Read Besoa 1 Timotiu 2 Bible Online

1 Timotiu 2 - Besoa bible

1 Timotiu 2

¹Rungu-runguna, kupembiáꞌ ntepuꞌu bona upu-upu tauna to mepoinálái i Pueꞌ Iesu mekakae i Pueꞌ Ala, membiáꞌ ahiꞌ hai manguliꞌ woꞌo handaꞌ kamaroꞌana. Hangaa-ngaa tapekakaeáheꞌ woꞌo upu-upu tauna,

²tepasuaꞌ upu-upu datu hai topopárentá. Hangaa-ngaa tapekakaeáheꞌ, bona maroꞌa pobágóꞌraꞌ. Ane noꞌonoꞌi, ina maroꞌa woꞌo katueꞌtaꞌ hai tiꞌara ara tauna to mampopeahiahiꞌkeꞌ, bona peisákeꞌ menómbá i Pueꞌ Ala hai mobábehikeꞌ oaꞌ bábehiá to hintotoꞌ rabiláꞌ hángká rángántaꞌ.

³Maroꞌa ane noꞌonoꞌi pekakaentaꞌ, láwiꞌ iti to mopagóeꞌ Pueꞌ Ala Topohómpóꞌ Salaꞌtaꞌ.

⁴PeundeꞌáNa bona upu-upu tauna tehómpóki hangko i huku dósá, hai moisá paturoꞌ to toꞌu. Paturoꞌ to toꞌu iti ia miꞌi:

⁵Hadua peá Pueꞌ Ala,[4] hai hadua woꞌo Topetangaꞌ-tangaꞌi to mopahintuwuꞌ Pueꞌ Ala hai tauna. Topetangaꞌ-tangaꞌi iti tauna woꞌo, ia miꞌi Kerisitu Iesu.

⁶Ia to mampehuhuꞌá wátáNa rapapate bona mohómpóki salaꞌraꞌ upu-upu tauna. Iti miꞌi ntóáꞌna Ngkóráꞌ Marasa hai pewaliꞌána hiolaꞌ hai tempó to napakanótó Pueꞌ Ala.

⁷Onoꞌ miꞌi haneꞌi Pueꞌ Ala mopileꞌiaꞌ mewaliꞌ suroNa. Nahuoꞌaꞌ mopahaweꞌ bámbári to toꞌu iti i tauna to tiꞌaraheꞌ toIahudiꞌ. Nahuoꞌaꞌ mopaturoꞌáheꞌ paturoꞌ to toꞌu, bona mepoináláiheꞌ i Iesu. Toꞌu ntepuꞌu to kuꞌuliꞌ deꞌe, tiꞌaraꞌaꞌ modongkoꞌ.

⁸Peundeꞌángkuꞌ bona iumbá-umbá peá, tobaleilo mekakae. Hangaa-ngaa magasaꞌ laluraꞌ, hai tiꞌaraheꞌ peisá mabukoꞌ ba mosisalaꞌ.

⁹Kuꞌundeꞌ woꞌo bona towawine hangaa-ngaa mopakeꞌheꞌ waruꞌ to hintotoꞌ hai ádá. Ineeꞌheꞌ mobubungaꞌi waruꞌraꞌ bona raita rángáraꞌ. Ineeꞌheꞌ mampopengaa-ngaa weluáꞌraꞌ. Ineeꞌheꞌ mopakeꞌ buláwá ba mutiara ba waruꞌ to masuliꞌ gaga.

¹⁰Rángina miꞌi towawine ratóiá ánti bábehiáraꞌ to maroꞌa, nodo to hintotoꞌ i towawine to mengkoruꞌ i Pueꞌ Ala.

¹¹Towawine hangaa-ngaa mengkoruꞌ i tadulako jemaꞌa hai maniiꞌ-niiꞌheꞌ mampehádingi paturoꞌ.

¹²Tiꞌara kupaliu towawine mopaturoꞌ ba mopárentáiheꞌ tobaleilo. Hangaa-ngaa maniiꞌ-niiꞌ peheꞌ hai mampehádingi.

¹³Kuꞌuliꞌ noꞌonoꞌ láwiꞌ to rungu-runguna napopewaliꞌ Pueꞌ Ala, ia miꞌi Adama, hangko Hewá riꞌi.

¹⁴Hai tiꞌara Adama to rakeloꞌ, agáiáná Hewá riꞌi, álána moliungi párentána Pueꞌ Ala.

¹⁵Kehapiꞌmoheꞌ towawine molámbiꞌ pehuku moliu pantódiháraꞌ i tempóraꞌ moánáꞌ,[5] bateꞌraꞌ ina molámbiꞌ katehómpóꞌ asalaꞌ mepoináláiheꞌ oaꞌ i Pueꞌ hai mampokaꞌahiꞌheꞌ hángká rángáraꞌ, magasaꞌ tueꞌraꞌ, hai mengkaiwóiꞌheꞌ oaꞌ.