Read Besoa 1 Korintu 9 Bible Online

1 Korintu 9 - Besoa bible

1 Korintu 9

¹Ba niuliꞌ ripaꞌi tiꞌaraꞌaꞌ peisá mobábehi apa-apa mouláꞌ peundeꞌángkuꞌ haduduángkuꞌ? Ba niuliꞌ tiꞌaraꞌaꞌ surona Pueꞌ Iesu? Ba niuliꞌ tiꞌara mani kuita Iesu Pueꞌtaꞌ?[48] Tiꞌara paꞌi kómu miꞌi wuaꞌna pobágóꞌkuꞌ to kupobágóꞌ i Pueꞌ?

²Kehapiꞌ tauna ntániꞌna tiꞌara mopangákuꞌ kakódóꞌna surona Pueꞌ Iesu, agáiáná kómu, hangaa-ngaa nipangákuꞌ láwiꞌ kódóꞌ miꞌi to moánti Ngkóráꞌ Marasa haweꞌ i kótámi. Pepoináláimi i Pueꞌ Iesu mopatongawaꞌ ntepuꞌu kakódóꞌna suroNa.

³Deꞌe miꞌi pehániꞌkuꞌ i tauna to mosalaꞌiaꞌ.

⁴Ba niuliꞌ ripaꞌi kaiꞌ surona Pueꞌ Iesu tiꞌaraꞌangkaiꞌ hintotoꞌ molámbiꞌ pandeꞌkiꞌ ba painungkiꞌ hangko i pobágóꞌkiꞌ moánti ngkóráꞌna Pueꞌ?

⁵Ba niuliꞌ tiꞌaraꞌangkaiꞌ peisá moánti toinángkiꞌ to hampepepoinálái i polumaoángkiꞌ, nodo to rabábehi Peturuꞌ,[49] surona Pueꞌ Iesu to ntániꞌna, hai ádina Pueꞌ Iesu?[50]

⁶Ba nipekiri hangko i upu-upuna surona Pueꞌ Iesu, Baranaba hai kódóꞌ peá to hangaa-ngaa mobágóꞌ mampeliꞌ katueꞌángkiꞌ haduduángkiꞌ?[51]

⁷Hintotoꞌ ntepuꞌu ane upu-upu tauna molámbiꞌ gáláꞌraꞌ hangko i pobágóꞌraꞌ. Rápáꞌna, tiꞌara ara hadua surudadoꞌ to mobaiari sarona haduduána ane lao mombeala. Tauna to mowiáꞌ, ina peisáheꞌ mandeꞌ wuaꞌ tudaꞌ-tudaꞌna. Noꞌonoꞌ woꞌo topoewu peisá mainu uwai huhu ewuána.

⁸Ba apa to kupolaluita mouláꞌ peá pekiri tauna, ba hibali hai paturoꞌ to talámbiꞌ i lalu Paturoꞌna Musa?

⁹I lalu Paturoꞌna Musa teukiꞌ node: “Ineeꞌ nisamakuꞌ hume gapiꞌ to tangaꞌna rapopobágóꞌ. Patodáhiheꞌ mangkukuꞌ tangaꞌraꞌ molumao.” [52] Ba gapiꞌ peá to natunggái Pueꞌ,

¹⁰ba kitaꞌ woꞌo to Natunggái? Manótó apa to teukiꞌ hangkoia iti kana woꞌo i kitaꞌ. Lempóna, tauna to mobágóꞌ hangaa-ngaa molámbiꞌheꞌ gáláꞌraꞌ hangko i pobágóꞌraꞌ. Tauna to mohawuꞌ ba to mepare, mobágóꞌheꞌ láwiꞌ mohárungáheꞌ kaꞌina molámbiꞌraꞌ gáláꞌraꞌ hangko i wuaꞌ pobágóꞌraꞌ.

¹¹Kaiꞌ miꞌi deꞌe to mohawuka ngkóráꞌna Pueꞌ i lalu katueꞌmi, onoꞌ miꞌi haneꞌi hintotoꞌ ntepuꞌu ane molámbiꞌangkaiꞌ katueꞌángkiꞌ hangko i kómu.

¹²Ane araheꞌ tauna ntániꞌna to peisá molámbiꞌ saroraꞌ hangko i kómu, apa mani kaiꞌ! Peisá kipembiáꞌ sarongkiꞌ i kómu, agáiáná tiꞌara kiundeꞌ. Kehapiꞌ handaꞌ kapári to morampeangkaiꞌ, tiꞌara kipembiáꞌ ba apa peá hangko i kómu, bona tiꞌara ara to mopamasusa pekirimi duuꞌna tiꞌarapokou mepoinálái i Ngkóráꞌ Marasa to kipahaweꞌ.

¹³Tiꞌara paꞌi niꞌisá: tauna to mobágóꞌ i lalu Támbina Pueꞌ Ala molámbiꞌ pandeꞌraꞌ hangko i pobágóꞌraꞌ iti i Támbina Pueꞌ Ala. Tadulako menómbá to mokádipurá popenómbá i paintuá popenómbá, molámbiꞌheꞌ gáláꞌraꞌ hangko i popenómbá to raꞌánti tauna to handaꞌ.[53]

¹⁴Noꞌonoꞌ woꞌo paturoꞌna Pueꞌ Iesu. Ia mepárentá bona tauna to moánti Ngkóráꞌ Marasa molámbiꞌ katueꞌáraꞌ hangko i tauna to rapopahaweꞌá bámbári iti.[54]

¹⁵Mewaliꞌ, kehapiꞌ peisáꞌaꞌ membiáꞌ sarongkuꞌ i kómu, agáiáná tiꞌara iti to kubábehi. Hai ineeꞌ nipekiri tunggáiángkuꞌ moukiꞌ sura deꞌe bona kupasimbukukou ina mampoweꞌiaꞌ ba apa peá. Góeꞌ lalungkuꞌ, láwiꞌ tiꞌaraꞌaꞌ haweꞌ hangkani membiáꞌ ba apa peá hangko i kómu. Rángingkuꞌ mate haneꞌi kuliungi apa to kupakanótó miꞌi i lalungkuꞌ iti.

¹⁶Tiꞌaraꞌaꞌ peisá mampepemahile ánti pobágóꞌkuꞌ mopahaweꞌ Ngkóráꞌ Marasa, láwiꞌ nahuoꞌaꞌ Pueꞌ Ala mampopolumao bágóꞌ iti. Kupohurewuꞌ ane tiꞌaraꞌaꞌ mopahaweꞌ Ngkóráꞌ Marasa iti!

¹⁷Ane rápáꞌna mopahaweꞌaꞌ Ngkóráꞌ Marasa ánti peundeꞌángkuꞌ haduduángkuꞌ, hangaa-ngaa raweꞌiaꞌ sarongkuꞌ. Agáiáná tiꞌara noꞌonoꞌ, láwiꞌ Pueꞌ Ala miꞌi to mohuoꞌaꞌ mampopolumao bágóꞌ deꞌe. Kuꞌundeꞌ ba tiꞌara, hangaa-ngaa kupahaweꞌ Ngkóráꞌ Marasa, láwiꞌ iti miꞌi bágóꞌkuꞌ to naweꞌiaꞌ Pueꞌ Ala.

¹⁸Ane noꞌonoꞌi, apa miꞌi to mewaliꞌ sarongkuꞌ? To kurekeꞌ sarongkuꞌ ia miꞌi kagóeꞌna lalungkuꞌ ánti pobágóꞌkuꞌ moánti Ngkóráꞌ Marasa to kupahaweꞌ mbero i upu-upu tauna, hai tiꞌara kupembiáꞌ sarongkuꞌ iti i tauna to kupopahaweꞌá Ngkóráꞌ Marasa.

¹⁹Tiꞌaraꞌaꞌ huoꞌána tauna, onoꞌ miꞌi haneꞌi peisáꞌaꞌ mouláꞌ peundeꞌángkuꞌ haduduángkuꞌ. Agáiáná kehapiꞌ noꞌonoꞌ, kutunggái mewaliꞌ nodo huoꞌáraꞌ upu-upu tauna. Kubábehi iti bona i popahaweꞌkuꞌ Ngkóráꞌ Marasa, tetámbái tauna to mepoinálái i Kerisitu.

²⁰Ane kupahaweꞌ Ngkóráꞌ Marasa i toIahudiꞌ, mewaliꞌaꞌ woꞌo nodo hadua toIahudiꞌ, bona handaꞌ toIahudiꞌ mepoinálái i Kerisitu. Ane hingkakaniaꞌ hai tauna to mampeuláꞌi Paturoꞌna Musa, kupeuláꞌi woꞌo paturoꞌna iti. Kehapiꞌ tiꞌaraꞌaꞌ tetakaꞌ i Paturoꞌna Musa, agáiáná kupeuláꞌi ntepuꞌu bona tauna iti tediiꞌ laluraꞌ mepoinálái i Kerisitu.

²¹Ane kupahaweꞌ Ngkóráꞌ Marasa i tauna to tiꞌara mangisá Paturoꞌna Musa, mewaliꞌaꞌ woꞌo nodo hadua tauna to tiꞌara mampeuláꞌi paturoꞌna iti, bona kudureiheꞌ mepoinálái i Kerisitu. Agáiáná ineeꞌ riꞌi rauliꞌ tiꞌara kupeuláꞌi hawaꞌna Pueꞌ Ala. Mengkoruꞌaꞌ oaꞌ i hawaꞌna Kerisitu.

²²Ane kuporángáheꞌ to tiꞌara mani maróhó pepoináláiraꞌ, kupeuláꞌiheꞌ woꞌo, bona kudureiheꞌ meuláꞌ i Kerisitu. Mewaliꞌ upu-upu tauna to kupohidupaꞌá, kupeliꞌ rárá bona mewaliꞌaꞌ nodo hira, bona ane peisái, araheꞌ to kuánti mepoinálái i Kerisitu.

²³Upu-upu iti kubábehi bona tetámbái tauna to mepoinálái i Ngkóráꞌ Marasa, hai bona molámbiꞌaꞌ woꞌo pewátiꞌ[55] hingkakani hai hira.

²⁴Halalu-halalu, niꞌisá ane tauna momberipoꞌ, handaꞌ tauna to melangka, agáiáná hadua peá to molámbiꞌ parasee. Kómu woꞌo peisá rapándiriꞌ nodo tauna to momberipoꞌ: hangaa-ngaa nipári-pári mampeuláꞌi peundeꞌána Pueꞌ Ala bona molámbiꞌkou háwángina.

²⁵Tauna to momberipoꞌ iti, hangaa-ngaa molati ntepuꞌuheꞌ hai hangaa-ngaa mantahaheꞌ i apa peá, bona molámbiꞌheꞌ parasee. Parasee iti, ia miꞌi tatali taweꞌngkau to ina malau peá. Agáiáná kitaꞌ, háwángina to talámbiꞌ hangko i Pueꞌ Ala tiꞌara ina mokahópóꞌá.

²⁶Tauna to momberipoꞌ tiꞌaraheꞌ melangka mbero, agáiáná ara tunggáiáraꞌ. Tauna to mombedángguruꞌ, tiꞌaraheꞌ mampombedángguruꞌá babaio. Noꞌonoꞌ woꞌo kódóꞌ, peisáꞌaꞌ rapándiriꞌ nodo tauna to melangka ba to mombedángguruꞌ, láwiꞌ tiꞌaraꞌaꞌ mobágóꞌ mbero. Apa to kubábehi, kubábehi bona háwángina pobágóꞌkuꞌ ina kulámbiꞌ.

²⁷Kupakaróhó wátángkuꞌ hai kumeeꞌ peundeꞌána lalungkuꞌ bona mantahaꞌaꞌ, bona ane roo kupahaweꞌ Ngkóráꞌ Marasa i tauna ntániꞌna, ineeꞌ paꞌi, kódóꞌ miꞌi to tiꞌara molámbiꞌ háwángina.