Read Besoa Pilipi 3 Bible Online

Pilipi 3 - Besoa bible

Pilipi 3

¹Mewaliꞌ halalu-halalu, hangaa-ngaa góeꞌkou ánti pohintuwuꞌmi hai Pueꞌ. Tiꞌara kupomapári deꞌe-deꞌe moukiꞌ huleꞌ apa to kupaturoꞌámokou, láwiꞌ ane nipeuláꞌi paturoꞌkuꞌ iti, ina maróhó pepoináláimi.

²Maingáꞌ-ingáꞌkou bona tiꞌarakou rapakanawoꞌ tauna to moánti paturoꞌ to salaꞌ. Paturoꞌraꞌ ina mopakarugiꞌ pepoináláimi. Nodoheꞌ tauna to tiꞌara mepoinálái i Iesu.[11] Hira to mopári-párikou bona ratileꞌ mouláꞌ Paturoꞌna Musa, {láwiꞌ mouláꞌ paturoꞌraꞌ, iti to mopakanótókeꞌ i peitána Pueꞌ Ala}.

³Agáiáná katoꞌuána kitaꞌ riꞌi to manótó i peitána Pueꞌ Ala, nodokeꞌ to ratileꞌ, láwiꞌ Inaona Pueꞌ Ala to moteteꞌmokeꞌ bona peisákeꞌ menómbá i Pueꞌ Ala hai mampomahile Kerisitu Iesu. Tiꞌarakeꞌ mehárungá i ádá to rabábehi peá tauna, ba bábehiántaꞌ haduduántaꞌ, {láwiꞌ tiꞌara iti to moántikeꞌ i katehómpóꞌ}.

⁴Katoꞌuána, ane kekuꞌundeꞌi, kepeisáꞌaꞌ woꞌo mehárungá i upu-upuna iti. Ane ara tauna to mampekiri ara álásá mehárungá i pampeuláꞌina ádá, pelumbuꞌna miꞌi kódóꞌ! Handaꞌ ntepuꞌu álásángkuꞌ ane mehárungáꞌaꞌ i ádá ba bábehiángkuꞌ haduduángkuꞌ.

⁵I kaꞌuwaluna alona tinuwuꞌkuꞌ, ratileꞌmoꞌ mouláꞌ Paturoꞌna Musa. Kódóꞌ toIberaniaꞌ, hai toiorungkuꞌ upu-upu toIberani.[12] Pemuleꞌánaꞌaꞌ toSáráeliꞌ hangko i toBenami. Hangko tiꞌara maniaꞌ mepoinálái i Pueꞌ Iesu, kupeuláꞌi ntepuꞌu Paturoꞌna Musa láwiꞌ kódóꞌ toParisi.[13]

⁶I tempó iti, rumihi peundeꞌángkuꞌ mampeuláꞌi peundeꞌána Pueꞌ Ala, onoꞌ miꞌi haneꞌi kupopeahiahiꞌ tauna to mepoinálái i Iesu. Madota ntepuꞌuaꞌ mampeuláꞌi upu-upu párentá to teukiꞌ i lalu Paturoꞌna Musa. Tiꞌara ara haweꞌ hadua tauna to peisá mosalaꞌiaꞌ.

⁷Hangkoia upu-upu iti kurekeꞌ kuporasiꞌi, hai iti to kuhárungá. Agáiáná deꞌe-deꞌe kuisá miꞌi upu-upu iti tiꞌara mobunduꞌ. Bateꞌna Kerisitu to kuhárungá.

⁸Hai pelumbuꞌna hangko ionoꞌ, deꞌe-deꞌe kuisá miꞌi: hinángkáꞌna tiꞌara mobunduꞌ i kódóꞌ, láwiꞌ ara to melumbuꞌ kamaroꞌana, ia miꞌi pohintuwuꞌkuꞌ hai Pueꞌkuꞌ Kerisitu Iesu. Onoꞌ haneꞌi kukábáhá miꞌi upu-upu to kuꞌundeꞌ hangkoia, kurekeꞌ peá nodo rumpuꞌ to paraluu ratibe, bona peisá peaꞌ mohintuwuꞌ hai Kerisitu

⁹hai mewaliꞌ taunáNa. Pueꞌ Ala morekeꞌaꞌ manótó i peitáNa, tiꞌara ánti pampeuláꞌingkuꞌ Paturoꞌna Musa, agáiáná ánti pepoináláingkuꞌ i Kerisitu. Mewaliꞌaꞌ manótó i peitána Pueꞌ Ala ánti kabulána laluNa, láwiꞌ mepoináláiaꞌ i Kerisitu.

¹⁰To mewaliꞌ tunggáiána katueꞌkuꞌ, bona moisá ntepuꞌuaꞌ Kerisitu. Kuꞌundeꞌ mohádiá kuasaꞌNa i lalu katueꞌkuꞌ, to nodo kuasaꞌna Pueꞌ Ala i kamampopearóNa Kerisitu hangko i kapate. Kupoinao molámbiꞌ kapári hai kapate nodo to nalámbiꞌ Iesu.[14]

¹¹Kupoinao upu-upu iti mewaliꞌ bona kódóꞌ woꞌo ina tueꞌaꞌ huleꞌ hangko i kapate.

¹²Halalu-halalu, tiꞌara kuꞌuliꞌ kulámbiꞌ miꞌi tunggáiángkuꞌ {duuꞌna magasaꞌmoꞌ hai tiꞌara piꞌi ara dósángkuꞌ}. Tiꞌaraꞌaꞌ wongkódóꞌá noꞌonoꞌ. Agáiáná kupári-pári bona mewaliꞌaꞌ hibali hai Kerisitu Iesu,[15] láwiꞌ onoꞌ miꞌi tunggáiáNa mokióꞌaꞌ mewaliꞌ taunáNa.

¹³Halalungkuꞌ upu-upu, kupangákuꞌ tiꞌara maniaꞌ molámbiꞌ tunggáiángkuꞌ iti, ara mani kamakuraꞌkuꞌ. Agáiáná ara hampákáꞌ to kubábehi: nodoaꞌ tauna to momberipoꞌ melangka. To momberipoꞌ melangka tiꞌara mampehaileꞌ to i taleuꞌna, agáiáná napári-pári monóntóhi tunggáiána to i lindoꞌna bona molámbiꞌ parasee. Noꞌonoꞌ woꞌo kódóꞌ. Tiꞌara piꞌi kupekiri apa to liu miꞌi, agáiáná kupári-pári oaꞌ mampeuláꞌi peundeꞌána Pueꞌ Ala, bona molámbiꞌaꞌ háwángina i surugáꞌ, láwiꞌ onoꞌ miꞌi pekióꞌna Pueꞌ Ala bona mohintuwuꞌaꞌ hai Kerisitu Iesu.

¹⁵Mewaliꞌ, kitaꞌ to maróhó pepoináláintaꞌ, hangaa-ngaa hampepekirikeꞌ mobábehi nodo to kuꞌukiꞌ miꞌi. Agáiáná ane ara mani to ntániꞌna to nipekiri, Pueꞌ Ala to ina mopakanótóákou apa to toꞌu.

¹⁶To hangaa-ngaa tapaioru ia miꞌi pampeuláꞌintaꞌ peundeꞌána Pueꞌ Ala bona hiolaꞌ hai apa to taisá miꞌi.

¹⁷Halalu-halalu, tangaꞌkiꞌ mani hingkakani hai kómu, kipopaitaꞌámokou bábehiá to maroꞌa. Mewaliꞌ kupembiáꞌ bona upu-upukou mampeuláꞌi bábehiángkuꞌ, láwiꞌ iti to mewaliꞌ pándiriꞌ i kómu. Hai hangaa-ngaa nipailalu tauna to mampeuláꞌi bábehiángkiꞌ, hai nipeuláꞌi woꞌo pándiriꞌ katueꞌraꞌ.

¹⁸Láwiꞌ nodo to paka kuhángáꞌákou hangkoia, hai kuhángáꞌá wopakou deꞌe-deꞌe: handaꞌheꞌ tauna to manguliꞌ katoSaraniraꞌ, agáiáná kadake bábehiáraꞌ hai mosápuákaheꞌ tunggáiána kamatena Kerisitu i kau mombehape. Masusa ntepuꞌu lalungkuꞌ mampepekiriheꞌ.

¹⁹Tauna to noꞌonoꞌ bateꞌraꞌ ina molámbiꞌ pehuku i lalu naraka. Nakuasaꞌiheꞌ peundeꞌána wátáraꞌ haduduáraꞌ. Mampomahile peheꞌ bábehiáraꞌ to mepakahiliá, hai mopaioru peheꞌ katueꞌraꞌ i duniáꞌ deꞌe.

²⁰Agáiáná kitaꞌ halalu-halalu, tiꞌara noꞌonoꞌ bábehiántaꞌ, láwiꞌ kitaꞌ miꞌi deꞌe to ina toroꞌ i surugáꞌ. Hai góeꞌ ntepuꞌukeꞌ mampegiá kahaweꞌna huleꞌ Pueꞌtaꞌ Iesu Kerisitu mai hangko i surugáꞌ. Ia miꞌi Topohómpóꞌ Salaꞌtaꞌ.

²¹Ane haweꞌ miꞌi tempóna kahaweꞌáNa huleꞌ, Ia ina mobáliki wátántaꞌ to maledeꞌ deꞌe bona hibali hai wátáNa to meawaꞌ ntepuꞌu.[16] Ina Nabábehi noꞌonoꞌ láwiꞌ Ia to makuasaꞌ, hai hinángkáꞌna to ara mengkoruꞌ i Hia.