Read Besoa Epesu 3 Bible Online

Epesu 3 - Besoa bible

Epesu 3

¹Kitaꞌ toIahudiꞌ hai to tiꞌara toIahudiꞌ, mohintuwuꞌmokeꞌ ánti pobágóꞌna Kerisitu, hai kódóꞌ Paulu ratarungkuaꞌ[12] ánti pobágóꞌkuꞌ moánti Ngkóráꞌ Marasa kana i Kerisitu i kómu to tiꞌarakou toIahudiꞌ.

²Tongawaꞌ miꞌi kanihádina noumbá Pueꞌ Ala mampoweꞌiaꞌ bágóꞌ deꞌe, bona moántiaꞌ Ngkóráꞌ Marasa mokana i kamaꞌahiꞌna Pueꞌ Ala i kómu to tiꞌarakou toIahudiꞌ.

³Hangkoia, tunggáiána Pueꞌ Ala iti tewuniángi mani. Agáiáná deꞌe-deꞌe Napatongawaꞌ miꞌi i kódóꞌ, hai iti to kuꞌukiꞌ miꞌi i lalu surangkuꞌ deꞌe,[13] kehapiꞌ rerembe peá.

⁴Mewaliꞌ, ane nibásá surangkuꞌ deꞌe, ina niꞌisá tunggáiána Pueꞌ Ala kana i Kerisitu to tewuniángi mani hangkoia, nodo to rapopaisáꞌámoꞌ.

⁵Hangkoia, tunggáiáNa iti tiꞌara mani Napatongawaꞌ i tauna. Agáiáná deꞌe-deꞌe tunggáiána Pueꞌ Ala tongawaꞌ miꞌi i kaiꞌ to Napileꞌi mewaliꞌ suroNa hai i tauna to mopahaweꞌ laluitaNa, láwiꞌ Inao to Magasaꞌ mopakanótóáꞌangkaiꞌ.

⁶Deꞌe miꞌi tunggáiáNa to tewuniángi iti, bona tauna to tiꞌara toIahudiꞌ molámbiꞌheꞌ woꞌo pewátiꞌ hangko i Pueꞌ Ala hingkakani hai toIahudiꞌ. Mewaliꞌ mohintuwuꞌmoheꞌ hai hingkani-ngkanimoheꞌ molámbiꞌ apa to nadándi Pueꞌ Ala i upu-upu ánáꞌNa.[14] Iti ralámbiꞌ ánti pohintuwuꞌraꞌ hai Kerisitu Iesu, láwiꞌ mepoináláiheꞌ i Ngkóráꞌ Marasa.

⁷Mewaliꞌ, kódóꞌ moántiaꞌ Ngkóráꞌ Marasa deꞌe láwiꞌ napileꞌiaꞌ Pueꞌ Ala mewaliꞌ topobágóꞌNa ánti kabulána laluNa. Ia mopakaróhóaꞌ hai kuasaꞌNa bona kubuku mampopolumao bágóꞌ iti.

⁸Hangko i upu-upu tauna to mepoinálái i Pueꞌ Iesu, kódóꞌ miꞌi deꞌe to tepaiwóiꞌá ntepuꞌu. Agáiáná kehapiꞌ noꞌonoꞌ, ánti kabulána laluNa, Pueꞌ Ala mohuoꞌaꞌ mopahaweꞌ i tauna to tiꞌaraheꞌ toIahudiꞌ kamaroꞌana pewátiꞌ to talámbiꞌ hangko i Kerisitu. Melumbuꞌ kamaroꞌana pewátiꞌ iti hangko i upu-upu to peisá rapekiri tauna.

⁹Pueꞌ Ala mampoweꞌiaꞌ woꞌo bágóꞌ mopakanótóáheꞌ upu-upu tauna {noumbá kamolámbiꞌraꞌ katehómpóꞌ moliu Iesu}. Hangkoia, Pueꞌ Ala to mampopewaliꞌ duniáꞌ hai upu-upu óntóꞌna, mowuniángi tunggáiáNa iti,

¹⁰bona deꞌe-deꞌe moliu pohintuwuꞌraꞌ tauna to mepoinálái, maroꞌa toIahudiꞌ, maroꞌa to tiꞌara toIahudiꞌ, upu-upu topopárentá hai upu-upu to makuasaꞌ i surugáꞌ ina moisá kamapándena Pueꞌ Ala i upu-upu to Nabábehi.

¹¹Pueꞌ Ala mobábehi upu-upuna iti mouláꞌ tunggáiáNa to Napakanótó hangko tiꞌara mani duniáꞌ deꞌe Napopewaliꞌ, hai tunggáiáNa iti Napopewaliꞌ moliu Kerisitu Iesu Pueꞌtaꞌ.

¹²Ánti pohintuwuꞌtaꞌ hai Kerisitu Iesu hai ánti pepoináláintaꞌ i Hia, pebáiꞌmokeꞌ mengkahungkuꞌ i Pueꞌ Ala hai tiꞌara piꞌi bata-bata laluntaꞌ.

¹³Onoꞌ miꞌi haneꞌi kupembiáꞌ bona ineeꞌ masusa lalumi mohádi bámbári karapopeahiahiꞌkuꞌ hai karatarungkungkuꞌ, láwiꞌ kapári to kutódihá deꞌe moánti pewátiꞌ i kómu.

¹⁴Halalungkuꞌ to tiꞌarakou toIahudiꞌ, ane kupailalu upu-upu pewátiꞌ to nilámbiꞌ ánti peuláꞌmi i Kerisitu, hangaa-ngaa molingkuduaꞌ motóiá Pueꞌ Ala Umántaꞌ.

¹⁵Ia miꞌi pentóáꞌána upu-upu to tueꞌ i duniáꞌ hai i surugáꞌ.

¹⁶Mekakaeaꞌ i Pueꞌ Ala, bona hangko i kuasaꞌNa to maróhó ntepuꞌu, ina Napakaróhó lalumi moliu InaoNa,

¹⁷duuꞌna Kerisitu toroꞌ oaꞌ i lalumi ánti pepoináláimi. Mekakaeaꞌ bona ahiꞌna Pueꞌ Ala mokálándá i lalumi[15] hai mewaliꞌ ntóáꞌna katueꞌmi.

¹⁸Mekakaeaꞌ bona kómu hingkakani hai upu-upu tauna to mepoinálái i Kerisitu, ina moisákou kamahilena ahiꞌna Kerisitu i kitaꞌ. Ahiꞌna iti tiꞌara mpuꞌu taisá láwiꞌ melumbuꞌ hangko i apa to tabuku tahuwárá, hai tiꞌara ara támpáꞌna. Mekakaeaꞌ bona niꞌisá ntepuꞌu ahiꞌNa iti i lalu katueꞌmi, bona pambiárámi ina hibali hai pambiárána Pueꞌ Ala.[16]

²⁰Maróhó ntepuꞌu kuasaꞌna Pueꞌ Ala i lalu katueꞌtaꞌ. Hai kuasaꞌNa iti peisá mopaꞌara to melumbuꞌ ntepuꞌu kahandaꞌna hangko i upu-upu to tapembiáꞌ ba to tapekiri.

²¹Onoꞌ miꞌi haneꞌi hintotoꞌ ntepuꞌukeꞌ motóiá hai mampomahile hangaꞌna Pueꞌ Ala, ánti bábehiáNa to Nabábehi i kitaꞌ to mepoinálái moliu Kerisitu Iesu. Tatóiá miꞌi Pueꞌ Ala mantepuꞌu deꞌe-deꞌe haweꞌ i rue-ruena. Ami.