Read Besoa Kolose 1 Bible Online

Kolose 1 - Besoa bible

Kolose 1

¹Molámbiꞌ Jemaꞌa i kótá Kolose Sura deꞌe hangko i kódóꞌ Paulu. Mouláꞌ peundeꞌáNa, Pueꞌ Ala mopileꞌiaꞌ mewaliꞌ surona Kerisitu Iesu. Hai halalu hampepepoináláintaꞌ Timotiu mamporángáꞌaꞌ.[1]

²Kipakatu sura deꞌe i kómu halalu hampepepoináláingkiꞌ i kótá Kolose to mepoinálái i Kerisitu. Tabeá maroꞌa! I lalu pekakaengkiꞌ, kipembiáꞌ i Pueꞌ Ala Umántaꞌ bona Nawátiꞌkou hai mampoweꞌikou roꞌa ngkatueꞌ.

³Ane mekakaeangkaiꞌ, pakakou woꞌo kipekakaeá, hai kiuliꞌ handaꞌ kamaroꞌana i Pueꞌ Ala, Umána Iesu Kerisitu Pueꞌtaꞌ,

⁴láwiꞌ kihádi miꞌi bámbári kana kamaróhóna pepoináláimi i Kerisitu Iesu hai kamaꞌahiꞌmi i upu-upu tauna to mepoinálái.

⁵Maróhó pepoináláimi hai ahiꞌmi, láwiꞌ nihárungá ntepuꞌu apa to napatimamaꞌámokou Pueꞌ Ala i surugáꞌ,[2] nodo to nihádi miꞌi moliu paturoꞌ to toꞌu, ia miꞌi Ngkóráꞌ Marasa to rapahaweꞌámokou.

⁶Ngkóráꞌ Marasa iti tebámbári i humalele duniáꞌ, álána katetátámbáiá tauna to mepoinálái i Pueꞌ Iesu hai mobábehiheꞌ apa to maroꞌa. Nodo woꞌo to mewaliꞌ i kómu halalu-halalu. I kanihádina miꞌi Ngkóráꞌ Marasa iti, liu-liumokou mepoinálái i Pueꞌ Iesu, álána moisá ntepuꞌumokou kabulána laluna Pueꞌ Ala i kómu.

⁷Ngkóráꞌ Marasa iti nihádi hangko i Epara,[3] rángángkiꞌ mobágóꞌ to kipokaꞌahiꞌ. Epara iti, ia miꞌi huoꞌána Kerisitu, hai ia tetidaꞌ mobágóꞌ motulungikou.

⁸Ia miꞌi to mopahaweꞌáꞌangkaiꞌ noumbá kamombepokaꞌahiꞌmi, hai kamaꞌahiꞌmi iti mentóáꞌ hangko i Inao to Magasaꞌ.

⁹Mewaliꞌ halalu-halalu, mantepuꞌu i kakihádina bámbári kana i pepoináláimi, kipekakaeákou oaꞌ. Kipembiáꞌ i Pueꞌ Ala bona Napakanótóákou peundeꞌáNa moliu Inao to Magasaꞌ, bona manótó lalumi hai niꞌisá ntepuꞌu mokana i Pueꞌ Ala.

¹⁰Mekakaeangkaiꞌ noꞌonoꞌ bona bábehiámi ina hiolaꞌ hai peundeꞌána Pueꞌ. Ane noꞌonoꞌi, upu-upu bábehiámi ina mopagóeꞌ Pueꞌ Ala, hai kamoisámi woꞌo Pueꞌ Ala ina mantámbái i lalu katueꞌmi.

¹¹Kipembiáꞌ i Pueꞌ Ala bona Napakaróhó lalumi moliu kamaróhóna kuasaꞌNa,[4] bona sabaraꞌkou mantaha i apa peá to morampekou, hai góeꞌkou oaꞌ.

¹²Kipekakaeákou toKolose, bona niꞌisá manguliꞌ handaꞌ kamaroꞌana i Pueꞌ Ala Umántaꞌ, láwiꞌ Ia miꞌi to mampopewaliꞌkou ánáꞌNa, álána hintotoꞌkou molámbiꞌ gáláꞌmi hingkakani hai upu-upu taunáNa i lalu popárentáNa i surugáꞌ.[5]

¹³Pueꞌ Ala mokábáhámokeꞌ hangko i kuasaꞌ to makáindi, hai Napopewaliꞌmokeꞌ taunáNa i lalu popárentána Ánáꞌna to Napokaꞌahiꞌ.

¹⁴Moliu ÁnáꞌNa iti, Nahómpókimokeꞌ, lempóna, Naꞌámpungi miꞌi dósántaꞌ.

¹⁵Pueꞌ Ala tiꞌara peisá raita tauna. Agáiáná ane taisá pambiáráNa hai kuasaꞌna Iesu, lempóna taisá miꞌi woꞌo pambiáráNa hai kuasaꞌNa Pueꞌ Ala.[6] Iesu iti tarekeꞌ nodo ÁnáꞌNa to Towutuꞌ,[7] láwiꞌ melumbuꞌ kuasaꞌNa hangko i upu-upu to napopewaliꞌ Pueꞌ Ala,

¹⁶láwiꞌ moliu Iesu, Pueꞌ Ala mampopewaliꞌ hinángkáꞌna to ara,[8] maroꞌa to i surugáꞌ hai to i duniáꞌ, maroꞌa to raita hai to tiꞌara raita, tepasuaꞌ upu-upu to makuasaꞌ hai to mepárentá.[9] Upu-upuna iti napopewaliꞌ Kerisitu, bona upu-upuna iti ina mampomahile Kerisitu.

¹⁷Hangko tiꞌara mani ara upu-upuna, ambiꞌna miꞌi ara Iesu. Hai upu-upuna iti ara i lalu kamakuasaꞌNa.[10]

¹⁸Kitaꞌ to mepoinálái i Kerisitu rapándiriꞌ nodo wátáNa, hai Kerisitu ia miꞌi Wuáꞌtaꞌ. Nodo wuáꞌ to mopárentá wátá, Kerisitu Ia miꞌi to mopárentá upu-upu tauna to mepoinálái i Hia. Hai Ia to mampoweꞌikeꞌ katueꞌ to woꞌu, láwiꞌ Ia miꞌi to Towutuꞌ, lempóna, to rungu-runguna tueꞌ huleꞌ hangko i kapate, bona Ia miꞌi to melumbuꞌ kuasaꞌNa hangko i upu-upuna to ara.

¹⁹{Ane taisá Ánáꞌna Pueꞌ Ala, taisá woꞌo Pueꞌ Ala,} láwiꞌ Pueꞌ Ala mopakanótó bona upu-upu kuasaꞌ hai pambiáráNa to ara i Hia ara woꞌo i ÁnáꞌNa, hai tiꞌara ara kamakuraꞌNa.

²⁰Pueꞌ Ala mohuoꞌ mai ÁnáꞌNa bona mate i kau mombehape.[11] TunggáiáNa mobábehi noꞌonoꞌ, bona upu-upu to ara, Napahintuwuꞌ huleꞌ hai Ia, maroꞌa to i duniáꞌ, maroꞌa to i surugáꞌ.

²¹Halalu-halalu, hangkoia karaoꞌkou hangko i Pueꞌ Ala, hai nipoewaliá láwiꞌ kadake lalumi hai bábehiámi.

²²Agáiáná deꞌe-deꞌe, ánti kamatena ÁnáꞌNa, mohintuwuꞌmokou hai Pueꞌ Ala, bona Napamagasaꞌkou duuꞌna tiꞌara piꞌi ara kamasalaꞌmi ba kamakuraꞌmi i peitáNa.[12]

²³Mewaliꞌ halalu-halalu, hangaa-ngaa maróhó pepoináláimi, hai hangaa-ngaa mepoináláikou oaꞌ i Ngkóráꞌ Marasa. Ineeꞌheꞌ nipatodáhi tauna mopakanawoꞌkou. Nipakaróhó kanipeuláꞌina paturoꞌ to nihádi miꞌi. Ineeꞌ nikábáhá pehárungámi i apa to nadándiámokou Pueꞌ Ala i lalu Ngkóráꞌ Marasa.[13] Ngkóráꞌ Marasa iti rabámbári miꞌi i humalele duniáꞌ, hai kódóꞌ woꞌo, mewaliꞌaꞌ huoꞌána Pueꞌ to mopahaweꞌ Ngkóráꞌ Marasa iti.

²⁴Góeꞌ ntepuꞌuaꞌ láwiꞌ kutódihá kapári ánti pobágóꞌkuꞌ motulungikou hai upu-upu tauna to mepoinálái.[14] Hira peisáheꞌ rapándiriꞌ nodo wátána Kerisitu. Hai pantódihána Kerisitu i lalu kapári, iti miꞌi woꞌo to mewaliꞌ i wátángkuꞌ deꞌe-deꞌe.

²⁵Pueꞌ Ala mopileꞌiaꞌ mewaliꞌ topobágóꞌNa to motulungi upu-upu tauna to mepoinálái i Hia, bona kupahaweꞌ ngkóráꞌNa i kómu i katoꞌu-toꞌuána.[15]

²⁶I átuna parena, tunggáiána Pueꞌ Ala tewuniángi i upu-upu tauna. Agáiáná deꞌe-deꞌe rapatongawaꞌ miꞌi i upu-upu tauna to mepoinálái i Hia.

²⁷To tewuniángi hangkoia iti, deꞌe-deꞌe naundeꞌ Pueꞌ Ala mopatongawaꞌ i taunáNa, ia miꞌi noumbá kamaroꞌana hai kameawaꞌna tunggáiáNa i kómu to tiꞌarakou toIahudiꞌ. TunggáiáNa iti ia miꞌi Kerisitu ara i lalumi, bona tongawaꞌ kamolámbiꞌmi miꞌi katueꞌ to meawaꞌ hingkakani hai Pueꞌ Ala. Iti miꞌi pehárungántaꞌ!

²⁸Mewaliꞌ, kibámbári i upu-upu tauna mokana i Kerisitu iti, mouláꞌ kanótó lalu to Naweꞌiangkaiꞌ. Kiweꞌiheꞌ laluita hai kipaturoꞌheꞌ, hai kiteteꞌheꞌ upu-upu, bona ane haweꞌangkaiꞌ i lindoꞌna Pueꞌ Ala, peisáheꞌ kiánti upu-upu tauna iti i Hia hai tiꞌara ara kamakuraꞌraꞌ, láwiꞌ mohintuwuꞌheꞌ hai Kerisitu.

²⁹Onoꞌ miꞌi haneꞌi madotaꞌaꞌ mobágóꞌ. Kupári-pári mampopolumao bágóꞌkuꞌ mouláꞌ karóhó to kulámbiꞌ hangko i Kerisitu, láwiꞌ mahile ntepuꞌu kuasaꞌNa i lalu katueꞌkuꞌ.