Read Besoa Galatia 2 Bible Online

Galatia 2 - Besoa bible

Galatia 2

¹Hampuloꞌ hai iba parena hangko ionoꞌ,[5] lao wopaꞌaꞌ i Ierusale[6] hingkakani hai Baranaba, hai Titu woꞌo meuláꞌ.

²Laoaꞌ i Ierusale láwiꞌ ara laluita hangko i Pueꞌ Ala i kódóꞌ to manguliꞌ hangaa-ngaa laoaꞌ. Kahaweꞌkuꞌ i Ierusale, kupombelámbiꞌáheꞌ tadulakoraꞌ toSarani. I tempó iti, to kupokalááꞌ, paturoꞌkuꞌ ina rasalaꞌi duuꞌna tiꞌara piꞌi mobunduꞌ bágóꞌkuꞌ mopaturoꞌáheꞌ tauna kana i Ngkóráꞌ Marasa, maroꞌa to roo miꞌi kupobágóꞌ, maroꞌa to tangaꞌna mani kupobágóꞌ. Onoꞌ miꞌi haneꞌi kupahaweꞌáheꞌ kana i Ngkóráꞌ Marasa to kuánti i tauna to tiꞌaraheꞌ toIahudiꞌ, hai rapokana paturoꞌkuꞌ.

³Agáiáná ara woꞌo tauna to mampe toSaraniheꞌ. Mesuaꞌheꞌ ngkániiꞌ-niiꞌ i oloꞌkiꞌ láwiꞌ ara tunggáiáraꞌ, ia miꞌi bona upu-upu toSarani hangaa-ngaa mouláꞌ áturáraꞌ toIahudiꞌ. Agáiáná kitaꞌ, tekábáhámokeꞌ hangko i áturá-áturá iti ánti peuláꞌtaꞌ i Iesu Kerisitu. Mewaliꞌ kahópóꞌána, Titu to meuláꞌ i kódóꞌ, tiꞌara woꞌo paraluu ratileꞌ mouláꞌ áturáraꞌ toIahudiꞌ, kehapiꞌ ia tiꞌara toIahudiꞌ.

⁵Tiꞌaraꞌangkaiꞌ mouláꞌ paturoꞌraꞌ to salaꞌ iti haweꞌ hantóiꞌ, bona Ngkóráꞌ Marasa ineeꞌ ragalo hai paturoꞌraꞌ to salaꞌ, bona katoꞌuna Ngkóráꞌ Marasa iti mewaliꞌ oaꞌ ntóáꞌna pepoináláimi.

⁶Mewaliꞌ, tadulakoraꞌ toSarani i Ierusale to rarekeꞌ mapángkáꞌ lántiꞌraꞌ, tiꞌaraheꞌ motámbái ba apa peá i paturoꞌkuꞌ. (Ba mapángkáꞌ lántiꞌraꞌ ba tiꞌara, iti tiꞌara paraluu, láwiꞌ Pueꞌ Ala tiꞌara mampopontaniꞌ tauna.)

⁷Tiꞌaraheꞌ motámbái apa peá i paturoꞌkuꞌ, agáiáná rapangákuꞌ kanapoináláingkuꞌ miꞌi Pueꞌ Ala moánti Ngkóráꞌ Marasa i tauna to tiꞌaraheꞌ toIahudiꞌ. Noꞌonoꞌ woꞌo Peturuꞌ napoinálái Pueꞌ Ala moánti Ngkóráꞌ Marasa i toIahudiꞌ,

⁸láwiꞌ Pueꞌ Ala mampoweꞌi róhó i Peturuꞌ bona mewaliꞌ surona Pueꞌ Iesu i toIahudiꞌ. Hai Pueꞌ Ala mampoweꞌiaꞌ woꞌo róhó bona mewaliꞌaꞌ suroNa i tauna to tiꞌaraheꞌ toIahudiꞌ.

⁹Mewaliꞌ Iakobu, Peturuꞌ hai Iohane iti, to rauliꞌ tadulako upu-upu jemaꞌa i Ierusale, mampototoꞌu kanakióꞌkuꞌ miꞌi Pueꞌ Iesu mewaliꞌ suroNa. Onoꞌ miꞌi haneꞌi kódóꞌ hai Baranaba ratarimaꞌangkaiꞌ maroꞌa. Mombetabe-tabemongkaiꞌ tandaꞌ pohintuwuꞌkiꞌ, hai hampepekiriangkaiꞌ: hira to mopahaweꞌ Ngkóráꞌ Marasa i toIahudiꞌ, hai kaiꞌ to mopahaweꞌ bámbári iti i tauna to tiꞌaraheꞌ toIahudiꞌ.

¹⁰Rapembiáꞌ peá i kaiꞌ, bona kibuhinao oaꞌ motulungi tauna to meahiahiꞌ tueꞌraꞌ, hai onoꞌ woꞌo to kuꞌundeꞌ kubábehi.

¹¹Hangkani tempó, i kahaweꞌna Peturuꞌ[7] i kótá Antiokia, tiꞌaraꞌaꞌ masandaꞌ mokámbáróá i lindoꞌna, láwiꞌ masalaꞌ ntepuꞌu bábehiána.

¹²Rungu-runguna maroꞌa bábehiána, láwiꞌ ia tiꞌara mampopontaniꞌ tauna, maroꞌa toIahudiꞌ maroꞌa to tiꞌara toIahudiꞌ. Ia pakanto mandeꞌ hingkakani hai halalu hampepepoináláina to tiꞌaraheꞌ toIahudiꞌ.[8] Agáiáná i kahaweꞌraꞌ bahangapa tauna hangko i Iakobu i Ierusale,[9] Peturuꞌ molalu ntaniꞌ haneꞌi mokaraohiheꞌ halalu hampepepoináláina to tiꞌara toIahudiꞌ, hai tiꞌara piꞌi pebáiꞌ mandeꞌ hingkakani hai hira, láwiꞌ napokalááꞌ apa to i pekiriraꞌ toIahudiꞌ[10] to hangko haweꞌ iti.

¹³Hai araheꞌ woꞌo halalu hampepepoináláina toIahudiꞌ to mampeuláꞌiheꞌ bábehiána Peturuꞌ to salaꞌ iti, álána Baranaba mampeuláꞌi woꞌo bábehiáraꞌ iti hai tiꞌara piꞌi mau mandeꞌ hingkakani hai tauna to tiꞌaraheꞌ toIahudiꞌ.

¹⁴Kuisá ntepuꞌu bábehiáraꞌ iti tiꞌara hintotoꞌ hai paturoꞌ to toꞌu to talámbiꞌ i Ngkóráꞌ Marasa. Onoꞌ miꞌi haneꞌi kukámbáróá iti Peturuꞌ i lindoꞌraꞌ tauna to handaꞌ to hirámpu ionoꞌ, kuhángáꞌá, “Io toIahudiꞌkoꞌ, agáiáná biásákoꞌ tueꞌ nodo tauna to tiꞌara toIahudiꞌ, hai tiꞌara piꞌi paraluu nupeuláꞌi ádáraꞌ toIahudiꞌ. Mewaliꞌ, moapa riꞌi haneꞌi nupoinao mopári-pári toSarani to tiꞌaraheꞌ toIahudiꞌ bona mampeuláꞌiheꞌ ádáraꞌ toIahudiꞌ?”

¹⁵[11] Kaiꞌ toIahudiꞌ hangko i karapoánákangkiꞌ, tiꞌaraꞌangkaiꞌ nodo tauna to tiꞌara moisá Pueꞌ Ala, to terekeꞌ “tomadósá”.

¹⁶Agáiáná kehapiꞌangkaiꞌ toIahudiꞌ, kiꞌisá tiꞌaraꞌangkaiꞌ rapakanótó i peitána Pueꞌ Ala ánti pampeuláꞌingkiꞌ áturá-áturá to teukiꞌ i Paturoꞌna Musa.[12] Ane taundeꞌ mewaliꞌ manótó i peitána Pueꞌ Ala, hangaa-ngaa mepoinálái ntepuꞌukeꞌ i Iesu Kerisitu. Onoꞌ miꞌi haneꞌi mepoináláimongkaiꞌ i Kerisitu bona mewaliꞌangkaiꞌ manótó i peitána Pueꞌ Ala. Tiꞌara piꞌi kihárungá pampeuláꞌingkiꞌ Paturoꞌna Musa, láwiꞌ tiꞌara ara haweꞌ hadua tauna to mewaliꞌ manótó i peitána Pueꞌ Ala ánti pampeuláꞌina párentá-párentá i lalu Paturoꞌna Musa.[13]

¹⁷Mewaliꞌ deꞌe miꞌi pehárungángkiꞌ: ánti pohintuwuꞌkiꞌ hai Kerisitu, onoꞌ miꞌi haneꞌi Pueꞌ Ala mopakanótóangkaiꞌ i peitáNa. Agáiáná ara toIahudiꞌ to mosalaꞌi pepaturoꞌkuꞌ, rauliꞌ, “Ane mepoinálái pekou i Iesu hai tiꞌarapokou mengkoruꞌ i Paturoꞌna Musa, lempóna mewaliꞌmokou tauna to madósá hibali hai tauna to tiꞌara toIahudiꞌ. Mewaliꞌ madósá ntepuꞌukou ánti peuláꞌmi i Iesu.” Laluita iti tiꞌara toꞌu!

¹⁸Ngkáliꞌna riꞌi, ane kukábáhá pampeuláꞌingkuꞌ áturá-áturá toIahudiꞌ, hai roo onoꞌ kupeuláꞌi wopiꞌi huleꞌ áturá-áturá iti láwiꞌ kupoinao mewaliꞌ manótó i peitána Pueꞌ Ala, madósá ntepuꞌuaꞌ.

¹⁹Tiꞌara mpuꞌu ara rárángkuꞌ mewaliꞌ manótó i peitána Pueꞌ Ala i kamampeuláꞌingkuꞌ áturá-áturá toIahudiꞌ. Onoꞌ miꞌi haneꞌi kukábáhá miꞌi pampeuláꞌingkuꞌ áturá-áturá iti, bona mampeuláꞌiaꞌ peundeꞌána Pueꞌ Ala. I peitána Pueꞌ Ala, nodo riꞌi kódóꞌ to rapapate hingkakani hai Kerisitu, láwiꞌ Iesu Kerisitu to mate mosulewátáiaꞌ,

²⁰hai deꞌe-deꞌe tiꞌara piꞌi kódóꞌ to tueꞌ, agáiáná Kerisitu miꞌi to tueꞌ i lalu katueꞌkuꞌ. Mewaliꞌ, tangaꞌkuꞌ mani tueꞌ i duniáꞌ deꞌe, bateꞌkuꞌ mepoinálái i Ánáꞌna Pueꞌ Ala to mampokaꞌahiꞌaꞌ, hai mampehuhuꞌá wátáNa rapapate bona mewaliꞌaꞌ manótó i peitána Pueꞌ Ala.

²¹Mewaliꞌ, bateꞌna kupoinálái, hai tiꞌara mpuꞌuaꞌ mosápuáka kabulána laluNa iti. Ane rápáꞌna, peisákeꞌ mewaliꞌ manótó i peitáNa ánti pampeuláꞌintaꞌ áturáraꞌ toIahudiꞌ, tiꞌara mobunduꞌ kamatena Kerisitu.