Read Besoa Galatia 1 Bible Online

Galatia 1 - Besoa bible

Galatia 1

¹Molámbiꞌ Jemaꞌa i tampoꞌ Galatia Sura deꞌe hangko i kódóꞌ Paulu, surona Pueꞌ Iesu. Kupakatu sura deꞌe i kómu upu-upu jemaꞌa-jemaꞌa i Galatia. Kódóꞌ hai upu-upu halalu hampepepoináláingkuꞌ to ara ieneꞌ, mopahaweꞌangkaiꞌ tabeángkiꞌ hai kipekakaeákou i Pueꞌ Ala Umántaꞌ hai i Pueꞌtaꞌ Iesu Kerisitu, bona mowátiꞌkou hai mampoweꞌikou roꞌa ngkatueꞌ. Bona niꞌisá halalu-halalu, tiꞌara tauna to mohuoꞌaꞌ, hai tiꞌara woꞌo tauna to mopileꞌiaꞌ mewaliꞌ suro, agáiáná Iesu Kerisitu hai Pueꞌ Ala Umántaꞌ to mopatueꞌ huleꞌ Iesu hangko i kapate, Ia miꞌi to mopileꞌiaꞌ mewaliꞌ suroNa.

⁴Ánti kamadósántaꞌ, Pueꞌ Iesu mampehuhuꞌá wátáNa rapapate bona tekábáhákeꞌ hangko i kuasaꞌ duniáꞌ to kadake deꞌe. Nabábehi noꞌonoꞌ láwiꞌ iti miꞌi peundeꞌána Pueꞌ Ala Umántaꞌ.

⁵Tatóiá Pueꞌ Ala duuꞌna i rue-ruena. Ami.

⁶Kupowuli ntepuꞌu halalu-halalu! Tiꞌara manikou marue nakióꞌ Pueꞌ Ala ánti kabulána laluna Kerisitu bona mampoináláikou Ngkóráꞌ Marasa, agáiáná deꞌe-deꞌe tiꞌara wopakou mengkoruꞌ i Pueꞌ Ala, mouláꞌrakou paturoꞌ ntániꞌna to rauliꞌ woꞌo tauna “Bámbári to Maroꞌa”, mole riꞌi tiꞌara toꞌu.

⁷Katoꞌuána, tiꞌara ara paturoꞌ ntániꞌna to peisá mopakanótóákeꞌ noumbá rárána molámbiꞌ katehómpóꞌ to hangko i Pueꞌ Ala, bateꞌna peá Ngkóráꞌ Marasa to kipahaweꞌámokou. Agáiáná araheꞌ tauna to haweꞌ i oloꞌmi to mopawulikou moliu paturoꞌraꞌ to salaꞌ. Mampoinaoheꞌ mobáliki Ngkóráꞌ Marasa kana i Kerisitu.

⁸Agáiáná kuhángáꞌáꞌákou, heáná peá to moánti ngkóráꞌ marasa to mosisalaꞌ hai Ngkóráꞌ Marasa to kipahaweꞌámokou, hangaa-ngaa nahukuheꞌ Pueꞌ Ala! Mogalo riꞌi kaiꞌ ba malaꞌeka hangko i surugáꞌ, bateꞌkiꞌ nahuku Pueꞌ Ala!

⁹Kihángáꞌáꞌámokou hangkoia i tempóngkiꞌ mani hingkakani hai kómu, hai deꞌe-deꞌe kuhángáꞌá wopakou hangkani: ane ara tauna to moánti ngkóráꞌ marasa to montaniꞌ hangko i to nitarima miꞌi, bateꞌna nahukuheꞌ Pueꞌ Ala!

¹⁰Mewaliꞌ halalu-halalu, ara to manguliꞌ kupehukáꞌ peá modiiꞌ laluraꞌ tauna bona ratóiáꞌaꞌ, agáiáná katoꞌuána, to kupoinao ntepuꞌu, molámbiꞌraꞌaꞌ petóiá hangko i Pueꞌ Ala. Ara woꞌo to manguliꞌ, kódóꞌ mampoinao peaꞌ mopagóeꞌ laluraꞌ tauna. Agáiáná ane iti peundeꞌángkuꞌ, lempóna, tiꞌaraꞌaꞌ peisá mewaliꞌ huoꞌána Kerisitu.

¹¹Bona niꞌisá halalu-halalu, Ngkóráꞌ Marasa to kuánti tiꞌara mesupaꞌ peá hangko i pekiri tauna.

¹²Ngkóráꞌ Marasa iti, tiꞌara kutarima hangko i tauna, tiꞌara woꞌo ara tauna to mopaturoꞌáꞌaꞌ, agáiáná Iesu Kerisitu haduduáNa to mopahaweꞌ Ngkóráꞌ Marasa iti i kódóꞌ.

¹³Niꞌisá halalu-halalu, noumbá katueꞌkuꞌ hangkoia i pouláꞌkuꞌ agama Iahudiꞌ. Handaꞌ ntepuꞌuheꞌ rángángkuꞌ to mouláꞌ agama Iahudiꞌ, agáiáná kódóꞌ miꞌi to maróhó ntepuꞌu pampeuláꞌingkuꞌ upu-upu áturá agama, láwiꞌ hangko i lalungkuꞌ ntepuꞌu mampeuláꞌiaꞌ ádáraꞌ toiorungkiꞌ.[1] Hai i tempó iti, kupári-pári mampopeahiahiꞌheꞌ upu-upu toSarani to mewaliꞌ taunána Pueꞌ Ala, láwiꞌ kupoinaoheꞌ kupatuna.[2]

¹⁵Agáiáná i tempó iti, Pueꞌ Ala mampopaisáꞌáꞌaꞌ kaheánána ÁnáꞌNa, bona kupahaweꞌ bámbári kana i ÁnáꞌNa iti i tauna to tiꞌaraheꞌ toIahudiꞌ, láwiꞌ Pueꞌ Ala mopileꞌimoꞌ hangko tiꞌara maniaꞌ rapoánáka, hai i tempó to Napakanótó miꞌi, ánti kabulána laluNa, Ia mokióꞌaꞌ bona mewaliꞌaꞌ suroNa. I kaNakióꞌkuꞌ, tiꞌara kupembiáꞌ bona napaturoꞌaꞌ tauna.

¹⁷Tiꞌaraꞌaꞌ woꞌo lao i kótá Ierusale meguru i hira to ioruheꞌ mewaliꞌ surona Pueꞌ Iesu, agáiáná laoaꞌ sieruꞌ i tampoꞌ Áráꞌ, hangko mesuleꞌraꞌaꞌ lao i kótá Damasiꞌ.

¹⁸Tálu parena hangko ionoꞌ, hangko laoraꞌaꞌ i Ierusale bona mampohidupaꞌá Peturuꞌ. Toroꞌaꞌ hingkakani hai ia hampuloꞌ hai lima alona.[3]

¹⁹Tempó iti, kupohidupaꞌá woꞌo Iakobu ádina Pueꞌ Iesu.[4] Agáiáná surona Pueꞌ Iesu to ntániꞌna, tiꞌaraheꞌ kupohidupaꞌá.

²⁰Apa to kuꞌukiꞌ deꞌe bateꞌna toꞌu. Pueꞌ Ala to mangisá lalungkuꞌ!

²¹Roo onoꞌ, liliuaꞌ pohuꞌ hangko i Ierusale lao i tampoꞌ Siria hai Kilikia.

²²Tiꞌaraꞌaꞌ lao moweoꞌ jemaꞌa-jemaꞌa i tampoꞌ Iudá, onoꞌ miꞌi haneꞌi tiꞌara maniaꞌ haweꞌ hangkani raita.

²³Mohádi peheꞌ bámbári to manguliꞌ, “Iatoliu mampopeahiahiꞌkeꞌ ánti pepoináláintaꞌ, deꞌe-deꞌe mopahaweꞌ miꞌi Ngkóráꞌ Marasa to napári-pári napatuna iaꞌo.”

²⁴Onoꞌ haneꞌi motóiáheꞌ Pueꞌ Ala, láwiꞌ mohádimoheꞌ apa to mewaliꞌ i kódóꞌ.