Read Besoa 1 Peturuꞌ 2 Bible Online

1 Peturuꞌ 2 - Besoa bible

1 Peturuꞌ 2

¹Mewaliꞌ halalu-halalu, {ánti kamolámbiꞌmi miꞌi katueꞌ to woꞌu}, onoꞌ miꞌi haneꞌi hangaa-ngaa nikábáhá upu-upu bábehiámi to kadake hai upu-upu laluita to mepakanawoꞌ. Ineeꞌkou mampe to maroꞌa, ineeꞌkou mahiniꞌ, ineeꞌkou mombepakadake.[16]

²Hangaa-ngaa nipoinao oaꞌ mampeliꞌ uwai ngkatueꞌ hangko i ngkóráꞌna Pueꞌ Ala, bona maróhó pepoináláimi, nodokou ánáꞌlei to mampoinao oaꞌ mehuhu i inána.

³Hangaa-ngaa nibábehi noꞌonoꞌ, láwiꞌ nihádiá miꞌi kamaroꞌana Pueꞌ Ala i lalu katueꞌmi.

⁴Pueꞌ Iesu peisá rapándiriꞌ nodo hambuaꞌ watu to tueꞌ. Watu iti ratibe tauna, láwiꞌ rauliꞌ tiꞌara mobunduꞌ. Agáiáná i peitána Pueꞌ Ala, watu iti riꞌi to mobunduꞌ ntepuꞌu, hai Pueꞌ Ala mopileꞌi watu iti mewaliꞌ watu pehodaꞌá támbi.[17] Hai kómu to mepoinálái i Pueꞌ Iesu, maimokou i Hia.

⁵Nipakaróhó pepoináláimi bona Napopewaliꞌkou nodo watu to tueꞌ to rapakeꞌ moaró támbi penómbáꞌá i Pueꞌ Ala. Napopewaliꞌkou tadulako menómbá to magasaꞌ, bona mohuhuꞌkou popenómbá i Pueꞌ Ala, ia miꞌi katueꞌmi haduduámi.[18] Hai ánti kanatangaꞌ-tangaꞌintaꞌ Iesu Kerisitu, popenómbámi iti bateꞌna mopagóeꞌ Pueꞌ Ala.

⁶I lalu Sura Magasaꞌ, Datu Topehómpóꞌ rapándiriꞌ nodo hambuaꞌ watu pehodaꞌá támbi. Nauliꞌ Pueꞌ Ala: “Peita! Kupileꞌi miꞌi hambuaꞌ watu to mobunduꞌ ntepuꞌu, Kuwoli i Buluꞌ Sio,[19] Kupopewaliꞌ watu pehodaꞌá támbi. Heáná peá to mepoinálái i Hia tiꞌara ina nahohoꞌ inaona.” [20]

⁷I kómu to mepoinálái, watu iti mahile ntepuꞌu pobunduꞌána. Agáiáná i tauna to tiꞌara mepoinálái: “Watu to ratibe topoaró támbi, mole watu onoꞌ riꞌi to mewaliꞌ pehodaꞌá támbi.” [21] Hai: “Watu iti mewaliꞌ woꞌo watu katehubeáraꞌ láwiꞌ mopakanawoꞌheꞌ.” [22]

⁸Tehubeheꞌ, láwiꞌ tiꞌaraheꞌ mepoinálái i ngkóráꞌna Pueꞌ Ala,[23] hai katiꞌárána ara pepoináláiraꞌ iti napakanótó miꞌi Pueꞌ Ala.[24]

⁹Agáiáná kómu halalu-halalu, napileꞌimokou Pueꞌ Ala mewaliꞌ taunáNa, bona peisákou mampopolumao bágóꞌna tadulako menómbá motangaꞌ-tangaꞌi tauna hai Pueꞌ Ala Datuntaꞌ.[25] Napataniꞌmokou mewaliꞌ taunáNa to magasaꞌ.[26] Napileꞌikou hai Nakióꞌkou hangko i kakáindiána mesuaꞌ i lalu kamabaaꞌáNa to meawaꞌ ntepuꞌu. Upu-upuna iti Nabábehi bona nipahaweꞌ i upu-upu tauna bábehiáNa to maroꞌa.[27]

¹⁰Hangkoia, tiꞌarakou taunáNa,[28] agáiáná deꞌe-deꞌe mewaliꞌmokou taunáNa.[29] Hangkoia, tiꞌarakou moisá ahiꞌna Pueꞌ Ala, agáiáná deꞌe-deꞌe niꞌisá miꞌi kamahilena ahiꞌNa i kómu.[30]

¹¹Halalu-halalu to kupokaꞌahiꞌ! Kitaꞌ i duniáꞌ deꞌe, nodo pekeꞌ tohaweꞌ ba topolilo. Onoꞌ miꞌi haneꞌi kuweꞌikou laluita: ineeꞌkou mouláꞌ peundeꞌána lalumi to kadake, láwiꞌ peundeꞌána lalumi to kadake iti moewaꞌ peundeꞌámi mengkoruꞌ i Pueꞌ Ala.

¹²Toroꞌkou i oloꞌraꞌ tauna to tiꞌara moisá Pueꞌ Ala, onoꞌ miꞌi haneꞌi hangaa-ngaa nipakaroꞌa-roꞌa bábehiámi, bona ane rápáꞌna hira mopakóiꞌ ba mosalaꞌikou nodo tauna to tiꞌara maroꞌa, marue-rue ina tongawaꞌ i hira kamaroꞌana bábehiámi, álána ina motóiáheꞌ Pueꞌ Ala i alo kahaweꞌáNa.

¹³Hangaa-ngaa mengkoruꞌkou i upu-upu tauna to mepárentá, láwiꞌ onoꞌ miꞌi peundeꞌána Pueꞌ Ala. Mengkoruꞌkou i datu, láwiꞌ ia miꞌi to i reá ntepuꞌu.

¹⁴Mengkoruꞌkou i topebutusi, láwiꞌ ia miꞌi to nahuoꞌ datu mohuku tauna to kadake bábehiáraꞌ hai motóiá tauna to maroꞌa bábehiáraꞌ.

¹⁵Hangaa-ngaa mengkoruꞌkou i hira, láwiꞌ iti miꞌi peundeꞌána Pueꞌ Ala, bona kamaroꞌana bábehiámi iti ina mopakaniiꞌheꞌ tauna to tiꞌara moisá apa-apa to pakakou mosalaꞌi.

¹⁶Hangaa-ngaa tueꞌkou nodo tauna to tekábáhá hangko i huku dósá {ánti pohintuwuꞌmi hai Kerisitu}, agáiáná ineeꞌ nipopobunduꞌ katekábáhámi iti mewaliꞌ rárámi mobábehi dósá. Ngkáliꞌna riꞌi, hangaa-ngaa mampeuláꞌikou oaꞌ peundeꞌána Pueꞌ Ala, láwiꞌ kómu iti huoꞌáNa mpuꞌukou.

¹⁷Hangaa-ngaa niádáiheꞌ upu-upu tauna, nipokaꞌahiꞌ halalu hampepepoináláimi, nipengkoruꞌi Pueꞌ Ala, hai nibiláꞌ to mopárentákou.[31]

¹⁸Mewaliꞌ kómu to medurei i támbi, hangaa-ngaa nipengkoruꞌi hai nibiláꞌ tuámi. Ane maroꞌa tuámi hai maꞌálusuꞌ pambiárána, bateꞌna nipengkoruꞌi, hai kehapiꞌ masodo, hangaa-ngaa nipengkoruꞌi woꞌo.

¹⁹Ane rápáꞌna rapopeahiahiꞌkou tuámi, kehapiꞌ tiꞌara ara salaꞌmi, hangaa-ngaa mantódihákou kapári iti láwiꞌ niꞌisá iti peundeꞌána Pueꞌ Ala bona mengkoruꞌkou. Ane nibábehi noꞌonoꞌ, bateꞌna napokagóeꞌkou Pueꞌ Ala.

²⁰Ba ina molámbiꞌkou petóiá hangko i Pueꞌ Ala ane sabaraꞌkou mantódihá pehuku to nilámbiꞌ ánti kamasalaꞌmi? Tiꞌara. Agáiáná ane molámbiꞌkou pepopeahiahiꞌ ánti bábehiámi to maroꞌa hai mantódihákou kapári iti, bateꞌna napokagóeꞌkou Pueꞌ Ala,

²¹láwiꞌ Ia to mopileꞌimokou bona mobábehikou oaꞌ apa to maroꞌa, kehapiꞌkou rapopeahiahiꞌ. Hai Kerisitu mewaliꞌ pándiriꞌ i kómu bona nipeuláꞌi pambiáráNa, láwiꞌ Ia haduduáNa mantódihá kapári ánti dósámi.

²²Ia tiꞌara haweꞌ hangkani mobábehi dósá ba modongkoꞌ.[32]

²³Kehapiꞌ rasasalaꞌi, tiꞌara meháwá. Kehapiꞌ rapopeahiahiꞌ, tiꞌara meꞌewaꞌ.[33] Ia mopaisarenga peá katueꞌNa i Pueꞌ Ala láwiꞌ Pueꞌ Ala peá to hintotoꞌ ntepuꞌu pebutusiNa.

²⁴Iesu haduduáNa mokili huku dósántaꞌ[34] moliu karapapateNa i kau mombehape,[35] bona tekábáhákeꞌ hangko i kuasaꞌ dósá, hai tueꞌkeꞌ hintotoꞌ hai peundeꞌána Pueꞌ Ala. WaheꞌNa to mabubu to moánti katehómpóꞌ i kitaꞌ.[36]

²⁵Hangkoia nodokou dimbá to matántá,[37] agáiáná deꞌe-deꞌe, mesuleꞌmokou i Topoewu to mokádipurá katueꞌmi hai pepoináláimi.