Read Besoa 1 Timotiu 4 Bible Online

1 Timotiu 4 - Besoa bible

1 Timotiu 4

¹Inao to Magasaꞌ mopakanótó i kitaꞌ: i alo to ina haweꞌ, araheꞌ tauna to ina mosuliꞌ hangko i pampeuláꞌiraꞌ paturoꞌ to toꞌu. Ina mengkoruꞌheꞌ i kuasaꞌ to mepakanawoꞌ hai mampeuláꞌiheꞌ paturoꞌ to hangko i setáꞌ.

²Paturoꞌ iti ina rapahaweꞌ tauna to mepakanawoꞌ. Topodongkoꞌheꞌ. Laluitaraꞌ tiꞌara hiolaꞌ hai bábehiáraꞌ. Makáindi laluraꞌ; tiꞌara piꞌi raisá mahili ane mobábehiheꞌ bábehiá to kadake.

³Mopaturoꞌheꞌ tauna bona ineeꞌheꞌ mohamboko hai ineeꞌheꞌ mandeꞌ ba apa peá to rapopopáliáꞌáheꞌ. Mole upu-upu pandeꞌ napopewaliꞌ Pueꞌ Ala bona raꞌandeꞌ. Kitaꞌ to mepoinálái i Kerisitu hai moisá paturoꞌ to toꞌu, peisá taꞌandeꞌ upu-upuna asalaꞌ tapekakaeá i lalu hangaꞌna Pueꞌ Ala.

⁴Tiꞌara ara to rapáliá ane tatarima hai tauliꞌ handaꞌ kamaroꞌana i Hia. Upu-upu to napopewaliꞌ Pueꞌ Ala maroꞌa, láwiꞌ Ia haduduáNa to manguliꞌ noꞌonoꞌ

⁵moliu ngkóráꞌNa.[10] Nawátiꞌ woꞌo moliu pekakaentaꞌ.

⁶Timotiu, ane nupaturoꞌáheꞌ halalu hampepepoináláintaꞌ upu-upu paturoꞌ deꞌe, ina mewaliꞌkoꞌ topobágóꞌna Kerisitu Iesu to maroꞌa. Hai ina maróhó ntepuꞌu lalumu ánti ngkóráꞌna Pueꞌ Ala to nupoinálái, hai ánti paturoꞌ to maroꞌa to marue miꞌi nupeuláꞌi.

⁷Ineeꞌ nutibe-tibe tempómu lao mampehádingi darita-darita to tiꞌara toꞌu hai tiꞌara modureikeꞌ i lalu pepoináláintaꞌ. Ngkáliꞌna riꞌi hangaa-ngaa nupakaróhó lalumu bona maróhó ntepuꞌu pengkoruꞌmu i Pueꞌ Ala.

⁸Láwiꞌ ane wátántaꞌ peá tapakaróhó, hantóiꞌ peá pobunduꞌána. Agáiáná ane pepoináláintaꞌ tapakaróhó, handaꞌ pobunduꞌána, láwiꞌ iti to moánti pewátiꞌ i lalu katueꞌtaꞌ, maroꞌa i duniáꞌ deꞌe, maroꞌa i alo to ina haweꞌ.

⁹Toꞌu ntepuꞌu laluita iti, hangaa-ngaa tapoinálái.

¹⁰Onoꞌ miꞌi haneꞌi mobágóꞌkeꞌ matimi, láwiꞌ mepoináláikeꞌ i Pueꞌ Ala to tueꞌ duuꞌna i rue-ruena láwiꞌ Ia to mohómpóki upu-upu tauna, iamoheꞌ to mepoinálái i Hia.

¹¹Upu-upu to kuhángáꞌáꞌákoꞌ deꞌe, nupaturoꞌáheꞌ hai nuhawaꞌiáheꞌ bona rapeuláꞌi.

¹²Kehapiꞌ maleheꞌ manikoꞌ, agáiáná hintotoꞌkoꞌ rabiláꞌ tauna. Onoꞌ miꞌi haneꞌi hangaa-ngaa nupoweꞌiheꞌ pándiriꞌ[11] moliu: polaluitamu, bábehiámu, kamaꞌahiꞌmu i hángká rángámu, pepoináláimu i Pueꞌ, hai katueꞌmu to magasaꞌ.[12]

¹³Hangko tiꞌara maniaꞌ haweꞌ, hangaa-ngaa nubásá oaꞌ Sura Magasaꞌ i lindoꞌraꞌ halalu hampepepoináláintaꞌ. Hangaa-ngaa nupakaróhó oaꞌ laluraꞌ hai nupaturoꞌheꞌ.

¹⁴Ineeꞌ nukábáhá bágóꞌmu to hangaa-ngaa nupopolumao hiolaꞌ hai pewátiꞌ to naweꞌikoꞌ Inao to Magasaꞌ. Io raweꞌikoꞌ pewátiꞌ iti i tempóraꞌ pinátuá i jemaꞌa moángkáꞌ taeraꞌ i wuáꞌmu mopahaweꞌ laluita to hangko i Pueꞌ Ala.

¹⁵Upu-upu bágóꞌmu hangaa-ngaa nupopolumao hangko i lalumu ntepuꞌu, bona tongawaꞌ i upu-upu tauna pobágóꞌmu i Pueꞌ kalao-lao maroꞌa.

¹⁶Hangaa-ngaa nukámpái bábehiámu, hai nukámpái woꞌo paturoꞌmu. Nupobágóꞌ oaꞌ upu-upuna iti, bona molámbiꞌkoꞌ katehómpóꞌ, noꞌonoꞌ woꞌo tauna to mampehádingi paturoꞌmu ina molámbiꞌheꞌ woꞌo katehómpóꞌ.