Read Besoa 2 Korintu 9 Bible Online

2 Korintu 9 - Besoa bible

2 Korintu 9

¹Katoꞌuána, tiꞌara piꞌi paraluu kuꞌukiꞌákou sura kana i dóiꞌ to ina kiánti lao i halalu hampepepoináláintaꞌ i kótá Ierusale.

²Kuisá miꞌi niundeꞌ ntepuꞌu motulungiheꞌ, onoꞌ miꞌi haneꞌi kutóiákou i lindoꞌraꞌ toMakedonia, kuhángáꞌáheꞌ, “Ane halaluntaꞌ toKorintu to toroꞌheꞌ i tampoꞌ Akaia,[62] mantepuꞌu pare to liu, timamaheꞌ mopakatu dóiꞌ i halalu hampepepoináláintaꞌ to meahiahiꞌ tueꞌraꞌ.” Mewaliꞌ, karahádina peá kamaꞌahiꞌna lalumi, tediiꞌ miꞌi woꞌo laluraꞌ toMakedonia, álána handaꞌheꞌ woꞌo to mampeweꞌi petulungiraꞌ.

³Agáiáná kehapiꞌ noꞌonoꞌ, kuhuoꞌ maniheꞌ Titu hai rodua rángána moioru lao i kómu, bona motulungikou morámpu dóiꞌ. Hai kuhárungá ane haweꞌaꞌ, upu-upuna iti ina timama miꞌi, bona laluitangkuꞌ motóiákou tiꞌara rarekeꞌ toMakedonia dongkoꞌkuꞌ peá, láwiꞌ roomoheꞌ kuhángáꞌá katimamami miꞌi morámpu dóiꞌ.

⁴Láwiꞌ ane haweꞌheꞌ toMakedonia to mamporángáꞌaꞌ lao i kómu, hai ane rápáꞌna tiꞌara mani terámpu dóiꞌ petulungimi, ina rumihi kamahilingkiꞌ, láwiꞌ roomokou kitóiá i lindoꞌraꞌ. Hai kómu woꞌo ina mahilikou.

⁵Onoꞌ miꞌi haneꞌi kuꞌuliꞌ i lalungkuꞌ, rángina miꞌi kuhuoꞌheꞌ Titu hai rodua rángána lao moioru, bona dóiꞌ to nidándi miꞌi hangkoia timama miꞌi. Mewaliꞌ, ane haweꞌaꞌ i bókóꞌ, ina timama mpuꞌu miꞌi dóiꞌ iti. Ane noꞌonoꞌi, ina tongawaꞌ i upu-upu tauna, dóiꞌ iti nipeweꞌi hangko i kabulána lalumi, tiꞌara ánti pepasimbuku.

⁶Nipailalu pándiriꞌ deꞌe: apa to tatudaꞌ, iti woꞌo to tapupu. Tauna to mantudaꞌ hantóiꞌ peá, hantóiꞌ woꞌo to ina napupu. Tauna to mantudaꞌ handaꞌ, handaꞌ woꞌo to ina napupu.

⁷Rángina miꞌi hadua-hadua tauna mampeweꞌi popenómbána hangko i sukáꞌna kabulána laluna. Ineeꞌkou mampeweꞌi hangko i kamatimina lalumi, hai ineeꞌkou mampeweꞌi ánti karapasimbukumi, láwiꞌ Pueꞌ Ala mampokaꞌahiꞌ tauna to mampeweꞌi hangko i kagóeꞌ lalu.[63]

⁸Hai Pueꞌ Ala ina mampoweꞌikou handaꞌ pewátiꞌ duuꞌna tiꞌara piꞌi ara kamakuraꞌmi, bona nibuku mampopolumao upu-upu bágóꞌ to maroꞌa, motulungi hángká rángámi.

⁹Láwiꞌ ara teukiꞌ i lalu Sura Magasaꞌ to manguliꞌ: “Ia mogáláꞌ-gáláꞌ pewátiꞌ i tauna to meahiahiꞌ tueꞌraꞌ. Kamaroꞌana laluNa tiꞌara mokahópóꞌá.” [64]

¹⁰Pueꞌ Ala mampoweꞌi tinudaꞌ i topohawuꞌ, hai hangko i tinudaꞌ iti, Ia mampoweꞌikeꞌ pandeꞌ. Noꞌonoꞌ woꞌo, Pueꞌ Ala ina motámbái apa to ara i kómu, bona tetámbái woꞌo kamaroꞌana lalumi motulungi tauna.

¹¹Kómu ina Napoporasiꞌkou i pákáꞌ-pákáꞌna, bona hangko i kabulána lalumi, peisákou motulungi tauna ntániꞌna. Mewaliꞌ, ane kiánti popenómbámi i halalu hampepepoináláintaꞌ to meahiahiꞌ tueꞌraꞌ, handaꞌ tauna ina manguliꞌ handaꞌ kamaroꞌana i Pueꞌ Ala.

¹²Popenómbámi iti ina mopagánái kamakuraꞌraꞌ tauna to ara i jemaꞌa i Ierusale, hai tiꞌara iti peá. Ánti kabulána lalumi, handaꞌ tauna ina manguliꞌ handaꞌ kamaroꞌana i Pueꞌ Ala.

¹³Ane tauna moita popenómbámi to kiánti iti, ina motóiáheꞌ Pueꞌ Ala láwiꞌ ánti kamaroꞌana lalumi, ina nipatongawaꞌ kamaróhóna pepoináláimi i Ngkóráꞌ Marasa kana i Kerisitu, hai ina tongawaꞌ woꞌo pengkoruꞌmi i hawaꞌNa. Ina motóiáheꞌ Pueꞌ Ala, láwiꞌ bulá lalumi motulungiheꞌ toSarani i Ierusale hai tauna ntániꞌna.

¹⁴Hai hira ina mampekakaeákou woꞌo hangko i laluraꞌ ntepuꞌu to bukeꞌ ahiꞌ, láwiꞌ kamahilena ahiꞌna Pueꞌ Ala mokale i lalumi.

¹⁵Tauliꞌ handaꞌ kamaroꞌana i Pueꞌ Ala, láwiꞌ mahile ntepuꞌu kabulána laluNa i kitaꞌ, hai iti melumbuꞌ ntepuꞌu hangko i apa to peisá tapekiri!