Read Besoa Pilemo 1 Bible Online

Pilemo 1 - Besoa bible

Pilemo 1

¹Molámbiꞌ Pilemo to kubiláꞌ i kótá Kolose[1] Sura deꞌe hangko i kódóꞌ Paulu, to ratarungku ánti pobágóꞌkuꞌ mopahaweꞌ bámbári kana i Kerisitu Iesu, hai hangko i Timotiu halalu hampepepoináláintaꞌ. Kipakatu sura deꞌe i hio Pilemo, halalu hampopobágóꞌángkiꞌ to kipokaꞌahiꞌ.

²Kipakatu woꞌo i Apia, halalungkiꞌ towawine to kipokaꞌahiꞌ, hai i Akipu rángángkiꞌ mobágóꞌ moánti Ngkóráꞌ Marasa, hai i jemaꞌa to hirámpu i támbimu.[2]

³Kupembiáꞌ bona Pueꞌ Ala Umántaꞌ hai Pueꞌ Iesu Kerisitu mowátiꞌkou hai mampoweꞌikou roꞌa ngkatueꞌ.

⁴Pilemo, i lalu pekakaengkuꞌ kukábeláikoꞌ oaꞌ, hai kuꞌuliꞌ handaꞌ kamaroꞌana i Pueꞌ Ala,

⁵láwiꞌ kuhádi miꞌi bámbári to rapahaweꞌ kamaróhóna pepoináláimu i Pueꞌ Iesu hai kamaꞌahiꞌmu i upu-upu tauna to mepoinálái.

⁶Mekakaeaꞌ bona, ánti pohintuwuꞌmu hai halalu hampepepoináláimuheꞌ, ina tetámbái oaꞌ apa to nuisá mokana i upu-upu pewátiꞌ to naweꞌikeꞌ Pueꞌ Ala ánti pohintuwuꞌtaꞌ hai Kerisitu.

⁷Góeꞌ ntepuꞌuaꞌ hai lindó lalungkuꞌ ánti kamaꞌahiꞌmu iti, láwiꞌ io to mopakaróhó laluraꞌ upu-upu tauna to mepoinálái i Pueꞌ Iesu.

⁸Halalungkuꞌ Pilemo! Katoꞌuána, peisákoꞌ kupárentá bona mobábehikoꞌ apa to hintotoꞌ, láwiꞌ naweꞌiaꞌ Kerisitu kuasaꞌ iti.

⁹Agáiáná kubuhinao kamaꞌahiꞌmu, onoꞌ miꞌi haneꞌi tiꞌarakoꞌ kupárentái. Kupahaweꞌ peá pembiáꞌkuꞌ i hio. Kódóꞌ Paulu, matoamamoꞌ hai deꞌe-deꞌe ratarungkuaꞌ ánti pobágóꞌkuꞌ i Kerisitu Iesu.

¹⁰Mewaliꞌ kupembiáꞌ bona nutarima maroꞌa woia deꞌe ánáꞌkuꞌ Onesimu. Kupoánáꞌ, láwiꞌ tangaꞌkuꞌ ratarungku ieneꞌ, kódóꞌ to mopaturoꞌ álána mepoinálái i Pueꞌ Iesu.

¹¹Iatoliu, Onesimu iti tiꞌara mobunduꞌ láwiꞌ melangka hangko i hio, agáiáná deꞌe-deꞌe, ina mobunduꞌ ntepuꞌu,[3] hai tiꞌara peá i hio Pilemo, agáiáná i kódóꞌ woꞌo.

¹²Mewaliꞌ deꞌe-deꞌe, ánáꞌkuꞌ to kupokaꞌahiꞌ iti, kuhuoꞌ mesuleꞌ huleꞌ lao i hio.

¹³Katoꞌuána, kupoinao mani kukóntó ieneꞌ hingkakani hai kódóꞌ, láwiꞌ kurekeꞌ miꞌi sulewátámu to motulungiaꞌ tangaꞌkuꞌ ratarungku ánti pobágóꞌkuꞌ moánti Ngkóráꞌ Marasa.

¹⁴Agáiáná tiꞌara tuꞌu inaongkuꞌ motaha ieneꞌ, láwiꞌ tiꞌara mani kupesabiꞌ i hio. Peundeꞌángkuꞌ bona apa to nubábehi, nubábehi hangko i lalumu ntepuꞌu. Tiꞌarakoꞌ kupasimbuku mampeuláꞌi peundeꞌángkuꞌ,

¹⁵láwiꞌ pogááꞌmi iatoliu deꞌe naporárá Pueꞌ bona Onesimu peisá mesuleꞌ i hio duuꞌna i rue-ruena.

¹⁶Onoꞌ miꞌi haneꞌi ineeꞌ miꞌi nurekeꞌ nodo hawiꞌmu, láwiꞌ deꞌe-deꞌe melumbuꞌ miꞌi tueꞌna hangko i karapohawiꞌna. Hai hangaa-ngaa nurekeꞌ nodo halalu hampepepoináláimu to nupokaꞌahiꞌ. Kupokaꞌahiꞌ ntepuꞌu, pelumbuꞌna mani io hangaa-ngaa mampokaꞌahiꞌkoꞌ Onesimu, láwiꞌ ia halalumu i lalu hangaꞌna Pueꞌ Iesu.

¹⁷Mewaliꞌ, ane nurekeꞌaꞌ rángámu to hampepepoináláimu, kupembiáꞌ bona nutarima huleꞌ Onesimu nodo kanutarimangkuꞌ.

¹⁸Ane ara salaꞌna ba indána i hio, kódóꞌ to mokili.

¹⁹LALUITA DEꞋE KUꞋUKIꞋ HAI TAENGKUꞋ HADUDUÁNGKUꞋ: KÓDÓꞋ PAULU INA MOBAIARIAꞋ UPU-UPU INDÁNA ONESIMU. Tiꞌarakoꞌ kuꞌuláki láwiꞌ kódóꞌ miꞌi to mopahaweꞌámokoꞌ Ngkóráꞌ Marasa. Mewaliꞌ, ánti kamolámbiꞌmu katehómpóꞌ, nodokoꞌ woꞌo topoindá i kódóꞌ.

²⁰Ánti pohintuwuꞌtaꞌ hai Pueꞌ, kupembiáꞌ bona nupeuláꞌi wongkódóꞌá pembiáꞌkuꞌ deꞌe: ánti pohalaluntaꞌ i lalu Kerisitu, nutarima miꞌi huleꞌ Onesimu, bona góeꞌ lalungkuꞌ.

²¹Sura deꞌe kuꞌukiꞌákoꞌ, láwiꞌ kupoinálái ntepuꞌu kaꞌina nupeuláꞌina. Hai kuisá bateꞌna ina melumbuꞌ to nubábehi hangko i apa to kupembiáꞌ.

²²Hai kupembiáꞌ woꞌo bona nupatimamaꞌáꞌaꞌ paturuángkuꞌ i támbimu, láwiꞌ kuhárungá Pueꞌ Ala ina mohániki pekakaemi, bona tekábáháꞌaꞌ hangko i petarungkuá deꞌe, hai peisá wopaꞌaꞌ lao moweoꞌkou.

²³Tabeá hangko i Epara, to mantódihá kapári hingkakani hai kódóꞌ i tarungku ánti pobágóꞌna mopahaweꞌ bámbári kana i Kerisitu Iesu.

²⁴Tabeá woꞌo hangko i halalu hampopobágóꞌángkuꞌ, ia miꞌi Marakusi, Aritaku, Dema[4] hai Lukasi.

²⁵Pueꞌtaꞌ Iesu Kerisitu mowátiꞌkou upu-upu. Hangko i kódóꞌ, PAULU