Read Besoa 2 Peturuꞌ 1 Bible Online

2 Peturuꞌ 1 - Besoa bible

2 Peturuꞌ 1

¹Molámbiꞌ toSarani i kaꞌaraꞌámi Sura deꞌe hangko i kódóꞌ Simoꞌ Peturuꞌ huoꞌána hai surona Iesu Kerisitu. Kupakatu sura deꞌe i kómu halalu-halalu to mepoinálái i Iesu Kerisitu. Iesu Kerisitu Ia miꞌi Pueꞌ Ala to mohómpókikeꞌ hangko i huku dósántaꞌ. Ánti bábehiáNa to manótó iti, Napopewaliꞌmokou taunáNa to mepoinálái i Hia, hibali hai kaiꞌ suroNa.

²Tabeá! Kupembiáꞌ i Pueꞌ Ala bona tetámbái pewátiꞌ hai roꞌa ngkatueꞌ to Naweꞌikou, ánti kaniꞌisána miꞌi Pueꞌ Ala hai Iesu Pueꞌtaꞌ.

³Moliu kuasaꞌNa, Pueꞌ Ala mampoweꞌimokeꞌ upu-upu to taparaluu bona molámbiꞌkeꞌ katueꞌ to woꞌu hai maróhó peuláꞌtaꞌ i Hia.[1] Naweꞌimokeꞌ upu-upu iti láwiꞌ moisá ntepuꞌumokeꞌ Pueꞌ Ala, hai Ia to mokióꞌkeꞌ mewaliꞌ ánáꞌNa ánti peawaꞌNa hai kamaroꞌana laluNa.

⁴Moliu peawaꞌNa hai kamaroꞌana laluNa iti, Napaꞌara dándi, hai mahile ntepuꞌu bunduꞌna i kitaꞌ. TunggáiáNa mopaꞌara dándi iti i kómu, bona pambiárámi peisá mewaliꞌ hibali hai pambiárána Pueꞌ Ala,[2] hai bona tekábáhákou hangko i peundeꞌána lalumi to kadake to mopamarugiꞌ peá laluraꞌ tauna i duniáꞌ deꞌe.

⁵Halalu-halalu, iti miꞌi kamaroꞌana Pueꞌ Ala i kómu. Onoꞌ miꞌi haneꞌi, i rawa hangko i pepoináláimi, hangaa-ngaa nibábehi oaꞌ apa to maroꞌa. Liu hangko ionoꞌ, hangaa-ngaa manótó pekirimi.

⁶Melingkaꞌ hangko ionoꞌ, hangaa-ngaa niꞌisá momeeꞌ peundeꞌána lalumi. Hangaa-ngaa mantahakou i lalu kapári. Hangaa-ngaa mengkoruꞌkou i Pueꞌ Ala.

⁷Hangaa-ngaa mampokaꞌahiꞌkou halalu hampepepoináláimi. Hai hangaa-ngaa maꞌahiꞌkou i upu-upu tauna.

⁸Ane noꞌonoꞌ pambiárámi hai nitámbái oaꞌ kamaroꞌana pambiárámi, ina mobunduꞌ ntepuꞌu katueꞌmi, láwiꞌ ina niꞌisá mpiiꞌ Pueꞌtaꞌ Iesu Kerisitu.

⁹Agáiáná tauna to tiꞌara noꞌonoꞌ, nodo tobilo ba to tiꞌara karaoꞌ pampekirina, láwiꞌ nakáláliꞌá kateámpungina miꞌi dósána.

¹⁰Mewaliꞌ halalu-halalu, láwiꞌ napileꞌimokou Pueꞌ Ala hai Nakióꞌmokou mewaliꞌ taunáNa, onoꞌ miꞌi haneꞌi hangaa-ngaa nipári-pári ntepuꞌu mouláꞌ Pueꞌ Ala, bona tongawaꞌ kaNapileꞌimi hai kaNakióꞌmi. Láwiꞌ ane nitámbái pepoináláimi hai bábehiá to kuꞌuliꞌ ininá, bateꞌna tiꞌarakou ina mosuliꞌ hangko i pepoináláimi,

¹¹hai i alo to ina haweꞌ, Pueꞌ Ala ina motarimakou i lalu popárentána Iesu Kerisitu Pueꞌtaꞌ Topohómpóꞌ Salaꞌ. Hai popárentáNa iti tiꞌara ina mokahópóꞌá.

¹²Mewaliꞌ halalu-halalu, kehapiꞌ niꞌisá miꞌi katoꞌuna upu-upuna iti, hai maróhó pampeuláꞌimi paturoꞌ iti, kupoinao oaꞌ bona nibuhinao.

¹³Láwiꞌ kuisá miꞌi tiꞌara piꞌi marue ina mateaꞌ hintotoꞌ hai apa to napahaweꞌámoꞌ Iesu Kerisitu Pueꞌtaꞌ.[3] Mewaliꞌ, tangaꞌkuꞌ mani tueꞌ, hangaa-ngaa kupahaweꞌákou bona nibuhinao upu-upu iti.

¹⁵Onoꞌ miꞌi haneꞌi kupári-pári mopaturoꞌkou, bona ane kupálehimokou, ina nibuhinao oaꞌ upu-upu paturoꞌkuꞌ.[4]

¹⁶Kódóꞌ hai surona Iesu to ntániꞌna, mopaturoꞌmokou kamaróhóna kuasaꞌna Pueꞌtaꞌ Iesu Kerisitu hai kaꞌina haweꞌNa huleꞌ i duniáꞌ. To kipaturoꞌákou iti, tiꞌara darita dongkoꞌ. Kiꞌisá apa to kipaturoꞌákou, láwiꞌ kiꞌita mata peawaꞌna Iesu.

¹⁷Hangkoia meuláꞌangkaiꞌ i Iesu lao i wongko buluꞌ tempóNa motarima pebiláꞌ hai peawaꞌ hangko i Pueꞌ Ala UmáNa to meawaꞌ ntepuꞌu. I tempó iti, nauliꞌ Pueꞌ Ala, “Deꞌe miꞌi ÁnáꞌKuꞌ to Kupokaꞌahiꞌ hai Kupokagóeꞌ.”[5]

¹⁸Kaiꞌ miꞌi to mohádi wambaꞌNa Pueꞌ Ala hangko i surugáꞌ i tempóngkiꞌ ara hingkakani hai Iesu i wongko buluꞌ to magasaꞌ iti.

¹⁹Mewaliꞌ, kipoinálái ntepuꞌu ngkóráꞌna Pueꞌ Ala to rapahaweꞌ nabiꞌ-nabiꞌ hangkoia mokana i Iesu. Laluitaraꞌ iti nodo huluꞌ to mewangkaꞌ i lalu kakáindiána, hai hangaa-ngaa nipailalu oaꞌ duuꞌna haweꞌ wopiꞌi Pueꞌ Iesu i karongkánina mai i duniáꞌ deꞌe. Kahaweꞌna huleꞌ Iesu iti peisá rapándiriꞌ nodo pesupaꞌna alo ba nodo betue tándáꞌ i mata alo[6] to mowangkaꞌi duniáꞌ. Tempó onoꞌ, Iesu ina mewangkaꞌ i lalumi {bona niꞌisá ntepuꞌu Pueꞌ Ala}.

²⁰Ara to hangaa-ngaa niꞌisá ntepuꞌu: tiꞌara ara hadua nabiꞌ to moukiꞌ laluitana Pueꞌ mouláꞌ pekirina haduduána,[7]

²¹láwiꞌ ngkóráꞌna Pueꞌ to rapahaweꞌ nabiꞌ-nabiꞌ hangkoia tiꞌara mouláꞌ peá peundeꞌána tauna, agáiáná nabiꞌ-nabiꞌ iti mohuwárá ngkóráꞌna Pueꞌ Ala ánti kuasaꞌna Inao to Magasaꞌ.