Read Besoa 2 Tesalonika 3 Bible Online

2 Tesalonika 3 - Besoa bible

2 Tesalonika 3

¹Mewaliꞌ halalu-halalu, kipembiáꞌ bona nipekakaeáꞌangkaiꞌ woꞌo, bona hawiáꞌ kamantámbáina tauna to ina mampehádingi hai motarima ngkóráꞌna Pueꞌ, nodo to mewaliꞌ i kómu hangkoia.

²Nipembiáꞌ woꞌo bona Pueꞌ Ala mokámpáiangkaiꞌ hangko i tauna to kadake hai to mepopeahiahiꞌ, láwiꞌ handaꞌ tauna to tiꞌara mampoinálái ngkóráꞌna Pueꞌ Ala.

³Agáiáná Pueꞌ to peisá rapoinálái. Ia to ina mopakaróhókou hai mokámpáikou hangko i to kadake.[12]

⁴Mewaliꞌ, ánti katetidaꞌna Pueꞌ i kómu, onoꞌ miꞌi haneꞌi kiꞌisá ntepuꞌu kanipeuláꞌina apa to kipaturoꞌákou, hai kiꞌisá woꞌo paturoꞌ iti ina nipeuláꞌi oaꞌ.

⁵Kipekakaeákou bona Pueꞌ Iesu moteteꞌkou duuꞌna moisá ntepuꞌukou kamaꞌahiꞌna Pueꞌ Ala i kómu hai noumbá rárána mantaha i lalu kapári nodo woꞌo Kerisitu.

⁶Halalu-halalu, i lalu kuasaꞌ to naweꞌiangkaiꞌ Pueꞌ Iesu Kerisitu, kihángáꞌáꞌákou: ineeꞌheꞌ nipohintuwuꞌá halalu hampepepoináláimi to loheheꞌ mobágóꞌ hai tiꞌaraheꞌ mampeuláꞌi paturoꞌ to nitarima hangko i kaiꞌ.

⁷Niꞌisá miꞌi bábehiángkiꞌ hangkoia. Tiꞌaraꞌangkaiꞌ lohe mobágóꞌ i tempóngkiꞌ hingkakani hai kómu. Bábehiángkiꞌ iti to hangaa-ngaa nipeuláꞌi.

⁸Tiꞌaraꞌangkaiꞌ mandeꞌ pandeꞌ ane tiꞌarai kibaiari. Hangalo-hangalo mobágóꞌangkaiꞌ matimi bona tiꞌarakou kipamapári.

⁹Katoꞌuána, tiꞌaranto woꞌo masalaꞌ ane membiáꞌangkaiꞌ i kómu. Agáiáná tiꞌara iti to kibábehi láwiꞌ tunggáiángkiꞌ bona kipopaitaꞌákou pándiriꞌ to maroꞌa to peisá nipeuláꞌi.

¹⁰I tempóngkiꞌ mani hingkakani hai kómu hangkoia, ara miꞌi laluita to kiweꞌikou. Kiuliꞌ: heáná to lohe mobágóꞌ, ineeꞌ rapopandeꞌ.

¹¹Tunggáiángkiꞌ haneꞌi kiuliꞌ noꞌonoꞌ, láwiꞌ kihádi bámbári to manguliꞌ kaꞌáráraꞌ tauna i oloꞌmi to lohe mobágóꞌ. Raundeꞌ peá mampesuaꞌi urusiána tauna ntániꞌna.

¹²Mewaliꞌ, i lalu kuasaꞌ to naweꞌiangkaiꞌ Pueꞌ Iesu Kerisitu, kipohawaꞌáheꞌ tauna iti hai kipaturoꞌheꞌ bona madotaheꞌ mobágóꞌ mampeliꞌ pandeꞌraꞌ.

¹³Hai kómu, ineeꞌkou luleꞌ mobábehi apa to maroꞌa.

¹⁴Rápáꞌna, ane ara tauna to tiꞌara moundeꞌ mampeuláꞌi apa to kiukiꞌ i lalu sura deꞌe, nipetándái tauna iti. Ineeꞌheꞌ nipohintuwuꞌá, bona raisá kamasalaꞌraꞌ hai ina mahiliheꞌ.

¹⁵Agáiáná ineeꞌheꞌ nirekeꞌ ewálimi, ngkáliꞌna riꞌi hangaa-ngaa nipaturoꞌheꞌ nodo halalu hampepepoináláimi.

¹⁶Bateꞌna Pueꞌ to peisá mampoweꞌikeꞌ roꞌa ngkatueꞌ. Onoꞌ miꞌi haneꞌi mekakaeangkaiꞌ i Pueꞌ bona alo-alona Naweꞌikou roꞌa ngkatueꞌ i pákáꞌ-pákáꞌna. Pueꞌ mamporángákou upu-upu.

¹⁷TABEÁ HANGKO I KÓDÓꞋ, PAULU. KAHÓPÓꞋÁNA SURA DEꞋE KUꞋUKIꞋ HAI TAENGKUꞋ HADUDUÁNGKUꞋ. DEꞋE MIꞋI TANDAꞋ TO KUPAKEꞋ I UPU-UPU SURANGKUꞋ, BONA NIꞋISÁ NTEPUꞋU KAKÓDÓꞋNA MIꞋI TO MOUKIꞋ SURA DEꞋE.

¹⁸Kupembiáꞌ bona Pueꞌtaꞌ Iesu Kerisitu mowátiꞌkou upu-upu hangko i kabulána laluNa. Hangko i kódóꞌ, Paulu