Read Besoa 1 Peturuꞌ 4 Bible Online

1 Peturuꞌ 4 - Besoa bible

1 Peturuꞌ 4

¹TangaꞌNa mani tueꞌ i duniáꞌ deꞌe, Kerisitu molámbiꞌ miꞌi kapári, onoꞌ miꞌi haneꞌi hangaa-ngaa nipakaróhó woꞌo lalumi bona timamakou mantódihá kapári nodo Ia, láwiꞌ heáná to mantódihá kapári i lalu katueꞌna, tiꞌara piꞌi ina nakuasaꞌi dósá.[45]

²Mewaliꞌ, i tempómi mani tueꞌ i duniáꞌ deꞌe, ineeꞌ nipeuláꞌi peundeꞌána lalumi haduduámi. Hangaa-ngaa mampeuláꞌikou peundeꞌána Pueꞌ Ala,

³láwiꞌ gáná miꞌi tempómi tueꞌ nodo tauna to tiꞌara moisá Pueꞌ. I tempó iti, rárá katueꞌmi tiꞌara maroꞌa, láwiꞌ mampeuláꞌi pekou peundeꞌána lalumi to kadake, peundeꞌána lalumi tiꞌara mau upu, mainukou duuꞌmi malangu-langu, mosusakou oaꞌ, masilakakou, hai menómbákou i ánitu to tiꞌara hintotoꞌ rapenómbái.

⁴Agáiáná deꞌe-deꞌe, tingkáráꞌmoheꞌ tauna to niporángá tempómi tiꞌara mani moisá Pueꞌ Ala, láwiꞌ tiꞌarapokou mampeuláꞌi bábehiáraꞌ to kadake. Onoꞌ miꞌi haneꞌi rasasalaꞌikou.

⁵Agáiáná hangkani tempó rángámi iti hangaa-ngaa meángkáꞌheꞌ i lindoꞌna Pueꞌ Ala mopangákuꞌ bábehiáraꞌ to kadake, láwiꞌ Pueꞌ Ala ina mohoda-hoda kara-kara upu-upu tauna, maroꞌa to tueꞌ mani, maroꞌa to mate miꞌi.

⁶Tauna to mohádi miꞌi Ngkóráꞌ Marasa haneꞌiheꞌ mepoinálái, kehapiꞌ matemoheꞌ ánti pehukuna Pueꞌ Ala i upu-upu tauna,[46] ina molámbiꞌheꞌ katueꞌ to maroꞌa to tiꞌara mokahópóꞌá láwiꞌ iti miꞌi peundeꞌána Pueꞌ Ala.

⁷Halalu-halalu, kahópóꞌána duniáꞌ deꞌe hungkuꞌ miꞌi, hai upu-upu óntóꞌna ina matántá. Onoꞌ miꞌi haneꞌi hangaa-ngaa manótó pekirimi hai nipakaróhó lalumi, bona peisákou mekakae.

⁸To melumbuꞌ hangko i upu-upuna iti, hangaa-ngaa mombepokaꞌahiꞌkou hadua hai hadua hangko i lalumi ntepuꞌu, láwiꞌ ane nibábehi noꞌonoꞌ, ina nibuku woꞌo moámpungi dósáraꞌ hángká rángámi.[47]

⁹Hangaa-ngaa góeꞌ lalumi ane ara torare to haweꞌ i támbimi, hai ineeꞌkou mohume-hume.

¹⁰Kitaꞌ upu-upu molámbiꞌmokeꞌ kapánde to montaniꞌ-ntaniꞌ mouláꞌ apa to naweꞌikeꞌ Pueꞌ Ala hangko i kabulána laluNa. Mewaliꞌ hangaa-ngaa tapakeꞌ kapánde iti motulungi tauna ntániꞌna, hai mampopolumao maroꞌa bágóꞌ to naweꞌikeꞌ Pueꞌ Ala iti.

¹¹Heáná to mopahaweꞌ ngkóráꞌna Pueꞌ, hangaa-ngaa napahaweꞌ hintotoꞌ hai apa to natarima hangko i Pueꞌ Ala. Heáná to motulungi tauna ntániꞌna, hangaa-ngaa metulungi mouláꞌ kuasaꞌ to nalámbiꞌ hangko i Pueꞌ Ala. Hangaa-ngaa nibábehi noꞌonoꞌ, bona Pueꞌ Ala rapomahile moliu Iesu Kerisitu, láwiꞌ Ia to makuasaꞌ hai to hintotoꞌ rapomahile duuꞌna i rue-ruena! Ami.

¹²Halalu-halalu to kupokaꞌahiꞌ! Ineeꞌ nipotingkáráꞌ ane arai kapári to morampekou, láwiꞌ biásá talámbiꞌ kapári i lalu katueꞌtaꞌ. Kapári iti peisá rapándiriꞌ nodo api, láwiꞌ napakeꞌ Pueꞌ Ala mampehukáꞌ kamaróhóna pepoináláimi.[48]

¹³Ngkáliꞌna riꞌi hangaa-ngaa nipokagóeꞌ, láwiꞌ molámbiꞌmokou kapári nodo to morampe Kerisitu. Onoꞌ miꞌi haneꞌi, ane haweꞌ miꞌi tempóna Kerisitu mopatongawaꞌ peawaꞌNa i upu-upu tauna, ina góeꞌ ntepuꞌukou.

¹⁴Halalu-halalu, morasiꞌkou ane rasasalaꞌikou ánti peuláꞌmi i Kerisitu, láwiꞌ Inao to Magasaꞌ to meawaꞌ to hangko i Pueꞌ Ala ara oaꞌ i lalumi.

¹⁵Agáiáná ineeꞌ ara hadua hangko i oloꞌmi to molámbiꞌ kapári láwiꞌ mepapate ba manako ba mobábehi to kadake, ba mampesuaꞌi oaꞌ urusiána hángká rángána.

¹⁶Mewaliꞌ ane rapopeahiahiꞌkou ánti katoSaranimi, ineeꞌ nipokahili, ngkáliꞌna riꞌi hangaa-ngaa niuliꞌ handaꞌ kamaroꞌana i Pueꞌ Ala ánti kakómuna topeuláꞌna Kerisitu.

¹⁷Haweꞌ miꞌi tempóna Pueꞌ Ala ina mohoda-hoda kara-kara upu-upu tauna,[49] hai to ina Nahoda-hoda ioru ia miꞌi kárá-kárántaꞌ kitaꞌ taunáNa. Mewaliꞌ ane kárá-kárántaꞌ to ioru to Nahoda-hoda, noumbá pehukuNa i tauna to tiꞌaraheꞌ mampoinálái Ngkóráꞌ Marasa to hangko i Hia?

¹⁸I lalu Sura Magasaꞌ teukiꞌ node: “Mogalo riꞌi tauna to manótó bábehiáraꞌ, maꞌángkárá kamolámbiꞌraꞌ katehómpóꞌ, apa mani tauna to kadake to tiꞌara mengkoruꞌ i Pueꞌ Ala!”[50]

¹⁹Mewaliꞌ, ane arakou to molámbiꞌ kapári ánti peundeꞌána Pueꞌ Ala, nipaisarenga katueꞌmi i Pueꞌ Ala to mampopewaliꞌ duniáꞌ hai upu-upu to ara, láwiꞌ Ia tetidaꞌ hai ina mobukeki upu-upu dándiNa i kómu, hai hangaa-ngaa nibábehi oaꞌ apa to maroꞌa.