Read Besoa 2 Timotiu 4 Bible Online

2 Timotiu 4 - Besoa bible

2 Timotiu 4

¹I kahaweꞌna huleꞌ Pueꞌ Iesu i duniáꞌ deꞌe, Ia ina mopárentái upu-upu tauna láwiꞌ Ia Datu, hai Ia ina mohoda-hoda kárá-káráraꞌ upu-upu tauna, maroꞌa to tueꞌ, maroꞌa to mate miꞌi. Onoꞌ miꞌi haneꞌi, i lindoꞌna Pueꞌ Ala hai Kerisitu Iesu, kuweꞌikoꞌ laluita deꞌe:

²Hangaa-ngaa timamakoꞌ oaꞌ mopahaweꞌ ngkóráꞌNa i tempó to maroꞌa ba i tempó to tiꞌara maroꞌa. Nupaingáꞌiheꞌ tauna to mobábehi salaꞌ hai nukóntóheꞌ, haneꞌi nupalindó laluraꞌ bona maroꞌa bábehiáraꞌ. Hangaa-ngaa sabaraꞌkoꞌ oaꞌ mopaturoꞌheꞌ.

³Láwiꞌ i alo to ina haweꞌ, tauna tiꞌara piꞌi ina moundeꞌ mampehádingi paturoꞌ to toꞌu. Ina mampeliꞌraheꞌ guru-guru to mopaturoꞌheꞌ hai laluita to mopagóeꞌ peá laluraꞌ, bona peisáheꞌ mampeuláꞌi peundeꞌána laluraꞌ, {kehapiꞌ kadake}.

⁴Ane mohádiheꞌ paturoꞌ to toꞌu, ina mentibongoꞌheꞌ, hai paturoꞌ to rapetoara riꞌi to ina raundeꞌ rapehádingi.

⁵Onoꞌ miꞌi haneꞌi kuweꞌikoꞌ laluita, Timotiu, bona nupatetidaꞌ pekirimu i apa peá to mewaliꞌ, hai mantahakoꞌ mantódihá kapári. Nupahaweꞌ oaꞌ Ngkóráꞌ Marasa i tauna to tiꞌara maniheꞌ mohádi, hai nupopolumao maroꞌa upu-upu bágóꞌ to naweꞌikoꞌ Pueꞌ haweꞌ i kahópóꞌána.

⁶Kuisá, tiꞌara piꞌi marue katueꞌkuꞌ i duniáꞌ deꞌe; ina haweꞌ miꞌi tempóngkuꞌ. Kehapiꞌaꞌ rapapate, kupaisarenga katueꞌkuꞌ deꞌe i Pueꞌ Ala. Iti miꞌi to ina mewaliꞌ popenómbángkuꞌ i Hia.

⁷Kupahópóꞌ miꞌi upu-upu bágóꞌ to naweꞌiaꞌ Pueꞌ Ala, nodo hadua tauna to menangi hangko i potandi, hai pepoináláingkuꞌ maróhó mani kakutibaaꞌna.

⁸Mewaliꞌ deꞌe-deꞌe, timama miꞌi i surugáꞌ háwángina penangingkuꞌ,[15] láwiꞌ kupeuláꞌi miꞌi peundeꞌána Pueꞌ Ala. Háwángina penangingkuꞌ iti ina naweꞌiaꞌ Pueꞌ i alo pobutusi i kahópóꞌána duniáꞌ, i tempóna mohoda-hoda kárá-kárána upu-upu tauna i kanótó-nótóána. Hai tiꞌara kódóꞌ peá to ina molámbiꞌ parasee. Upu-upu tauna to mampegiá kahaweꞌna huleꞌ Pueꞌ, ina molámbiꞌheꞌ woꞌo háwángina pepoináláiraꞌ i Hia.

⁹Timotiu, nupári-pári bona hawiáꞌ wongkódóꞌá mai nuweoꞌ,

¹⁰láwiꞌ tiꞌara piꞌi ara to mamporángáꞌaꞌ ieneꞌ. Dema mopálehimoꞌ, láwiꞌ pohuꞌ miꞌi lao i kótá Tesalonika mampeliꞌ peá katueꞌána i duniáꞌ deꞌe. Ane Keresike, lao miꞌi i tampoꞌ Galatia. Titu woꞌo lao miꞌi i tampoꞌ Dalamatia.

¹¹Lukasi perái to hingkakani hai kódóꞌ. Ane maikoꞌ, nuropoꞌ mai Marakusi nuporángá bona mai ieneꞌ, láwiꞌ ia peisá motulungiaꞌ i lalu pobágóꞌkuꞌ.

¹²Tikiku[16] kuhuoꞌ miꞌi lao i hio i kótá Epesu.

¹³Kupembiáꞌ woꞌo bona nuántiáꞌaꞌ mai kumbángkuꞌ to makápá[17] to kupálehi i kótá Teroasi i támbina Kapusi. Nupahiánti woꞌo mai surangkuꞌ to ionoꞌ. To kuparaluu ntepuꞌu, sura to rabábehi hangko i koliꞌ binataꞌ.

¹⁴Maingáꞌ-ingáꞌkoꞌ i Alesande, topobábehi párewá hangko i tembaga. Ia moewaꞌ paturoꞌtaꞌ. Handaꞌ bábehiána to kadake i kódóꞌ. Bábehiána iti ina naháwángi Pueꞌ Ala.

¹⁶I karahoda-hodana kárá-kárángkuꞌ rungu-runguna, tiꞌara mpuꞌu ara haweꞌ hadua to motulungiaꞌ. Upu-upuheꞌ mopálehiaꞌ. Kupembiáꞌ i Pueꞌ bona Ia tiꞌara moháwángi bábehiáraꞌ iti.

¹⁷Agáiáná kehapiꞌ tiꞌara ara tauna to mamporángáꞌaꞌ, Pueꞌ haduduáNa to mamporángáꞌaꞌ oaꞌ. Ia to mampoweꞌiaꞌ róhó mopahaweꞌ Ngkóráꞌ Marasa i katoꞌu-toꞌuána, bona i támbi pobutusiá upu-upu tauna to tiꞌara toIahudiꞌ mohádi bámbári iti. Kahópóꞌána, Pueꞌ mokábáháꞌaꞌ hangko i kapate.[18]

¹⁸Hai deꞌe-deꞌe, bateꞌkuꞌ ina nakábáhá Pueꞌ hangko i upu-upu to kadake. Ina Naꞌántiaꞌ mesuaꞌ i lalu popárentáNa i surugáꞌ. Tapomahile hangaꞌNa duuꞌna i rue-ruena. Ami!

¹⁹Nupahaweꞌ tabeángkuꞌ i tohambokoheꞌ Akila hai Pirikila,[19] hai i Onesiporu hantámbi.

²⁰Eratu ara mani i kótá Korintu. Toropimu kupálehi i kótá Miletu láwiꞌ tiꞌara nalalu.

²¹Nugagu mai hangko tiꞌara mani haweꞌ tempó lengiꞌ! Tabeá hangko i Ebulu, Pudeꞌ, Linu hai Laudia, hai hangko i upu-upu halalu hampepepoináláintaꞌ to ara ieneꞌ i kótá Roma.

²²Timotiu, Pueꞌ Ala mamporángákoꞌ. Hai kupembiáꞌ bona Pueꞌ mowátiꞌkou upu-upu. Hangko i kódóꞌ, PAULU