Read Besoa 2 Timotiu 3 Bible Online

2 Timotiu 3 - Besoa bible

2 Timotiu 3

¹Bona nuisá, i alo-alo to kahópóꞌána, ina masusa ntepuꞌu katueꞌraꞌ tauna ánti kakadakeraꞌ tauna i duniáꞌ.

²Handaꞌ tauna ina mampomahile peheꞌ wátáraꞌ haduduáraꞌ, ina mampoinaoheꞌ mewaliꞌ topebuku, ina mopalóngkáheꞌ, ina mampepemahileheꞌ, hai ina mopakóiꞌheꞌ hángká rángáraꞌ. Tiꞌaraheꞌ ina mengkoruꞌ i tosaeraꞌ, tiꞌara ina raisá manguliꞌ handaꞌ kamaroꞌana, hai tiꞌaraheꞌ ina mobiláꞌ Pueꞌ Ala.

³Tiꞌaraheꞌ ina maꞌahiꞌ, hai tiꞌara ina raisá mohintuwuꞌ. Ina mosasalaꞌiheꞌ oaꞌ hángká rángáraꞌ, tiꞌaraheꞌ ina momeeꞌ peundeꞌána laluraꞌ, ina masekeheꞌ, hai ina mokáhihiꞌheꞌ apa peá to maroꞌa.

⁴Ina mopakanawoꞌheꞌ hángká rángáraꞌ, tiꞌara ina kaladu pampekiriraꞌ, hai ina motóiá peheꞌ wátáraꞌ haduduáraꞌ. Tiꞌaraheꞌ ina mampeuláꞌi peundeꞌána Pueꞌ Ala, agáiáná ina mampeuláꞌi peheꞌ peundeꞌána laluraꞌ haduduáraꞌ.

⁵I peitáraꞌ tauna, mampeuláꞌi ntepuꞌuheꞌ áturá-áturá poagama nodoheꞌ tauna to mengkoruꞌ i Pueꞌ Ala, mole riꞌi hira iti mosápuákaheꞌ kuasaꞌna Pueꞌ Ala to peisá mobáliki laluraꞌ. Ineeꞌheꞌ nupohintuwuꞌá tauna to noꞌonoꞌ bábehiáraꞌ,

⁶láwiꞌ i oloꞌraꞌ, araheꞌ tauna to moánti paturoꞌ to salaꞌ i támbiraꞌ tauna, hai mopakanawoꞌheꞌ towawine to maledeꞌ laluraꞌ. Towawineheꞌ iti, handaꞌ dósáraꞌ, hai mampeuláꞌi peheꞌ peundeꞌána laluraꞌ haduduáraꞌ.

⁷Raundeꞌ oaꞌ mampehádingi paturoꞌ, agáiáná tiꞌara maniheꞌ mopailalu paturoꞌ to toꞌu to hangko i Pueꞌ Ala.

⁸Guru to mepakanawoꞌheꞌ iti, kadake pekiriraꞌ, hai pepoináláiraꞌ tiꞌara piꞌi ara. Mewaliꞌ, tiꞌaraheꞌ naundeꞌ Pueꞌ. Moewaꞌheꞌ paturoꞌ to toꞌu, nodo Iane hai Iambereꞌ[12] to moewaꞌ nabiꞌ Musa hangkoia i tampoꞌ Másiriꞌ.

⁹Tiꞌara rabuku moewaꞌ kuasaꞌna Pueꞌ Ala to ara i Musa. Apa to mewaliꞌ i hira, ina mewaliꞌ woꞌo i guru-guru to mepakanawoꞌ i tempó deꞌe. Tiꞌara ina rabuku moewaꞌ paturoꞌ to toꞌu, láwiꞌ kabeberaꞌ bateꞌna ina raisá upu-upu tauna.

¹⁰Agáiáná io Timotiu, láwiꞌ maruemokoꞌ mamporángáꞌaꞌ, nuisá ntepuꞌu miꞌi noumbá paturoꞌkuꞌ, bábehiángkuꞌ hai tunggáiána lalungkuꞌ. Nuisá woꞌo noumbá pepoináláingkuꞌ, kasabaraꞌkuꞌ, kamaꞌahiꞌkuꞌ i hángká rángángkuꞌ, hai kamantódihángkuꞌ i lalu kapári.

¹¹Nuisá ntepuꞌu kapári to kulámbiꞌ i tempóngkuꞌ rapopeahiahiꞌ i kótá Antiokia, Ikoniu hai Lisitera.[13] Rumihi ntepuꞌu kamapáringkuꞌ iti! Agáiáná Pueꞌ mokábáháꞌaꞌ hangko i upu-upuna iti.

¹²Taisá miꞌi: upu-upu tauna to meuláꞌ i Kerisitu Iesu hai to moundeꞌ toroꞌ hintotoꞌ hai peundeꞌána Pueꞌ Ala bateꞌna ina rapopeahiahiꞌ.

¹³Agáiáná tauna to kadake hai topodongkoꞌ ina tetámbái kakadakena bábehiáraꞌ. Mopakanawoꞌheꞌ hángká rángáraꞌ moliu paturoꞌraꞌ to salaꞌ, hai hira woꞌo rapakanawoꞌheꞌ.

¹⁴Agáiáná io Timotiu, hangaa-ngaa nutibaaꞌ oaꞌ paturoꞌ to nuhádi miꞌi. Nuisá ntepuꞌu katoꞌuna paturoꞌ iti, láwiꞌ nuisá heáná iti to mopaturoꞌkoꞌ.

¹⁵Noꞌonoꞌ woꞌo i kaꞌánángkóiꞌmu mani, nuisá miꞌi apa to teukiꞌ i lalu Sura Magasaꞌ.[14] Sura Magasaꞌ iti to peisá mopakanótó lalumu duuꞌna mepoináláikoꞌ i Kerisitu Iesu, hai tehómpókikoꞌ hangko i huku dósámu.

¹⁶Upu-upu to teukiꞌ i lalu Sura Magasaꞌ, teukiꞌ moliu Inao to Magasaꞌ to hangko i Pueꞌ Ala, hai mobunduꞌ ntepuꞌu i kitaꞌ bona: taisá paturoꞌ to toꞌu, taisá apa to salaꞌ, takaraohi bábehiá to kadake, hai taisá rárá mopakanótó bábehiántaꞌ bona hiolaꞌ hai peundeꞌána Pueꞌ Ala.

¹⁷Mewaliꞌ hangko i Sura Magasaꞌ iti, Pueꞌ Ala mopaturoꞌkeꞌ, bona kitaꞌ to mengkoruꞌ i Hia, moisákeꞌ upu-upu to taparaluu bona peisákeꞌ mampopolumao upu-upu bágóꞌ to maroꞌa.