Read Besoa 2 Tesalonika 1 Bible Online

2 Tesalonika 1 - Besoa bible

2 Tesalonika 1

¹Molámbiꞌ Jemaꞌa i kótá Tesalonika Sura deꞌe hangko i kaiꞌ, Paulu, Silasi[1] hai Timotiu. Kipakatu sura deꞌe i kómu to mohintuwuꞌ hai Pueꞌ Ala Umántaꞌ hai Pueꞌ Iesu Kerisitu! Kipembiáꞌ bona Pueꞌ Ala hai Pueꞌ Iesu Kerisitu mowátiꞌkou hai mampoweꞌikou roꞌa ngkatueꞌ.

³Halalu-halalu, tiꞌaraꞌangkaiꞌ luleꞌ manguliꞌ handaꞌ kamaroꞌana i Pueꞌ Ala ánti kakómuna. Hai hintotoꞌ ntepuꞌu manguliꞌangkaiꞌ noꞌonoꞌ, láwiꞌ kiꞌisá kamaróhó-róhóá pepoináláimi i Pueꞌ Iesu, hai katetátámbáiá woꞌo ahiꞌmi i upu-upu rángámi.

⁴Onoꞌ miꞌi haneꞌi i jemaꞌa ntániꞌna, kitóiákou i lindoꞌraꞌ halaluntaꞌ to mepoinálái i Pueꞌ Ala. Kihángáꞌáheꞌ, kómu toTesalonika, kehapiꞌkou narampe handaꞌ kapári hai rapopeahiahiꞌkou, bateꞌna mepoináláikou oaꞌ i Pueꞌ Iesu.

⁵Mewaliꞌ ánti kamaróhóna mani pepoináláimi iti, tongawaꞌ miꞌi pobutusina Pueꞌ Ala ina manótó ntepuꞌu. Hai Napakanótó kahintotoꞌmi mewaliꞌ taunáNa i lalu popárentáNa, láwiꞌ mantahakou i lalu kapári to morampekou deꞌe-deꞌe ánti peuláꞌmi i Pueꞌ Ala.

⁶Pueꞌ Ala mobábehi apa to manótó. Ia ina moháwángi bábehiáraꞌ tauna to mampopeahiahiꞌkou,

⁷hai ina Nakábáhákou hangko i kapárimi, nodo woꞌo kaiꞌ. Ina Nabábehi woꞌo noꞌonoꞌ i kahaweꞌna huleꞌ Pueꞌ Iesu to ina mendáulu mai hangko i surugáꞌ hingkakani hai malaꞌekaNa to makuasaꞌ i lalu api to roreꞌ.[2]

⁸Ia miꞌi to ina mohukuheꞌ tauna to tiꞌara moisá Pueꞌ Ala hai tiꞌaraheꞌ woꞌo mau mampeuláꞌi Ngkóráꞌ Marasa to mopakanótó kaheánána Pueꞌtaꞌ Iesu.

⁹Tauna to tiꞌaraheꞌ mepoinálái ina molámbiꞌ pehuku to tiꞌara mokahópóꞌá, hai ina ratibeheꞌ karaoꞌ hangko i Pueꞌ, álána tiꞌarapoheꞌ moita kamahilena kuasaꞌNa hai peawaꞌNa.

¹⁰Upu-upuna iti ina mewaliꞌ i kahaweꞌána huleꞌ Pueꞌ Iesu. I tempó iti, upu-upu taunáNa ina mampomahile hangaꞌNa, hai upu-upu tauna to mepoinálái i Hia ina manguliꞌ, “Tongawaꞌ ntepuꞌu peawaꞌNa!” Hai kómu woꞌo halalu-halalu, bateꞌna ina nipomahile Pueꞌ Iesu i alo iti, láwiꞌ nipoinálái miꞌi bámbári to kipahaweꞌákou.

¹¹Halalu-halalu, onoꞌ miꞌi haneꞌi kipekakaeákou oaꞌ, bona mewaliꞌkou hintotoꞌ i kanapileꞌimi miꞌi Pueꞌ Ala. Kipembiáꞌ bona moliu kuasaꞌNa, Ia mampopewaliꞌ upu-upu tunggáiámi to maroꞌa hai mopamagánái upu-upu to nipobágóꞌ ánti pepoináláimi i Pueꞌ Iesu.

¹²Tunggáiángkiꞌ mekakae noꞌonoꞌ, bona ánti bábehiámi to maroꞌa iti, hangaꞌna Pueꞌtaꞌ Iesu rapomahile, hai bona kómu woꞌo ina napomahilekou Pueꞌ Iesu. Upu-upuna iti hangaa-ngaa mewaliꞌ ánti kabulána laluna Pueꞌ Ala Umántaꞌ hai Pueꞌ Iesu Kerisitu.