Read Besoa 1 Peturuꞌ 3 Bible Online

1 Peturuꞌ 3 - Besoa bible

1 Peturuꞌ 3

¹Noꞌonoꞌ woꞌo kómu towawine, hangaa-ngaa mengkoruꞌkou i toámámi, bona ane araheꞌ toámámi to tiꞌara mampoinálái Ngkóráꞌ Marasa, bábehiámi iti ina mobáliki laluraꞌ duuꞌraꞌ mepoinálái, kehapiꞌ tiꞌarantoheꞌ nihángáꞌá apa-apa,

²láwiꞌ ane raitai pengkoruꞌmi hai bábehiámi to maroꞌa ntepuꞌu, iti to ina moántiheꞌ mepoinálái i Pueꞌ.

³Ineeꞌkou mampeliꞌ kamalásáꞌmi to i rawana peá, nodo mobubungaꞌi weluáꞌmi ba mopamababe wátámi hai buláwá ba waruꞌ to masuliꞌ hólóna.

⁴Ngkáliꞌna riꞌi, kamalásáꞌmi iti hangaa-ngaa mesupaꞌ hangko i lalumi, ia miꞌi, hangaa-ngaa maꞌálusuꞌ pambiárámi hai tinda lalumi, láwiꞌ iti miꞌi kamalásáꞌ to tiꞌara ara katebálikiána, hai mopagóeꞌ ntepuꞌu Pueꞌ Ala.

⁵Noꞌonoꞌ woꞌo pambiáráraꞌ towawine to hangkoia to mengkoruꞌ hai mehárungáheꞌ i Pueꞌ Ala. Mengkoruꞌheꞌ woꞌo i toámáraꞌ.

⁶Sáráꞌ mewaliꞌ pándiriꞌ i kitaꞌ. Ia mampeuláꞌi hawaꞌna Burahima toámána, hai Burahima iti nakióꞌ Sáráꞌ “tuá”.[38] Hai kómu halalu-halalu, peisákou rauliꞌ pemuleꞌána Sáráꞌ, asalaꞌ mampeuláꞌikou woꞌo bábehiána to maroꞌa hai tiꞌarakou malááꞌ i apa peá to ina morampekou.

⁷Noꞌonoꞌ woꞌo kómu tobaleilo. Hangaa-ngaa maroꞌakou i toinámi, niádái hai nikádipurá. Hangaa-ngaa niꞌisá mampekiri apa kaparaluuána toinámi, láwiꞌ kamaróhóraꞌ tiꞌara nodo kamaróhómi. Agáiáná kehapiꞌ noꞌonoꞌ, i peitána Pueꞌ Ala, toinámi bateꞌna hibali hai kómu, láwiꞌ hangko i kabulána laluNa, Pueꞌ Ala mampoweꞌiheꞌ woꞌo katueꞌ to tiꞌara mokahópóꞌá hibali hai kómu. Onoꞌ miꞌi haneꞌi hintotoꞌkou mobiláꞌ toinámi, láwiꞌ ane tiꞌaraheꞌ nibiláꞌ, pekakaemi tiꞌara ina napehádingi Pueꞌ Ala.

⁸Mewaliꞌ kómu upu-upu {to mepoinálái i Kerisitu}, hangaa-ngaa hampepekirikou, maꞌahiꞌ lalumi hai mombepokaꞌahiꞌkou nodo topohalalu. Hangaa-ngaa maꞌálusuꞌ lalumi, hai mengkaiwóiꞌkou.

⁹Ane araheꞌ tauna to mobábehi to kadake i kómu, ineeꞌheꞌ woꞌo niháwángi hai to kadake. Ane rasasalaꞌikou, ineeꞌheꞌ woꞌo huleꞌ nisasalaꞌi. Ngkáliꞌna riꞌi, nipembiáꞌ bona Pueꞌ Ala mowátiꞌheꞌ, láwiꞌ Ia mopileꞌimokou mewaliꞌ taunáNa bona molámbiꞌkou pewátiꞌ hangko i Hia.

¹⁰I lalu Sura Magasaꞌ teukiꞌ node: “Heáná to moundeꞌ maroꞌa katueꞌna bona góeꞌ oaꞌ, ia hangaa-ngaa mokámpái polaluitana, bona tiꞌara mohuwárá laluita to kadake hai mepakanawoꞌ.

¹¹Ia hangaa-ngaa mokábáhá bábehiána to kadake hai mobábehi apa to maroꞌa. Ia hangaa-ngaa mopári-pári mohintuwuꞌ hai hángká rángána,

¹²láwiꞌ Pueꞌ mokámpáiheꞌ upu-upu tauna to mampeuláꞌi peundeꞌáNa, hai Ia mampehádingi oaꞌ pekakaeraꞌ. Agáiáná upu-upu tauna to kadake bábehiáraꞌ bateꞌna ina naewaꞌ Pueꞌ Ala.” [39]

¹³Heáná paꞌi to ina mobábehi to kadake i kómu ane nibábehi oaꞌ apa to maroꞌa?[40]

¹⁴Kehapiꞌkou molámbiꞌ kapári ánti bábehiámi to maroꞌa, morasiꞌkou! Mewaliꞌ, ane ara tauna to mampopalááꞌkou, ineeꞌkou malááꞌ, hai ineeꞌ karaoꞌ inaomi.[41]

¹⁵Ngkáliꞌna riꞌi, nipaisarenga katueꞌmi i Kerisitu, hai nipangákuꞌ i lalumi kaꞌIana peá Pueꞌmi. Hangaa-ngaa timamakou oaꞌ mohániki pekuneꞌraꞌ tauna kana i pehárungámi i Pueꞌ Ala. Hai ane nihánikiheꞌ, hangaa-ngaa maꞌálusuꞌ polaluitami hai niꞌisá ádá.

¹⁶Hangaa-ngaa bulá lalumi, bona ane araheꞌ tauna to ina mosalaꞌi bábehiámi to maroꞌa ánti pepoináláimi i Kerisitu, ina mahiliheꞌ.

¹⁷Rángintaꞌ miꞌi molámbiꞌ kapári ánti bábehiántaꞌ to maroꞌa ane iti miꞌi peundeꞌána Pueꞌ Ala, haneꞌi molámbiꞌkeꞌ kapári ánti bábehiántaꞌ to kadake.

¹⁸Hintotoꞌkeꞌ molámbiꞌ kapári, láwiꞌ ara woꞌo Hadua to molámbiꞌ kapári, ia miꞌi Kerisitu. Ia hangkani peá mampehuhuꞌá wátáNa rapapate bona mohómpóki dósá. Ia to tiꞌara ara salaꞌNa, rapapate mosulewátáikeꞌ to masalaꞌ, bona Ia mopahintuwuꞌkeꞌ hai Pueꞌ Ala. Ia rapapate, agáiáná rapatueꞌ huleꞌ ánti kuasaꞌna Inao to Magasaꞌ.

¹⁹Hai ánti kuasaꞌna Inao to Magasaꞌ, Ia lao miꞌi mopahaweꞌ bámbári hangko i Pueꞌ Ala i tánuánáꞌraꞌ tomate[42] to ratarungku i katoroꞌá tomate.

²⁰Hira iti ratarungku ánti pesápuákaraꞌ i Pueꞌ Ala hangkoia i tempóna mani tueꞌ Noho. Tongawaꞌ miꞌi kasabaraꞌna Pueꞌ Ala, láwiꞌ Ia mampegiá katebálikina laluraꞌ tangaꞌna Noho mobábehi duanga to mahile.[43] Agáiáná kahópóꞌána, Pueꞌ Ala molábóꞌ duniáꞌ hai uwai. Uwalu peheꞌ tauna to mesuaꞌ i lalu duanga to mahile to napelae Pueꞌ Ala hangko i kapate.

²¹Uwai to molábóꞌ duniáꞌ peisá rapopándiriꞌ uwai periu toSarani deꞌe-deꞌe, láwiꞌ uwai periu iti mopatongawaꞌ Pueꞌ Ala mohómpókimokeꞌ hangko i huku dósántaꞌ. Ane tabábehi ádá periu iti, tiꞌara pekeꞌ mobahoꞌi wátántaꞌ, agáiáná ara tunggáiántaꞌ to melumbuꞌ hangko i hinti. Lempóna, ádá periu iti tarekeꞌ pembiáꞌtaꞌ i Pueꞌ Ala, bona Nabahoꞌi laluntaꞌ hangko i dósá,[44] hai ánti katueꞌna huleꞌ Iesu Kerisitu, Naꞌámpungi ntepuꞌumokeꞌ hangko i dósántaꞌ.

²²Karoona Iesu rapatueꞌ huleꞌ, Ia mengkaoreꞌ lao i surugáꞌ, haneꞌi mehoda tándáꞌ i kuánána Pueꞌ Ala. Upu-upu malaꞌeka hai to makuasaꞌ hai to mepárentá, rapopengkoruꞌheꞌ i Iesu.