Read Besoa Iberani 1 Bible Online

Iberani 1 - Besoa bible

Iberani 1

¹Hangkoia, handaꞌ kánina Pueꞌ Ala mongkóráꞌ i toioruntaꞌ. LaluitaNa rapahaweꞌ nabiꞌ-nabiꞌ, hai handaꞌ pákáꞌna rárá Napakeꞌ mopaturoꞌ toioruntaꞌ.

²Agáiáná deꞌe-deꞌe i tempó to kahópóꞌána, Pueꞌ Ala mopahaweꞌ laluitaNa i kitaꞌ moliu ÁnáꞌNa haduduáNa. Hai ÁnáꞌNa iti to Napontóáꞌ mampopewaliꞌ duniáꞌ hai upu-upu óntóꞌna. Ia miꞌi to napakanótó Pueꞌ Ala molámbiꞌ upu-upuna to ara.

³Ia to mampetudeꞌá peawaꞌna Pueꞌ Ala i kitaꞌ. PambiáráNa hai kuasaꞌNa hibali hai pambiárána hai kuasaꞌna Pueꞌ Ala. Ia to mokádipurá upu-upuna to ara moliu ngkóráꞌNa to makuasaꞌ.[1] Ia to mampehuhuꞌá wátáNa rapapate bona mopamagasaꞌ tauna hangko i dósá, hai roo onoꞌ, Ia mengkaoreꞌ miꞌi lao i surugáꞌ mehoda tándáꞌ i kuánána Pueꞌ Ala to Makuasaꞌ i lalu popárentáNa.

⁴Ia molámbiꞌ kuasaꞌ to melumbuꞌ hangko i upu-upu malaꞌeka, láwiꞌ melumbuꞌ kamahilena hangaꞌNa to naweꞌi Pueꞌ Ala i Hia hangko i hangaꞌ to raweꞌiheꞌ malaꞌeka.

⁵Taisá kamahilena tueꞌna Pueꞌ Iesu, láwiꞌ laluita deꞌe tiꞌara haweꞌ hangkani napahaweꞌ Pueꞌ Ala i malaꞌeka: “Io miꞌi ÁnáꞌKuꞌ. Mantepuꞌu alo deꞌe, KupopewaliꞌKoꞌ ÁnáꞌKuꞌ.” [2] Hai Pueꞌ Ala tiꞌara woꞌo molaluita mokana i hadua malaꞌeka node: “Kódóꞌ NapoumaꞌAꞌ, hai Ia Kupoánáꞌ.” [3]

⁶Hai i kanahuoꞌna Pueꞌ Ala ÁnáꞌNa to towutuꞌ[4] mai i duniáꞌ, node laluitaNa: “Upu-upu malaꞌekaNgkuꞌ hangaa-ngaa menómbá i Hia.” [5]

⁷Mokana i malaꞌeka, teukiꞌ peá node: “Pueꞌ Ala mampopewaliꞌ malaꞌekaNa nodo wui[6] hai huoꞌána nodo api.”[7] [8]

⁸Agáiáná kana i ÁnáꞌNa nauliꞌ Pueꞌ Ala: “Ó Pueꞌ Ala! Io miꞌi datu duuꞌna i rue-ruena. Io to mepárentá i kanótó-nótóána.

⁹Nuꞌundeꞌ bábehiá to manótó, hai Nukáhihiꞌ bábehiá to kadake. Onoꞌ miꞌi haneꞌi KububuhiKoꞌ hai lana to mawongi láwiꞌ KupileꞌiKoꞌ. Kódóꞌ miꞌi Pueꞌ Ala, PueꞌMu. KubiláꞌKoꞌ melumbuꞌ hangko i rángáMu, bona góeꞌ laluMu.” [9]

¹⁰Nauliꞌ woꞌo Pueꞌ Ala i ÁnáꞌNa: “Ó Pueꞌ, hangko i rungu-runguna, Io miꞌi to mampopewaliꞌ duniáꞌ deꞌe, hai Io to mampopewaliꞌ langiꞌ.[10]

¹¹Upu-upuna iti bateꞌna ina magero. Agáiáná Io, tiꞌaraKoꞌ mambáliꞌ. Langiꞌ hai tampoꞌ deꞌe ina magero nodo waruꞌ to sae.

¹²Hangkani tempó ina Nuwógó hai Nutibe. Ina Nupaháwángi hai duniáꞌ to woꞌu.[11] Agáiáná Io, tiꞌara ara kamambáliꞌáMu, hai katueꞌMu tiꞌara mokahópóꞌá.” [12]

¹³Hai ara woꞌo hampákáꞌ laluita to tiꞌara haweꞌ hangkani napahaweꞌ Pueꞌ Ala i malaꞌeka, láwiꞌ laluitaNa deꞌe Napahaweꞌ peá i ÁnáꞌNa, Nauliꞌ: “MehodamoKoꞌ tándáꞌ i kuánáNgkuꞌ, duuꞌna Kupopengkoruꞌheꞌ upu-upu ewáliMu i Hio.” [13]

¹⁴Mewaliꞌ apa to taisá mokana i upu-upu malaꞌeka? Hira iti huoꞌána Pueꞌ Ala to mobágóꞌ nodo topekádipurá. Nahuoꞌheꞌ motulungi tauna to ina molámbiꞌ katueꞌ to maroꞌa to tiꞌara mokahópóꞌá.