Read Besoa Iakobu 3 Bible Online

Iakobu 3 - Besoa bible

Iakobu 3

¹Halalu-halalu! Ineeꞌkou handaꞌ to mampoinao mewaliꞌ tauna to mopaturoꞌ toSarani, láwiꞌ taisá miꞌi, kitaꞌ to mewaliꞌ tauna to mepaturoꞌ {hangaa-ngaa mampeuláꞌikeꞌ peundeꞌána Pueꞌ Ala, láwiꞌ ane mopahaweꞌkeꞌ paturoꞌ to salaꞌ},[15] ina melumbuꞌ pehukuNa i kitaꞌ haneꞌi pehukuNa i tauna ntániꞌna.

²Pakakeꞌ mobábehi salaꞌ. Heáná tauna to tiꞌara mobábehi salaꞌ i polaluitana, ia to manginao miꞌi hai peisá mokuasaꞌi pekirina hai bábehiána i upu-upuna.

³I duniáꞌ deꞌe, to kókóiꞌ peisá mokuasaꞌi to mahile. Rápáꞌna, mosamaꞌikeꞌ dárá bona mampeuláꞌi peundeꞌántaꞌ. Mewaliꞌ, kehapiꞌ samaꞌ kókóiꞌ peá, peisákeꞌ mokuasaꞌi dárá to mahile.

⁴Noꞌonoꞌ woꞌo kapalaꞌ tahiꞌ. Kehapiꞌ kapalaꞌ to mahile naꞌánti wui to rumihi, agáiáná kapalaꞌ iti peisá napopolumao topoánti iumbá peá peundeꞌána, láwiꞌ ia mopakeꞌ peguli[16] to kókóiꞌ.

⁵Hai noꞌonoꞌ woꞌo lilaꞌ tauna. Kehapiꞌ kókóiꞌ peá, agáiáná peisá tapakeꞌ mampepemahile. Nipailalu noumbá api to hantódiꞌ peá peisá moandeꞌ kakau to maeláꞌ.

⁶Noꞌonoꞌ woꞌo laluita to tapahaweꞌ hai lilaꞌtaꞌ. Lilaꞌtaꞌ iti nodo api, láwiꞌ peisá tapakeꞌ mobábehi to kadake. I wátántaꞌ deꞌe, lilaꞌtaꞌ peisá mopaꞌara hinángkáꞌ dósá to mopakadake upu-upu wátántaꞌ. Laluita to tapahaweꞌ hai lilaꞌtaꞌ peisá rapándiriꞌ nodo api hangko i naraka to mopamarugiꞌ upu-upu katueꞌtaꞌ.

⁷Upu-upu binataꞌ to maila, tádáhi, binataꞌ to mendólóꞌ hai bouꞌ i tahiꞌ, peisá rapakanondoꞌ, hai marue miꞌi raisá tauna mopakanondoꞌ binataꞌ iti.

⁸Agáiáná tiꞌara ara hadua tauna to moisá mopakanondoꞌ lilaꞌ! Lilaꞌ kadake ntepuꞌu, hai tiꞌara peisá rakuasaꞌi, láwiꞌ lilaꞌtaꞌ peisá mopamahái laluna tauna nodo rasu to mepapate.

⁹Lilaꞌtaꞌ peisá tapakeꞌ motóiá Pueꞌ Ala Umántaꞌ, agáiáná peisá woꞌo tapakeꞌ motundaꞌ tauna, kehapiꞌ tauna iti napopewaliꞌ Pueꞌ Ala mouláꞌ pambiáráNa haduduáNa.[17]

¹⁰Hangko i hambuaꞌ peá hume, mesuwuꞌ rompákáꞌ laluita: petóiá hai petundaꞌ. Katoꞌuána halalu-halalu, tiꞌara peisá noꞌonoꞌ!

¹¹Peisá paꞌi hambuaꞌ mata uwai mampopesuwuꞌ rompákáꞌ uwai: to matamaꞌ hai to mapaiꞌ? Tiꞌara!

¹²Kau ara tiꞌara mampowuaꞌ saitu, hai anggoroꞌ tiꞌara mampowuaꞌ ara. Tibubuꞌ to mabure tiꞌara mampopesuwuꞌ uwai to matáweá. Noꞌonoꞌ woꞌo, tiꞌara hintotoꞌ ane lilaꞌtaꞌ tapakeꞌ mohuwárá to maroꞌa hai to kadake.

¹³Heáná tauna i oloꞌmi to bukeꞌ pekiri hai manótó laluraꞌ? Iti hangaa-ngaa rapatongawaꞌ hangko i bábehiáraꞌ to maroꞌa. Bábehiá to maroꞌa iti mentóáꞌ hangko i laluraꞌ to mengkaiwóiꞌ hai bukeꞌ pekiri.

¹⁴Agáiáná ane mahiniꞌ ntepuꞌukou i tauna ntániꞌna, hai mampoinao pekou mampoporasiꞌ wátámi haduduámi, ineeꞌkou mampepemahile hai manguliꞌ kómu tauna to manótókou.

¹⁵Pekiri to noꞌonoꞌ, tiꞌara mpuꞌu hangko i Pueꞌ Ala to i surugáꞌ, agáiáná hangko i duniáꞌ, hangko i peundeꞌána lalumi haduduámi, hai hangko i setáꞌ!

¹⁶Láwiꞌ ane araheꞌ tauna to mahiniꞌ hai to mampoporasiꞌ peá wátáraꞌ haduduáraꞌ, bateꞌna ina ara posisalaꞌ hai mampopengaa bábehiá to kadake.

¹⁷Agáiáná pekiri to hangko i Pueꞌ Ala i surugáꞌ magasaꞌ, moánti pohintuwuꞌ, maꞌálusuꞌ, mengkoruꞌ, bukeꞌ kabulá lalu, hai mopaꞌara hinángkáꞌna bábehiá to maroꞌa. Pekiri to hangko i Pueꞌ Ala tiꞌara mampopontaniꞌ tauna hai tiꞌara mampe to maroꞌa.

¹⁸Tauna to mopahintuwuꞌ huleꞌ tauna to mosisalaꞌ, moántiheꞌ dame, iti miꞌi wuaꞌna bábehiáraꞌ to manótó iti.