Read Besoa Iakobu 5 Bible Online

Iakobu 5 - Besoa bible

Iakobu 5

¹Deꞌe miꞌi paturoꞌkuꞌ i tauna to pebuku. Rángina miꞌi teriaꞌkou, láwiꞌ ina narampekou kapári.

²Ina matántá peawaꞌmi. Waruꞌmi ina natátáꞌ epiꞌ.

³Buláwá hai peráꞌmi ina matágárá. Tágárána iti ina mopatongawaꞌ kamasalaꞌmi láwiꞌ mampomahile pekou kapebukumi. Onoꞌ miꞌi haneꞌi ina rahukukou nodokou tauna to naꞌandeꞌ api. Morámpu pekou párewá i duniáꞌ deꞌe, agáiáná tiꞌara piꞌi marue ina haweꞌ alo kahópóꞌána duniáꞌ!

⁴Topobágóꞌ i hinoemi meraruaꞌheꞌ láwiꞌ tiꞌara nibaiari saroraꞌ. Topepare i bondemi mekakaeheꞌ membiáꞌ tulungi, hai pekakaeraꞌ napehádingi miꞌi Pueꞌ Ala to Makuasaꞌ.

⁵Mosalaꞌikou tauna to tiꞌara masalaꞌ, to tiꞌara rabuku moewaꞌkou, álána nihukuheꞌ mate. I duniáꞌ deꞌe, meawaꞌ tueꞌmi. Mampeliꞌ pekou kagóeꞌámi haduduámi, mole nodokou binataꞌ to mopakaruduꞌ wátáraꞌ haduduáraꞌ duuꞌna haweꞌ tempóraꞌ rasambale! Noꞌonoꞌ miꞌi woꞌo kómu ane haweꞌ alo pehukuá.

⁷Halalu-halalu! Hangaa-ngaa sabaraꞌkou duuꞌna haweꞌ huleꞌ Pueꞌ. Nipeita noumbá kasabaraꞌraꞌ topohinoe mampegiá powuaꞌna tudaꞌ-tudaꞌraꞌ to mobunduꞌ ntepuꞌu. Sabaraꞌheꞌ mampegiá udá i tempóraꞌ mantudaꞌ haweꞌ i powuaꞌna.

⁸Noꞌonoꞌ woꞌo kómu. Hangaa-ngaa sabaraꞌkou hai nipakaróhó lalumi, láwiꞌ tiꞌara piꞌi marue ina haweꞌ miꞌi Pueꞌ.

⁹Halalu-halalu! Ineeꞌkou mohume-hume hai mombesasalaꞌi, bona tiꞌarakou molámbiꞌ pehuku, láwiꞌ Topobutusi meángkáꞌ miꞌi i lindoꞌ babaꞌ; tiꞌara piꞌi marue ina haweꞌ!

¹⁰Halalu-halalu! Nabiꞌ-nabiꞌ hangkoia to mopahaweꞌ ngkóráꞌna Pueꞌ, mewaliꞌmoheꞌ pándiriꞌ i kitaꞌ láwiꞌ sabaraꞌheꞌ mantódihá kapári.

¹¹Tauna to mantaha i lalu kapári tarekeꞌ tauna to morasiꞌ. Niꞌisá miꞌi daritakáná Aiubi to sabaraꞌ mantódihá kapári. Hai niꞌisánto woꞌo apa to mewaliꞌ i kahópóꞌána: ia nawátiꞌ Pueꞌ Ala láwiꞌ bulá laluna Pueꞌ Ala hai bukeꞌ ahiꞌ.

¹²Halalu-halalu! To paraluu ntepuꞌu nipailalu: ineeꞌkou modándi mokábelái surugáꞌ ba duniáꞌ ba apa peá. Ane tunggáiámi manguliꞌ ió, gáná miꞌi niuliꞌ peá “Ió.” Ane tunggáiámi manguliꞌ tiꞌara, gáná miꞌi niuliꞌ peá “Tiꞌara,” bona tiꞌarakou ina molámbiꞌ pehuku.

¹³Ane arai i oloꞌmi to molámbiꞌ kapári, maroꞌa ane ia mekakae. Ane arai to góeꞌ, maroꞌa ane ia monani motóiá Pueꞌ Ala.

¹⁴Ane arai to tiꞌara nalalu, maroꞌa ane ia mokióꞌheꞌ pinátuá, bona pinátuáheꞌ iti peisá mampekakaeá hai molánái i lalu hangaꞌna Pueꞌ.

¹⁵Ane mekakaeheꞌ láwiꞌ mepoinálái ntepuꞌuheꞌ, bateꞌna mauriꞌ to tiꞌara nalalu iti. Pueꞌ Ala ina mopakauriꞌ wátána, hai ane ara dósána, ina Naꞌámpungi woꞌo.

¹⁶Onoꞌ miꞌi haneꞌi hangaa-ngaa nipangákuꞌ i lindoꞌna hángká rángámi apa salaꞌmi, hai mombepekakaeákou bona mauriꞌkou. Pemoso ntepuꞌu pekakaeraꞌ tauna to manótó.

¹⁷Rápáꞌna, nabiꞌ Eliá hangkoia tauna biásá hibali hai kitaꞌ. Ia mekakae hangko i laluna ntepuꞌu bona tiꞌara keudá, hai tiꞌara mpuꞌu keudá tálu parena ini wulána kamaruena.

¹⁸Roo onoꞌ, ia mekakae wopiꞌi bona keudá, hai keudá mpuꞌu, hai tampoꞌ mampopowuaꞌ huleꞌ upu-upu tudaꞌ-tudaꞌ.[20]

¹⁹Halalu-halalu! Ane arai i oloꞌmi hadua tauna to mehupeꞌ hangko i paturoꞌ to toꞌu, hai ara woꞌo hadua to moteteꞌ bona mesuleꞌ i Pueꞌ,

²⁰hangaa-ngaa naisá, heáná to moánti huleꞌ tauna to madósá iti hangko i bábehiána to salaꞌ, ia motulungi tauna iti bona tekábáhá hangko i kapate,[21] hai dósána to handaꞌ teámpungi. Hangko i kódóꞌ, IAKOBU