Read Besoa Epesu 1 Bible Online

Epesu 1 - Besoa bible

Epesu 1

¹Molámbiꞌ Jemaꞌa i kótá Epesu Sura deꞌe hangko i kódóꞌ, Paulu, surona Kerisitu Iesu mouláꞌ peundeꞌána Pueꞌ Ala. Hai sura deꞌe kupakatu i kómu taunána Pueꞌ Ala to ara i kótá Epesu to tetidaꞌ pepoináláimi i Kerisitu Iesu.

²Tabeá hangko i kódóꞌ! Kupembiáꞌ bona Pueꞌ Ala Umántaꞌ hai Pueꞌ Iesu Kerisitu mowátiꞌkou hai mampoweꞌikou roꞌa ngkatueꞌ.

³Tatóiá miꞌi Pueꞌ Ala, Umána Pueꞌtaꞌ Iesu Kerisitu, láwiꞌ Nawátiꞌkeꞌ hai upu-upu pewátiꞌ to maroꞌa hangko i surugáꞌ ánti pohintuwuꞌtaꞌ hai Kerisitu.

⁴Hangko tiꞌara mani Napopewaliꞌ duniáꞌ deꞌe, Napileꞌimokeꞌ bona mohintuwuꞌkeꞌ hai Kerisitu, haneꞌikeꞌ mewaliꞌ taunáNa to magasaꞌ to tiꞌara ara salaꞌtaꞌ i peitáNa.

⁵Ánti kamaꞌahiꞌNa i kitaꞌ, hangko i rungu-runguna Napakanótó miꞌi ami ina Napileꞌikeꞌ mewaliꞌ ánáꞌNa moliu kanatangaꞌ-tangaꞌintaꞌ Iesu Kerisitu. Nabábehi noꞌonoꞌ láwiꞌ iti miꞌi tunggáiáNa, hai iti to Napokagóeꞌ.[1]

⁶Onoꞌ miꞌi haneꞌi hintotoꞌ ntepuꞌu tatóiá hai tapomahile Pueꞌ Ala, láwiꞌ mahile ahiꞌNa i kitaꞌ. Hangko i kabulána laluNa, Napatongawaꞌákeꞌ ahiꞌNa moliu apa to nabábehi Iesu ÁnáꞌNa to Napokaꞌahiꞌ.

⁷Moliu kamatena Iesu iti, Pueꞌ Ala mohómpókimokeꞌ hangko i huku dósántaꞌ, hai moámpungi salaꞌtaꞌ. Nabábehi noꞌonoꞌ ánti kamahilena ahiꞌNa i kitaꞌ.

⁸KamaꞌahiꞌNa i kitaꞌ tiꞌara ara hukáꞌna. Ia to moisá upu-upuna.

⁹Mouláꞌ peundeꞌáNa, Napopaisáꞌámokeꞌ tunggáiáNa to marue miꞌi tewuniángi. TunggáiáNa iti ia miꞌi bona hinángkáꞌna to ara, maroꞌa to i surugáꞌ maroꞌa to i duniáꞌ, ina Napahintuwuꞌ hai Kerisitu, hai Kerisitu ina mopárentái hinángkáꞌna.[2] Hangko i rungu-runguna, Pueꞌ Ala mopakanótó tunggáiáNa to ina Nabukeki moliu Kerisitu, hai tunggáiáNa iti bateꞌna ina Napopewaliꞌ ane haweꞌ miꞌi tempóna.

¹¹Pueꞌ Ala mobábehi upu-upuna iti mouláꞌ peundeꞌáNa haduduáNa. Napileꞌimokeꞌ hai Napakanótó kakitaꞌna miꞌi to mewaliꞌ taunáNa ánti pohintuwuꞌtaꞌ hai Kerisitu.

¹²Nabábehi noꞌonoꞌ bona kaiꞌ toIahudiꞌ to rungu-runguna mehárungá i Kerisitu motóiá hai mampomahile Pueꞌ Ala.

¹³Noꞌonoꞌ woꞌo kómu to tiꞌara toIahudiꞌ. I kanihádina bámbári to toꞌu, mepoináláimokou i Ngkóráꞌ Marasa iti, álána Pueꞌ Ala mohómpókikou hangko i huku dósámi, hai Naweꞌikou Inao to Magasaꞌ to Nadándi miꞌi hangkoia. Inao to Magasaꞌ iti, Ia miꞌi petándáina Pueꞌ Ala i lalumi[3] to mopatongawaꞌ kakitaꞌna miꞌi taunána Pueꞌ Ala.

¹⁴Hai Pueꞌ Ala mampoweꞌikeꞌ Inao to Magasaꞌ tandaꞌ kamaróhóna dándiNa i kitaꞌ, duuꞌna talámbiꞌ ntepuꞌu apa to Nadándiákeꞌ to mewaliꞌ taunáNa, ia miꞌi katehómpóꞌ. Onoꞌ miꞌi haneꞌi hintotoꞌ ntepuꞌu Pueꞌ Ala tatóiá hai tapomahile.

¹⁵Kuhádi bámbári kana i pepoináláimi i Pueꞌ Iesu, hai noumbá kamaꞌahiꞌmi i upu-upu tauna to mepoinálái.

¹⁶Onoꞌ miꞌi haneꞌi kuꞌuliꞌ handaꞌ kamaroꞌana i Pueꞌ Ala ánti pewátiꞌNa to Naweꞌikou, hai kukábeláikou oaꞌ i lalu pekakaengkuꞌ.

¹⁷Mekakaeaꞌ i Pueꞌ Ala to meawaꞌ. Ia miꞌi Umána Pueꞌtaꞌ Iesu Kerisitu. Mewaliꞌ kupembiáꞌ bona Ia mampoweꞌikou Inao to Magasaꞌ to mopakanótó lalumi, bona niꞌisá ntepuꞌu Pueꞌ Ala.

¹⁸Hai kupembiáꞌ i Pueꞌ Ala bona Ia mobungkáhi pekirimi, bona niꞌisá noumbá kamaroꞌana pewátiꞌ to nihárungá ina nitarima hangko i Pueꞌ Ala, láwiꞌ Ia to mokióꞌmokou mewaliꞌ ánáꞌNa. Kupembiáꞌ woꞌo bona niꞌisá ntepuꞌu kamahilena sosora[4] to Napatimama miꞌi ami i upu-upu tauna to Napoánáꞌ,

¹⁹hai ina niꞌisá woꞌo kamahilena kuasaꞌna Pueꞌ Ala i kitaꞌ to mepoinálái i Hia. KuasaꞌNa iti hibali hai kamaróhóna kuasaꞌNa

²⁰i tempóNa mampopearó Kerisitu hangko i kapate hai Napopehoda tándáꞌ i kuánáNa i surugáꞌ.

²¹Kuasaꞌ to naweꞌi Pueꞌ Ala i Kerisitu iti, melumbuꞌ ntepuꞌu kamaróhóna hangko i kuasaꞌraꞌ upu-upu topopárentá, upu-upu tadulako, upu-upu to makuasaꞌ, hai upu-upu to rapenómbái. Melumbuꞌ kamaróhóna kuasaꞌNa Kerisitu hangko i upu-upu to molámbiꞌ pehodaꞌá to teádái, maroꞌa to tueꞌ deꞌe-deꞌe, maroꞌa to tueꞌ i alo to ina haweꞌ.

²²Pueꞌ Ala mampopengkoruꞌ miꞌi hinángkáꞌna to ara i lalu kuasaꞌna Kerisitu,[5] hai moángkáꞌ Kerisitu mewaliꞌ Tadulako to mopárentái upu-upu tauna to mepoinálái i Hia.

²³Kitaꞌ to mepoinálái i Hia, peisákeꞌ rapándiriꞌ nodo Wátána Kerisitu, hai Kerisitu mewaliꞌ Wuáꞌtaꞌ, láwiꞌ Ia miꞌi to mampobágóꞌ hinángkáꞌna to ara bona upu-upu mewaliꞌ mouláꞌ tunggáiáNa.