Read Besoa 2 Korintu 2 Bible Online

2 Korintu 2 - Besoa bible

2 Korintu 2

¹Mewaliꞌ, kuꞌuliꞌ i lalungkuꞌ: ineeꞌaꞌ sieruꞌ lao moweoꞌkou, láwiꞌ tiꞌara kuꞌundeꞌ mopamapári wopiꞌi lalumi, nodo to mewaliꞌ hangkoia i tempómi kuweoꞌ.

²Láwiꞌ ane kupakasusa wopiꞌi lalumi, heáná paꞌi to kuhárungá ina mopalindóaꞌ? Bateꞌna peá kómu.

³Onoꞌ tunggáiángkuꞌ haneꞌi kupakatu miꞌi hambuaꞌ sura i kómu hangkoia,[8] bona ane haweꞌaꞌ, tiꞌara piꞌi nipakasusa lalungkuꞌ. Láwiꞌ katoꞌuána, kómu riꞌi to hangaa-ngaa mopagóeꞌ lalungkuꞌ. Hai kuisá, ane góeꞌaꞌ, kómu woꞌo ina góeꞌ.

⁴I tempóna kuꞌukiꞌ sura iti hangkoia, tudoꞌ uwai mátángkuꞌ láwiꞌ mapári ntepuꞌu kuhádi hai kupokaraoꞌ inao. Tiꞌara kuꞌukiꞌ sura iti bona kupakasusa lalumi, agáiáná sura iti kuꞌukiꞌ bona niꞌisá noumbá kamahilena ahiꞌkuꞌ i kómu.

⁵Deꞌe-deꞌe kuꞌundeꞌ moukiꞌ mokana i hadua tauna i oloꞌmi to masalaꞌ ntepuꞌu. Bábehiána iti tiꞌara peá kódóꞌ to napakasusa, agáiáná mopakasusa woꞌo hanggááꞌ hangko i kómu. Tiꞌara kuꞌundeꞌ motátámbái apa to pewaliꞌ.

⁶Handaꞌkou to mobutusi tauna iti hangaa-ngaa rahuku, hai kuhángáꞌáꞌákou, gáná miꞌi kamaruena pehukumi i hia.

⁷Deꞌe-deꞌe hangaa-ngaa niámpungi. Nipalindó laluna tauna iti, bona tiꞌara gaga masusa pekirina duuꞌna tiꞌara piꞌi ara pehárungána.

⁸Onoꞌ miꞌi haneꞌi kupembiáꞌ bona nipatongawaꞌ wopiꞌi kamaꞌahiꞌmi i hia.

⁹I lalu surangkuꞌ to kupakatu miꞌi i kómu,[9] kuhuoꞌkou mohuku tauna iti. Tunggáiángkuꞌ moukiꞌ sura iti, bona kupampeitaikou, ba ina nipeuláꞌi upu-upu hawaꞌkuꞌ ba tiꞌara, hai tongawaꞌ nipeuláꞌi ntepuꞌu miꞌi hawaꞌkuꞌ iti.

¹⁰Agáiáná deꞌe-deꞌe kuhángáꞌáꞌákou: heáná to niámpungi salaꞌna, kódóꞌ woꞌo ina moámpungi.[10] Ane ara salaꞌna i kódóꞌ, kuámpungi i lindoꞌna Kerisitu! Kubábehi noꞌonoꞌ ánti kakómuna.

¹¹Onoꞌ miꞌi haneꞌi kuꞌuliꞌ, hangaa-ngaa taꞌámpungi tauna to masalaꞌ, bona tiꞌarakeꞌ moweꞌi tempó i Datu Tokadake monangikeꞌ, láwiꞌ taisá: Datu Tokadake iti mapánde moákálángi tauna bona manawoꞌheꞌ i lalu dósá.[11]

¹²Kaliliuána halalu-halalu, hangkoia i kapohuꞌkuꞌ hangko i kótá Epesu, laoaꞌ i kótá Teroasi[12] moánti Ngkóráꞌ Marasa kana i Kerisitu. I kahaweꞌkuꞌ i Teroasi, Pueꞌ mampobungkáhiáꞌaꞌ rárá bona mobágóꞌaꞌ ionoꞌ.

¹³Agáiáná kehapiꞌ noꞌonoꞌ, tiꞌara tinda lalungkuꞌ, láwiꞌ Titu tiꞌara mani mesuleꞌ moánti bámbári hangko i kómu. Onoꞌ miꞌi haneꞌi mesabiꞌmoꞌ i halalungkuꞌ to ara i Teroasi, bona maiaꞌ ieneꞌ i tampoꞌ Makedonia mampeliꞌ Titu.

¹⁴Agáiáná kuꞌuliꞌ handaꞌ kamaroꞌana i Pueꞌ Ala, láwiꞌ ánti pohintuwuꞌtaꞌ hai Kerisitu, menangikeꞌ, hai Ia mewaliꞌ tadulakontaꞌ to moteteꞌkeꞌ oaꞌ. Iumbá peá kalaoángkiꞌ, kipahaweꞌ Ngkóráꞌ Marasa i upu-upu tauna bona peisáheꞌ woꞌo moisá Pueꞌ Ala. Ngkóráꞌ Marasa iti peisá rapándiriꞌ nodo lana to mawongi.

¹⁵Ánti popahaweꞌkiꞌ bámbári kana i Kerisitu, onoꞌ miꞌi haneꞌi mawongiangkaiꞌ i peitána Pueꞌ Ala, hai i oloꞌraꞌ upu-upu tauna. I tauna to mampoinálái Ngkóráꞌ Marasa, rapándiriꞌangkaiꞌ nodo dupaꞌ to mawongi, láwiꞌ kipahaweꞌáheꞌ bámbári to moántiheꞌ i katueꞌ to maroꞌa to tiꞌara mokahópóꞌá. Agáiáná i tauna to mosápuáka Ngkóráꞌ Marasa, kaiꞌ to moánti Ngkóráꞌ Marasa iti, rapándiriꞌangkaiꞌ nodo mau tomate, láwiꞌ kipahaweꞌáheꞌ kaꞌina nahukuraꞌ Pueꞌ Ala haweꞌ i rue-ruena. Heáná paꞌi to nabuku mampopolumao bágóꞌ deꞌe? {Ane róhóngkiꞌ peá haduduángkiꞌ, tiꞌara kibuku.}

¹⁷Láwiꞌ kaiꞌ, tiꞌaraꞌangkaiꞌ nodo tauna to mampeliꞌ peá porasiꞌáraꞌ hangko i popahaweꞌraꞌ ngkóráꞌna Pueꞌ. Ngkáliꞌna riꞌi, láwiꞌ kiꞌisá Pueꞌ Ala to mopileꞌiangkaiꞌ mampopolumao bágóꞌNa, hai Ia mampeita pobágóꞌkiꞌ iti, onoꞌ miꞌi haneꞌi kipahaweꞌ ngkóráꞌna Pueꞌ hangko i lalungkiꞌ ntepuꞌu ánti pohintuwuꞌkiꞌ hai Kerisitu.