Read Besoa Titu 3 Bible Online

Titu 3 - Besoa bible

Titu 3

¹Nupopambuhinaoáheꞌ toSarani to ara ionoꞌ, bona mengkoruꞌheꞌ i topopárentá hai i tadulako i wánuá. Hangaa-ngaa mampeuláꞌiheꞌ hawaꞌraꞌ hai timamaheꞌ mobábehi apa to maroꞌa.

²Ineeꞌheꞌ mopakadake hangaꞌ tauna, ineeꞌheꞌ mosisalaꞌ. Rángina miꞌi rapamaꞌálusuꞌ bábehiáraꞌ, hai maꞌálusuꞌheꞌ i upu-upu tauna.

³Láwiꞌ hangkoia, hangko tiꞌara manikeꞌ mepoinálái, makáindi mani laluntaꞌ, tiꞌara taisá rárá to manótó lao i Pueꞌ Ala. Taliungi áturáNa. I lalu katueꞌtaꞌ hangkoia, napohawiꞌkeꞌ peundeꞌána laluntaꞌ to tiꞌara mau upu, hai mampokagóeꞌkeꞌ ngkáduniáꞌ to mepakanawoꞌ. Kadake ntepuꞌu laluntaꞌ, mahiniꞌkeꞌ i hángká rángántaꞌ, hai mombekáhihiꞌ pekeꞌ.

⁴Agáiáná kehapiꞌ noꞌonoꞌ kakadakena bábehiántaꞌ, Pueꞌ Ala bateꞌna maꞌahiꞌ i kitaꞌ hai Napatongawaꞌámokeꞌ kamaroꞌana laluNa i kaNahómpókintaꞌ hangko i huku dósántaꞌ.

⁵Apa ntóáꞌna haneꞌi Nahómpókikeꞌ hangko i huku dósántaꞌ? Ba Nahómpókikeꞌ ánti kamaroꞌana bábehiántaꞌ? Tiꞌara. Nahómpókikeꞌ ánti kabulána laluNa i kitaꞌ.[7] Onoꞌ miꞌi haneꞌi Napoweꞌikeꞌ Inao to Magasaꞌ moliu Kerisitu Topohómpóꞌ Salaꞌ, hai ánti kuasaꞌna Inao to Magasaꞌ iti, Nabahoꞌimokeꞌ hangko i dósántaꞌ, hai Napowoꞌu katueꞌtaꞌ.[8]

⁷Tunggáiána Pueꞌ Ala, bona hangko i kabulána laluNa, Napopewaliꞌkeꞌ tauna to tiꞌara masalaꞌ i peitáNa, bona tueꞌkeꞌ hintotoꞌ hai pehárungántaꞌ, ia miꞌi, ina molámbiꞌkeꞌ katueꞌ to maroꞌa to tiꞌara mokahópóꞌá.

⁸Toꞌu ntepuꞌu laluitangkuꞌ iti. Onoꞌ miꞌi haneꞌi kupembiáꞌ bona nupaturoꞌáheꞌ paturoꞌ iti i upu-upu tauna to mehárungá i Pueꞌ Ala, bona madotaheꞌ mobábehi bábehiá to maroꞌa. Paturoꞌ deꞌe paturoꞌ to maroꞌa, hai mobunduꞌ i tauna.

⁹Araheꞌ tauna to mamposisalaꞌi hai mampombeheheꞌi áturá agama Iahudiꞌ ba daritakáná pemuleꞌáraꞌ. Nukaraohiheꞌ! Pombeheheꞌraꞌ iti tiꞌara mobunduꞌ hai tiꞌara moánti pewátiꞌ i tauna.

¹⁰Ane ara tauna to mopaꞌara posisalaꞌ i halalu hampepepoináláintaꞌ, nukámbáróáheꞌ hangkani ba rongkani, hai ane tiꞌara rabáliki bábehiáraꞌ, ineeꞌmoheꞌ nupohintuwuꞌá.

¹¹Hangaa-ngaa nuisá: tauna to noꞌonoꞌ, salaꞌ rárámoheꞌ, hai dósáraꞌ iti mopakanótó kamasalaꞌraꞌ.

¹²Pembiáꞌkuꞌ bona ane haweꞌ miꞌi Atema ba Tikiku[9] to kuhuoꞌ lao i hio, nugaguheꞌ lao nupohidupaꞌáꞌaꞌ i wánuá Nikopoli, láwiꞌ tunggáiángkuꞌ ina laoaꞌ toroꞌ ionoꞌ ane haweꞌ tempó lengiꞌ.[10]

¹³Kupembiáꞌ bona Apolo[11] hai Sena guru agama, nipopeángkáꞌheꞌ maroꞌa, bona upu-upu to raparaluu i polumaoáraꞌ niweꞌiheꞌ.

¹⁴Kupembiáꞌ woꞌo bona halalu hampepepoináláintaꞌ madotaheꞌ mampopolumao bágóꞌ to maroꞌa, bona molámbiꞌheꞌ apa to raparaluu alo-alona,[12] hai bona katueꞌraꞌ tiꞌara ina mbero-mbero.

¹⁵Kupahaweꞌ woꞌo tabeáraꞌ hangko i upu-upu rángángkuꞌ to araheꞌ ieneꞌ. Kupembiáꞌ bona nupahaweꞌ woꞌo tabeángkiꞌ i halalu hampepepoináláintaꞌ ionoꞌ i puló Kereta. Pueꞌ mowátiꞌkou upu-upu. Hangko i kódóꞌ, PAULU