Read Besoa Iberani 5 Bible Online

Iberani 5 - Besoa bible

Iberani 5

¹Upu-upu Tadulako Menómbá Mahile rapileꞌi hangko i oloꞌraꞌ tauna, hai raꞌángkáꞌ bona mampopolumao bágóꞌna Pueꞌ Ala. Tadulako Menómbá Mahile ia miꞌi hadua tadulako agama to lao i lindoꞌna Pueꞌ Ala bona mosulewátái tauna to handaꞌ. Bágóꞌna mosambale binataꞌ bona mopaháwángi dósáraꞌ tauna to handaꞌ hai mohuhuꞌ popenómbá to ntániꞌna i Pueꞌ Ala.

²Tadulako Menómbá Mahile iti tauna biásá hai bateꞌna handaꞌ kamaledeꞌna. Onoꞌ miꞌi haneꞌi naisá mopamaꞌálusuꞌ poántina mokádipurá tauna to tiꞌara mani moisá apa-apa ba to mosuliꞌ hangko i pepoináláiraꞌ.

³Ánti kamaledeꞌna, Tadulako Menómbá Mahile tiꞌara peá mohuhuꞌ popenómbá bona mopaháwángi dósáraꞌ tauna to handaꞌ, agáiáná ia woꞌo mohuhuꞌ popenómbá bona mopaháwángi dósána haduduána.

⁴Hai tiꞌara ara tauna to moángkáꞌ wátána haduduána mewaliꞌ Tadulako Menómbá Mahile, agáiáná ánti pekióꞌna Pueꞌ Ala, nodo to mewaliꞌ hangkoia i Haruni, Tadulako Menómbá Mahile to rungu-runguna.[29]

⁵Noꞌonoꞌ woꞌo Kerisitu, tiꞌara mengkaiwongko, hai tiꞌara moángkáꞌ wátáNa haduduáNa mewaliꞌ Tadulako Menómbá Mahile, agáiáná Pueꞌ Ala riꞌi to moángkáꞌ, Nauliꞌ node: “Io miꞌi ÁnáꞌKuꞌ, Alo deꞌe mewaliꞌAꞌ UmáMu.” [30]

⁶Hai i lalu Sura Magasaꞌ, nauliꞌ woꞌo Pueꞌ Ala i ÁnáꞌNa: “Io miꞌi tadulako menómbá duuꞌna i rue-ruena, mouláꞌ karapotadulako menómbána Mekisedeꞌ.”[31] [32]

⁷I tempóna mani Iesu tueꞌ i duniáꞌ deꞌe, Ia meraruaꞌ hai teriaꞌ, mekakae membiáꞌ tulungi i Pueꞌ Ala, láwiꞌ Naisá kamakuasaꞌna Pueꞌ Ala mokábáhá hangko i kapate. Agáiáná tiꞌara Naundeꞌ mampeuláꞌi peundeꞌáNa haduduáNa, bateꞌna mengkoruꞌ i peundeꞌána Pueꞌ Ala.[33] Onoꞌ miꞌi haneꞌi Pueꞌ Ala mampehádingi pembiáꞌNa.

⁸Kehapiꞌ Ia Ánáꞌna Pueꞌ Ala, agáiáná molámbiꞌ woꞌo kapári, hai i lalu kapári iti, Ia mampegurui rárá mengkoruꞌ i Pueꞌ Ala.

⁹Ánti pengkoruꞌNa iti, Iesu mewaliꞌ Topehómpóꞌ to tiꞌara ara kamakuraꞌNa, hai ánti kaꞌIana, upu-upu tauna to mengkoruꞌ i Hia ina molámbiꞌ katueꞌ to maroꞌa to tiꞌara mokahópóꞌá.

¹⁰Hai Pueꞌ Ala moángkáꞌ Iesu mewaliꞌ Tadulako Menómbá Mahile mouláꞌ karapotadulako menómbána Mekisedeꞌ.

¹¹Halalu-halalu, katoꞌuána, handaꞌ mani to kupoinao kuhángáꞌáꞌákou kana i Iesu hai Mekisedeꞌ, agáiáná mapári kuhádi mopakanótóákou upu-upuna iti, láwiꞌ nodokou tauna to mentibongoꞌ. Tiꞌara niundeꞌ mampehádingi paturoꞌkuꞌ,

¹²kehapiꞌ maruemokou meuláꞌ i Pueꞌ Iesu. Katoꞌuána, deꞌe-deꞌe hangaa-ngaa mewaliꞌkou guru to mopahaweꞌ ngkóráꞌna Pueꞌ, agáiáná paraluu manikou meguru i tauna ntániꞌna, láwiꞌ tiꞌara mani niꞌisá ntóáꞌna paturoꞌ agama Sarani. Mogalo riꞌi paturoꞌ to madoli, tiꞌara mani maroꞌa kanipeuláꞌina, apa mani paturoꞌ to maꞌángkárá! Nodo manikou ánáꞌlei to mehuhu, tiꞌara mani nibuku mandeꞌ pandeꞌ to matuꞌa,

¹³láwiꞌ ane to mehuhu mani nodo ánáꞌlei, tiꞌara mani raisá mampopontaniꞌ apa to toꞌu hai apa to salaꞌ.

¹⁴Agáiáná tauna to manginao miꞌi, mandeꞌmoheꞌ pandeꞌ to matuꞌa, láwiꞌ raisá miꞌi mampopontaniꞌ apa to maroꞌa hai apa to kadake.