Read Besoa 1 Tesalonika 4 Bible Online

1 Tesalonika 4 - Besoa bible

1 Tesalonika 4

¹Mewaliꞌ halalu-halalu, kipembiáꞌ bona nipeuláꞌi upu-upuna hawaꞌ to nihádi miꞌi hangko i kaiꞌ, bona bábehiámi hintotoꞌ hai peundeꞌána Pueꞌ Ala. Kiꞌisá, deꞌe-deꞌe maroꞌa miꞌi bábehiámi, agáiáná i lalu kuasaꞌ to naweꞌiangkaiꞌ Pueꞌ Iesu, kipembiáꞌ ntepuꞌu bona nitámbái mani kamaroꞌana bábehiámi.

²Niꞌisá miꞌi paturoꞌ to kipahaweꞌákou i lalu hangaꞌna Pueꞌ Iesu.

³Deꞌe miꞌi peundeꞌána Pueꞌ Ala, bona magasaꞌ katueꞌmi, hai hangaa-ngaa nikaraohi bábehiá to metitidiꞌi.

⁴Kómu tobaleilo, hangaa-ngaa nibuku momeeꞌ peundeꞌána wátámi to kadake.[7]

⁵Ineeꞌkou maꞌala naꞌánti peundeꞌána lalumi to kadake, nodo to biásá mewaliꞌ i tauna to tiꞌaraheꞌ moisá Pueꞌ Ala.

⁶Ineeꞌkou mobábehi salaꞌ to nodo mebualosi ba mopakarugiꞌ tauna ntániꞌna, apa mani halalu hampepepoináláimi. Hangkoia kipaturoꞌmokou kana i pehukuna Pueꞌ Ala i tauna to mobábehi noꞌonoꞌ.

⁷Apa tunggáiána Pueꞌ Ala mokióꞌkeꞌ, halalu-halalu? Tiꞌarakeꞌ Nakióꞌ bona mobábehikeꞌ salaꞌ, agáiáná Nakióꞌkeꞌ bona magasaꞌ tueꞌtaꞌ.

⁸Onoꞌ miꞌi haneꞌi ane ara tauna to mosápuáka paturoꞌ deꞌe, tiꞌara tauna to nasápuáka, agáiáná Pueꞌ Ala riꞌi! Tunggáiána Pueꞌ Ala mampoweꞌikeꞌ Inao to Magasaꞌ, bona magasaꞌ katueꞌtaꞌ.

⁹Kaliliuána halalu-halalu, ara paturoꞌ to manguliꞌ hangaa-ngaa mampokaꞌahiꞌkeꞌ halalu hampepepoináláintaꞌ. Katoꞌuána tiꞌara piꞌi paraluu kiukiꞌákou paturoꞌ iti, láwiꞌ Pueꞌ Ala mopaturoꞌkou bona mombepokaꞌahiꞌkou hadua hai hadua.

¹⁰Tongawaꞌ miꞌi kamaꞌahiꞌmi i upu-upu halalu hampepepoináláimi i tampoꞌ Makedonia. Agáiáná kipembiáꞌ ntepuꞌu, halalu-halalu, bona bábehiámi iti nitámbái mani.

¹¹Nipári-pári mohintuwuꞌ hai hángká rángámi. Hangaa-ngaa nipopolumao maroꞌa bágóꞌmi haduduámi, ineeꞌkou mampesuaꞌi urusiána hángká rángámi. Mobágóꞌkou mampeliꞌ pandeꞌmi haduduámi, nodo to kipaturoꞌámokou hangkoia.

¹²Ane nibábehiꞌi noꞌonoꞌ, tiꞌarakou ina mehárungá i tauna ntániꞌna, hai ina rabiláꞌkou tauna to tiꞌaraheꞌ mepoinálái i Pueꞌ Iesu.

¹³Halalu-halalu, tunggáiána lalungkiꞌ bona niꞌisá ntepuꞌu apa to ina mewaliꞌ i tauna to mepoinálái to matemoheꞌ, bona tiꞌara masusa ntepuꞌu lalumi nodoheꞌ tauna to tiꞌara ara pehárungáꞌáraꞌ i Pueꞌ Ala.

¹⁴Noumbá katapoináláina Pueꞌ Iesu to mate haneꞌi tueꞌ huleꞌ, noꞌonoꞌ woꞌo katapoináláina, upu-upu tauna to mepoinálái i Hia agáiáná matemoheꞌ, ina tueꞌheꞌ woꞌo huleꞌ. Hai ina naꞌántiheꞌ Pueꞌ Ala bona tueꞌheꞌ hingkakani hai Ia.

¹⁵Deꞌe miꞌi paturoꞌ to kitarima hangko i Pueꞌ Iesu: i kahaweꞌNa huleꞌ, kitaꞌ to tueꞌ mani, tiꞌarakeꞌ ina moioru hangko i halalu hampepepoináláintaꞌ to matemoheꞌ,

¹⁶láwiꞌ ane mendáulu mai Pueꞌ Iesu hangko i surugáꞌ, ina tahádi pekióꞌna tadulakoraꞌ malaꞌeka hai pokániꞌ tamburuꞌna Pueꞌ Ala.[8] Hai i tempó iti, ina tueꞌ huleꞌ upu-upu tomate to mepoinálái i Kerisitu.

¹⁷Hangko ionoꞌ, kitaꞌ to tueꞌ mani ina Naoreꞌ hingkakani hai hira, lao i lalu gawu mampohidupaꞌá Pueꞌ Iesu i wongko langiꞌ.[9] Hai ina toroꞌkeꞌ hingkakani hai Pueꞌ duuꞌna i rue-ruena.

¹⁸Mewaliꞌ halalu-halalu, mombepakaróhókou hadua hai hadua moliu bámbári to kipahaweꞌámokou deꞌe.