Read Besoa Iberani 10 Bible Online

Iberani 10 - Besoa bible

Iberani 10

¹Hangko i Paturoꞌna Musa, tiꞌara mani tongawaꞌ apa to ina mewaliꞌ moliu Kerisitu. Nodo pekeꞌ moita babaio. Mouláꞌ Paturoꞌna Musa iti, hampare-hampare tauna to mampoinao mohungkuki Pueꞌ Ala hangaa-ngaa moánti oaꞌ popenómbáraꞌ, agáiáná popenómbáraꞌ iti tiꞌara moánti tauna mewaliꞌ manótó i peitána Pueꞌ Ala.

²Ane ketoꞌu-toꞌu tauna iti teámpungi dósáraꞌ, ketiꞌarapoheꞌ paraluu moánti popenómbáraꞌ, láwiꞌ ina raisá dósáraꞌ teámpungi duuꞌna i rue-ruena hai tiꞌara piꞌi ina masusa laluraꞌ ánti kamadósáraꞌ.

³Agáiáná tiꞌara noꞌonoꞌ. Hangko i popenómbáraꞌ to raꞌánti hampare-hampare, rabuhinao oaꞌ kamadósáraꞌ,

⁴láwiꞌ waheꞌ gapiꞌ hai waheꞌ bekeꞌ tiꞌara peisá mowehángi dósá.

⁵Onoꞌ miꞌi haneꞌi, i kahaweꞌna Kerisitu i duniáꞌ deꞌe, Ia molaluita i Pueꞌ Ala, Nauliꞌ node: “Tiꞌara Nuꞌundeꞌ popenómbá to raintu, hai tiꞌara Nupembiáꞌ binataꞌ to rasambale bona mopaháwángi dósá tauna, agáiáná wátáNgkuꞌ haduduáNgkuꞌ to Nupatimama bona mewaliꞌAꞌ popenómbá i Hio.

⁷Onoꞌ miꞌi haneꞌi Kuꞌuliꞌ: deꞌeMoꞌ Pueꞌ Ala, maiAꞌ mampeuláꞌi peundeꞌáMu, nodo to teukiꞌ i lalu Sura Magasaꞌ kana i Kódóꞌ.” [67]

⁸Kehapiꞌ popenómbá hangaa-ngaa rahuhuꞌ mouláꞌ Paturoꞌna Musa, Kerisitu manguliꞌ node: “Pueꞌ Ala, tiꞌara Nuꞌundeꞌ popenómbá to raintu, hai tiꞌara Nupembiáꞌ binataꞌ to rasambale bona mopaháwángi dósá tauna.”

⁹Roo onoꞌ, Nauliꞌ wopiꞌi, “DeꞌeMoꞌ Pueꞌ Ala, maiAꞌ mampeuláꞌi peundeꞌáMu.” Áturá-áturá to rungu-runguna mokana i popenómbá tiꞌara piꞌi mobunduꞌ, mewaliꞌ nawehángi miꞌi Pueꞌ Ala, láwiꞌ ara miꞌi rárá to woꞌu bona dósántaꞌ peisá teámpungi, ia miꞌi moliu Iesu Kerisitu. Hangkani peá Ia mohuhuꞌ wátáNa i Pueꞌ Ala nodo popenómbá to woꞌu mouláꞌ peundeꞌána Pueꞌ Ala, bona Napamagasaꞌmokeꞌ duuꞌna i rue-ruena.

¹¹Alo-alona upu-upu tadulako menómbá agama Iahudiꞌ mampopolumao bágóꞌraꞌ, hai mohuleꞌ-huleꞌheꞌ mohuhuꞌ popenómbá, to tiꞌara peisá mowehángi dósá.

¹²Agáiáná Kerisitu, hangkani peá mohuhuꞌ popenómbáNa, ia miꞌi wátáNa haduduáNa, bona rapapate mopaháwángi dósá tauna. PopenómbáNa iti mobunduꞌ haweꞌ i rue-ruena. Karoona mohuhuꞌ popenómbáNa iti, mengkaoreꞌ miꞌi lao i surugáꞌ hai mehoda tándáꞌ i kuánána Pueꞌ Ala.

¹³Deꞌe-deꞌe Kerisitu mampegiá tempóna Pueꞌ Ala ina mampopengkoruꞌ upu-upu ewáliNa i Hia.

¹⁴Mewaliꞌ, ánti kamateNa to hangkani peá, Napakanótómokeꞌ i peitána Pueꞌ Ala duuꞌna i rue-ruena, hai deꞌe-deꞌe tangaꞌtaꞌ mani Napamagasaꞌ.

¹⁵Hai paturoꞌ mokana i upu-upuna iti napakanótóámokeꞌ moliu Inao to Magasaꞌ, láwiꞌ i lalu Sura Magasaꞌ teukiꞌ node:

¹⁶Nauliꞌ Pueꞌ Ala: “Deꞌe miꞌi dándiNgkuꞌ to woꞌu to ina Kupaꞌara hai hira i alo to ina haweꞌ. ÁturáNgkuꞌ ina Kuwoli i laluraꞌ hai ina Kuꞌukiꞌ i pekiriraꞌ.”

¹⁷Roo onoꞌ, Nauliꞌ woꞌo: “Dósáraꞌ hai salaꞌraꞌ tiꞌara piꞌi ina Kubuhinao.” [68]

¹⁸Mewaliꞌ, ánti kateámpungina miꞌi dósántaꞌ hai salaꞌtaꞌ, tiꞌarapokeꞌ paraluu moánti popenómbá ntániꞌna to mopaháwángi dósántaꞌ.

¹⁹Halalu-halalu! Ánti waheꞌna Iesu i kamateNa, tiꞌarapokeꞌ paraluu malááꞌ mohungkuki Pueꞌ Ala i katoroꞌá to magasaꞌ ntepuꞌu i surugáꞌ,

²⁰láwiꞌ Iesu mobungkáhiámokeꞌ rárá to woꞌo to moántikeꞌ i katehómpóꞌ. Hai rárá to Nabungkáhiámokeꞌ iti tiꞌara moliu rindi báná,[69] agáiáná moliu wátáNa haduduáNa.

²¹Iesu miꞌi to mewaliꞌ Tadulako Menómbá Mahilentaꞌ i Támbina Pueꞌ Ala i surugáꞌ.

²²Onoꞌ miꞌi haneꞌi halalu-halalu, maimokeꞌ mohungkuki Pueꞌ Ala hangko i laluntaꞌ ntepuꞌu hai hangko i pepoináláintaꞌ to tiꞌara piꞌi bata-bata, láwiꞌ laluntaꞌ Napamagasaꞌ miꞌi moliu waheꞌNa bona taisá katiꞌárána piꞌi ara kamasalaꞌtaꞌ, hai wátántaꞌ rariu miꞌi hai uwai to malino, to mewaliꞌ tandaꞌ kaNapamagasaꞌtaꞌ hangko i dósántaꞌ.[70]

²³Hangaa-ngaa mehárungákeꞌ oaꞌ i Iesu, hai ineeꞌkeꞌ malááꞌ mopangákuꞌ pehárungántaꞌ i Hia, láwiꞌ Pueꞌ Ala tetidaꞌ hai ina mobukeki dándiNa i kitaꞌ.

²⁴Hangaa-ngaa mombekamata hai mombepakaróhókeꞌ mpolalu, bona mombepokaꞌahiꞌkeꞌ hangko i laluntaꞌ ntepuꞌu, hai tabábehi oaꞌ apa to maroꞌa.

²⁵Araheꞌ halaluntaꞌ to tiꞌara piꞌi hirámpu menómbá. Kitaꞌ ineeꞌkeꞌ noꞌonoꞌ. Hangaa-ngaa hirámpukeꞌ menómbá hai mombepakaróhókeꞌ mpolalu, pelumbuꞌna mani deꞌe-deꞌe láwiꞌ taisá tiꞌara piꞌi marue Pueꞌ ina haweꞌ.

²⁶Tahádi hai taisá miꞌi Ngkóráꞌ Marasa to hangko i Pueꞌ, agáiáná ane tatunggái mani mobábehi oaꞌ dósá,[71] tiꞌara piꞌi ara popenómbá ntaniꞌ to peisá mowehángi dósántaꞌ,

²⁷bateꞌna perái kamalááꞌtaꞌ to rumihi lántuꞌántaꞌ mampegiá pobutusina Pueꞌ Ala, láwiꞌ tauna to meꞌewaꞌ i Hia ina Nahuku hai api to roreꞌ ntepuꞌu.

²⁸Hangkoia, ane ara tauna to moliungi Paturoꞌna Musa, hai araheꞌ rodua ba tálu tauna to mosabiki katoꞌuna kamasalaꞌraꞌ, tiꞌara ara ámpungiraꞌ, bateꞌraꞌ rahuku mate.[72]

²⁹Ane tauna to moliungi Paturoꞌna Musa rahuku noꞌonoꞌ, pelumbuꞌna mani tauna to motitibeiheꞌ Ánáꞌna Pueꞌ Ala, láwiꞌ rauliꞌ tiꞌara ara pobunduꞌána waheꞌNa, mole waheꞌna Iesu iti to mopakanótó dándina Pueꞌ Ala hai peisá mopamagasaꞌheꞌ. Mopakóiꞌheꞌ Inao to Magasaꞌ to moweꞌikeꞌ pewátiꞌ.

³⁰Láwiꞌ taisá Pueꞌ Ala to manguliꞌ: “Kódóꞌ to meháwá, Kódóꞌ to mehuku.”[73] Hai teukiꞌ woꞌo i Sura Magasaꞌ: “Pueꞌ ina mobutusi kárá-káráraꞌ taunáNa.”[74]

³¹Malááꞌ ntepuꞌukeꞌ ane nahukukeꞌ Pueꞌ Ala to tueꞌ.

³²Nibuhinao noumbá katueꞌmi i rungu-runguna pohádimi Ngkóráꞌ Marasa. Tempó iti, narampemokou handaꞌ kapári ánti peuláꞌmi i Pueꞌ. Agáiáná kehapiꞌ noꞌonoꞌ, tiꞌarakou mosuliꞌ, bateꞌna maróhó oaꞌ pepoináláimi.

³³Hangkani-hangkani rasasalaꞌikou hai rapopeahiahiꞌkou i lindoꞌraꞌ tauna to handaꞌ; hai hangkani-hangkani, ane tauna ntániꞌna rapopeahiahiꞌ, kómu woꞌo meuláꞌ mantódihá kapári hingkakani hai hira.

³⁴Maꞌahiꞌ lalumi i tauna to ratarungku ánti peuláꞌraꞌ i Pueꞌ Iesu. Ane párewámi raperampaꞌi, tiꞌara nikahiaꞌ. Góeꞌ ntepuꞌukou, láwiꞌ niꞌisá kaꞌárána to rapatimamaꞌákou i surugáꞌ to melumbuꞌ kamaroꞌana hai tiꞌara piꞌi mokahópóꞌá.

³⁵Onoꞌ miꞌi haneꞌi, ineeꞌ nikábáhá pepoináláimi i Pueꞌ, láwiꞌ ane mepoináláikou oaꞌ, ina mahile ntepuꞌu háwángina to ina nilámbiꞌ.

³⁶Kehapiꞌ apa miꞌi to ina mewaliꞌ, hangaa-ngaa nitibaaꞌ oaꞌ pepoináláimi. Nipeuláꞌi oaꞌ peundeꞌána Pueꞌ Ala, bona nilámbiꞌ apa to Nadándiákou.

³⁷Tiꞌara piꞌi marue, ina tepabukeꞌi ngkóráꞌna Pueꞌ Ala to manguliꞌ: “Ia to ina haweꞌ bateꞌna ina haweꞌ, KahaweꞌNa tiꞌara ina moali-ali.

³⁸Tauna to manótó i peitáNgkuꞌ ina molámbiꞌheꞌ katehómpóꞌ ánti pepoináláiraꞌ. Agáiáná ane araheꞌ to mosuliꞌ hangko i pepoináláiraꞌ, tiꞌaraheꞌ Kupokagóeꞌ.” [75]

³⁹Agáiáná kitaꞌ deꞌe, tiꞌarakeꞌ tauna to mosuliꞌ hangko i pepoináláintaꞌ haneꞌi rahuku, ngkáliꞌna riꞌi kitaꞌ deꞌe, tauna to motibaaꞌkeꞌ oaꞌ pepoináláintaꞌ hai molámbiꞌkeꞌ katehómpóꞌ.