Read Besoa Iberani 2 Bible Online

Iberani 2 - Besoa bible

Iberani 2

¹Mewaliꞌ, ánti kamakuasaꞌna Pueꞌ Iesu, onoꞌ miꞌi haneꞌi hangaa-ngaa tapakaroꞌa-roꞌa ntepuꞌu pampeuláꞌintaꞌ upu-upu paturoꞌ to rapahaweꞌámokeꞌ, bona tiꞌarakeꞌ mosuliꞌ hangko i pepoináláintaꞌ,

²láwiꞌ ane Áturána Pueꞌ Ala to rapahaweꞌ malaꞌeka {i toioruntaꞌ hangkoia} tiꞌara ara katebálikiána, hai tauna to tiꞌaraheꞌ mouláꞌ ba mampoinálái Áturá iti molámbiꞌheꞌ pehuku hintotoꞌ hai bábehiáraꞌ,

³melumbuꞌ mani karumihina pehukuna Pueꞌ Ala i kitaꞌ ane tiꞌarakeꞌ mopailalu bámbári katehómpóꞌ. Hai bámbári katehómpóꞌ iti melumbuꞌ ntepuꞌu kuasaꞌna hangko i áturána Musa, láwiꞌ Pueꞌ Iesu haduduáNa to rungu-runguna mopahaweꞌ bámbári iti. Hai tauna to rungu-runguna mohádi laluitana Iesu hangkoia, mopakanótóákeꞌ katoꞌuna bámbári iti.

⁴Pueꞌ Ala mopakaróhó wopiꞌi posabikiraꞌ, láwiꞌ Naweꞌiheꞌ kuasaꞌ mobábehi handaꞌ pákáꞌna tandaꞌ kuasaꞌ to metingkáráki. Hai Ia mampoweꞌiheꞌ woꞌo kapánde to mampopengaa hangko i Inao to Magasaꞌ hintotoꞌ hai peundeꞌáNa.[14]

⁵Tiꞌara malaꞌeka to ina molámbiꞌ kuasaꞌ hangko i Pueꞌ Ala bona mopárentá duniáꞌ to woꞌu to ina haweꞌ to tapolaluita deꞌe-deꞌe,

⁶agáiáná taunána riꞌi Pueꞌ Ala to ina molámbiꞌ kuasaꞌ iti. Iti to tepakanótó i lalu Sura Magasaꞌ to manguliꞌ node: “Ó Pueꞌ Ala, heáná mpuꞌu paꞌi tauna, haneꞌi Nubuhinao? Hai heáná mpuꞌu paꞌi tauna haneꞌi Nukádipurá?

⁷I tempó to hantódiꞌ peá, Nupopewaliꞌ tueꞌna bona tepaiwóiꞌá hangko i malaꞌeka. Roo onoꞌ, Nupomahile hai Nuweꞌi pehodaꞌá to meawaꞌ hai tebiláꞌ.

⁸Nupopengkoruꞌ upu-upuna i Hia.” [15] Mewaliꞌ, Pueꞌ Ala mampoweꞌi miꞌi kuasaꞌ i tauna bona mopárentá upu-upuna. Lempóna, tiꞌara ara hampákáꞌ to tiꞌara nakuasaꞌi tauna. Agáiáná katoꞌuána, deꞌe-deꞌe kamakuasaꞌna tauna iti i upu-upuna tiꞌara mani tongawaꞌ i kitaꞌ.

⁹Agáiáná kuasaꞌ iti tongawaꞌ miꞌi i Iesu. TangaꞌNa mani tueꞌ i duniáꞌ deꞌe, kamahilena tueꞌNa tepaiwóiꞌá hantódiꞌ hangko i malaꞌeka. Ánti kabulána laluna Pueꞌ Ala i kitaꞌ, Napakanótó bona Iesu rapapate mewaliꞌ sulewátána upu-upu tauna. Hai ánti kaNahuhuꞌna wátáNa rapapate, deꞌe-deꞌe Ia rapomahile hai raweꞌi pehodaꞌá to meawaꞌ hai tebiláꞌ.

¹⁰Pueꞌ Ala mampopewaliꞌ upu-upuna mouláꞌ pobutusiNa, bona upu-upu to ara ina molámbiꞌ tunggáiáNa. Hai tunggáiáNa iti bona handaꞌ tauna Napopewaliꞌ ánáꞌNa hai Napopeawaꞌheꞌ. Onoꞌ miꞌi haneꞌi Pueꞌ Ala mopakanótó bona Iesu molámbiꞌ kapári duuꞌna mate. Hintotoꞌ ntepuꞌu pobutusina Pueꞌ Ala iti, láwiꞌ hangko i kapári to nalámbiꞌ Iesu, Iesu mewaliꞌ Topehómpóꞌ to tiꞌara ara kamakuraꞌNa. Ia to mobungkáhi rárá to tapolumaoi bona molámbiꞌkeꞌ katueꞌ to meawaꞌ hibali hai Ia.[16]

¹¹Iesu mopamagasaꞌ tauna, hai tauna to Napamagasaꞌ, hadua peá Umáraꞌ. Onoꞌ miꞌi haneꞌi Iesu tiꞌara mahili manguliꞌ hira iti halaluNa.

¹²Nauliꞌ Iesu i Pueꞌ Ala node: “Ina Kubámbári hangaꞌMu i oloꞌraꞌ halaluNgkuꞌ, hai ina Kutóiá hangaꞌMu i oloꞌraꞌ taunáMu.” [17]

¹³Nauliꞌ wopiꞌi Iesu: “MehárungáꞌAꞌ bukeꞌ-bukeꞌ i Pueꞌ Ala.” [18] Hai hangkani wopiꞌi Iesu manguliꞌ: “Deꞌe mpuꞌuMoꞌ, hingkakani hai tauna to naweꞌiAꞌ Pueꞌ Ala.” [19]

¹⁴Tauna to napoánáꞌheꞌ Pueꞌ Ala, tauna biásá to hangaa-ngaa mate. Onoꞌ miꞌi haneꞌi Iesu mewaliꞌ woꞌo tauna hai katueꞌNa nodo woꞌo katueꞌ tauna biásá, bona ánti kamateNa Ia mogero kuasaꞌna Datu Tokadake to moántikeꞌ i kapate.

¹⁵Moliu kamatena iti, Iesu mokábáhákeꞌ hangko i kapate. Hangkoia, tueꞌkeꞌ nodo hawiꞌ, hai peisákeꞌ rapándiriꞌ nodo hawiꞌna Datu Tokadake, láwiꞌ tapokalááꞌ kapate.

¹⁶Mewaliꞌ, taisá ntepuꞌu: tiꞌara riꞌi malaꞌeka to Natulungi Pueꞌ Iesu, agáiáná kitaꞌ pemuleꞌána Burahima to Natulungi.

¹⁷Onoꞌ miꞌi haneꞌi Iesu hangaa-ngaa mewaliꞌ tauna hibali hai kitaꞌ halaluNa i pákáꞌ-pákáꞌna, bona Ia mewaliꞌ Tadulako Menómbá Mahile. Maꞌahiꞌ ntepuꞌu laluNa hai Ia tetidaꞌ mampopolumao bágóꞌNa i Pueꞌ Ala bona dósá tauna ina teámpungi.

¹⁸Tempóna Iesu ara mani i duniáꞌ deꞌe, Ia molámbiꞌ pekeloꞌ hai kapári hangko i Datu Tokadake, onoꞌ miꞌi haneꞌi Ia peisá motulungi tauna to rakeloꞌ.