Read Besoa Iberani 12 Bible Online

Iberani 12 - Besoa bible

Iberani 12

¹Halalu-halalu! Kitaꞌ deꞌe nodokeꞌ to ratolelingi handaꞌ tauna to maróhó pepoináláiraꞌ hangkoia,[107] hai mosabikiheꞌ katueꞌtaꞌ. Kitaꞌ deꞌe nodo tauna to momberipoꞌ melangka, onoꞌ miꞌi haneꞌi hangaa-ngaa tatibe upu-upu to paka mosalempori peuláꞌtaꞌ i Pueꞌ. Hangaa-ngaa tatibe dósántaꞌ to mopamatimikeꞌ, hai hangaa-ngaa mantahakeꞌ mouláꞌ rárá to napakanótóákeꞌ Pueꞌ Ala.

²Hangaa-ngaa tapeita oaꞌ Iesu, láwiꞌ Ia to tepaioruá mobungkáhi rárá pepoinálái hai mopagánái pepoinálái.[108] Iesu mantódihá kapári i kau mombehape. Rárá kamateNa iti katoꞌuána mepakahiliá i Hia,[109] agáiáná kehapiꞌ noꞌonoꞌ, tiꞌara Napailalu. Bateꞌna peá Napehuhuꞌá wátáNa rapakuꞌ i kau mombehape, láwiꞌ Nabuhinao oaꞌ kagóeꞌ to ina Nalámbiꞌ ane hópóꞌ miꞌi bágóꞌNa, onoꞌ haneꞌi deꞌe-deꞌe Ia mehoda miꞌi tándáꞌ i kuánána pehodaꞌá kadatuána Pueꞌ Ala i surugáꞌ.

³Mapári ntepuꞌu laluna Iesu molindoꞌ tauna to kadake to mesápuáka. Kómu woꞌo raewaꞌ tauna to kadake, agáiáná i lalu pombealami moewaꞌ dósá, tiꞌara manikou rapapate nodo Iesu. Mewaliꞌ halalu-halalu, hangaa-ngaa nipekiri noumbá kamantahana Iesu i lalu kapári, bona kómu woꞌo tiꞌarakou maledeꞌ hai masusa lalumi.

⁵Hai hangaa-ngaa nibuhinao paturoꞌna ngkóráꞌna Pueꞌ to mopaturoꞌkou nodo hadua umaꞌ mopaturoꞌ ánáꞌna, to manguliꞌ node: “Ánáꞌkuꞌ, nupailalu maroꞌa paturoꞌna Pueꞌ, hai ineeꞌ masusa lalumi ane Nakámbáróákou.

⁶Láwiꞌ Pueꞌ Ala mokámbáróá upu-upu tauna to Napokaꞌahiꞌ, hai mokabukoꞌi upu-upu tauna to Napoánáꞌ.” [110]

⁷Hangaa-ngaa mantódihákou i lalu kapári. Nirekeꞌ peá kapári iti nodo paturoꞌ ba pekámbáróá hangko i Umámi to i surugáꞌ. Pueꞌ Ala mopaturoꞌkou nodo hadua umaꞌ mopaturoꞌ hai mokámbáróá ánáꞌna,[111] láwiꞌ umaꞌ hangaa-ngaa mokámbáróá ánáꞌna.

⁸Upu-upu tauna to napoánáꞌ Pueꞌ Ala, bateꞌna Nakámbáróá. Mewaliꞌ, ane rápáꞌna tiꞌarakou nakámbáróá Pueꞌ Ala, lempóna tiꞌarakou ánáꞌNa, agáiáná nodo pekou ánáꞌ bule.

⁹Kitaꞌ upu-upu rakámbáróákeꞌ tosaentaꞌ i duniáꞌ, agáiáná kehapiꞌ noꞌonoꞌ bateꞌraꞌ tabiláꞌ, pelumbuꞌna mani Umántaꞌ to i surugáꞌ. Ane Nakámbáróákeꞌ, hangaa-ngaa tapengkoruꞌi ntepuꞌu álána molámbiꞌkeꞌ katueꞌ.

¹⁰Tosaentaꞌ i duniáꞌ mopaturoꞌkeꞌ bahangapa peá parena kamaruena. Paturoꞌraꞌ iti ara támpáꞌna, láwiꞌ peisá peheꞌ moweꞌikeꞌ laluita mouláꞌ apa to maroꞌa i peitáraꞌ. Agáiáná paturoꞌ hangko i Pueꞌ Ala tiꞌara ara kamakuraꞌna, láwiꞌ Ia mopaturoꞌkeꞌ bona mewaliꞌkeꞌ tauna to maroꞌa, hai magasaꞌkeꞌ woꞌo hibali hai Ia.

¹¹Tangaꞌtaꞌ rapaturoꞌ ba rakámbáróá, tiꞌara maroꞌa pehádintaꞌ, masusa laluntaꞌ. Agáiáná, ane tapeuláꞌi paturoꞌ iti, katueꞌtaꞌ ina maroꞌa, hai bábehiántaꞌ ina manótó.

¹²Onoꞌ miꞌi haneꞌi ineeꞌkou luleꞌ mobábehi to maroꞌa. Nipakaróhó pepoináláimi to maledeꞌ.

¹³Hangaa-ngaa nipakaróhó peuláꞌmi i Pueꞌ, bona ane ara to i oloꞌmi to bata-bata mani laluraꞌ, tiꞌaraheꞌ ina manawoꞌ, agáiáná ina maróhó huleꞌ pepoináláiraꞌ.[112]

¹⁴Hangaa-ngaa nipári-pári bona mohintuwuꞌkou hai upu-upu tauna,[113] hai nipári-pári woꞌo bona magasaꞌ tueꞌmi,[114] láwiꞌ tauna to tiꞌara magasaꞌ tueꞌraꞌ, tiꞌaraheꞌ ina moita Pueꞌ Ala.

¹⁵Maingáꞌ-ingáꞌkou bona tiꞌara ara halalumi to mokaraohi Pueꞌ Ala hai mosápuáka ahiꞌNa. Maroꞌa-roꞌakou bona tiꞌara ara tauna to mopakarugiꞌ pohintuwuꞌmi, álána handaꞌ tauna teánti i lalu dósá. Hira nodoheꞌ rasu i oloꞌmi.[115]

¹⁶Maroꞌa-roꞌakou bona tiꞌarakou ara to mebualosi ba mobábehi bábehiá to metitidiꞌi. Ineeꞌkou ara to mehioroꞌ nodo pehioroꞌna Esau hangkoia, to tiꞌara moádái pewátiꞌna Pueꞌ Ala to ina nalámbiꞌ ánti kaꞌiana towutuꞌ. Katowutuꞌna to ina nalámbiꞌ hangko i umána iti, napobaluꞌ riꞌi i ádina, nasuláꞌ peá hai pandeꞌ hantaboꞌ.[116]

¹⁷Niꞌisá ntepuꞌu daritakáná iti. Roo onoꞌ, napoinao molámbiꞌ pewátiꞌ iti hangko i umána, agáiáná tiꞌara raweꞌi. Kehapiꞌ teriaꞌ membiáꞌ pewátiꞌ iti, tiꞌara piꞌi ara rárá mopakaroꞌa kamasalaꞌna.[117]

¹⁸Halalu-halalu, ane haweꞌkou i Pueꞌ Ala deꞌe-deꞌe, tiꞌara hibali hai toSáráeliꞌ hangkoia. Hangkoia, Pueꞌ Ala mongkóráꞌ i toSáráeliꞌ hangko i Buluꞌ Sinai i kaNaweꞌiraꞌ ÁturáNa. Buluꞌ iti, buluꞌ biásá. Tangaꞌraꞌ toSáráeliꞌ hungkuꞌ i buluꞌ iti,[118] moitaheꞌ api to roreꞌ ntepuꞌu, gawu to maiti, hai wui to rumihi.

¹⁹Mohádiheꞌ pokániꞌ tamburuꞌ to masimbuku, hai Pueꞌ Ala mampolaluitaꞌáheꞌ, Nauliꞌ, “Heáná peá to mokada buluꞌ deꞌe hangaa-ngaa rawatui duuꞌna mate, maroꞌa binataꞌ maroꞌa tauna.” Malááꞌ ntepuꞌuheꞌ mohádi párentá to napahaweꞌ Pueꞌ Ala, haneꞌi rapembiáꞌ bona Pueꞌ ineeꞌ wopiꞌi molaluita i hira, láwiꞌ tiꞌara rabuku mampehádingi.[119]

²¹Apa to raita toSáráeliꞌ iti meriringkuꞌi ntepuꞌu, mogalo riꞌi Musa manguliꞌ woꞌo, “Malááꞌaꞌ hai moridiꞌaꞌ.”[120]

²²Halalu-halalu, tiꞌarakou haweꞌ i buluꞌ to noꞌonoꞌ, agáiáná deꞌe-deꞌe haweꞌmokou i Buluꞌ Sio hai kótá Ierusale to i surugáꞌ to nakatoroꞌi Pueꞌ Ala to tueꞌ. Molindoꞌkou i sábuna malaꞌeka to moromu-romuheꞌ i lalu kagóeꞌ-góeꞌ.

²³Haweꞌmokou i posusáraꞌ upu-upu ánáꞌ towutuꞌ,[121] to teukiꞌ hangaꞌraꞌ i lalu surugáꞌ. Haweꞌmokou i Pueꞌ Ala to mohoda-hoda kárá-káráraꞌ upu-upu tauna. Moromumokou hai tauna to marue miꞌi mate to manótó bábehiáraꞌ hangkoia hai to rapamagasaꞌmoheꞌ i peitána Pueꞌ Ala.

²⁴Haweꞌmokou i Iesu, Topetangaꞌ-tangaꞌi to mopakanótó podándi to woꞌu to nabábehi Pueꞌ Ala. Rárá to napakeꞌ Pueꞌ Ala mopakanótó podándi iti, ia miꞌi moliu kamatena Iesu. Tempó iti, moili waheꞌNa, hai melumbuꞌ kamaroꞌana waheꞌNa iti hangko i waheꞌna Abeli hangkoia.[122]

²⁵Maingáꞌ-ingáꞌkou bona ineeꞌ nisápuáka Pueꞌ, láwiꞌ deꞌe-deꞌe Pueꞌ Ala to mongkóráꞌ i kómu! Ane toSáráeliꞌ hangkoia rahuku láwiꞌ tiꞌaraheꞌ mampoinálái laluitana Pueꞌ Ala to mongkóráꞌ hangko i Buluꞌ Sinai, pelumbuꞌna mani kitaꞌ to mohádi Pueꞌ Ala mongkóráꞌ hangko i surugáꞌ. Ane tasápuáka ngkóráꞌNa, bateꞌna tiꞌarakeꞌ ina tekábáhá hangko i pehukuNa.

²⁶I tempóna Pueꞌ Ala mongkóráꞌ i toSáráeliꞌ i Buluꞌ Sinai, wambaꞌNa moenggo duniáꞌ. Agáiáná deꞌe-deꞌe, ara wopiꞌi dándiNa to manguliꞌ, “Hangkani mani ina Kuenggo duniáꞌ deꞌe álána magero. Hai tiꞌara peá duniáꞌ to ina Kuenggo, agáiáná langiꞌ woꞌo.”

²⁷NgkóráꞌNa to manguliꞌ “hangkani mani”, lempóna: Pueꞌ Ala ina moenggo hai mogero duniáꞌ to Napopewaliꞌ deꞌe. Mewaliꞌ, apa peá to tiꞌara peisá raenggo, iti perái to mentárá.

²⁸Mewaliꞌ halalu-halalu, ánti kaꞌina molámbiꞌtaꞌ gáláꞌtaꞌ i lalu popárentána Pueꞌ Ala to tiꞌara peisá raenggo, onoꞌ miꞌi haneꞌi hangaa-ngaa tauliꞌ handaꞌ kamaroꞌana i Pueꞌ Ala, hai hangaa-ngaa menómbá mpuꞌukeꞌ i Hia mouláꞌ peundeꞌáNa. Hangaa-ngaa tabiláꞌ hai tapengkoruꞌi ntepuꞌu,

²⁹láwiꞌ Pueꞌ Ala to tapenómbái, nodo api to mopapumpu upu-upu to paraluu Nahuku.