Read Besoa 1 Tesalonika 3 Bible Online

1 Tesalonika 3 - Besoa bible

1 Tesalonika 3

¹Ánti katiꞌárána piꞌi kibuku motaha kamabilangkiꞌ, onoꞌ miꞌi haneꞌi kiuliꞌ rángingkiꞌ mepegiá i kótá Atena, hai Timotiu kihuoꞌ miꞌi lao i kómu to ara i kótá Tesalonika. Timotiu iti ia miꞌi halalu hampepepoináláintaꞌ, rángángkiꞌ mampopolumao bágóꞌna Pueꞌ Ala, láwiꞌ ia woꞌo mopahaweꞌ Ngkóráꞌ Marasa kana i Kerisitu. Hai Timotiu miꞌi to ina mopalindó lalumi hai mopakaróhó pepoináláimi.

³Kihuoꞌ lao i kómu, bona ineeꞌ ara to bata-bata laluna haneꞌi mosuliꞌ hangko i pepoináláina ánti kapári to morampekou. Láwiꞌ niꞌisánto, halalu-halalu, kapári to morampekeꞌ deꞌe mewaliꞌ ánti popakanótóna Pueꞌ Ala.

⁴Tangaꞌkiꞌ mani hingkakani hai kómu, handaꞌ miꞌi kánina kihángáꞌáꞌákou kaꞌina rapopeahiahiꞌtaꞌ tauna to tiꞌara mepoinálái. Hai deꞌe-deꞌe mewaliꞌ miꞌi.

⁵Onoꞌ miꞌi haneꞌi kuhuoꞌ miꞌi Timotiu lao i kómu, bona kuisá noumbá pepoináláimi, láwiꞌ kupokalááꞌ, ineeꞌ paꞌi nakeloꞌkou Datu Tokadake. Peisákou napakanawoꞌ álána tiꞌara piꞌi mobunduꞌ pobágóꞌkiꞌ mopahaweꞌ Ngkóráꞌ Marasa i kómu.

⁶Mewaliꞌ deꞌe-deꞌe, Timotiu mesuleꞌ miꞌi ieneꞌ, hai napahaweꞌámongkaiꞌ bámbári to mopagóeꞌ lalungkiꞌ. Nauliꞌ, kómu maróhó ntepuꞌu pepoináláimi hai kamaꞌahiꞌmi. Mabilakou woꞌo i kaiꞌ, hai nibuhinaoangkaiꞌ oaꞌ. Nodo kanipoinaona ina mampohidupaꞌáꞌangkaiꞌ, noꞌonoꞌ woꞌo kakipoinaona mampohidupaꞌákou.

⁷Kehapiꞌ rapopeahiahiꞌangkaiꞌ hai molámbiꞌangkaiꞌ kapári ieneꞌ, agáiáná i kamohádingkiꞌ bámbári to naꞌánti Timotiu kana i kamaróhóna pepoináláimi, mewaliꞌ lindó lalungkiꞌ.

⁸Mewaliꞌ, maróhó huleꞌ buꞌungkiꞌ, láwiꞌ tetidaꞌ mpuꞌukou oaꞌ i pepoináláimi i Pueꞌ Iesu.

⁹Rumihi kagóeꞌkiꞌ ánti kakómuna, halalu-halalu. Mewaliꞌ, apa mani paꞌi to peisá kiuliꞌ i Pueꞌ Ala ánti kagóeꞌ to Naweꞌiangkaiꞌ deꞌe? Tiꞌara ara ntániꞌna, bateꞌna peá kiuliꞌ handaꞌ kamaroꞌana i lalu pekakaengkiꞌ i Pueꞌ Ala Umántaꞌ.

¹⁰I tempóngkiꞌ mekakae, maroꞌa mabaa ba káindi, membiáꞌangkaiꞌ i Pueꞌ Ala hangko i lalungkiꞌ ntepuꞌu bona peisá wopakou kiweoꞌ, láwiꞌ kipoinao mani mopaturoꞌkou bona maróhó ntepuꞌu pepoináláimi.

¹¹I lalu pekakaengkiꞌ kiuliꞌ, “Pueꞌ Ala Umángkiꞌ! Pueꞌkiꞌ Pueꞌ Iesu! Kipembiáꞌ Nubungkáhiáꞌangkaiꞌ rárá bona kibuku mampohidupaꞌáheꞌ halalungkiꞌ i Tesalonika.

¹²Hai kipembiáꞌ woꞌo bona katetátámbáiá ahiꞌraꞌ, áláraꞌ mombepokaꞌahiꞌ mpuꞌuheꞌ hadua hai hadua, hai mampokaꞌahiꞌheꞌ woꞌo upu-upu tauna, nodo kamaꞌahiꞌkiꞌ i hira.

¹³Pueꞌ, kipembiáꞌ bona Nupakaróhó laluraꞌ, bona magasaꞌ tueꞌraꞌ hai tiꞌara ara kamasalaꞌraꞌ i lindoꞌMu i kahaweꞌna huleꞌ Pueꞌ Iesu hingkakani hai upu-upu taunáNa to magasaꞌ. Ami.”