Read Besoa 1 Timotiu 3 Bible Online

1 Timotiu 3 - Besoa bible

1 Timotiu 3

¹Ara tauna to manguliꞌ: “Tauna to mampoinaoheꞌ motadulakoi jemaꞌa, lempóna raundeꞌ mampopolumao bágóꞌ to maroꞌa.” Toꞌu ntepuꞌu laluita iti.

²Mewaliꞌ tadulako i jemaꞌa, hangaa-ngaa to tiꞌara peisá rasalaꞌi. Hangaa-ngaa hadua peá toinána,[6] hai nabuku momeeꞌ peundeꞌána laluna. Hangaa-ngaa to bukeꞌ pekiri hai moisá ádá. Hangaa-ngaa naundeꞌ motarima torare i támbina hai naisá mepaturoꞌ.

³Tiꞌara peisá to paka malangu ba to paka mosisalaꞌ. Hangaa-ngaa to maꞌálusuꞌ pambiárána, to moisá mohintuwuꞌ hai hángká rángána, hai to tiꞌara mampoinao peá dóiꞌ.

⁴Hangaa-ngaa naisá motadulakoi tauna to toroꞌ i támbina, hai naisá mopaturoꞌ ánáꞌna bona raisá mebiláꞌ hai mengkoruꞌ i tosaeraꞌ.

⁵Láwiꞌ ane ara tauna to tiꞌara moisá mokádipurá tauna i lalu támbina, noumbá paꞌi kanabukuna motadulakoi taunána Pueꞌ Ala?

⁶Ane ara hadua tauna to tiꞌara mani marue mepoinálái i Pueꞌ Iesu, ia tiꞌara mani peisá rapileꞌi mewaliꞌ pinátuá, bona ia tiꞌara mewaliꞌ maꞌángkáꞌ hai kahópóꞌána molámbiꞌ pehuku nodo karahukuna Datu Tokadake ánti kamaꞌángkáꞌna.

⁷Kaliliuána, tauna to motadulakoi jemaꞌa hangaa-ngaa to tiꞌara ara salaꞌiána i peitáraꞌ tauna to tiꞌaraheꞌ mepoinálái, bona ineeꞌ maꞌala rapakanawoꞌ haneꞌi nakuasaꞌi Datu Tokadake.

⁸Noꞌonoꞌ woꞌo hai tauna to mewaliꞌ diaken. Hangaa-ngaa manótó bábehiáraꞌ hai hintotoꞌ rabiláꞌ. Tiꞌara peisá to momata potimbali ba paka malangu ba mampoinao peá dóiꞌ.

⁹Ngkáliꞌna riꞌi, hangaa-ngaa motibaaꞌ ntepuꞌuheꞌ paturoꞌ to hangko i Pueꞌ Ala. Hangkoia paturoꞌ iti tewuniángi i tauna, agáiáná deꞌe-deꞌe tongawaꞌ miꞌi. Hangaa-ngaa mampeuláꞌiheꞌ paturoꞌ iti hangko i kabulána laluraꞌ.

¹⁰Ane araheꞌ tauna to mampoinao mewaliꞌ diaken, hangaa-ngaa nipampeitai sieruꞌ bábehiáraꞌ hai pambiáráraꞌ, hai ane tiꞌara ara salaꞌiáraꞌ, hangko peisáraheꞌ rapileꞌi mewaliꞌ diaken i lalu jemaꞌa.

¹¹Noꞌonoꞌ woꞌo toináraꞌ.[7] Hangaa-ngaa manótó bábehiáraꞌ bona hintotoꞌheꞌ rabiláꞌ. Tiꞌaraheꞌ hintotoꞌ ane moánti-ántiheꞌ laluita. Hangaa-ngaa raisá momeeꞌ peundeꞌána laluraꞌ, hai hangaa-ngaa tauna to peisá rapoinálái i pákáꞌ-pákáꞌna.

¹²Diaken hangaa-ngaa hadua peá toináraꞌ,[8] hai hangaa-ngaa moisáheꞌ motadulakoi maroꞌa ánáꞌraꞌ hai tauna to toroꞌ i támbiraꞌ.

¹³Ane maroꞌa kamampopolumaoraꞌ bágóꞌna Pueꞌ, ina rabiláꞌheꞌ, hai ina tetámbái kapebáiꞌraꞌ mopahaweꞌ i tauna mokana i pepoináláiraꞌ i Kerisitu Iesu.

¹⁴Timotiu, ara mpuꞌu tunggáiángkuꞌ lao moweoꞌkoꞌ. Agáiáná kehapiꞌ noꞌonoꞌ, kuꞌukiꞌákoꞌ sura deꞌe,

¹⁵bona ane marue maniaꞌ hangko haweꞌ, ina nuisá miꞌi ami noumbá katueꞌna tauna to mepoinálái i Pueꞌ Ala to tueꞌ. Motibaaꞌkeꞌ paturoꞌ to toꞌu, láwiꞌ paturoꞌ iti ia miꞌi ntóáꞌna hai róhóna pepoináláintaꞌ.

¹⁶Maroꞌa ntepuꞌu paturoꞌ to tapeuláꞌi ánti pengkoruꞌtaꞌ i Pueꞌ Ala. Hangkoia paturoꞌ iti tiꞌara raisá tauna, agáiáná deꞌe-deꞌe napatongawaꞌámokeꞌ Pueꞌ Ala. Deꞌe miꞌi to tapoinálái mokana i Iesu Kerisitu: Ia miꞌi to mewaliꞌ tauna, to napakanótó Inao to Magasaꞌ,[9] hai to raita malaꞌeka. BámbáriNa rapahaweꞌ i tauna to tiꞌara maniheꞌ moisá Pueꞌ Ala, hai Ia rapoinálái tauna i humalele duniáꞌ, hai naoreꞌ Pueꞌ Ala lao i surugáꞌ. Ionoꞌ Ia meawaꞌ tueꞌNa.