Read Besoa 1 Peturuꞌ 5 Bible Online

1 Peturuꞌ 5 - Besoa bible

1 Peturuꞌ 5

¹Ara woꞌo pembiáꞌkuꞌ i kómu to mewaliꞌ pinátuá i jemaꞌa-jemaꞌa. Kuꞌukiꞌákou deꞌe láwiꞌ kódóꞌ woꞌo hadua pinátuá, hai kuita mata kapári to morampe Kerisitu hangkoia. Ane haweꞌ Kerisitu i lalu peawaꞌNa, peawaꞌNa iti ina rapatongawaꞌ i upu-upu tauna, hai ina molámbiꞌaꞌ woꞌo gáláꞌkuꞌ i lalu peawaꞌNa iti.

²Kupembiáꞌ bona nikádipuráheꞌ maroꞌa taunána Pueꞌ Ala to ara i jemaꞌami, láwiꞌ hira iti nodoheꞌ dimbá to napoináláiákou Pueꞌ Ala bona niewuheꞌ. Nikádipuráheꞌ hangko i lalumi ntepuꞌu, láwiꞌ iti peundeꞌána Pueꞌ Ala; ineeꞌ nipobágóꞌ iti nodokou to rapasimbukuá. Nitulungiheꞌ hangko i kabulána lalumi. Ineeꞌ pekou mampeliꞌ porasiꞌámi haduduámi.

³Ineeꞌheꞌ nipohawaꞌá tauna to rapoináláiákou nodo topopárentá mampohawaꞌá taunána. Ngkáliꞌna riꞌi hangaa-ngaa mewaliꞌkou pándiriꞌ i hira,

⁴álána ane haweꞌ huleꞌ Tadulako Topoewu, ina Naweꞌikou háwángina pobágóꞌmi, ia miꞌi tatali to meawaꞌ haweꞌ i rue-ruena.[51]

⁵Noꞌonoꞌ woꞌo kómu to maleheꞌ mani, hangaa-ngaa mengkoruꞌkou i totosae. Hai kómu upu-upu to mepoinálái, hangaa-ngaa niꞌisá mengkaiwóiꞌ hai mombetulungi, láwiꞌ: “Pueꞌ Ala moewaꞌ tauna to mampepemahile, agáiáná Ia motulungi tauna to mengkaiwóiꞌ.” [52]

⁶Onoꞌ miꞌi haneꞌi halalu-halalu, hangaa-ngaa mengkaiwóiꞌkou, hai mengkoruꞌkou i Pueꞌ Ala to makuasaꞌ, bona ane haweꞌ miꞌi tempóna, ina Napaireá katueꞌmi.

⁷Nipaisarenga upu-upu kamapárina katueꞌmi i Hia, láwiꞌ Ia to mokádipurákou.

⁸Hangaa-ngaa nipakanótó pekirimi hai maingáꞌ-ingáꞌkou, láwiꞌ ewálimi Datu Tokadake molulumao oaꞌ. Ia nodo hambaꞌa singá to marimi, timama miꞌi ina moharaꞌ ewálina.

⁹Hangaa-ngaa niewaꞌ ntepuꞌu moliu pepoináláimi to maróhó. Hai niꞌisá i humalele duniáꞌ, halalu hampepepoináláimi molámbiꞌheꞌ woꞌo kapári nodo to nilámbiꞌ.

¹⁰Hai ane maliu miꞌi kapári to hampaiꞌ peá iti, Pueꞌ Ala ina mopagánái apa to makuraꞌ mani i lalu katueꞌmi. Lempóna, Ia ina mopakaróhó woꞌo pepoináláimi, mopakanótó katueꞌmi hai mopatetidaꞌ lalumi. Láwiꞌ Pueꞌ Ala Ia miꞌi pentóáꞌána upu-upu ahiꞌ. Ia to mopileꞌikou mewaliꞌ ánáꞌNa, bona ánti pohintuwuꞌmi hai Kerisitu Iesu, ina molámbiꞌkou gáláꞌmi i lalu peawaꞌNa to tiꞌara mokahópóꞌá.[53]

¹¹Tatóiá miꞌi Pueꞌ Ala láwiꞌ Ia to makuasaꞌ i upu-upuna duuꞌna i rue-ruena. Ami!

¹²Surangkuꞌ to rembe deꞌe kuꞌukiꞌ, hai Silasi[54] modureiaꞌ moukiꞌ. Ia woꞌo halalu hampepepoináláintaꞌ to peisá rapoinálái. I lalu surangkuꞌ deꞌe, kupahaweꞌámokou i katoꞌu-toꞌuána noumbá kamahilena ahiꞌna Pueꞌ Ala i kitaꞌ. Kuꞌukiꞌ noꞌonoꞌ bona maróhó lalumi. Hangaa-ngaa tetidaꞌkou oaꞌ i lalu kamaꞌahiꞌNa iti.

¹³Tabeá hangko i halalu hampepepoináláimi to ara ieneꞌ i kótá Bábeli {to peisá woꞌo rauliꞌ kótá Roma}.[55] Hira napileꞌiheꞌ Pueꞌ Ala, hibali hai kómu. Marakusi to kupoánáꞌ[56] mopakatu woꞌo tabeána haweꞌ i kómu.

¹⁴Kupembiáꞌ bona mombetabe-tabekou hadua hai hadua tandaꞌ kamaꞌahiꞌmi i halalu hampepepoináláimi. Kupembiáꞌ woꞌo i Pueꞌ Ala bona Naweꞌikou roꞌa ngkatueꞌ ánti pohintuwuꞌmi hai Kerisitu. Hangko i kódóꞌ, PETURUꞌ