Read Besoa Galatia 6 Bible Online

Galatia 6 - Besoa bible

Galatia 6

¹Halalu-halalu, ane moitakou halalu hampepepoináláimi mobábehi salaꞌ, kómu to mampeuláꞌi peundeꞌána Inao to Magasaꞌ, hangaa-ngaa niteteꞌheꞌ huleꞌ i rárá to manótó. Agáiáná ane nibábehi iti, hangaa-ngaa nipamaꞌálusuꞌ lalumi. Hai maingáꞌ-ingáꞌkou woꞌo, bona ineeꞌkou woꞌo maꞌala nakuasaꞌi dósá.

²Hangaa-ngaa mombetulungikou hadua hai hadua, bona hangko i bábehiámi iti, nipeuláꞌi miꞌi hawaꞌna Kerisitu.[41]

³Ane ara hadua tauna to mampekiri melumbuꞌ tueꞌna hangko i rángána, mole riꞌi tiꞌara, lempóna ia modongkoki wátána haduduána.

⁴Rángina miꞌi kitaꞌ upu-upu mampekiri bábehiántaꞌ haduduántaꞌ, ba maroꞌa ba tiꞌara. Ane maroꞌai, peisá tapogóeꞌ. Agáiáná ineeꞌ miꞌi tapahibali bábehiántaꞌ hai bábehiána tauna ntániꞌna,

⁵láwiꞌ kitaꞌ upu-upu hangaa-ngaa mampopolumaokeꞌ bágóꞌtaꞌ haduduántaꞌ.[42]

⁶Tauna to motarima paturoꞌ mokana i ngkóráꞌna Pueꞌ Ala, hangaa-ngaa mampogáláꞌá woꞌo to mepaturoꞌ iti hangko i porasiꞌána.

⁷Maingáꞌ-ingáꞌkou, halalu-halalu! Ane tauliꞌ peisákeꞌ mampodongkoꞌá Pueꞌ Ala, wátántaꞌ haduduántaꞌ to tapodongkoꞌá, láwiꞌ apa to tatudaꞌ, iti woꞌo to ina tapupu.

⁸Ane mouláꞌkeꞌ oaꞌ peundeꞌántaꞌ haduduántaꞌ, ina molámbiꞌkeꞌ wuaꞌna bábehiántaꞌ iti, lempóna: ina tegáákikeꞌ hangko i Pueꞌ Ala duuꞌna i rue-ruena. Agáiáná ane bábehiántaꞌ mampeuláꞌi oaꞌ peundeꞌána Inao to Magasaꞌ, ina molámbiꞌkeꞌ katueꞌ to maroꞌa to tiꞌara mokahópóꞌá hangko i Inao to Magasaꞌ.

⁹Mewaliꞌ halalu-halalu, ineeꞌkeꞌ luleꞌ mobábehi apa to maroꞌa, láwiꞌ ane mobábehikeꞌ oaꞌ bábehiá to maroꞌa, bateꞌna ina talámbiꞌ wuaꞌna bábehiántaꞌ i tempó to tepakanótó miꞌi.

¹⁰Mewaliꞌ, tangaꞌna mani ara tempó, hangaa-ngaa mobábehikeꞌ oaꞌ apa to maroꞌa i upu-upu tauna, pelumbuꞌna miꞌi i halalu hampepepoináláintaꞌ.

¹¹NIPEITA NOUMBÁ KAMABÁNGKÁNA UKIꞋNA TO KUꞋUKIꞋ HAI TAENGKUꞋ HADUDUÁNGKUꞋ.[43]

¹²Maingáꞌ-ingáꞌkou i tauna to moánti paturoꞌ to mepakanawoꞌ. Raundeꞌ peá bona ratóiá tauna ntániꞌna. Mouláꞌheꞌ ádá i rawana peá hai mopári-párikou bona mampeuláꞌikou woꞌo ádá petileꞌ. Iti rabábehi láwiꞌ malááꞌheꞌ ina rapopeahiahiꞌ toIahudiꞌ ane mobámbáriheꞌ Kerisitu to mate i kau mombehape.

¹³Katoꞌuána, tauna to mampeuláꞌi ádá petileꞌ iti, tiꞌaraheꞌ mampeuláꞌi upu-upu áturá-áturá to teukiꞌ i Paturoꞌna Musa. Tunggáiáraꞌ mohuoꞌkou mampopetileꞌ, bona mampepemahileheꞌ ánti kanipeuláꞌina áturáraꞌ iti.

¹⁴Agáiáná kódóꞌ, tiꞌara kuꞌundeꞌ mampepemahile. To kupomahile ia miꞌi Pueꞌ Iesu Kerisitu to mate rapakuꞌ i kau mombehape. Ane kódóꞌi, nodoaꞌ woꞌo to rapakuꞌ i kau hingkakani hai Ia, láwiꞌ tiꞌara piꞌi kuꞌundeꞌ mouláꞌ peundeꞌáraꞌ tauna to i duniáꞌ deꞌe. Hai tauna i duniáꞌ deꞌe, tiꞌara tediiꞌ laluraꞌ i apa to kupaioru.

¹⁵Ratileꞌ ba tiꞌara, tiꞌara iti to mobunduꞌ. To mobunduꞌ ia miꞌi katueꞌ to woꞌu[44] hangko i Pueꞌ Ala.

¹⁶I lalu pekakaengkuꞌ, kupembiáꞌ bona Pueꞌ Ala moweꞌikou roꞌa ngkatueꞌ hai mopatongawaꞌ ahiꞌNa i upu-upu tauna to mampeuláꞌi paturoꞌ deꞌe to mewaliꞌmoheꞌ taunáNa.

¹⁷Kahópóꞌána, kupembiáꞌ bona tiꞌara piꞌi ara to mopakasusaꞌaꞌ, láwiꞌ kódóꞌ miꞌi surona Pueꞌ Iesu, hai tongawaꞌ hangko i to bálána wátángkuꞌ.[45]

¹⁸Kupembiáꞌ bona Pueꞌtaꞌ Iesu Kerisitu mowátiꞌkou hangko i kabulána laluNa. Ami. Hangko i kódóꞌ, PAULU