Read Besoa 1 Tesalonika 5 Bible Online

1 Tesalonika 5 - Besoa bible

1 Tesalonika 5

¹Halalu-halalu, tiꞌaranto paraluu kiukiꞌákou kaimpirána mpuꞌu alo kahaweꞌána Pueꞌ Iesu,

²láwiꞌ niꞌisá alo kahaweꞌáNa huleꞌ ina haweꞌ nodo topanako i tangaꞌ káindi; ina tingkáráꞌ upu-upu tauna i duniáꞌ.[10]

³Hangko tiꞌara mani haweꞌ tempóna, tauna to tiꞌaraheꞌ moisá Pueꞌ Ala ina manguliꞌ, “Maroꞌa ntepuꞌu katueꞌtaꞌ, tiꞌara ara kamalááꞌtaꞌ.” Agáiáná i tempó iti woꞌo, hangkaꞌ-hangkaꞌ peá ina narampeheꞌ kapári to rumihi, nodo pantódihána hadua towawine to humádi. Tiꞌara mpuꞌu ara ráráraꞌ mokaraohi pehukuna Pueꞌ Ala.

⁴Agáiáná kómu halalu-halalu, niꞌisá miꞌi Pueꞌ Ala, hai tiꞌarapokou ara i lalu kamakáindi.[11] Mewaliꞌ, ane haweꞌ alo kahaweꞌána Pueꞌ Iesu, tiꞌarakou ina tingkáráꞌ nodo tauna to nakahaweꞌi topanako.

⁵Kómu upu-upu ara miꞌi i lalu kamabaa láwiꞌ mepoináláimokou. Tiꞌarapokeꞌ mobábehi to kadake nodo to rabábehi tauna to ara mani i lalu kamakáindi.

⁶Mewaliꞌ ineeꞌkeꞌ leraꞌ, ineeꞌkeꞌ letaꞌ nodo tauna to tiꞌara mani moisá Pueꞌ Ala. Maingáꞌ-ingáꞌkeꞌ, hai hangaa-ngaa tapakanótó pekirintaꞌ,

⁷láwiꞌ tauna to tiꞌaraheꞌ timama i kaꞌina haweꞌna huleꞌ Pueꞌ Iesu, káindi ina letaꞌ peheꞌ hai malangu-languheꞌ.

⁸Agáiáná kitaꞌ deꞌe, timamakeꞌ láwiꞌ tueꞌkeꞌ i lalu kamabaa, onoꞌ miꞌi haneꞌi hangaa-ngaa tapakanótó pekirintaꞌ. Hangaa-ngaa tapakaróhó pepoináláintaꞌ i Pueꞌ Ala hai kamaꞌahiꞌtaꞌ i hángká rángántaꞌ, nodokeꞌ to mopakeꞌ badu besiꞌ to napakeꞌ surudadoꞌ. Hangaa-ngaa tapakaróhó pehárungántaꞌ i kaꞌina naweꞌintaꞌ Pueꞌ Ala katehómpóꞌ i alo pobutusi, bona maróhókeꞌ nodo hadua surudadoꞌ to mesóngkó besiꞌ.[12]

⁹Pueꞌ Ala ina mampoweꞌikeꞌ katueꞌ to maroꞌa. Taisá iti láwiꞌ tiꞌarakeꞌ Napileꞌi bona molámbiꞌkeꞌ pehukuNa, ngkáliꞌna Napileꞌirakeꞌ bona molámbiꞌkeꞌ katehómpóꞌ hangko i Iesu Kerisitu Pueꞌtaꞌ.

¹⁰Iesu Kerisitu mate mosulewátáikeꞌ, bona ane matemokeꞌ ba tueꞌ manikeꞌ i tempó kahaweꞌáNa huleꞌ, bateꞌna ina tueꞌkeꞌ hingkakani hai Ia.

¹¹Onoꞌ miꞌi haneꞌi halalu-halalu, hangaa-ngaa mombepakaróhókou mpolalu hai mombepaturoꞌkou hadua hai hadua, nodo to nibábehi miꞌi deꞌe-deꞌe.

¹²Halalu-halalu, kipembiáꞌ bona nibiláꞌheꞌ tauna to mobágóꞌ matimi mampopolumao bágóꞌna Pueꞌ, láwiꞌ hira miꞌi to napileꞌi Pueꞌ bona motadulakoikou hai mopaturoꞌkou.

¹³Hangaa-ngaa nibiláꞌheꞌ hai nipokaꞌahiꞌheꞌ ánti pobágóꞌraꞌ. Hai hangaa-ngaa mohintuwuꞌkou hadua hai hadua.

¹⁴Halalu-halalu, kipembiáꞌ woꞌo bona nikámbáróáheꞌ halalu hampepepoináláimi to tiꞌara mau mobágóꞌ.[13] Nipalindó laluraꞌ tauna to malááꞌ. Nitulungi tauna to araheꞌ i lalu kamakuraꞌraꞌ. Hangaa-ngaa sabaraꞌkou i upu-upu tauna.

¹⁵Ane arai to mobábehi to kadake i kómu, ineeꞌ niháwángi, ngkáliꞌna riꞌi hangaa-ngaa nibábehi oaꞌ to maroꞌa i halalumi iti hai i upu-upu tauna.

¹⁶Ánti pohintuwuꞌmi hai Iesu Kerisitu, hangaa-ngaa góeꞌkou, mekakaekou, hai niuliꞌ oaꞌ handaꞌ kamaroꞌana i Pueꞌ Ala i apa peá to pewaliꞌ, láwiꞌ iti miꞌi peundeꞌána Pueꞌ Ala i kómu.

¹⁹Ineeꞌ niewaꞌ bágóꞌna Inao to Magasaꞌ.[14]

²⁰Ineeꞌ nisápuáka laluita hangko i Pueꞌ Ala to Napahaweꞌ moliu taunáNa.

²¹Hangaa-ngaa nipáresáꞌ maroꞌa upu-upu laluita iti. Ane to maroꞌai, hangaa-ngaa nitibaaꞌ.

²²Hai upu-upu to kadake, hangaa-ngaa nikaraohi.

²³Mekakaeangkaiꞌ i Pueꞌ Ala to mampoweꞌikeꞌ roꞌa ngkatueꞌ. Kiuliꞌ node: “Pueꞌ Ala! Kipembiáꞌ bona Nupakanótó bábehiáraꞌ toTesalonika, duuꞌna magasaꞌ tueꞌraꞌ. Nukámpái katueꞌraꞌ, maroꞌa laluraꞌ ba inaoraꞌ ba wátáraꞌ, bona tiꞌara ara kamasalaꞌraꞌ i kahaweꞌna huleꞌ Pueꞌkiꞌ Iesu Kerisitu.” Noꞌonoꞌ miꞌi pekakaengkiꞌ.

²⁴Pueꞌ Ala to mopileꞌikou, hai Ia tetidaꞌ, láwiꞌ apa peá to Nadándi bateꞌna ina mewaliꞌ.

²⁵Halalu-halalu, kipembiáꞌ bona nipekakaeáꞌangkaiꞌ woꞌo.

²⁶Nipahaweꞌ tabeángkiꞌ hai kamaꞌahiꞌkiꞌ i upu-upu halalu hampepepoináláintaꞌ.

²⁷I lalu hangaꞌna Pueꞌ Iesu, kupembiáꞌ ntepuꞌu bona sura deꞌe rabásá i lindoꞌraꞌ upu-upu halalu hampepepoináláintaꞌ to araheꞌ ionoꞌ.

²⁸Pueꞌtaꞌ Iesu Kerisitu mowátiꞌkou upu-upu. Hangko i kódóꞌ, PAULU