Read Besoa 1 Iohane 3 Bible Online

1 Iohane 3 - Besoa bible

1 Iohane 3

¹Mahile ntepuꞌu ahiꞌna Pueꞌ Ala Umántaꞌ i kitaꞌ, onoꞌ miꞌi haneꞌi Narekeꞌmokeꞌ ánáꞌNa, hai kitaꞌ toꞌu-toꞌu ánáꞌna mpuꞌukeꞌ Pueꞌ Ala. Tauna to tiꞌara mepoinálái, tiꞌaraheꞌ woꞌo moisá Pueꞌ Ala, onoꞌ miꞌi haneꞌi tiꞌaraheꞌ moisá kakitaꞌna ánáꞌNa.

²Halalu-halalu to kupokaꞌahiꞌ! Deꞌe-deꞌe, ánáꞌnamokeꞌ Pueꞌ Ala. Tiꞌara mani taisá noumbá kamaroꞌana katueꞌtaꞌ i alo to ina haweꞌ, láwiꞌ tiꞌara manikeꞌ rapopaisáꞌá. Agáiáná to taisá ia miꞌi: ane haweꞌi huleꞌ Kerisitu, kitaꞌ ina mewaliꞌkeꞌ nodo Ia,[11] láwiꞌ ina moita mpuꞌukeꞌ noumbá iti Kerisitu i katoꞌu-toꞌuána.

³Hai upu-upu tauna to mehárungá i Kerisitu ina mopakaraoꞌheꞌ upu-upu dósá hangko i wátáraꞌ bona magasaꞌ katueꞌraꞌ nodo kamagasaꞌna Kerisitu.

⁴Upu-upu tauna to mobábehi dósá moliungiheꞌ hawaꞌna Pueꞌ Ala. Iti miꞌi to rauliꞌ dósá.

⁵Hai niꞌisá ntepuꞌu halalu-halalu, tunggáiána Iesu mai i duniáꞌ deꞌe bona mokábáhá tauna hangko i dósá. Hai Ia haduduáNa tiꞌara haweꞌ hangkani madósá.

⁶Mewaliꞌ upu-upu tauna to mohintuwuꞌ hai Ia, tiꞌarapoheꞌ mobábehi oaꞌ dósá. Upu-upu tauna to mobábehi oaꞌ dósá, tiꞌara mpuꞌuheꞌ moita ba moisá Iesu.

⁷Ánáꞌkuꞌ, ineeꞌheꞌ nipatodáhi tauna mopakanawoꞌkou. Tauna to mampeuláꞌi peundeꞌána Pueꞌ Ala, hira to manótó nodo kamanótóna Iesu.

⁸Tauna to mobábehi oaꞌ dósá, nakuasaꞌiheꞌ Datu Tokadake, láwiꞌ Datu Tokadake ia miꞌi to mobábehi dósá hangko i rungu-runguna.[12] Deꞌe miꞌi tunggáiána Ánáꞌna Pueꞌ Ala mai i duniáꞌ, bona mogero bágóꞌna Datu Tokadake.[13]

⁹Upu-upu tauna to napoánáꞌ Pueꞌ Ala, tiꞌarapoheꞌ mobábehi oaꞌ dósá, láwiꞌ pambiárána Pueꞌ Ala ara oaꞌ i laluraꞌ.[14] Tiꞌarapoheꞌ mobábehi dósá, láwiꞌ napoánáꞌmoheꞌ Pueꞌ Ala.

¹⁰Deꞌe miꞌi to mopatongawaꞌ kaheánána to napoánáꞌ Pueꞌ Ala hai kaheánána to napoánáꞌ Datu Tokadake: upu-upu tauna to tiꞌara mobábehi apa to manótó, tiꞌaraheꞌ napoánáꞌ Pueꞌ Ala, hai upu-upu tauna to tiꞌara mampokaꞌahiꞌ halalu hampepepoináláiraꞌ, tiꞌaraheꞌ woꞌo napoánáꞌ Pueꞌ Ala.

¹¹Deꞌe miꞌi bámbári to nihádi hangko i rungu-runguna: hangaa-ngaa mombepokaꞌahiꞌkeꞌ hadua hai hadua.

¹²Ineeꞌkeꞌ mampeuláꞌi bábehiána Kaiꞌ[15] hangkoia. Kaiꞌ iti nakuasaꞌi Datu Tokadake, duuꞌna mopapate ádina. Moapa riꞌi haneꞌi ia mopapate ádina? Láwiꞌ ia biásá miꞌi mobábehi to kadake, agáiáná bábehiána ádina manótó i peitána Pueꞌ Ala.

¹³Mewaliꞌ halalu-halalu, ineeꞌ nipowuli ane tauna to tiꞌara mepoinálái i Iesu mokáhihiꞌkou.

¹⁴Ane tapokaꞌahiꞌ halalu hampepepoináláintaꞌ, taisá katekábáhántaꞌ miꞌi hangko i kapate hai kamolámbiꞌtaꞌ miꞌi katueꞌ to maroꞌa to tiꞌara mokahópóꞌá. Tauna to tiꞌara mampokaꞌahiꞌ halalu hampepepoináláina, tiꞌara mani tekábáhá hangko i kapate.

¹⁵Heáná to tiꞌara mampokaꞌahiꞌ halaluna, ia nodo topepapate. Hai niꞌisá ntepuꞌu halalu-halalu: tiꞌara ara topepapate to molámbiꞌ katueꞌ to maroꞌa to tiꞌara mokahópóꞌá.

¹⁶Deꞌe to mopatongawaꞌákeꞌ apa to rauliꞌ ahiꞌ: Iesu mohuhuꞌ miꞌi katueꞌNa bona kitaꞌ molámbiꞌkeꞌ katehómpóꞌ. Mewaliꞌ, kitaꞌ woꞌo hangaa-ngaa timamakeꞌ mohuhuꞌ katueꞌtaꞌ motulungi halalu hampepepoináláintaꞌ.

¹⁷Rápáꞌna, ane ara hadua tauna to maroꞌa tueꞌna, hai ia moita halaluna to meahiahiꞌ tueꞌna, noumbá ane tauna iti mampokabohiꞌ riꞌi apa to naparaluu halaluna iti? Ane nabábehiꞌi noꞌonoꞌ, lempóna ahiꞌna Pueꞌ Ala tiꞌara ara i tauna iti.

¹⁸Ánáꞌkuꞌ, ineeꞌkeꞌ maꞌahiꞌ i polaluitantaꞌ peá. Kamaꞌahiꞌtaꞌ iti hangaa-ngaa tongawaꞌ moliu bábehiántaꞌ, láwiꞌ iti miꞌi ahiꞌ i katoꞌu-toꞌuána.

¹⁹Ane mampokaꞌahiꞌkeꞌ halaluntaꞌ, manótó taisá kakitaꞌna ánáꞌna Pueꞌ Ala to toꞌu, hai peisá tapatinda laluntaꞌ i lindoꞌna Pueꞌ Ala.

²⁰Ane tiꞌara tinda laluntaꞌ láwiꞌ masalaꞌkeꞌ, tiꞌarakeꞌ paraluu malááꞌ, láwiꞌ Pueꞌ Ala moisá miꞌi upu-upu to mewaliꞌ i lalu katueꞌtaꞌ, hai kamaꞌahiꞌNa i kitaꞌ melumbuꞌ hangko i laluntaꞌ to mosalaꞌi wátántaꞌ haduduántaꞌ.

²¹Mewaliꞌ, halalu-halalu to kupokaꞌahiꞌ, ane tiꞌarakeꞌ nasalaꞌi pekirintaꞌ haduduántaꞌ, pebáiꞌkeꞌ mohungkuki Pueꞌ Ala,

²²hai apa to tapembiáꞌ i Hia, bateꞌna Naweꞌikeꞌ, láwiꞌ mampeuláꞌikeꞌ hawaꞌNa, hai mobábehikeꞌ apa to mopagóeꞌ laluNa.

²³Deꞌe miꞌi hawaꞌNa i kitaꞌ: hangaa-ngaa mepoináláikeꞌ i Iesu Kerisitu ÁnáꞌNa, hai hangaa-ngaa mombepokaꞌahiꞌkeꞌ hadua hai hadua. Iti miꞌi to nahawaꞌámokeꞌ Pueꞌ Iesu.

²⁴Tauna to mampeuláꞌi hawaꞌna Pueꞌ Ala, mohintuwuꞌheꞌ oaꞌ hai Ia, hai Pueꞌ Ala mohintuwuꞌ woꞌo hai hira. Taisá mohintuwuꞌkeꞌ hai Pueꞌ Ala, láwiꞌ Napoweꞌimokeꞌ Inao to Magasaꞌ.