napamagasaꞌ woꞌo Pueꞌ Ala.

¹⁵Agáiáná, ane tauna to tiꞌara mepoinálái i Pueꞌ mampoinao mogááꞌ, patodáhimoheꞌ, láwiꞌ towawine ba tobaleilo to mepoinálái i Pueꞌ tiꞌara paraluu tetakaꞌ ane hambokona moundeꞌ mogááꞌ. Agáiáná hangaa-ngaa nibuhinao: Pueꞌ Ala mokióꞌkeꞌ mewaliꞌ ánáꞌNa bona mohintuwuꞌkeꞌ.

¹⁶Ane tiꞌarakou mogááꞌ, kómu towawine to mepoinálái i Pueꞌ, ara mani tempómi mamporáráꞌá toámámi bona mepoinálái. Noꞌonoꞌ woꞌo kómu tobaleilo, ara mani tempómi mamporáráꞌá toinámi bona mepoinálái woꞌo i Pueꞌ.

¹⁷Hangaa-ngaa tapokagóeꞌ katueꞌtaꞌ to napakanótóámokeꞌ Pueꞌ Ala i kaNakióꞌtaꞌ mewaliꞌ ánáꞌNa. Iti miꞌi áturá to kupaturoꞌá upu-upu jemaꞌa iumbá-umbá peá kalaoángkuꞌ.

¹⁸Rápáꞌna, ane toIahudiꞌ to mepoinálái i Pueꞌ Iesu, ineeꞌ miꞌi mampenosoꞌi karatileꞌna. Noꞌonoꞌ woꞌo ane tauna to tiꞌara toIahudiꞌ to mepoinálái i Pueꞌ Iesu, ineeꞌ miꞌi mampopetileꞌ.

¹⁹Láwiꞌ ratileꞌ ba tiꞌara ratileꞌ, hibali peá, tiꞌara ara bunduꞌna i peitána Pueꞌ. To paraluu ntepuꞌu, kamampeuláꞌintaꞌ riꞌi hawaꞌNa.

²⁰Kitaꞌ upu-upu, kehapiꞌ noumbá katueꞌtaꞌ i kanakióꞌtaꞌ Pueꞌ, hangaa-ngaa tapokagóeꞌ katueꞌtaꞌ to napakanótóámokeꞌ Pueꞌ.

²¹Ane rápáꞌna hawiꞌ tueꞌmi hai nakióꞌkou Pueꞌ Ala bona mepoinálái i Pueꞌ Iesu, ineeꞌ masusa lalumi mampekiri kahawiꞌmi. Agáiáná ane arai tempómi bona tekábáhákou, rángina miꞌi nipopobunduꞌ tempó iti mampeliꞌ rárá bona tekábáhákou hangko i karapohawiꞌmi.

²²Ba hawiꞌ tueꞌmi ba tiꞌara, hibali peá i peitána Pueꞌ Ala, láwiꞌ hawiꞌ to nakióꞌ Pueꞌ Ala to mepoinálái i Pueꞌ Iesu ina tekábáhá hangko i kuasaꞌ dósá ánti pepoináláina i Pueꞌ. Noꞌonoꞌ woꞌo tauna to tiꞌara hawiꞌ tueꞌna to nakióꞌ Pueꞌ Ala hai mepoinálái i Pueꞌ Iesu, ia mewaliꞌ hawiꞌna Kerisitu.

²³Nahómpókimokou Pueꞌ Ala, upu miꞌi Nabaiari.[43] Ineeꞌmokou mouláꞌ peundeꞌána tauna i duniáꞌ deꞌe.

²⁴Mewaliꞌ halalu-halalu, nodo to kuꞌuliꞌ ininá: kehapiꞌ ba noumbá katueꞌmi i kanakióꞌmi Pueꞌ Ala mewaliꞌ toSarani, tiꞌara paraluu nibáliki. Hangaa-ngaa nipokagóeꞌ katueꞌmi iti hai nibábehi apa to napakanótóámokou Pueꞌ Ala.

²⁵Deꞌe miꞌi paturoꞌkuꞌ i tauna to tiꞌara mani mohamboko. Párentá deꞌe tiꞌara kutarima hangko i Pueꞌ Iesu, agáiáná kupaturoꞌkou mouláꞌ polámbiꞌkuꞌ haduduángkuꞌ. Paturoꞌkuꞌ deꞌe peisá nipoinálái, láwiꞌ napileꞌimoꞌ Pueꞌ mewaliꞌ suroNa ánti kamaꞌahiꞌNa.

²⁶Mewaliꞌ, deꞌe miꞌi paturoꞌkuꞌ: i tempó deꞌe, kitaꞌ toSarani narampekeꞌ handaꞌ pákáꞌna kapári, onoꞌ miꞌi haneꞌi kuꞌuliꞌ, rángina miꞌi ineeꞌ tabáliki katueꞌtaꞌ to napakanótóámokeꞌ Pueꞌ Ala i duniáꞌ deꞌe.

²⁷Rápáꞌna: kómu tobaleilo to motoina miꞌi, ineeꞌkou mampeliꞌ rárá mampogááka toinámi. Kómu to tiꞌara mani mohamboko, ineeꞌ nipári-pári bona ara hambokomi.

²⁸Agáiáná ane ara ánáꞌntomoane to mampoinao motoina, maroꞌanto woꞌo, tiꞌaranto madósá. Hai ane ara ánáꞌntawine to mampoinao motoama, maroꞌanto woꞌo, tiꞌaranto madósá. Agáiáná hangaa-ngaa nibuhinao: tauna to mohamboko ina molámbiꞌheꞌ kapári i wongko duniáꞌ deꞌe, hai peundeꞌángkuꞌ, bona tiꞌarakou molámbiꞌ kapári iti.

²⁹Halalu-halalu, tunggáiángkuꞌ node: kitaꞌ toSarani, hangaa-ngaa tabuhinao katiꞌárána piꞌi handaꞌ tempó i duniáꞌ deꞌe. Onoꞌ miꞌi haneꞌi kuꞌuliꞌ, mantepuꞌu deꞌe-deꞌe, kómu to mohamboko miꞌi, ineeꞌ peá pohambokomi to nipaioru. Agáiáná hangaa-ngaa bateꞌna bágóꞌna Pueꞌ to nipaioru.[44]

³⁰Kómu to teriaꞌ, ineeꞌ gaga masusa lalumi. Kómu to góeꞌ, ineeꞌ gaga góeꞌ lalumi. Kómu to mohóló ba apa-apa, ineeꞌ mentakaꞌ lalumi i párewá iti.

³¹Kómu to masisiáká mampeliꞌ párewá ngkáduniáꞌ, ineeꞌ nipekiri peá katueꞌmi i duniáꞌ deꞌe, láwiꞌ duniáꞌ to takatoroꞌi deꞌe ina tuna.

³²Peundeꞌángkuꞌ halalu-halalu, bona ineeꞌkou mampekiri oaꞌ katueꞌmi i duniáꞌ deꞌe. Tobaleilo to tiꞌara mani motoina, peisáheꞌ mampopolumao oaꞌ bágóꞌna Pueꞌ, hai peisáheꞌ mampekiri oaꞌ apa peundeꞌána Pueꞌ.

³³Agáiáná tobaleilo to motoina miꞌi, hangaa-ngaa mampekiriheꞌ woꞌo katueꞌraꞌ i wongko duniáꞌ deꞌe, láwiꞌ mampoinaoheꞌ mopagóeꞌ laluna toináraꞌ.

³⁴Onoꞌ miꞌi haneꞌi morompenga laluraꞌ. Noꞌonoꞌ woꞌo, towawine to tiꞌara motoama,[45] peisáheꞌ mampopolumao oaꞌ bágóꞌna Pueꞌ, hai peisáheꞌ mampekiri oaꞌ apa peundeꞌána Pueꞌ, bona magasaꞌ katueꞌraꞌ i lindoꞌNa. Agáiáná towawine to motoama miꞌi, hangaa-ngaa mampekiriheꞌ woꞌo katueꞌraꞌ i duniáꞌ deꞌe, láwiꞌ mampoinaoheꞌ mopagóeꞌ laluna toámáraꞌ.

³⁵Upu-upuna iti kuhángáꞌáꞌákou halalu-halalu, bona katueꞌmi molumao maroꞌa. Tiꞌara kuꞌundeꞌ ane tetakaꞌkou i handaꞌ pákáꞌna párentá. Tunggáiángkuꞌ bona nibábehi oaꞌ apa to maroꞌa, bona mampeuláꞌikou peundeꞌána Pueꞌ hai tiꞌara ara to mosalempori kamampopolumaomi bágóꞌna Pueꞌ.

³⁶Ane rápáꞌna ara hadua ánáꞌntomoane to mokaróhói miꞌi ngkóráꞌ i hadua ánáꞌntawine, hai nauliꞌ ánáꞌntomoane iti, “Tiꞌara maroꞌa ane tiꞌaraꞌangkaiꞌ mohamboko, láwiꞌ kalao-laomongkaiꞌ sae,” hai ane mampoinao maniheꞌ mohamboko, rángina mohambokomoheꞌ, tiꞌara rapodósá.

³⁷Agáiáná, ane rápáꞌna tongawaꞌ ntepuꞌu i ánáꞌntomoane iti tiꞌara ina mampohambokoá towawine iti, hai tiꞌara woꞌo ara to mopári-pári, asalaꞌ toꞌu-toꞌu nabuku momeeꞌ peundeꞌána laluna, maroꞌanto ane tiꞌara mohamboko.

³⁸Mewaliꞌ, maroꞌa ane tauna mohamboko, agáiáná melumbuꞌ mani kamaroꞌana ane tauna tiꞌara mohamboko.[46]

³⁹Mouláꞌ áturá pohamboko, towawine tetakaꞌ oaꞌ i toámána lántuꞌána mani tueꞌ i wongko duniáꞌ. Agáiáná ane mate miꞌi toámána, tekábáhá miꞌi hangko i katetakaꞌna iti. Towawine iti peisá mohamboko huleꞌ, asalaꞌ mampotoama tobaleilo to hampepepoináláina.

⁴⁰Agáiáná melumbuꞌ kamaroꞌana ane tiꞌara piꞌi mohamboko. Iti mouláꞌ peá polámbiꞌkuꞌ. Agáiáná kupekiri paturoꞌkuꞌ deꞌe napahaweꞌáꞌaꞌ Inaona Pueꞌ Ala to ara i lalungkuꞌ.