Read Besoa 1 Timotiu 5 Bible Online

1 Timotiu 5 - Besoa bible

1 Timotiu 5

¹Ane mopaturoꞌkoꞌ tobaleilo to matinuwuꞌ hangko i hio, ineeꞌkoꞌ makasaraꞌ. Nurekeꞌheꞌ nodo umámu, hai nupamaꞌálusuꞌ polaluitamu ane paraluuheꞌ nukámbáróá. Ane ánáꞌntomoane, nurekeꞌheꞌ nodo halalumu.

²Ane towawine to matinuwuꞌ hangko i hio, nurekeꞌheꞌ nodo inámu, hai towawine to maleheꞌ mani hangko i hio, hangaa-ngaa nurekeꞌheꞌ nodo ádimu hangko i lalumu to magasaꞌ.

³I lalu jemaꞌa, ane arai towawine to bembaꞌ to tueꞌ mosadudua, hangaa-ngaa nibiláꞌ hai nikádipuráheꞌ.

⁴Agáiáná ane tobembaꞌ to ara ánáꞌna ba ueꞌna, hira iti to hangaa-ngaa nupaturoꞌ kana i rárá mokádipurá ináraꞌ hai moháwángiheꞌ kamaroꞌana tosaeraꞌ i hira, láwiꞌ iti to mopagóeꞌ Pueꞌ Ala.

⁵Ane arai tobembaꞌ to mosadudua, lempóna tiꞌara ara to mokádipurá. Ia mehárungá peá i Pueꞌ Ala. I alo-alona ia mekakae membiáꞌ tulungi.

⁶Agáiáná tobembaꞌ to mampeliꞌ peheꞌ kagóeꞌ-góeꞌ, nurekeꞌmoheꞌ mate i lalu pepoináláiraꞌ, kehapiꞌ tueꞌ maniheꞌ.

⁷Kupembiáꞌ bona nupahaweꞌáheꞌ halalu hampepepoináláintaꞌ paturoꞌkuꞌ deꞌe, bona tiꞌara ara to peisá mosalaꞌi bábehiáraꞌ.

⁸Láwiꞌ ane ara tauna to manguliꞌ maroꞌa pepoináláina i Pueꞌ Ala, agáiáná tiꞌara mokádipurá halaluna, pelumbuꞌna mani to hantámbiána, lempóna ia mosápuáka pepoináláina. Tauna to noꞌonoꞌ, melumbuꞌ kakadakena hangko i tauna to tiꞌara mepoinálái i Pueꞌ Ala.

⁹Tobembaꞌ to peisá rapopesuaꞌ hangaꞌraꞌ i lalu sura pokatámpáꞌá tobembaꞌ bona ratulungiheꞌ hangka hampepepoináláiraꞌ, bateꞌna peá tauna to tinuwuꞌraꞌ tiꞌara makuraꞌ hangko i ini puloꞌna parena hai to hangkani peá mohamboko.[13]

¹⁰Hangaa-ngaa nipáresáꞌheꞌ sieruꞌ: Ba manótó bábehiána? Ba ia mokádipurá maroꞌa ánáꞌna? Ba ia bulá laluna motarima torare i támbina? Ba ia motulungi halalu hampepepoináláina? Ba ia mokádipurá tauna to i lalu kapári? Ba ia timama oaꞌ mobábehi upu-upu to maroꞌa?

¹¹Ane tobembaꞌ to maleheꞌ mani, ineeꞌ raukiꞌ hangaꞌraꞌ i lalu sura pokatámpáꞌá tobembaꞌ, láwiꞌ ane ara mani peundeꞌána laluraꞌ mohamboko, bateꞌraꞌ ina mohamboko. Kahópóꞌána masalaꞌheꞌ, láwiꞌ moliungiheꞌ dándiraꞌ i Kerisitu.[14]

¹³Mewaliꞌ, ane maleheꞌ maniheꞌ, ineeꞌ raukiꞌ hangaꞌraꞌ i lalu sura pokatámpáꞌá tobembaꞌ, láwiꞌ biásána loheheꞌ mampopolumao bágóꞌna Pueꞌ, agáiáná raundeꞌ peá oaꞌ paka lao morángá. Hai tiꞌara peá onoꞌ, agáiáná moánti-ántiheꞌ woꞌo laluita i rángáraꞌ. Raundeꞌ peá mosalempori bágóꞌna tauna ntániꞌna, hai mopahaweꞌheꞌ oaꞌ laluita to tiꞌara hintotoꞌ rahuwárá.

¹⁴Onoꞌ miꞌi haneꞌi kuꞌuliꞌ, tobembaꞌ to maleheꞌ mani, rángina miꞌi mohamboko huleꞌ, moánáꞌ, hai mokádipurá maroꞌa tauna to ara i lalu támbiraꞌ, bona tiꞌara ara ráráraꞌ ewálintaꞌ mosalaꞌikeꞌ.

¹⁵Láwiꞌ araheꞌ bahangapa tobembaꞌ to tiꞌara piꞌi mampeuláꞌi peundeꞌána Kerisitu, agáiáná mampeuláꞌiraheꞌ peundeꞌána Datu Tokadake.

¹⁶Ane araheꞌ toSarani to ara tobembaꞌ i oloꞌraꞌ tináraꞌ, hangaa-ngaa tináraꞌ iti to mokádipuráheꞌ bona tiꞌara mopamatimi jemaꞌa ane hira woꞌo paraluu rakádipurá, láwiꞌ jemaꞌa hangaa-ngaa mokádipurá tobembaꞌ to meahiahiꞌ ntepuꞌu tueꞌraꞌ, to tiꞌarapoheꞌ ara topokádipurá.

¹⁷Ane pinátuáraꞌ to maroꞌa petadulakoiraꞌ, hintotoꞌ ntepuꞌuheꞌ molámbiꞌ pesaro to melumbuꞌ hangko i pinátuá ntániꞌna, tandaꞌ karabiláꞌraꞌ, pelumbuꞌna mani pinátuá to madota mepaturoꞌ hai motuntu.

¹⁸Láwiꞌ i lalu Sura Magasaꞌ teukiꞌ node: “Ineeꞌ rasamakuꞌ hume gapiꞌ to tangaꞌna rapopobágóꞌ.” [15] Hai teukiꞌ woꞌo: “Ineeꞌ nitaha saroraꞌ topobágóꞌ, láwiꞌ hintotoꞌheꞌ raweꞌi.”[16] [17]

¹⁹Ane ara hadua pinátuá to rasalaꞌi tauna, ineeꞌ kásáliu nutarima pesalaꞌiraꞌ. Ane arai rodua ba tálu tauna to mosabiki katoꞌuna kamasalaꞌna, hangko peisá riꞌi nutarima.

²⁰Ane ara pinátuá to mobábehi oaꞌ dósá, hangaa-ngaa nukámbáróá i lindoꞌna jemaꞌa, bona tauna ntániꞌna ina malááꞌheꞌ woꞌo mampeuláꞌi bábehiána.

²¹I lindoꞌna Pueꞌ Ala hai Kerisitu Iesu hai malaꞌekaNa to Napileꞌi, kupembiáꞌ ntepuꞌu bona hangko i lalumu, nupeuláꞌi upu-upu to kuháwáꞌiámokoꞌ, hai ineeꞌkoꞌ mampopontaniꞌ tauna.

²²Ineeꞌkoꞌ hawiáꞌ moángkáꞌ tauna mewaliꞌ pinátuá, bona tiꞌara io to mampohurunga ane tauna iti mobábehi dósá. Hangaa-ngaa nupáresáꞌ sieruꞌ bábehiána, hangko nuángkáꞌ riꞌi taemu i wuáꞌna. Maroꞌa-roꞌakoꞌ woꞌo bona manótó oaꞌ bábehiámu.

²³Timotiu, ineeꞌkoꞌ mainu uwai ntooꞌ peá. Rángina miꞌi nugalo hantóiꞌ hai anggoroꞌ, láwiꞌ kuisá madáháꞌ mahái taꞌimu.

²⁴Araheꞌ tauna to tongawaꞌ miꞌi kamadósáraꞌ, kehapiꞌ tiꞌara mani rahoda-hoda kárá-káráraꞌ. Araheꞌ woꞌo tauna to tiꞌara mani taisá kamadósáraꞌ.

²⁵Noꞌonoꞌ woꞌo, araheꞌ tauna to tongawaꞌ ntepuꞌu kamaroꞌana bábehiáraꞌ. Araheꞌ woꞌo tauna to maroꞌa bábehiáraꞌ, hai kamaroꞌana bábehiáraꞌ iti tiꞌara mani raisá tauna, agáiáná hangkani tempó ina tongawaꞌ woꞌo.