Read Besoa Iberani 3 Bible Online

Iberani 3 - Besoa bible

Iberani 3

¹Halalu-halalu to mewaliꞌ taunána Pueꞌ Ala to Nakióꞌ mesuaꞌ i surugáꞌ! Nipailalu kaheánána Iesu. Ia miꞌi Huoꞌána Pueꞌ Ala hai Tadulako Menómbá Mahile to tapoinálái.

²Iesu tetidaꞌ mampopolumao bágóꞌNa to nahuoꞌá Pueꞌ Ala. Noꞌonoꞌ woꞌo, Musa hangkoia tetidaꞌ mampopolumao bágóꞌna mokádipurá támbina Pueꞌ Ala; lempóna, mokádipurá taunána Pueꞌ Ala.

³Agáiáná hintotoꞌ ntepuꞌu Iesu molámbiꞌ pebiláꞌ to melumbuꞌ hangko i Musa, láwiꞌ tauna to moaró támbi hangaa-ngaa melumbuꞌ karabiláꞌna hangko i támbi to naꞌaró.

⁴Upu-upu támbi, bateꞌna ara to mobábehi. Agáiáná to mobábehi upu-upuna to ara, bateꞌna peá Pueꞌ Ala.

⁵Musa peisá rapándiriꞌ nodo hadua topokádipurá támbi. Ia tetidaꞌ mampopolumao bágóꞌna mokádipurá taunána Pueꞌ Ala. Hai apa to nabábehi Musa iti, mopakanótóákeꞌ Ngkóráꞌ Marasa to ina rapahaweꞌ i tempó to ina haweꞌ.

⁶Agáiáná Kerisitu, tiꞌara peá topekádipurá. Ia miꞌi Ánáꞌna Pueꞌ Ala to mampopolumao oaꞌ bágóꞌNa, nodo hadua tadulako to mokádipurá upu-upu támbina Pueꞌ Ala, hai kitaꞌ miꞌi deꞌe támbina Pueꞌ Ala, asalaꞌ maróhó oaꞌ pepoináláintaꞌ, hai mehárungákeꞌ i Pueꞌ Iesu to tapomahile.

⁷Mewaliꞌ halalu-halalu, hangaa-ngaa nipehádingi maroꞌa paturoꞌna Inao to Magasaꞌ to teukiꞌ i lalu Sura Magasaꞌ node: “Alo deꞌe, ane nihádi apa to nauliꞌ Pueꞌ Ala,

⁸ineeꞌ nipamatuꞌa lalumi nodo kamatuꞌana laluraꞌ toiorumi hangkoia to naꞌánti nabiꞌ Musa mesuwuꞌ hangko i tampoꞌ Másiriꞌ. Toiorumi iti moewaꞌheꞌ Pueꞌ Ala, hai mampehukáꞌheꞌ oaꞌ kasabaraꞌNa i pádá loriꞌ.

⁹Nauliꞌ Pueꞌ Ala: ‘Toiorumi mampehukáꞌAꞌ hai rapampeitai mpuꞌu kasabaraꞌKuꞌ, mole riꞌi moitamoheꞌ handaꞌ tandaꞌ kuasaꞌ to Kupatongawaꞌámoheꞌ i lalu iba puloꞌna parena kamaruena.

¹⁰Onoꞌ miꞌi haneꞌi mabukoꞌ ntepuꞌuAꞌ i taunaheꞌ iti, láwiꞌ pakaheꞌ mouláꞌ rárá ntaniꞌ, hai tiꞌaraheꞌ mau mampeuláꞌi peundeꞌáNgkuꞌ.

¹¹Onoꞌ miꞌi ánti kamabukoꞌKuꞌ haneꞌi Kutotowi node: Tiꞌaraheꞌ ina mesuaꞌ i pengkarooá to Kupatimamaꞌámoheꞌ, ia miꞌi tampoꞌ to Kudándiámoheꞌ.’ ” [20]

¹²Halalu-halalu, maingáꞌ-ingáꞌkou bona tiꞌara ara i oloꞌmi to kadake laluna. Ineeꞌkou mewaliꞌ nodo tauna to mopálehi pepoináláina i Pueꞌ Ala to tueꞌ!

¹³Ngkáliꞌna riꞌi, mombepakaróhó mpolalukou oaꞌ i alo-alona, bona tiꞌarakou ara to napakanawoꞌ dósá duuꞌna matuꞌa lalumi. Mombepakaróhó mpolalukou hadua hai hadua lántuꞌána mani peisá rauliꞌ, “Alo Deꞌe,” lempóna, i tempómi mani tueꞌ.

¹⁴Mobágóꞌkeꞌ hingkakani hai Kerisitu, asalaꞌ apa to tapoinálái hangko i rungu-runguna, tatibaaꞌ ntepuꞌu duuꞌna i kahópóꞌána.

¹⁵Láwiꞌ deꞌe miꞌi to teukiꞌ i lalu Sura Magasaꞌ to manguliꞌ node: “Alo deꞌe, ane nihádi apa to nauliꞌ Pueꞌ Ala, ineeꞌ nipamatuꞌa lalumi nodo kamatuꞌana laluraꞌ toiorumi hangkoia.” [21]

¹⁶Heánáheꞌ to mopaꞌara kamabukoꞌna Pueꞌ Ala, kehapiꞌ mohádiheꞌ wambaꞌNa? Tiꞌara paꞌi toSáráeliꞌ to naꞌánti nabiꞌ Musa mesuwuꞌ hangko i tampoꞌ Másiriꞌ.

¹⁷Hai heáná to nakabukoꞌi Pueꞌ Ala iba puloꞌna parena kamaruena? Tiꞌara paꞌi toSáráeliꞌ to mateheꞌ i pádá loriꞌ ánti kahandaꞌna dósáraꞌ.

¹⁸Hai heáná to natotowi Pueꞌ Ala, bona tiꞌaraheꞌ peisá mesuaꞌ i pengkarooá to Napatimamaꞌámoheꞌ, ia miꞌi tampoꞌ to Nadándiáheꞌ? Tiꞌara paꞌi toSáráeliꞌ to tiꞌaraheꞌ mampeuláꞌi hawaꞌNa.

¹⁹Mewaliꞌ taisá miꞌi: katiꞌáráraꞌ peisá mesuaꞌ i tampoꞌ to nadándiáheꞌ Pueꞌ Ala hai mengkaroo hingkakani hai Ia, láwiꞌ tiꞌaraheꞌ mepoinálái i Hia.