Read Besoa 1 Timotiu 6 Bible Online

1 Timotiu 6 - Besoa bible

1 Timotiu 6

¹Ane halalu hampepepoináláintaꞌ to hawiꞌ tueꞌraꞌ, nupaturoꞌheꞌ bona mobiláꞌheꞌ pueꞌraꞌ hai mampeuláꞌi woꞌo hawaꞌraꞌ, bona tiꞌara ara tauna to peisá motitibei hangaꞌna Pueꞌ Ala ba mopakóiꞌ paturoꞌtaꞌ.

²Ane toSarani pueꞌraꞌ, tiꞌara hintotoꞌ ane hawiꞌ manguliꞌ node: “Tiꞌara paraluu kupeuláꞌi hawaꞌna, láwiꞌ ia halalu hampepepoináláingkuꞌ.” Ngkáliꞌna riꞌi, hawiꞌ hangaa-ngaa mopamaroꞌa ntepuꞌu kamampopolumaona bágóꞌna pueꞌna, láwiꞌ pueꞌna iti ia miꞌi halalu hampepepoináláina to napokaꞌahiꞌ. Upu-upu to kuꞌukiꞌ deꞌe, hangaa-ngaa nupaturoꞌáheꞌ tauna bona maróhó pepoináláiraꞌ.

³Araheꞌ to moánti paturoꞌ to mosisalaꞌ hai paturoꞌ to tapahaweꞌ i tauna. Tiꞌaraheꞌ mampoinálái paturoꞌ to toꞌu iti to hangko i Pueꞌtaꞌ Iesu Kerisitu mokana i pengkoruꞌtaꞌ i Pueꞌ Ala.

⁴Tauna iti mampe to mapánde peheꞌ, mole tiꞌaraheꞌ moisá apa-apa. Mampoinao peheꞌ mopaꞌara posisalaꞌ hai pombeheheꞌ mokana peá i laluita. Moliu paturoꞌraꞌ to salaꞌ iti, handaꞌ tauna mewaliꞌ mahiniꞌ, mosisalaꞌ, mesasalaꞌi, meraiꞌ,

⁵hai mombeheheꞌheꞌ oaꞌ hai tauna ntániꞌna. Tauna to noꞌonoꞌ, kedái pekiriraꞌ, hai tiꞌarapoheꞌ peisá moisá paturoꞌ to toꞌu. Rauliꞌ ripaꞌi, peisáheꞌ molámbiꞌ rasiꞌ hangko i poágámáraꞌ.

⁶Katoꞌuána, to rauliꞌ iti toꞌu. Poágámántaꞌ moánti rasiꞌ to mahile, asalaꞌ tueꞌkeꞌ hintotoꞌ hai peundeꞌána Pueꞌ Ala hai tapogáná apa to ara i kitaꞌ.

⁷I kahaweꞌtaꞌ i duniáꞌ deꞌe, tiꞌara ara to taꞌánti. Noꞌonoꞌ woꞌo i pesuleꞌtaꞌ, tiꞌara ara to peisá taꞌánti.[18]

⁸Mewaliꞌ, ane ara pandeꞌ hai pewaruꞌ, iti magáná miꞌi.

⁹Agáiáná tauna to mampoinaoheꞌ mewaliꞌ topebuku, nakeloꞌheꞌ peundeꞌána laluraꞌ haduduáraꞌ. Peundeꞌána laluraꞌ iti tiꞌara mobunduꞌ, ngkáliꞌna riꞌi moánti peheꞌ i kapári. Kaupuána, manawoꞌheꞌ i lalu dósá, álána molámbiꞌheꞌ rugiꞌ.

¹⁰Handaꞌ pákáꞌna bábehiá to kadake mentóáꞌ hangko i peundeꞌána tauna mampeliꞌ peá dóiꞌ. Hai ara mpuꞌu tauna to noꞌonoꞌ, to mampeliꞌ peheꞌ oaꞌ dóiꞌ, álána mehupeꞌheꞌ hangko i pepoináláiraꞌ. Kahópóꞌána, mopamarugiꞌ peheꞌ laluraꞌ haduduáraꞌ i lalu pepoináláiraꞌ, hai narampeheꞌ handaꞌ kapári.

¹¹Agáiáná io Timotiu, hangaa-ngaa nupakaraoꞌ upu-upu bábehiá to noꞌonoꞌ, láwiꞌ io huoꞌánakoꞌ Pueꞌ Ala. Nupári-pári mobábehi bábehiá to manótó. Mengkoruꞌkoꞌ i Pueꞌ Ala. Nupakaróhó pepoináláimu i Kerisitu hai kamaꞌahiꞌmu i hángká rángámu. Mantahakoꞌ i lalu kapári. Nupamaꞌálusuꞌ pambiárámu i tauna ntániꞌna.

¹²Nupári-pári bona tueꞌkoꞌ hiolaꞌ hai apa to nupoinálái, hai nupakaróhó pepoináláimu to moántikoꞌ i katueꞌ to maroꞌa to tiꞌara mokahópóꞌá, láwiꞌ iti miꞌi tunggáiána Pueꞌ Ala mopileꞌikoꞌ mewaliꞌ taunáNa. Hai to nupangákuꞌ miꞌi i lindoꞌraꞌ tauna to handaꞌ, kamepoináláimu i Pueꞌ Iesu.

¹³Mewaliꞌ, deꞌe miꞌi paturoꞌkuꞌ i hio, Timotiu. Kuweꞌikoꞌ laluita i lindoꞌna Pueꞌ Ala to mopatueꞌ hinángkáꞌna, hai i lindoꞌna Kerisitu Iesu to mopangákuꞌ kaheánáNa i lindoꞌna Pontiu Pilatu.[19]

¹⁴Kuweꞌikoꞌ laluita bona nupeuláꞌi upu-upu hawaꞌ iti, bona tiꞌara ara to peisá mosalaꞌikoꞌ duuꞌna i kahaweꞌána huleꞌ Pueꞌtaꞌ Iesu Kerisitu.

¹⁵Tempó kahaweꞌáNa huleꞌ iti ina mewaliꞌ i tempó to napakanótó miꞌi Pueꞌ Ala mouláꞌ peundeꞌáNa haduduáNa. Bateꞌna peá Ia to makuasaꞌ hai hintotoꞌ ratóiá. Ia miꞌi Datu to melumbuꞌ kamakuasaꞌNa hangko i upu-upu datu, Ia miꞌi Pueꞌ to melumbuꞌ kamakuasaꞌNa hangko i upu-upu pueꞌ.

¹⁶Bateꞌna peá Ia to tiꞌara ara kahópóꞌána.[20] Ia toroꞌ i lalu kamabaaꞌána to meawaꞌ ntepuꞌu. Tiꞌara ara haweꞌ hadua to peisá mohungkuki ba moita, láwiꞌ Ia tiꞌara peisá teita. Bateꞌna peá Ia to hintotoꞌ rabiláꞌ hai to hintotoꞌ mepárentá duuꞌna i rue-ruena. Ami.

¹⁷Ane tauna to pebuku i lalu duniáꞌ deꞌe, nupaturoꞌheꞌ bona ineeꞌheꞌ mampepemahile, hai ineeꞌheꞌ mehárungá i párewá ngkáduniáꞌ, láwiꞌ párewá ngkáduniáꞌ peisá marugiꞌ. Ngkáliꞌna riꞌi, hangaa-ngaa mepoináláiheꞌ i Pueꞌ Ala to mampoweꞌikeꞌ handaꞌ pewátiꞌ to tiꞌara ara hukáꞌna, bona upu-upuna iti tapokagóeꞌ.

¹⁸Nupaingáꞌiheꞌ bona maroꞌa oaꞌ bábehiáraꞌ, motulungiheꞌ tauna ntániꞌna, góeꞌheꞌ mampoweꞌi apa-apa i hángká rángáraꞌ, hai maroꞌa oaꞌ laluraꞌ.

¹⁹Láwiꞌ ane onoꞌ rabábehi, nodoheꞌ mowoli párewá to maroꞌa i lalu surugáꞌ, hai bateꞌna ina molámbiꞌheꞌ katueꞌ to maroꞌa ntepuꞌu hingkakani hai Pueꞌ Ala.

²⁰Timotiu, hangaa-ngaa nutibaaꞌ maroꞌa apa to napoináláiákoꞌ Pueꞌ Ala. Mewaliꞌ, paturoꞌ iti. Nukaraohiheꞌ tauna to moánti laluita to tiꞌara mobunduꞌ, hai tauna to moewaꞌkoꞌ moliu paturoꞌraꞌ to tiꞌara toꞌu. Rauliꞌ ara kapánderaꞌ, mole tiꞌara toꞌu.

²¹Araheꞌ tauna to mampeuláꞌi paturoꞌraꞌ iti, álána mehupeꞌheꞌ hangko i pepoináláiraꞌ i Iesu. Pueꞌ mowátiꞌkou upu-upu. Hangko i kódóꞌ, PAULU