Read Besoa Epesu 2 Bible Online

Epesu 2 - Besoa bible

Epesu 2

¹Hangkoia, hangko tiꞌara manikou mepoinálái i Iesu, nodokou tomate hai tegááki hangko i Pueꞌ Ala, láwiꞌ madósákou hai moliungikou hawaꞌNa.

²I tempó iti, bábehiámi alo-alona nodo bábehiáraꞌ tauna to kadake i duniáꞌ deꞌe, hai mampeuláꞌikou peundeꞌána Datu Tokadake. Datu Tokadake iti, ia miꞌi tadulakoraꞌ setáꞌ to i laerawa. Duuꞌna deꞌe-deꞌe, ia mokuasaꞌi laluraꞌ tauna to tiꞌara mengkoruꞌ i Pueꞌ Ala.

³Hangkoia, kitaꞌ upu-upu noꞌonoꞌ woꞌo bábehiántaꞌ. Mouláꞌ pekeꞌ peundeꞌána laluntaꞌ haduduántaꞌ, hai tabábehi apa peá to taundeꞌ i wátántaꞌ hai i pekirintaꞌ. Hintotoꞌ ntepuꞌukeꞌ nakabukoꞌi Pueꞌ Ala láwiꞌ bábehiántaꞌ woꞌo hibali hai bábehiáraꞌ.

⁴Agáiáná Pueꞌ Ala bulá laluNa hai mahile ahiꞌNa i kitaꞌ.

⁵Onoꞌ miꞌi haneꞌi, kehapiꞌkeꞌ nodo tomate ánti dósántaꞌ, Napoweꞌikeꞌ katueꞌ to woꞌu ánti pohintuwuꞌtaꞌ hai Kerisitu. Hangaa-ngaa nibuhinao: bateꞌna peá ánti kabulána laluna Pueꞌ Ala haneꞌikeꞌ tehómpóki hangko i huku dósántaꞌ!

⁶Ánti pohintuwuꞌtaꞌ hai Kerisitu Iesu, Pueꞌ Ala mampopearókeꞌ hangko i kapate, hai mampopehodakeꞌ i lalu surugáꞌ i pehodaꞌá to meawaꞌ bona mepárentákeꞌ hingkakani hai Kerisitu.[6]

⁷Tunggáiána Pueꞌ Ala, bona i alo to ina haweꞌ, Ia ina mopatongawaꞌákeꞌ kamahilena kabulána laluNa hai kamaroꞌana laluNa to talámbiꞌ ánti pohintuwuꞌtaꞌ hai Kerisitu Iesu.

⁸Nahómpókimokeꞌ Pueꞌ Ala hangko i huku dósántaꞌ ánti kabulána laluNa hai ánti pepoináláintaꞌ i Iesu. Tiꞌarakeꞌ Nahómpóki ánti kamaroꞌana bábehiántaꞌ,[7] ngkáliꞌna riꞌi ánti kabulána laluNa i kitaꞌ.

⁹Onoꞌ miꞌi haneꞌi tiꞌara ara haweꞌ hadua to peisá manguliꞌ, “Ánti kamaroꞌana bábehiángkuꞌ, haneꞌiaꞌ nahómpóki Pueꞌ Ala hangko i huku dósángkuꞌ.”

¹⁰Tiꞌara haweꞌ hadua to peisá manguliꞌ noꞌonoꞌ, láwiꞌ Pueꞌ Ala mampopewaliꞌmokeꞌ tauna to woꞌu ánti pohintuwuꞌtaꞌ hai Kerisitu Iesu. Napopewaliꞌkeꞌ tauna to woꞌu bona tabábehi bábehiá to maroꞌa. Hai bábehiá iti Napatimamaꞌámokeꞌ ami hangkoia.

¹¹Mewaliꞌ halalu-halalu, hangaa-ngaa nibuhinao noumbá katueꞌmi hangkoia. Mouláꞌ karapoánákami, tiꞌarakou toIahudiꞌ. Mouláꞌ toIahudiꞌ, kómu “tauna to tiꞌara ratileꞌ”, hai toIahudiꞌ iti “tauna to ratileꞌ”, agáiáná ádá petileꞌ iti ia miꞌi ádá to rabábehi i wátá peá.

¹²Hangkoia, tiꞌara manikou meuláꞌ i Kerisitu. Tiꞌarakou tepasuaꞌ i imbaꞌna toSáráeliꞌ to napileꞌi Pueꞌ Ala mewaliꞌ taunáNa. Tiꞌara ara gáláꞌmi i lalu dándina Pueꞌ Ala i toSáráeliꞌ. I lalu katueꞌmi i duniáꞌ deꞌe, tiꞌara ara pehárungámi,[8] hai karaoꞌkou hangko i Pueꞌ Ala.

¹³Agáiáná deꞌe-deꞌe, ánti pohintuwuꞌmi hai Kerisitu Iesu, tiꞌara piꞌi noꞌonoꞌ katueꞌmi. Hangkoia kómu karaoꞌkou hangko i Pueꞌ Ala, agáiáná deꞌe-deꞌe hungkuꞌmokou láwiꞌ Kerisitu mampeweꞌi miꞌi wátáNa rapapate mosulewátáikou.

¹⁴Ia haduduáNa to mopahintuwuꞌkeꞌ, toIahudiꞌ hai to tiꞌara toIahudiꞌ. Napehuhuꞌá wátáNa rapapate bona Ia haduduáNa mewaliꞌ sulewátántaꞌ. Ánti kamateNa, Ia mokábáhákeꞌ hangko i áturá agama toIahudiꞌ hai párentána.[9] Iti Nabábehi bona mowehángi posisalaꞌraꞌ toIahudiꞌ hai tauna to tiꞌara toIahudiꞌ. Hangkoia, áturá agama toIahudiꞌ iti nodo bosoꞌ iliꞌ to mampopogááꞌkeꞌ bona mewaliꞌkeꞌ rontobu, agáiáná deꞌe-deꞌe Napahintuwuꞌmokeꞌ moliu Kerisitu. Napahintuwuꞌmokeꞌ aha bona mewaliꞌkeꞌ hantobu to woꞌu, hai mohintuwuꞌkeꞌ upu-upu. Deꞌe miꞌi ráráNa mopaꞌara pohintuwuꞌ:

¹⁶ánti kamateNa i kau mombehape, Kerisitu mopahintuwuꞌ toIahudiꞌ hai tauna to tiꞌara toIahudiꞌ. Hai hangko ionoꞌ, Napahintuwuꞌmokeꞌ upu-upu hai Pueꞌ Ala. Kamatena Kerisitu i kau mombehape mowehángi upu-upu posisalaꞌ.

¹⁷Ia mai i duniáꞌ mopahaweꞌ bámbári pohintuwuꞌ i kómu to karaoꞌ hangko i Pueꞌ Ala hai i kaiꞌ toIahudiꞌ to hungkuꞌ i Pueꞌ Ala.

¹⁸Ánti pohintuwuꞌtaꞌ hai Kerisitu, kitaꞌ upu-upu peisákeꞌ hungkuꞌ i Pueꞌ Ala Umántaꞌ,[10] láwiꞌ Inao to Magasaꞌ to motulungikeꞌ, maroꞌa kaiꞌ toIahudiꞌ, maroꞌa kómu to tiꞌarakou toIahudiꞌ.

¹⁹Hangkoia, kómu to tiꞌarakou toIahudiꞌ, nodokou tauna to i rawa peá.[11] Agáiáná deꞌe-deꞌe tiꞌarapokou noꞌonoꞌ. Tepasuaꞌmokou i imbaꞌraꞌ tauna to mepoinálái i Iesu. Hantinamokou hai upu-upu ánáꞌna Pueꞌ Ala.

²⁰Kitaꞌ to mepoinálái i Iesu, peisákeꞌ rapándiriꞌ nodo támbi to naꞌaró Pueꞌ Ala. Surona Pueꞌ Iesu hai nabiꞌ-nabiꞌ, hira miꞌi nodo áriꞌina, hai Kerisitu Iesu, Ia miꞌi watu pehodaꞌá peángkáꞌána támbi.

²¹Kitaꞌ to meuláꞌ i Iesu nodokeꞌ párewá támbi to raꞌaró i wongko watu to maróhó, álána mewaliꞌkeꞌ nodo hambuaꞌ támbi penómbáꞌá to magasaꞌ to hintotoꞌ nakatoroꞌi Pueꞌ.

²²Hai kómu woꞌo halalu-halalu to tiꞌarakou toIahudiꞌ, ánti pohintuwuꞌmi hai Kerisitu, kómu raꞌaró hingkakani hai upu-upu tauna ntániꞌna to mepoinálái, bona mewaliꞌkeꞌ nodo hambuaꞌ támbi to nakatoroꞌi Pueꞌ Ala moliu Inao to Magasaꞌ to ara i laluntaꞌ.