Read Besoa Iberani 9 Bible Online

Iberani 9 - Besoa bible

Iberani 9

¹Pototowina Pueꞌ Ala to napahaweꞌ Musa i toSáráeliꞌ hangkoia, handaꞌ áturá penómbá, hai ara woꞌo támbi penómbáꞌáraꞌ to rabábehi tauna.[48]

²Támbi penómbáꞌáraꞌ iti rahangaꞌ Bambaruꞌ Penómbáꞌá. I lalu támbi iti, ara rombuaꞌ lintuꞌ. Lintuꞌ to i lindoꞌ rahangaꞌ Lintuꞌ Magasaꞌ. I lalu lintuꞌ iti, ara: pemboliá huluꞌ,[49] mejá pemboliá rótiꞌ,[50] hai rótiꞌ to rapopenómbá i Pueꞌ Ala.[51]

³Lintuꞌ to rombuaꞌ iti raparailiki hantau báná.[52] Lintuꞌ to karombuaꞌna iti to i lalu ntepuꞌu rauliꞌ Lintuꞌ to Melumbuꞌ Kamagasaꞌna.

⁴I lalu lintuꞌ iti ara: paintuá dupaꞌ to rabábehi hangko i buláwá,[53] hai ara woꞌo hambuaꞌ petiꞌ to rahangaꞌ Petiꞌ Podándi, to rakarolápiꞌi hai buláwá, maroꞌa i rawana, maroꞌa i laluna.[54] I lalu petiꞌ iti, ara: rombuaꞌ watu to rapoukiꞌi Hawaꞌ to Hampuloꞌ to hangko i Pueꞌ Ala,[55] ara pamboliá buláwá to raóntóki rótiꞌ manna,[56] hai ara woꞌo laiꞌna Haruni to motumbeꞌ.[57]

⁵I wongko petiꞌ iti, ara rombuaꞌ lenggeꞌ kerubi.[58] Kápiraꞌ teónáꞌ i wongko tauꞌ petiꞌ, tandaꞌna peawaꞌna Pueꞌ Ala ara ionoꞌ. Petukona iti rahangaꞌ Petuko Petiꞌ Peámpungi Dósá.[59] Agáiáná upu-upu iti tiꞌara piꞌi nampakaꞌ tapolaluita ba tapáresáꞌ maroꞌa ieneꞌ.

⁶Noꞌonoꞌ miꞌi karapatimamana Bambaruꞌ Penómbáꞌá hangkoia. Alo-alona tadulako-tadulako menómbá mesuaꞌ i lintuꞌ to i lindoꞌ mampopolumao bágóꞌraꞌ.

⁷Agáiáná to peisá mesuaꞌ i lintuꞌ to i lalu ntepuꞌu, bateꞌna peá Tadulako Menómbá Mahile. Hangkani peá i lalu hampare ia mesuaꞌ, hai hangaa-ngaa moánti waheꞌ binataꞌ to napopenómbá i Pueꞌ Ala, háwángina salaꞌna haduduána hai salaꞌraꞌ tauna to handaꞌ to tiꞌara ratunggái.

⁸Ánti kaꞌárána áturá to noꞌonoꞌ, Inao to Magasaꞌ mopakanótóákeꞌ kamakuraꞌna áturá iti, láwiꞌ lántuꞌána ara mani Lintuꞌ to i lindoꞌ, rárá mesuaꞌ i Lintuꞌ to Melumbuꞌ Kamagasaꞌna tiꞌara mani tebungkáhi bona tauna peisá mohungkuki Pueꞌ Ala.

⁹Upu-upu iti mewaliꞌ pándiriꞌ i kitaꞌ to tueꞌ deꞌe-deꞌe. Lempóna: upu-upu popenómbá hai binataꞌ to tahuhuꞌ mewaliꞌ popenómbá i Pueꞌ Ala, tiꞌara peisá mopamagasaꞌ laluntaꞌ.

¹⁰Áturá-áturá to sae iti, mokana peá ádá pandeꞌ,[60] painu,[61] hai pembahoꞌ.[62] Upu-upuna iti mewaliꞌ áturá ngkatueꞌ to i rawana peá, to rapopolumao oaꞌ lántuꞌána mampegiá podándi to woꞌu.[63] I tempó iti, upu-upuna ina mewaliꞌ miꞌi woꞌu.

¹¹Haweꞌ miꞌi Kerisitu mewaliꞌ Tadulako Menómbá Mahile to moánti katueꞌ to maroꞌa to talámbiꞌ miꞌi.[64] Ia mesuaꞌ i lalu Bambaruꞌ Penómbáꞌá i surugáꞌ to melumbuꞌ kamaroꞌana hai kamagasaꞌna hangko i Bambaruꞌ Penómbáꞌá to naꞌaró tauna. Lempóna, Ia mesuaꞌ i Bambaruꞌ Penómbáꞌá to tiꞌara hangko i duniáꞌ deꞌe.

¹²I pesuaꞌNa iti, Ia liliu lao i lalu Lintuꞌ to Melumbuꞌ Kamagasaꞌna molindoꞌ Pueꞌ Ala. Waheꞌ to Naꞌánti tiꞌara waheꞌ bekeꞌ laki ba waheꞌ ánáꞌ gapiꞌ, agáiáná waheꞌNa haduduáNa. PesuaꞌNa iti, hangkani peá, hai tiꞌara piꞌi paraluu rahuleki, láwiꞌ ánti waheꞌNa to Naꞌánti iti, Ia mokábáhákeꞌ hangko i huku dósántaꞌ duuꞌna i rue-ruena.

¹³Mouláꞌ Paturoꞌna Musa, ane araheꞌ tauna to kedái mouláꞌ áturá agama,[65] bekeꞌ laki ba gapiꞌ laki hangaa-ngaa rasambale, hai waheꞌna rapopohimpeꞌheꞌ. Noꞌonoꞌ woꞌo hambaꞌa ánáꞌ gapiꞌ hangaa-ngaa raintu duuꞌna mewaliꞌ awu, hai awuna hangaa-ngaa rakámburángiáheꞌ. Mewaliꞌ ane waheꞌ hai awu iti peisá rapakeꞌ mopamagasaꞌ tauna i rawana peá,

¹⁴pelumbuꞌna mani waheꞌna Kerisitu! Ia mohuhuꞌ wátáNa haduduáNa i Pueꞌ Ala moliu Inao to Magasaꞌ to tueꞌ duuꞌna i rue-ruena, bona mewaliꞌ popenómbá to tiꞌara ara kamakuraꞌNa. WaheꞌNa iti peisá mopamagasaꞌ laluntaꞌ hangko i upu-upu áturá-áturá to tiꞌara mobunduꞌ, bona bulá huleꞌ laluntaꞌ haneꞌi peisákeꞌ menómbá i Pueꞌ Ala to tueꞌ.

¹⁵Kerisitu mate mohómpóki tauna hangko i huku dósá to rabábehi tempóna podándi to rungu-runguna ara mani. Ánti popenómbáNa to tiꞌara ara kamakuraꞌNa iti, Kerisitu motangaꞌ-tangaꞌi podándi to woꞌu to mopahintuwuꞌ tauna hai Pueꞌ Ala. Iti Nabábehi bona upu-upu tauna to napileꞌi Pueꞌ Ala ina molámbiꞌ pewátiꞌ to tiꞌara mokahópóꞌá hiolaꞌ hai apa to nadándiáheꞌ Pueꞌ Ala.

¹⁶Láwiꞌ ane ara podándi, hangaa-ngaa ara to mate to mopakanótó podándi iti,

¹⁷láwiꞌ ane tiꞌara mani ara to mate, podándi iti tiꞌara mani peisá rapakanótó.

¹⁸Noꞌonoꞌ woꞌo podándi to rungu-runguna rapakanótó hai waheꞌ.

¹⁹Node rárána: karoona Musa mopahaweꞌ i upu-upu toSáráeliꞌ párentá-párentá to ara i lalu Áturána Pueꞌ Ala, ia moala waheꞌ ánáꞌ gapiꞌ hai waheꞌ bekeꞌ laki haneꞌi nagalo hai uwai. Roo onoꞌ, moala miꞌi woꞌo dáꞌána hisop to ratomboꞌ hai wulu dimbá to malei, naeme i lalu waheꞌ, haneꞌi nahimpeꞌá Sura Áturána Pueꞌ Ala hai tauna to handaꞌ.[66]

²⁰Tangaꞌna Musa mohimpeꞌ, nauliꞌ node: “Deꞌe miꞌi waheꞌ to mopakanótó dándina Pueꞌ Ala i kómu, hai hangaa-ngaa nipeuláꞌi.”

²¹Musa mohimpeꞌ woꞌo Bambaruꞌ Penómbáꞌá hai upu-upu párewá to rapakeꞌ menómbá i Pueꞌ Ala.

²²Hai mouláꞌ Paturoꞌna Musa, pákáꞌ-pákáꞌna hangaa-ngaa rapamagasaꞌ hai waheꞌ. Ane tiꞌara ara waheꞌ hangko i to rasambale, dósá tiꞌara ina teámpungi.

²³Ane Bambaruꞌ Penómbáꞌá to i duniáꞌ deꞌe hai párewá to ara i laluna, upu-upu iti rapahibali hai apa to ara i surugáꞌ, onoꞌ miꞌi haneꞌi hangaa-ngaa rapamagasaꞌ hai waheꞌ binataꞌ to rapopenómbá i Pueꞌ Ala. Agáiáná ane támbi penómbáꞌá to i surugáꞌ, hangaa-ngaa ara popenómbá to melumbuꞌ mani kamaroꞌana.

²⁴Láwiꞌ támbi penómbáꞌá to napesuaꞌi Kerisitu, tiꞌara támbi to rabábehi tauna to rapahibali peá hai to i surugáꞌ, ngkáliꞌna riꞌi, támbi penómbáꞌá to napesuaꞌi Kerisitu ia miꞌi surugáꞌ. Hai deꞌe-deꞌe, Ia motangaꞌ-tangaꞌikeꞌ i lindoꞌna Pueꞌ Ala.

²⁵Ane Tadulako Menómbá Mahile agama Iahudiꞌ, hampare-hampare ia mesuaꞌ i lalu Lintuꞌ to Melumbuꞌ Kamagasaꞌna moánti waheꞌ binataꞌ. Agáiáná Kerisitu tiꞌara mohuleꞌ-huleꞌ mohuhuꞌ wátáNa i Pueꞌ Ala.

²⁶Láwiꞌ ane Ia nodo Tadulako Menómbá Mahile i duniáꞌ, mantepuꞌu hangko i pewaliꞌána duniáꞌ, kehandaꞌ kánina hangaa-ngaa mantódihá kapári duuꞌna mate. Agáiáná deꞌe-deꞌe i tempó to kahópóꞌána, hangkani peá Ia haweꞌ bona mowehángi dósá i pohuhuꞌNa wátáNa bona rapapate.

²⁷Pueꞌ Ala mopakanótó miꞌi, tauna hangaa-ngaa mate hangkani peá, hai roo onoꞌ ina rabutusi kárá-káráraꞌ.

²⁸Noꞌonoꞌ woꞌo, hangkani peá Kerisitu mohuhuꞌ wátáNa mewaliꞌ popenómbá i Pueꞌ Ala, bona mokili dósá tauna. Hai hangkani tempó, Ia ina mesuleꞌ mai i karongkánina i duniáꞌ deꞌe. Tempó onoꞌ, Ia tiꞌara piꞌi ina mokili dósántaꞌ, agáiáná Ia ina moánti katehómpóꞌ i tauna to mampegiá kahaweꞌNa.