Read Besoa 2 Peturuꞌ 2 Bible Online

2 Peturuꞌ 2 - Besoa bible

2 Peturuꞌ 2

¹Hangkoia araheꞌ nabiꞌ-nabiꞌ to mepakanawoꞌ i oloꞌraꞌ taunána Pueꞌ Ala. Noꞌonoꞌ woꞌo deꞌe-deꞌe, ina araheꞌ woꞌo i oloꞌmi guru-guru to moánti paturoꞌ to salaꞌ. Taunaheꞌ iti ina mopahaweꞌ ngkóráꞌna Pueꞌ, agáiáná ina ratámbái ngkániiꞌ-niiꞌ paturoꞌ to tiꞌara toꞌu to mopakanawoꞌ tauna. Ina mosápuákaheꞌ Kerisitu Pueꞌtaꞌ to mohómpóki tauna hangko i huku dósáraꞌ. Ánti pesápuákaraꞌ iti, ina mopakanawoꞌheꞌ wátáraꞌ haduduáraꞌ. Tiꞌara piꞌi marue, ina molámbiꞌheꞌ pehuku.

²Agáiáná kehapiꞌ noꞌonoꞌ, bateꞌna handaꞌ tauna ina mouláꞌ rárá katueꞌraꞌ to kadake iti, rápáꞌna, ina motoina ba motoamaheꞌ deleꞌ. Ánti bábehiáraꞌ to salaꞌ iti, handaꞌ tauna to tiꞌara mepoinálái ina mosalaꞌi paturoꞌ to toꞌu to moántikeꞌ i Rárá to Manótó.

³Guru-guru to mepakanawoꞌ iti mampeliꞌheꞌ woꞌo porasiꞌáraꞌ, hai ina mopahaweꞌákou laluita to rabábehi peá haduduáraꞌ bona molámbiꞌheꞌ rasiꞌ hangko i kómu. Agáiáná ara pehuku to marue miꞌi napatimamaꞌáheꞌ Pueꞌ Ala, hai kaNahukuraꞌ iti bateꞌna ina mewaliꞌ.

⁴{Halalu-halalu, Pueꞌ Ala ina mohuku guru-guru to mepakanawoꞌ. Iti tongawaꞌ hangko i pohukuNa malaꞌeka, hangko i pohukuNa tauna to ara i tempóna Noho, hai hangko i pohukuNa Sodomo hai Gumora.} Mogaloraheꞌ malaꞌeka to madósá hangkoia,[8] tiꞌaraheꞌ nakábáhá Pueꞌ Ala hangko i karahukuraꞌ. Malaꞌeka iti bateꞌraꞌ Natibe i lalu naraka hai Nataha i lalu pingke to makáindi duuꞌna haweꞌ alo pobutusi.[9]

⁵Noꞌonoꞌ woꞌo tauna to kadake hangkoia, tiꞌaraheꞌ nakábáhá Pueꞌ Ala hangko i karahukuraꞌ, onoꞌ miꞌi haneꞌi duniáꞌ nalábóꞌá Pueꞌ Ala hai uwai, áláraꞌ mate humpu upu-upu. Bateꞌna peá nabiꞌ Noho hai pituheꞌ hantámbiána to napelae Pueꞌ Ala haneꞌi tiꞌaraheꞌ mate. Noho iti mampehukáꞌ mopakanótóáheꞌ tauna rárá mouláꞌ peundeꞌána Pueꞌ Ala, {agáiáná tiꞌara rapehádingi}.[10]

⁶Noꞌonoꞌ woꞌo hangkoia Pueꞌ Ala mohuku toSodomo hai toGumora láwiꞌ madósá ntepuꞌuheꞌ. Ia mohuku kótáraꞌ,[11] hai kaNahukuna kótá iti mewaliꞌ pepaingáꞌi i tauna to tiꞌaraheꞌ mengkoruꞌ i Hia.

⁷Agáiáná ara hadua tauna to rahangaꞌ Loꞌoti to napelae Pueꞌ Ala. Loꞌoti iti tauna to manótó. I tempóna Loꞌoti toroꞌ i kótá iti, mapári ntepuꞌu nahádi ánti kakadakena bábehiáraꞌ tauna to toroꞌ ionoꞌ.

⁸I tempó iti, napomasusa ntepuꞌu laluna, láwiꞌ ia tauna to manótó, agáiáná alo-alona naita hai nahádi bábehiáraꞌ to kadake.

⁹Mewaliꞌ, hangko i upu-upu pándiriꞌ to kupahaweꞌ iti, tongawaꞌ miꞌi kuasaꞌna Pueꞌ Ala mampelae tauna to mengkoruꞌ i Hia hangko i kapári to morampeheꞌ. Hai tongawaꞌ woꞌo kuasaꞌNa mohuku upu-upu tauna to tiꞌara mengkoruꞌ i Hia, hai Ia ina motahaheꞌ duuꞌna haweꞌ alo pobutusi,[12]

¹⁰pelumbuꞌna mani tauna to motunggái mouláꞌ peundeꞌána laluraꞌ haduduáraꞌ mobábehi bábehiá to metitidiꞌi, hai to mosasalaꞌiheꞌ kuasaꞌna Pueꞌ Ala to mopárentáheꞌ. Guru-guru to mepakanawoꞌ iti, pebáiꞌheꞌ mampepemahile, hai tiꞌaraheꞌ malááꞌ mopakóiꞌ apa to meawaꞌ i surugáꞌ.

¹¹Mogaloraheꞌ malaꞌeka to melumbuꞌ kamakuasaꞌraꞌ hangko i guru-guru iti, tiꞌaraheꞌ pebáiꞌ mopakóiꞌ ba mosalaꞌi apa to meawaꞌ iti i lindoꞌna Pueꞌ Ala.[13]

¹²Agáiáná guru-guru to mepakanawoꞌ iti, tiꞌara manótó pekiriraꞌ. Mosasalaꞌiheꞌ apa to tiꞌara raisá. Bábehiáraꞌ nodo peá binataꞌ to tiꞌara moisá mampekiri. Hira nodoheꞌ binataꞌ to maila to raꞌánáka bona rahakaꞌ hai rapapate peheꞌ. Ánti bábehiáraꞌ to kadake, kahópóꞌána ina nahukuheꞌ Pueꞌ Ala nodo karapapatena binataꞌ.

¹³Ina molámbiꞌheꞌ pehuku to hintotoꞌ hai bábehiáraꞌ. Bábehiáraꞌ tauna iti mepakahiliá ntepuꞌu. Mogalo riꞌi mabaa, tiꞌara peá káindi, góeꞌheꞌ mosusa-susa hai mainu to melángui. Ane mandeꞌheꞌ hingkakani hai kómu i posusaꞌámi, mopakadakeheꞌ hangaꞌmi láwiꞌ mouláꞌ peheꞌ peundeꞌána laluraꞌ to kadake.

¹⁴Mogalo riꞌi mátáraꞌ kadake láwiꞌ ane mangintaheꞌ towawine, raundeꞌ pemiꞌi mobábehi bábehiá to metitidiꞌi. Tiꞌara raporái mobábehi oaꞌ dósá, agáiáná ratámbái riꞌi. Ane ara tauna to maledeꞌ pepoináláiraꞌ, radiiꞌ ntepuꞌu laluraꞌ bona meuláꞌheꞌ i hira. Mampokaeluheꞌ oaꞌ párewána tauna ntániꞌna, láwiꞌ rapobiásá miꞌi mobábehi to kadake. Hárárámoheꞌ!

¹⁵Mehupeꞌmoheꞌ hangko i rárá to toꞌu, onoꞌ miꞌi haneꞌi kadake bábehiáraꞌ. Mouláꞌheꞌ rárá to naporárái Bilea ánáꞌna Beo hangkoia, láwiꞌ Bilea moundeꞌ peá molámbiꞌ dóiꞌ hangko i bábehiána to kadake.

¹⁶Bilea iti ia miꞌi hadua nabiꞌ, {agáiáná tempóna ina mobábehi salaꞌ mokambo toSáráeliꞌ}, Pueꞌ Ala moweꞌi kuasaꞌ i kalidena bona molaluita nodo tauna, haneꞌi mopaingáꞌi Bilea, álána tunggáiána to tiꞌara mesuaꞌ i akala iti tiꞌara mewaliꞌ.[14]

¹⁷Ane guru-guru to mepakanawoꞌ iti, napatimamaꞌámoheꞌ Pueꞌ Ala katoroꞌá to rumihi kamakáindina. Hira peisá rapándiriꞌ nodo tibubuꞌ to maꞌáti, ba nodo gawu to naꞌánti wui to rumihi, agáiáná tiꞌara mopaꞌara udá.

¹⁸Polaluitaraꞌ mampepemahile, hai tiꞌara mobunduꞌ. Modiiꞌheꞌ laluraꞌ tauna moliu peundeꞌána laluraꞌ to metitidiꞌi, álána tauna iti rapakanawoꞌ, mole tauna to rapakanawoꞌ iti tiꞌara mani marue mokábáhá bábehiáraꞌ to kadake.

¹⁹Rauliꞌ guru-guru iti, “Ane nipeuláꞌi paturoꞌkiꞌ, ina tekábáhákou hangko i áturá-áturá, hai peisá ntepuꞌukou mobábehi apa peá mouláꞌ peundeꞌámi.” Mole riꞌi, hira haduduáraꞌ to tueꞌheꞌ nodo hawiꞌ, láwiꞌ nakuasaꞌiheꞌ peundeꞌána laluraꞌ to kadake, hai heáná to nakuasaꞌi peundeꞌána laluna to kadake, lempóna, ia napohawiꞌ peundeꞌána laluna iti.[15]

²⁰{Meahiahiꞌ ntepuꞌuheꞌ tauna iti.} Moisámoheꞌ Pueꞌtaꞌ Iesu Kerisitu Topohómpóꞌ Salaꞌ, duuꞌna tekábáhámoheꞌ hangko i bábehiá to kadake i duniáꞌ deꞌe, agáiáná roo onoꞌ mesuleꞌheꞌ huleꞌ i bábehiáraꞌ to kadake. Kahópóꞌána rumihi kamarugiꞌraꞌ hangko i rungu-runguna i tempóraꞌ tiꞌara mani mepoinálái![16]

²¹Rángina miꞌi tiꞌaraheꞌ moisá rárá to toꞌu, haneꞌi moisáheꞌ rárá to toꞌu agáiáná mosápuákaheꞌ hawaꞌna Pueꞌ Ala to rapahaweꞌámoheꞌ iti.

²²Ara laluita to manguliꞌ node: “Ahu mandeꞌ huleꞌ bólána, hai boeꞌ to radói lao mentumbá huleꞌ i regeꞌ.” Hintotoꞌ ntepuꞌu tauna iti rapándiriꞌ hai laluita iti, láwiꞌ mokábáhámoheꞌ bábehiáraꞌ to kadake, agáiáná rabábehi peá huleꞌ.