Read Besoa Galatia 5 Bible Online

Galatia 5 - Besoa bible

Galatia 5

¹Kerisitu mokábáhámokeꞌ hangko i áturá-áturá toIahudiꞌ, bona tekábáhá ntepuꞌukeꞌ. Onoꞌ miꞌi haneꞌi hangaa-ngaa nipatetidaꞌ lalumi, bona ineeꞌkou rapohawiꞌ huleꞌ.

²Nipehádingi maroꞌa laluitangkuꞌ! Láwiꞌ kódóꞌ deꞌe Paulu, hai kuhángáꞌákou: ane nipehukáꞌ mewaliꞌ manótó i peitána Pueꞌ Ala i kamampeuláꞌimi ádá petileꞌ i Paturoꞌna Musa, lempóna, Kerisitu tiꞌara piꞌi mobunduꞌ i kómu.

³Hai kupaingáꞌi wopakou: heáná peá to mampopetileꞌ, hangaa-ngaa mampeuláꞌiheꞌ woꞌo upu-upu párentá ntániꞌna i lalu Paturoꞌna Musa.

⁴Ane tunggáiámi ina mewaliꞌ manótó ánti kamampeuláꞌimi Paturoꞌna Musa, megáákimokou hangko i Kerisitu, láwiꞌ Pueꞌ Ala mampoinao mopakanótókeꞌ ánti kabulána laluNa. Mewaliꞌ, ane nipoinao mopakanótó wátámi haduduámi, lempóna, nisápuáka miꞌi kabulána laluNa iti.

⁵Agáiáná kitaꞌ halalu-halalu, ánti peteteꞌna Inao to Magasaꞌ, bateꞌna mehárungákeꞌ i Pueꞌ Ala to mopakanótókeꞌ i peitáNa ánti pepoináláintaꞌ i Iesu Kerisitu. Hai bateꞌna iti to tapegiá.

⁶Ane mohintuwuꞌkeꞌ hai Kerisitu Iesu, tiꞌara ádá petileꞌ to paraluu, agáiáná to paraluu ntepuꞌu ia miꞌi pepoinálái to tongawaꞌ i kamaꞌahiꞌtaꞌ i hángká rángántaꞌ.

⁷Hangkoia, maroꞌa pampeuláꞌimi Ngkóráꞌ Marasa. Mewaliꞌ, moapa riꞌi haneꞌi tiꞌara piꞌi nipeuláꞌi paturoꞌ to toꞌu iti? Heánáraheꞌ to mobáliki pekirimi moliu paturoꞌraꞌ?

⁸Manótó ntepuꞌu halalu-halalu, paturoꞌraꞌ iti tiꞌara hangko i Pueꞌ Ala to mokióꞌkeꞌ mewaliꞌ taunáNa.

⁹Paturoꞌraꞌ to mepawuli iti nodo ragiꞌ,[37] láwiꞌ “Ragiꞌ to hantódiꞌ peá mampopembongke tinámpu mewaliꞌ handaꞌ.”

¹⁰Agáiáná kehapiꞌ noꞌonoꞌ, bateꞌna kupoinálái katiꞌárána nipeuláꞌi paturoꞌ to mepawuli iti, láwiꞌ mohintuwuꞌmokou hai Pueꞌ Iesu. Hai tongawaꞌ woꞌo i kódóꞌ, heáná to mopawulikou moliu paturoꞌna, bateꞌna ina nahuku Pueꞌ Ala.

¹¹Halalu-halalu, araheꞌ tauna to manguliꞌ kakódóꞌna to mopaguru tauna mampeuláꞌi ádá petileꞌ mouláꞌ áturána Musa. Tiꞌara toꞌu polaluitaraꞌ iti! Ane noꞌonoꞌi paturoꞌkuꞌ, ketiꞌara ara toIahudiꞌ to mampopeahiahiꞌaꞌ, láwiꞌ tiꞌara ina rapokóiꞌ inao paturoꞌkuꞌ mokana i kamatena Kerisitu i kau mombehape.

¹²Heánáheꞌ to mopawulikou i pepoináláimi, ineeꞌ ratileꞌ peá, rángina miꞌi rabutoꞌi![38]

¹³Tunggáiána Pueꞌ Ala mokióꞌkou halalu-halalu, bona tekábáhákou. Agáiáná ineeꞌ niuliꞌ node: “Ane tekábáhá mpuꞌukeꞌ hangko i áturá-áturá to teukiꞌ i Paturoꞌna Musa, peisákeꞌ mobábehi ba apa peá mouláꞌ peundeꞌántaꞌ.” Ngkáliꞌna riꞌi hangaa-ngaa mombepokaꞌahiꞌkou hai mombetulungikou hadua hai hadua.

¹⁴Ara párentá to teukiꞌ i lalu Paturoꞌna Musa to manguliꞌ, “Nipokaꞌahiꞌ hángká rángámi nodokou mampokaꞌahiꞌ wátámi haduduámi.”[39] Upu-upu Paturoꞌna Musa mentóáꞌ hangko i párentá to hampákáꞌ iti.

¹⁵Agáiáná ane mosisalaꞌkou hai mombepokóiꞌ inao, maingáꞌ-ingáꞌkou láwiꞌ ina marugiꞌkou.

¹⁶Node tunggáiángkuꞌ: hangaa-ngaa nateteꞌkeꞌ Inao to Magasaꞌ bona tiꞌarakeꞌ mouláꞌ peundeꞌána laluntaꞌ haduduántaꞌ.

¹⁷Láwiꞌ peundeꞌána laluntaꞌ haduduántaꞌ tiꞌara hiolaꞌ hai peundeꞌána Inao to Magasaꞌ. Ane tauláꞌ to hampákáꞌ iti, tiꞌarakeꞌ peisá mouláꞌ to ntániꞌna. Ane tauláꞌ peundeꞌána laluntaꞌ haduduántaꞌ, tiꞌara tabábehi apa to maroꞌa mouláꞌ peundeꞌána Inao to Magasaꞌ; hai ane tauláꞌ peundeꞌána Inao to Magasaꞌ, tiꞌara ina tabábehi apa peá to taundeꞌ.

¹⁸Mewaliꞌ, ane nateteꞌkeꞌ Inao to Magasaꞌ, tiꞌarapokeꞌ mengkoruꞌ i Paturoꞌna Musa.

¹⁹Tongawaꞌ miꞌi ane tauna mobábehi bábehiá to hiolaꞌ hai peundeꞌána laluraꞌ haduduáraꞌ. Rápáꞌna, tauna to: mobábehi bábehiá to metitidiꞌi, mobábehi bábehiá to tiꞌara hintotoꞌ, mouláꞌ peá peundeꞌána haduduána,

²⁰menómbá i to tiꞌara Pueꞌ Ala, mampopobunduꞌ kuasaꞌ to hangko i setáꞌ, mokáhihiꞌ hángká rángáraꞌ, mosisalaꞌ, mohiriꞌ, paka mabukoꞌ, mouláꞌ peheꞌ peundeꞌáraꞌ haduduáraꞌ, paka momata ntimbali, paka mampopohioroá tauna,

²¹mahiniꞌ, malangu, mosusa-susa oaꞌ, hai ara mani woꞌo to ntániꞌna. Mewaliꞌ, upu-upu iti, kupopaingáꞌá wopakou nodo to kuhángáꞌáꞌákou hangkoia: heáná peá to mobábehi noꞌonoꞌ, tiꞌaraheꞌ ina toroꞌ hingkakani hai Pueꞌ Ala i lalu popárentáNa.[40]

²²Agáiáná ane nateteꞌkeꞌ Inao to Magasaꞌ, bábehiántaꞌ node: mombepokaꞌahiꞌkeꞌ, góeꞌkeꞌ, tinda laluntaꞌ, sabaraꞌkeꞌ, maroꞌa laluntaꞌ, maroꞌa bábehiántaꞌ; tetidaꞌkeꞌ,

²³mengkaiwóiꞌkeꞌ, hai momeeꞌkeꞌ peundeꞌána laluntaꞌ. Tiꞌara ara párentá to mokóntó bábehiá to noꞌonoꞌ.

²⁴Ane kitaꞌ to mewaliꞌ taunána Kerisitu Iesu, kitaꞌ nodo tauna to rapapate i kau mombehape hingkakani hai Kerisitu, láwiꞌ tapapate miꞌi peundeꞌána laluntaꞌ haduduántaꞌ.

²⁵Hai Inao to Magasaꞌ mampoweꞌimokeꞌ katueꞌ to woꞌu, onoꞌ miꞌi haneꞌi hangaa-ngaa tapeuláꞌi ntepuꞌu peundeꞌáNa.

²⁶Mewaliꞌ, ineeꞌkeꞌ mampepemahile, ineeꞌkeꞌ mombepakahái mpolalu, ba mahiniꞌkeꞌ i hángká rángántaꞌ.