Read Besoa 2 Korintu 11 Bible Online

2 Korintu 11 - Besoa bible

2 Korintu 11

¹Mewaliꞌ halalu-halalu, kupembiáꞌ bona sabaraꞌkou mampehádingi laluitangkuꞌ, kehapiꞌ molaluitaꞌaꞌ nodo tobebe.

²Mohiriꞌaꞌ láwiꞌ araheꞌ tauna to mampoinao moalakou hangko i Kerisitu. Agáiáná kamohiriꞌkuꞌ deꞌe hintotoꞌ hai peundeꞌána Pueꞌ Ala,[69] láwiꞌ kódóꞌ miꞌi to rungu-runguna moántikou mepoinálái i Kerisitu. Peundeꞌángkuꞌ, bona mepoináláikou oaꞌ i Hia, láwiꞌ nodokou ánáꞌntawine[70] to ina kupopohamboko hai hadua tobaleilo, hai tobaleilo iti ia miꞌi Kerisitu.[71]

³Agáiáná kupembiáꞌ bona tiꞌarakou rapakanawoꞌ, álána tiꞌarapokou mepoinálái i Kerisitu hangko i lalumi ntepuꞌu. Araheꞌ tauna to mampoinao bona mampeuláꞌikou paturoꞌraꞌ to mosisalaꞌ hai pepoináláimi i Kerisitu. Hira nodoheꞌ lelótó mokeloꞌ Hewá hai laluitana to meákálángi.

⁴Kómu, góeꞌkou motarima tauna to haweꞌ, to mopaturoꞌkou kana i Iesu, kehapiꞌ paturoꞌraꞌ tiꞌara hibali hai apa to kipaturoꞌákou. Moapa riꞌi haneꞌi niundeꞌ mampehádingi laluitaraꞌ? Ba niundeꞌ paꞌi motarima inao[72] to montaniꞌ hai Inao to Magasaꞌ to nitarima miꞌi? Ba niundeꞌ paꞌi motarima paturoꞌ to mosisalaꞌ hai Ngkóráꞌ Marasa to nipoinálái miꞌi? Magampaꞌ mpiiꞌkou rapakanawoꞌ. Halalu-halalu, ineeꞌkou noꞌonoꞌ!

⁵Guru-guru iti rarekeꞌ “suro to melumbuꞌ kamaroꞌaraꞌ”, agáiáná kupembiáꞌ i kómu, hangaa-ngaa nipeuláꞌi paturoꞌkuꞌ, láwiꞌ kódóꞌ tiꞌaraꞌaꞌ i wóiꞌ hangko i hira.

⁶Kehapiꞌ tiꞌaraꞌaꞌ mapánde molaluita, agáiáná mokana i paturoꞌ to toꞌu, kuisá ntepuꞌu. Hai paturoꞌ iti nihádi hai niꞌita miꞌi moliu upu-upu bábehiángkiꞌ i oloꞌmi.

⁷I tempóngkuꞌ mopahaweꞌ Ngkóráꞌ Marasa i kómu iaꞌo, tiꞌaraꞌaꞌ membiáꞌ sarongkuꞌ i kómu kehapiꞌ hantóiꞌ peá. Mengkaiwóiꞌaꞌ hai mobágóꞌaꞌ hai taengkuꞌ[73] bona kupahaweꞌ bámbári to moánti pewátiꞌ i kómu. Ba masalaꞌaꞌ halalu-halalu, láwiꞌ tiꞌaraꞌaꞌ membiáꞌ sarongkuꞌ i kómu?

⁸Tangaꞌkuꞌ mani i kótámi iaꞌo, toSarani to araheꞌ i kótá ntániꞌna mopakatuheꞌ dóiꞌ i kódóꞌ. Peisá kuꞌuliꞌ: hira riꞌi to kupakarugiꞌ láwiꞌ kómu riꞌi to kutulungi.

⁹I tempó iti, ara woꞌo kamakuraꞌkuꞌ, agáiáná tiꞌarakou kupamapári, láwiꞌ araheꞌ halaluntaꞌ to haweꞌ hangko i tampoꞌ Makedonia moánti dóiꞌ to mopagánái apa to kuparaluu. Kupeliꞌ oaꞌ rárá, bona tiꞌarakou kupamapári, hai iti to ina kubábehi oaꞌ.

¹⁰Toꞌu ntepuꞌu laluitangkuꞌ deꞌe, Kerisitu to moisá lalungkuꞌ. Góeꞌ lalungkuꞌ láwiꞌ tiꞌaraꞌaꞌ membiáꞌ sarongkuꞌ i kómu ba i heáná peá to toroꞌ i tampoꞌ Akaia. Kagóeꞌna lalungkuꞌ deꞌe tiꞌara ina tebáliki.

¹¹Moapa riꞌi haneꞌi molaluitaꞌaꞌ noꞌonoꞌ? Ba niuliꞌ tiꞌarakou kupokaꞌahiꞌ halalu-halalu? Pueꞌ Ala moisá kamaꞌahiꞌna lalungkuꞌ i kómu.

¹²Apa to kubábehi iti, ina kubábehi oaꞌ. Tiꞌaraꞌaꞌ ina membiáꞌ sarongkuꞌ i kómu. Araheꞌ tauna to mampepemahile to membiáꞌ saroraꞌ. Motóiáheꞌ oaꞌ wátáraꞌ haduduáraꞌ. Agáiáná kódóꞌ, tiꞌaraꞌaꞌ mau membiáꞌ sarongkuꞌ i kómu, bona tiꞌaraheꞌ peisá manguliꞌ hibali pobágóꞌkiꞌ.

¹³Tauna to noꞌonoꞌ, hira miꞌi suro to mepakanawoꞌ láwiꞌ mebagiuꞌheꞌ. Hira mobágóꞌheꞌ i oloꞌmi hai rauliꞌ kahirana surona Kerisitu, mole modongkoꞌheꞌ!

¹⁴Bábehiáraꞌ iti ineeꞌ miꞌi tapowuli, láwiꞌ mouláꞌheꞌ bábehiána Datu Tokadake[74] to mobáliki wátána mewaliꞌ nodo hadua malaꞌeka to mewangkaꞌ.

¹⁵Onoꞌ haneꞌi ineeꞌ miꞌi nipowuli ane topobágóꞌna Datu Tokadake motámbungiheꞌ bábehiáraꞌ to kadake, bona raita hibali hai topobágóꞌna Pueꞌ Ala. Agáiáná kahópóꞌána, ina molámbiꞌheꞌ háwángina to hintotoꞌ hai bábehiáraꞌ.

¹⁶Halalu-halalu, kupembiáꞌ wopiꞌi bona ineeꞌ nipekiri kódóꞌ deꞌe tobebe. Agáiáná ane ara manikou to manguliꞌ kódóꞌ deꞌe tobebe, sabaraꞌkou hampaiꞌ, bona peisáꞌaꞌ motóiá wátángkuꞌ haduduángkuꞌ.

¹⁷Katoꞌuána, laluitangkuꞌ deꞌe tiꞌara mouláꞌ párentána Pueꞌ Ala, agáiáná ina molaluitaꞌaꞌ nodo tauna tobebe, láwiꞌ ina kupomahile wátángkuꞌ haduduángkuꞌ.

¹⁸Handaꞌ tauna mampepemahile mokana i katueꞌraꞌ i duniáꞌ deꞌe. Mewaliꞌ deꞌe-deꞌe kódóꞌ woꞌo ina motóiáꞌaꞌ wátángkuꞌ haduduángkuꞌ.

¹⁹Niuliꞌ kakómuna to mapánde, agáiáná nipokagóeꞌ ntepuꞌu paturoꞌraꞌ tauna to bebe!

²⁰Ane araheꞌ guru to mampohawiꞌkou, nitarimaheꞌ mpakaroꞌa. Ane araheꞌ to mopakanawoꞌkou ba mobagiuꞌkou, nitarimaheꞌ woꞌo. Ane araheꞌ to mampepemahile ba motampedaꞌkou, nitódihá peá.

²¹Ba niuliꞌ riꞌi hangaa-ngaa mahiliaꞌ láwiꞌ tiꞌaraꞌangkaiꞌ pebáiꞌ mampeuláꞌi bábehiáraꞌ iti? Agáiáná ane báiꞌheꞌ motóiá wátáraꞌ haduduáraꞌ, kódóꞌ woꞌo hangaa-ngaa báiꞌaꞌ molaluitaꞌaꞌ nodo tobebe hai motóiá wátángkuꞌ haduduángkuꞌ.

²²Ane rauliꞌi guru iti toIberaniheꞌ, kódóꞌ woꞌo toIberaniaꞌ! Ba rauliꞌ hira iti toSáráeliꞌ,[75] kódóꞌ woꞌo toSáráeliꞌaꞌ. Noꞌonoꞌ woꞌo ane rauliꞌi hira pemuleꞌánaheꞌ Burahima, kódóꞌ woꞌo pemuleꞌánaꞌaꞌ Burahima.

²³Ba rauliꞌ kahirana topobágóꞌnaheꞌ Kerisitu? Pelumbuꞌna miꞌi kódóꞌ! Polaluitangkuꞌ deꞌe nodo tauna to magila, agáiáná katongawaꞌána, madota maniaꞌ mobágóꞌ haneꞌi hira. Handaꞌ káningkuꞌ ratarungku,[76] handaꞌ káningkuꞌ rapopeahiahiꞌ rumihi,[77] hai handaꞌ woꞌo káningkuꞌ ina mate.[78]

²⁴Lima miꞌi káningkuꞌ rahuku toIahudiꞌ; rahepeaꞌ tálu puloꞌna hai hahioꞌ kánina.

²⁵Tálu woꞌo káningkuꞌ rahuku toRoma; rabóbáꞌaꞌ hai laiꞌ.[79] Hangkani woꞌo rawatuiaꞌ tauna to mampoinao mopapateaꞌ.[80] Tálu miꞌi káningkuꞌ makawu i kapalaꞌ tahiꞌ.[81] Hangkani lanto-lantoaꞌ i wongko tahiꞌ hambengiá hai hangaloá.

²⁶I lalu polumaoángkuꞌ, handaꞌ káningkuꞌ molámbiꞌ kapári: mowetaꞌaꞌ i uwai to kebuꞌu, mampohidupaꞌáꞌaꞌ toperampaꞌ, rapopeahiahiꞌaꞌ toIahudiꞌ, rapopeahiahiꞌaꞌ tauna to tiꞌara toIahudiꞌ. Molámbiꞌaꞌ rugiꞌ i lalu kótá. Molámbiꞌaꞌ rugiꞌ i rawa kótá. Molámbiꞌaꞌ rugiꞌ i wongko tahiꞌ. Molámbiꞌaꞌ woꞌo rugiꞌ hangko i tauna to manguliꞌ kahirana halalu hampepepoináláingkuꞌ, agáiáná katoꞌuána tiꞌara!

²⁷I lalu pampopolumaongkuꞌ bágóꞌna Pueꞌ, mobágóꞌaꞌ i sukáꞌna pebukuángkuꞌ. Handaꞌ kánina tiꞌaraꞌaꞌ peisá letaꞌ, marimiaꞌ hai mangkadoꞌuaꞌ. Handaꞌ kánina tiꞌara ara pandeꞌkuꞌ, melengiꞌ kuhádi, hai hangkani-hangkani tiꞌara gáná waruꞌkuꞌ.

²⁸Pelumbuꞌna mani hangko ionoꞌ, to kupomapári, alo-alona mampekiriaꞌ noumbá katueꞌraꞌ toSarani i jemaꞌa-jemaꞌa.

²⁹Ane araheꞌ halalu hampepepoináláingkuꞌ to masusa laluraꞌ ánti kamaledeꞌna pepoináláiraꞌ, masusa woꞌo lalungkuꞌ. Ane araheꞌ to rapakanawoꞌ i lalu dósá, mabukoꞌaꞌ i tauna to mepakanawoꞌ iti.

³⁰Ane hangaa-ngaa motóiá maniaꞌ wátángkuꞌ haduduángkuꞌ, hangaa-ngaa góeꞌaꞌ ánti kamaledeꞌkuꞌ.[82]

³¹Upu-upu to kuꞌuliꞌ ininá, toꞌu aha, tiꞌaraꞌaꞌ modongkoꞌ. Pueꞌ Ala, Umána Pueꞌ Iesu, Ia miꞌi sabiꞌkuꞌ! Tatóiá miꞌi duuꞌna i rue-ruena!

³²I tempóngkuꞌ ara i kótá Damasiꞌ, mágáuꞌ sulewátána Datu Areta mohuoꞌ surudadoꞌna mokámpái babaꞌá bente kótá bona rahakaꞌaꞌ.

³³Agáiáná rángángkuꞌ motulungiaꞌ. Rapusaꞌaꞌ i lalu kárándi hai rauluaꞌ moliu i sungkekeꞌ i bente kótá, onoꞌ miꞌi haneꞌi tekábáháꞌaꞌ.[83]