Read Besoa Iakobu 1 Bible Online

Iakobu 1 - Besoa bible

Iakobu 1

¹Molámbiꞌ toSarani i kaꞌaraꞌámi Tabeá hangko i kódóꞌ Iakobu, huoꞌána Pueꞌ Ala hai Pueꞌ Iesu Kerisitu. Sura deꞌe kupakatu i kómu taunána Pueꞌ Ala to hampuloꞌ hai rontina, to mahawuꞌ i humalele duniáꞌ.

²Halalu-halalu! Ane narampekou mampopengaa kapári, ineeꞌ nipokóiꞌ inao. Ngkáliꞌna riꞌi, hangaa-ngaa nipogóeꞌ,

³láwiꞌ niꞌisá, ane pepoináláimi rapáresáꞌ moliu kapári, peisákou meguru bona mantahakou.

⁴Hai hangaa-ngaa mantahakou duuꞌna i kahópóꞌána, bona maróhó ntepuꞌu pepoináláimi hai tiꞌara ara kamasalaꞌmi ba kamakuraꞌna pambiárámi.

⁵Ane arai i oloꞌmi to tiꞌara mani gaga bukeꞌ pekiri, hangaa-ngaa napembiáꞌ i Pueꞌ Ala, hai bateꞌna ina Naweꞌikou. Láwiꞌ Pueꞌ Ala tiꞌara luleꞌ mampoweꞌikeꞌ apa to taparaluu, hai Naweꞌikeꞌ hangko i kabulá laluNa.

⁶Agáiáná ane tapembiáꞌ i Pueꞌ Ala, hangaa-ngaa mepoinálái ntepuꞌukeꞌ. Ineeꞌ bata-bata laluntaꞌ, láwiꞌ heáná tauna to bata-bata laluna, peisá rapándiriꞌ nodo bálumbá to nawui ngkálu soꞌu ngkálu mai.

⁷Tauna to noꞌonoꞌ, morompenga mani laluna, tiꞌara mokanótóá katueꞌna. Onoꞌ miꞌi haneꞌi ia tiꞌara peisá mohárungá ba apa peá hangko i Pueꞌ.

⁹ToSarani to meahiahiꞌ tueꞌraꞌ, hangaa-ngaa góeꞌheꞌ láwiꞌ bateꞌna napaireámoheꞌ Pueꞌ Ala ánti pepoináláiraꞌ i Hia.[1]

¹⁰Noꞌonoꞌ woꞌo toSarani to pebuku, hangaa-ngaa góeꞌheꞌ ane Pueꞌ Ala mopaiwóiꞌ tueꞌraꞌ. Tauna to pebuku peisá rapándiriꞌ nodo bungaꞌ i pádá: hampalai peá katueꞌna,

¹¹láwiꞌ ane bungaꞌ i pádá iti nahimbaꞌi alo to mahárá, kásáliu malau duuꞌna maránáꞌ bungaꞌna hai tiꞌara piꞌi malásáꞌ. Noꞌonoꞌ woꞌo tauna to pebuku: ina mateheꞌ tangaꞌraꞌ mokádipurá kapebukuraꞌ.

¹²Morasiꞌ tauna to mantaha i lalu kapári hai pekeloꞌ, láwiꞌ ane mantahaheꞌ, ina molámbiꞌheꞌ háwángina, ia miꞌi katueꞌ to maroꞌa to tiꞌara mokahópóꞌá[2] to nadándi Pueꞌ Ala i heáná peá tauna to mepokaꞌahiꞌ i Hia.

¹³Ane ara to rakeloꞌ bona mobábehi to kadake, ineeꞌ rapekiri, “Pekeloꞌ deꞌe hangko i Pueꞌ Ala,” láwiꞌ Pueꞌ Ala tiꞌara peisá rakeloꞌ to kadake, hai Ia tiꞌara woꞌo ina mokeloꞌ tauna bona mobábehiheꞌ to kadake.

¹⁴Agáiáná upu-upu tauna to rakeloꞌ, nadiiꞌ peundeꞌána laluraꞌ to tiꞌara maroꞌa.

¹⁵Ane mouláꞌkeꞌ peundeꞌána laluntaꞌ haduduántaꞌ, bateꞌna mobábehikeꞌ dósá.[3] Hai ane madósákeꞌ oaꞌ, kahópóꞌána ina naꞌántikeꞌ i kapate.[4]

¹⁶Halalungkuꞌ to kupokaꞌahiꞌ! Ineeꞌkou rapakanawoꞌ!

¹⁷Upu-upu to maroꞌa hai to tiꞌara ara kamakuraꞌna mentóáꞌ hangko i Pueꞌ Ala. Ia miꞌi to mampopewaliꞌ upu-upuna to mewangkaꞌ i langiꞌ, tiꞌara ara katebálikiáNa, hai tiꞌara woꞌo ara kamakáindiNa.

¹⁸Napopewaliꞌkeꞌ ánáꞌNa mouláꞌ peundeꞌáNa haduduáNa moliu Ngkóráꞌ Marasa to toꞌu, bona kitaꞌ to mepoinálái Napomahile ntepuꞌukeꞌ hangko i upu-upu to Napopewaliꞌ.

¹⁹Halalungkuꞌ to kupokaꞌahiꞌ! Hangaa-ngaa nipailalu laluita deꞌe: kitaꞌ upu-upu hangaa-ngaa moundeꞌkeꞌ mampehádingi apa to rauliꞌ tauna ntániꞌna, tapekiri sieruꞌ hangko tiꞌara manikeꞌ molaluita, hai ineeꞌkeꞌ hawiáꞌ mabukoꞌ,

²⁰láwiꞌ tauna to mabukoꞌ, tiꞌaraheꞌ peisá mobábehi apa to hiolaꞌ hai peundeꞌána Pueꞌ Ala.

²¹Onoꞌ miꞌi haneꞌi hangaa-ngaa nikábáhá upu-upu bábehiá to kedái hai kadake, nodo to paka rabábehi tauna i duniáꞌ deꞌe.[5] Hangaa-ngaa mengkaiwóiꞌkou motarima ngkóráꞌ to natudaꞌ Pueꞌ Ala i lalumi, láwiꞌ ngkóráꞌ iti ara kuasaꞌ mohómpókikou hangko i huku dósámi.[6]

²²Mewaliꞌ, ngkóráꞌna Pueꞌ iti hangaa-ngaa nipeuláꞌi ntepuꞌu. Ineeꞌ peá nipehádingi mbero, láwiꞌ ane noꞌonoꞌi, mopakanawoꞌ pekou wátámi haduduámi.

²³Tauna to mohádi peá ngkóráꞌna Pueꞌ hai tiꞌara mampeuláꞌi, peisá rapándiriꞌ nodo tauna to mampeita lenggeꞌna i pampewaio,

²⁴agáiáná i kapohuꞌna peá, tiꞌara piꞌi nabuhinao ba noumbái lenggeꞌna iti.

²⁵Onoꞌ miꞌi haneꞌi hangaa-ngaa nipailalu ntepuꞌu ngkóráꞌna Pueꞌ Ala hai nipeuláꞌi oaꞌ, láwiꞌ ngkóráꞌna Pueꞌ tiꞌara ara kamakuraꞌna, hai ara kuasaꞌna mokábáhákeꞌ hangko i dósántaꞌ. Mewaliꞌ, ineeꞌkou mohádi peá ngkóráꞌNa haneꞌi nikáláliꞌá. Hangaa-ngaa nipeuláꞌi ngkóráꞌNa iti, láwiꞌ upu-upu tauna to mobábehi noꞌonoꞌ, bateꞌna nawátiꞌheꞌ Pueꞌ Ala i apa peá to rabábehi.

²⁶Ane arai hadua tauna to manguliꞌ kaꞌiana to moagama ntepuꞌu, agáiáná tiꞌara naisá mokámpái lilaꞌna bona maroꞌa polaluitana, ia mopakanawoꞌ peá wátána haduduána. Poágámána iti mbero-mbero peá.

²⁷Ngkáliꞌna riꞌi, poagama to tiꞌara ara kamakuraꞌna ba kamasalaꞌna i peitána Pueꞌ Ala Umántaꞌ node: hangaa-ngaa motulungikeꞌ ánángkóiꞌ to ilu hai tobembaꞌ to meahiahiꞌ tueꞌraꞌ, hai hangaa-ngaa mokámpáikeꞌ katueꞌtaꞌ, bona tiꞌarakeꞌ rapakedái tauna to kadake i duniáꞌ to moewaꞌ Pueꞌ Ala.